Read Sehwi Lewitikɔso 21 Bible Online

Lewitikɔso 21 - Sehwi bible

Lewitikɔso 21

¹ AWURADE sele Mose kyɛ, “Ka kyire Aarɔn mma mmienzua asɔfo nemɔ kyɛ, Nnɛma ɛmɔ nu biala kɔ ye abusuafoɛ fuin nwo ma ye nwo gua fiɛ,

²sana sona bɔ wawu ne ɔte ye nwoniɛ paa: oni, ɔse, ɔwa bienzua, ɔwa brasua anaa oliɛma bienzua;

³yeɛ oliɛma brasua kaenn bɔ ɔte ababunu bɔ onnwuni biaa le ɔ, ofikyɛ onnya oggyale biaa. Ɔnate oliɛma brasua ne ati, ɔkora gua ye nwo fiɛ.

⁴Nakoso nnɛmaa ɔyɔ huɛ asɛdeɛ ma ye abusuaniɛ biala bɔ ogya biaa ɔ, ná wangua ye bɔbɔ ye nwo fiɛ.

⁵ Nnɛmaa bepiapia bɛ ti nwiaa maa ɔyɛ nguruwa nguruwa, nnɛmaa bepiapia bɛ kanza nwiaa bɛyɛ ye basaa, yeɛ nnɛmaa bɛfa nikyee bɛtete bɛ nwonaen.

⁶Odi kyɛ bɛyɛ krongron bɛma bɛ Nyameɛ, na ɔnzɛ kyɛ begua bɛ Nyameɛ dumaa nwo fiɛ; ofikyɛ afɔleɛ bɔ bɛbɔ ye see so bɛma AWURADE, bɔ ɔte bɛ Nyameɛ aleɛ ne, bɛ yeɛ bɛbɔ ɔ; yiti odi kyɛ bɛyɛ krongron.

⁷Onni kyɛ begya gyanderaniɛ anaa brasua bɔ ebie ne ye ala le ɔ; yeɛ nnɛmaa begya brasua bɔ ohu ayira ye ɔ, ofikyɛ asɔfo mɔ te krongron ma bɛ Nyameɛ.

⁸Odi kyɛ Yisraelniɛ biala nwu asɔfo mɔ kyɛ bɛte krongron, ofikyɛ bɛ yeɛ bɛbɔ aleɛ afɔleɛ bɛma wɔ Nyameɛ ɔ; nwu bɛ kyɛ bɛte krongron, ofikyɛ me AWURADE bɔ mete ɛmɔ nwo ne, nde krongron.

⁹Sɛ ɔsɔfo awa brasua bɔ adwaman fa gua ye bɔbɔ ye nwo fiɛ a, ye de wagua ye baba nwo fiɛ, odi kyɛ bɛyera baa brasua ne.

¹⁰“Ɔsɔfo panyi paa, bɔ ye yeɛ bahwie ɛpopalɛ ngoo bagua ye ti so, ná bate ye nwo kyɛ ówura asɔfo ndaadeɛ ne, onni kyɛ ɔma ye ti nwiaa gua so basaa, yeɛ nnɛmaa osunzua ye ndaadeɛ nu.

¹¹Onni kyɛ ɔkɔ efuin biala nwo, onni kyɛ ogua ye nwo fiɛ, kyɛ ɔse fuin ahɔ oo, anaa oni deɛ ahɔ oo.

¹²Onni kyɛ ofi nekaa krongron berɛ kɔ ɛsɛen bo, na wangua ye Nyameɛ nekaa krongron ne nwo fiɛ; ofikyɛ bafa ye Nyameɛ ɛpopalɛ ngoo bate ye nwo: Me ole AWURADE.

¹³Odi kyɛ brasua bɔ onnwuni biaa le angome yeɛ ɔsɔfo panyi paa ne ogya ye ɔ.

¹⁴Onni kyɛ ogya brasua kunaniɛ, anaa brasua bɔ bayira ye ɔ, anaa brasua bɔ ebie ne ye ala le ɔ, anaa gyanderaniɛ. Ye bɔbɔ ye abusua nu brasua bɔ onnwuni biaa le yeɛ odi kyɛ ogya ye ɔ;

¹⁵amaa ye boso ama nwo angua fiɛ wɔ ye abusua nu; ofikyɛ me ole AWURADE bɔ mete ye nwo ɔ.”

¹⁶Na AWURADE sele Mose kyɛ,

¹⁷“Ka kyire Aarɔn kyɛ, Wɔ bosofoɛ nemɔ, wɔ b’aworɛ ndoatoasoɛ amukoraati nu, nnɛma bɛ nu biala bɔ wali nnɛen ɔba afɔleɛ bokyea ne anwo ɔbafa ye Nyameɛ aleɛ ɔma ye.

¹⁸Ofikyɛ onni kyɛ ebiala bɔ wali nnɛen ba afɔleɛ bokyea ne anwo: kyɛ anyesiniwaaniɛ oo, bubuaniɛ oo, bɔ wali nnɛen wɔ ye nyunu oo anaa sona bɔ watɔ bue oo,

¹⁹bɔ ye gya nu anaa ye sa nu abu oo,

²⁰afu oo, twɛtwerɛbɛdɛ oo, bɔ ɛtɛen asi ye nye so oo, bɔ anwonyerɛ kyeekyee agua ye nwo oo, bɔ ngena atutu ye oo, anaa bɔ ye ndɔma abɔ hɔ oo.

²¹Nnɛma ɔsɔfo Aarɔn bosoniɛ biala bɔ wali nnɛen ba afɔleɛ bokyea ne anwo kyɛ ɔbaabɔ see so afɔleɛ ma AWURADE; wali nnɛen ne ati, onni kyɛ ɔba afɔleɛ bokyea ne anwo kyɛ ɔfa ye Nyameɛ aleɛ ɔbrɛ ye ɔ.

²²Ye Nyameɛ aleɛ ne, bɔ ɔte krongron paa ɔne bɔ ɔte krongron ne, ɔkɔhora koli bie.

²³Nakoso ɔnate kyɛ wali nnɛen ne ati, nnɛmaa opingye mbɛmuɛ tena ne anaakyɛ ɔba afɔleɛ bokyea ne anwo, ná wamva efiɛ wanga nekaa krongron ne, ɔne nu nningyein; ofikyɛ me ole AWURADE bɔ mete bɛ nwo ɔ.”

²⁴Yiti Mose hane sɔ dwirɛ hemɔ hyirele Aarɔn ne ye mma mmienzua mɔ ne Yisrael maen amukoraati.