Read Sehwi Lewitikɔso 22 Bible Online

Lewitikɔso 22 - Sehwi bible

Lewitikɔso 22

¹Na AWURADE sele Mose kyɛ,

²“Ka kyire Aarɔn ne ye mma mmienzua nemɔ kyɛ, Yisraelfoɛ akyɛdeɛ krongron bɔ batu basie berɛ bama me ne, ɔsɛ kyɛ bɛnea ye yé, ná bangua me dumaa krongron ne anwo fiɛ: Me ole AWURADE.

³Se bɛ kyɛ, ‘Akyɛdeɛ krongron bɔ Yisraelfoɛ betu besie berɛ bɛma AWURADE ne, wɔ ɛmɔ aworɛ ndoatoasoɛ nu, sɛ ɛmɔ boso ama biala ba ye nwo wɔ mmerɛ bɔ sɔ sona ne nwo nde a, onni kyɛ bɛma ye ate maa ɔba me nyunu ko: Me ole AWURADE.

⁴Aarɔn bosoniɛ biala bɔ ɔte kwataniɛ, anaakyɛ ye bienzua afiti ne, mmɛɛmaa odi sɔ akyɛdeɛ krongron ne bie kɔpem kyɛ ye nwo kofi ɔ. Sɛ bɛ nu bie nwo ka ɛhemɔ anu biala a, ye nwo kogua fiɛ: nikyee biala bɔ ye nwo kɔha fuin ma ye nwo kogua fiɛ ɔ, bienzua bɔ ye nwo nzue kɔwa ɔ,

⁵ebiala bɔ ye nwo kɔha kaka biala bɔ ɔtwe ye nwo ase maa ye nwo kogua fiɛ ɔ, sona biala bɔ ye nwo agua fiɛ bɔ ɔkɔma ye nwo kogua fiɛ ɔ, ɔmva ye nwo nikye horɛ bɔ wama sona ne nwo agua fiɛ ɔ.

⁶Ɔsɔfo biala bɔ ye nwo kɔha sɔ nningyein nen, ye nwo kogua fiɛ maa okoodwu nɔsoa, na onni kyɛ odi akyɛdeɛ krongron ne bie, sana wafa nzue wabia koraka.

⁷Sɛ eyia kɔtɔ a yeɛ ye nwo kɔte ɔ, na ye si ye ɔkɔhora koli akyɛdeɛ krongron ne bie, ofikyɛ aleɛ ne te ye deɛ.

⁸Naenmvuin anaa naen bɔ kaka aboyaa bie ahu ye atete ye de, nnɛmaa odi ná wamva wangua ye nwo fiɛ: Me ole AWURADE.’

⁹Asɔfo nemɔ beli m’ahyɛdeɛ so, amaa bangua me nekaa krongron ne anwo fiɛ, ná banni fɔ ná banwuwu: Me ole AWURADE bɔ mete bɛ nwo ɔ.

¹⁰“Ebiala bɔ ɔbboka asɔfo abusua kure ne aso ne, nnɛmaa odi akyɛdeɛ krongron ne bie. Ɛwɔfoɛ bɔ waasikye ɔsɔfo, anaa sona biala bɔ ɔsɔfo bie abɔ ye paa ne, ɔnzɛ kyɛ odi akyɛdeɛ krongron ne bie.

¹¹Nakoso sɛ ɔsɔfo bie tɔ kanganiɛ a, ye de kanganiɛ ne ɔkora odi bie, na kanganiɛ ne mma bɔ bɛkɔwo bɛ wɔ ɔsɔfo awuro berɛ ne, bɛ koso bɛkora bedi ɔsɔfo aleɛ ne bie.

¹² Sɛ ɔsɔfo bie awa brasua gya biaa bɔ nna asɔfo abusua kure ne anu yeɛ ofi hɔ a, ye de sɔ braa ne, ɔnzɛ kyɛ odi akyɛdeɛ krongron bɔ bafa babɔ afɔleɛ ne bie.

¹³Nakoso sɛ ɔsɔfo awa brasua bayɛ kunaniɛ, anaa ohu yira ye bɔ olle ba, ná osa batena ye baba awuro kyɛbɔ ye ndaluwa nu ɔtenane berɛ ne a, ye de ɔkora odi ye baba aleɛ ne bie. Sona biala bɔ nna ɔsɔfo abusua kure ne anu yeɛ ofi ne de, ɔnzɛ kyɛ odi bie ɔ.

¹⁴Na sɛ ebie di akyɛdeɛ krongron ne bie, ná ɔnze kyɛ ɔte akyɛdeɛ krongron a, odi kyɛ ɔfa akyɛdeɛ krongron ne bie si ye gya nu pɛpɛɛpɛ; odi kyɛ osa fa nnu nu ngyɛmuɛ ko ɔboka so ná ɔ́fa ma ɔsɔfo ne.

¹⁵Yisraelfoɛ akyɛdeɛ krongron bɔ bɛfa bɛma AWURADE ne, nnɛma ebiala gua ye nwo fiɛ,

¹⁶amaa sɛ bedi b’akyɛdeɛ krongron bɔ ye nwo agua fiɛ ne a, sona bɔ ɔfale afɔleɛ ne wale ne wanni ye nwo fɔ bɔ okohia kyɛ ɔkɔbɔ foɛlilɛ afɔleɛ ɔ; ofikyɛ me ole AWURADE bɔ mete bɛ nwo ne.

¹⁷Na AWURADE sele Mose kyɛ,

¹⁸“Ka kyire Aarɔn ne ye mma mmienzua nemɔ ne Yisraelfoɛ amukoraati kyɛ, ‘Sɛ ebiala bɔ ofi Yisrael awuro anaa ɛwɔfoɛ mɔ bɔ baatena Yisrael maen nu ɔfa afɔleɛ brɛ AWURADE a, kyɛ aboadeɛ yeɛ otua oo, anaakyɛ akyɛdeɛ afɔleɛ bɔ ɔfa bɔ naen yeralɛ afɔleɛ oo,

¹⁹kyɛ ɔfa fi nandwie kure, mmoaen kure anaa mbɔngye kure nu oo, ɔsɛ kyɛ ɔyɛ nyii bɔ ollili nnɛen biala ɔ, koraka ne wasɔ Nyameɛ nye.

²⁰Nnɛma ɛmɔfa kaka biala bɔ wali nnɛen bɛbɔ afɔleɛ bɛma AWURADE, ofikyɛ ɔngɔsɔ Nyameɛ nye.

²¹Sɛ ebie bɔ asomdwee afɔleɛ ma AWURADE a, kyɛ aboadeɛ yeɛ otua oo, anaa ɔte akyɛdeɛ afɔleɛ oo, kyɛ ofi nandwie kure nu anaa mmoaen kure nu oo, odi kyɛ odi mu koraka né wasɔ Nyameɛ nye; onni kyɛ ɔyɛ bɔ wali nnɛen biala ɔ.

²²Kaka biala bɔ ye nye asi, anaa wabubu, anaa wali nnɛen, anaa ye nwo ayɛ ngena ngena, anaa ye nwo atutu, anaa bɔ ngaka wɔ ye nwo ne, nnɛma ɛmɔfa bɛbɔ afɔleɛ bɛma AWURADE, yeɛ nnɛma ɛmɔfa bɛ begua afɔleɛ bokyea ne aso bɛbɔ afɔleɛ bɛma AWURADE.

²³Nandwie biala anaa boaen biala bɔ ye nekaa bie ayɛ tendenn anaa tika watra ko ne, ɛkɔhora kɔfa kɔbɔ akyɛdeɛ afɔleɛ, nakoso ɛfa yɛ aboadeɛ de a, Nyameɛ nye ngɔsɔ.

²⁴Kaka biala bɔ ye ndɔma nwo apuro, anaa wabɔ, anaa watiti, anaa ye nwo aha ne, onni kyɛ ɛmɔfa bɛbɔ afɔleɛ bɛma AWURADE ɔ; nnɛma ɛmɔyɔ sɔ wɔ ɛmɔ aseɛ ne aso,

²⁵yeɛ nnɛma ɛmɔde sɔ ngaka nemɔ bie befi ɛwɔfoɛ bie berɛ bɛfa bɛbɔ afɔleɛ bɛma ɛmɔ Nyameɛ. Ɔnate kyɛ ngekalewa wɔ bɛ nwo ná bali nnɛen ne ati, Nyameɛ nye ngɔsɔ.

²⁶Na AWURADE sele Mose kyɛ,

²⁷“Sɛ bɛwo nandwie anaa boaen anaa abɔngye a, ɔkɔtena oni anwo ɛlɛsoo. Ofi ye ɛlɛbɔtwɛ ne aso ne, sɛ bɛyera ye bɛfa bɛbɔ afɔleɛ bɛma AWURADE a, ye nye kɔsɔ.

²⁸Sɛ nandwie oo, sɛ boaen oo, nnɛma ɛmɔku kaka oni ne ɔwa ɛlɛho.

²⁹Sɛ ɛmɔbɔ asennaa afɔleɛ bɛma AWURADE a, ɛ́mɔbɔ ye kyɛbɔ ɔkɔsɔ Nyameɛ nye ɔ.

³⁰Odi kyɛ bedi afɔleɛ ne ɛlɛho ne ala; nnɛma ɛmɔyakyi bie ma aleɛ kye so: Me ole AWURADE.

³¹“Sɔ yeɛ odi kyɛ ɛmɔdi me mmeraa dwirɛ so ná ɛmɔfa bɛbɔ bɛ bra ɔ: Me ole AWURADE.

³²Nnɛma ɛmɔgua me dumaa krongron ne anwo fiɛ, amaa ɔnate so babu me krongron wɔ Yisraelfoɛ nu: Me ole AWURADE bɔ mete ɛmɔ nwo ɔ.

³³Me ole AWURADE bɔ nyele ɛmɔ mvili Misraim aseɛ so mmale ne, bɔ me yeɛ nde ɛmɔ Nyameɛ ɔ: Me ole AWURADE.”