Read Sehwi Lewitikɔso 23 Bible Online

Lewitikɔso 23 - Sehwi bible

Lewitikɔso 23

¹ AWURADE sele Mose kyɛ,

²“Ka kyire Yisraelfoɛ kyɛ, Ɛhemɔ ole aluolue ahoroɔ bɔ AWURADE atu asie berɛ ɔ, na ɛ́mɔfa bɛ́to dwaa kyɛ bɛte nyianu krongron; m’aluolue nemɔ mmerɛ ɛne.

³Elesia yeɛ ɔsɛ kyɛ ɛmɔfa bɛ́yɔ adwuma ɔ, nakoso kyẽa bɔ ɔtɔ so nzoo ne de, ɔte nwomelelɛ kyẽa bɔkɔɔ. Ɔte nyianu krongron, ná onni kyɛ ɛmɔyɔ adwuma biala; ɔte afofikyẽa ma AWURADE wɔ nekaa biala bɔ ɛmɔkɔtena ɔ.

⁴“Ɛhemɔ ole aluolue ahoroɔ bɔ AWURADE atu asie berɛ, nyianu krongron bɔ odi kyɛ ɛmɔdi so mmerɛ bɔ mahyehyɛ mato berɛ ne ɔ.

⁵ Bosome bɔ oli moa ne, ye kyẽa bɔ ɔtɔ so buru ne nna ne, ye nɔsoa, odi kyɛ ɛmɔbɔ Abɔtra afɔleɛ bɛma AWURADE.

⁶Sɔ bosome ne ala, ye kyẽa bɔ ɔtɔ so buru ne nnu ne, ɔte Paanoo Kabrɛdi aluolue ma AWURADE; odi kyɛ ɛmɔdi paanoo kabrɛdi ɛlɛsoo.

⁷Kyẽa bɔ oli moa ne, odi kyɛ ɛmɔyɛ nyianu krongron; nnɛma ɛmɔyɔ adwuma biala.

⁸Odi kyɛ ɛmɔbɔ see so afɔleɛ bɛma AWURADE ɛlɛsoo; na kyẽa bɔ ɔtɔ so nzoo ne, ɛ́mɔyɛ nyianu krongron; nnɛma ɛmɔyɔ adwuma biala.

⁹Na AWURADE sele Mose kyɛ,

¹⁰“Ka kyire Yisraelfoɛ kyɛ, Sɛ ɛmɔbadwu aseɛ bɔ méfa méma ɛmɔ ne aso, ná ɛmɔfa so aleɛ a, ɛ́mɔfa ɛmɔ aleɛ bɔ oli moa ne taperɛ ko bɛbrɛ ɔsɔfo.

¹¹Odi kyɛ ɔsɔfo ne nwaha taperɛ ne wɔ AWURADE nyunu, amaa ɔnate so AWURADE ale ɛmɔ ato nu. Sɛ afofikyẽa ne pɛ nu a, kyẽa bɔ ɔtoa so ne yeɛ odi kyɛ ɔsɔfo ne nwaha taperɛ ne ɔ.

¹²Kyẽa bɔ ɛmɔkɔnwaha aleɛ taperɛ ne, odi kyɛ ɛmɔfa boaen bɔ wali afoɛ ko, bɔ ollili nnɛen biala ɔ, bɛbɔ naen yeralɛ afɔleɛ bɛma AWURADE.

¹³Na aburoo afɔleɛ bɔ ɔboka so ne, odi kyɛ bɛfa esam paa bɔ bafa ngoo bafra ye ɔ olonka nyɔ; ɔte afɔleɛ bɔ bɛbɔ bɛma see so bɛma AWURADE ná ɔbo ye fona ɔ. Anonneɛ afɔleɛ bɔ ɔboka so ne, odi kyɛ bɛfa bobe nzaa towaa ko ne bue.

¹⁴Nnɛma ɛmɔdi aburoo monɛ ne bie, kyɛ bafa bayɛ paanoo oo, kyɛ bahye oo, anaakyɛ ye monɛ oo, kɔpem kyẽa bɔ ɛmɔkɔfa ɛmɔ Nyameɛ afɔleɛ bɛkɔbrɛ ye ɔ. Ɔte ahyɛdeɛ afebɔɔ ma ɛmɔ wɔ ɛmɔ aworɛ ndoatoasoɛ amukoraati nu, wɔ nekaa biala bɔ ɛmɔkɔtena ɔ.

¹⁵“Kyẽa bɔ ɔtoa afofikyẽa ne aso, bɔ yeɛ odi kyɛ ɛmɔfa aleɛ taperɛ ɛnwahanɛ afɔleɛ bɛba ne, ɛ́mɔhyɛ ye bo bɛha dapɛn nzoo pɛpɛɛpɛ.

¹⁶Ɛ́mɔha maa oodwu kyẽa bɔ oli afofikyẽa bɔ ɔtɔ so nzoo ne asi ne, bɔ ɔte aburannu ne, koraka né ɛmɔafa aburoo monɛ afɔleɛ babrɛ AWURADE.

¹⁷Odi kyɛ ɛmɔfa paanoo mumua nyɔ befi ɛmɔ atenaleɛ nemɔ anu bɛbabɔ ɛnwahanɛ afɔleɛ maa ɔyɛ aleɛ bɔ bali moa bate afɔleɛ ma AWURADE. Odi kyɛ paanoo ko biala bɛfa esam paa bɔ bafa mɔle harewaa bafra ɔ olonka nyɔ yeɛ bɛto ɔ.

¹⁸Odi kyɛ ɛmɔfa ɛhemɔ bɛboka paanoo ne aso: mmoaen nzoo bɔ bali afoɛ ngoko bɔ bellili nnɛen ɔ, nandwie nyii akrɔngrɔma ko, ɔne mmoaen nyii nyɔ; odi kyɛ bɛfa bɛbɔ naen yeralɛ afɔleɛ bɛma AWURADE. Aburoo afɔleɛ ne anonneɛ afɔleɛ ne koso boka so, na ɔte afɔleɛ bɔ bɛbɔ ye see so bɛma AWURADE ná ɔbo ye fona ɔ.

¹⁹Afei koso, ɛ́mɔfa abɔngye nyii ko bɛ́bɔ bɔne nwo afɔleɛ, ná ɛ́mɔfa mmoaen nyii nyɔ bɔ bali afoɛ ngoko bɛbɔ asomdwee afɔleɛ.

²⁰Ngaka nemɔ, ɔne paanoo bɔ bafa aleɛ bɔ bali moa bate yeɛ bato ne, odi kyɛ ɔsɔfo ne pagya bɛ fa bɔ ɛnwahanɛ afɔleɛ wɔ AWURADE nyunu, mmoaen nyɔ ne boka so. Bɛte krongron ma AWURADE, na bɛkɔyɛ ɔsɔfo ne deɛ.

²¹Sɔ kyẽa ne ala, odi kyɛ ɛmɔyia nu; ɔte nyianu krongron. Nnɛma ɛmɔyɔ adwuma biala. Ɛhe te ahyɛdeɛ afebɔɔ ma ɛmɔ wɔ ɛmɔ aworɛ ndoatoasoɛ amukoraati nu, wɔ nekaa biala bɔ ɛmɔkɔtena ɔ.

²² “Sɛ ɛmɔfa ɛmɔ fieso aleɛ a, nnɛbu maa okodwu fie ne noa, yeɛ nnɛsesa ye bo nwɔngyerɛmma ne; yakyi ɛhene mɔ ma ehiafoɛ ne ɛwɔfoɛ mɔ: Me ole AWURADE ɛmɔ Nyameɛ.”

²³Na AWURADE sele Mose kyɛ,

²⁴“Ka kyire Yisraelfoɛ kyɛ, Bosome bɔ ɔtɔ so nzoo ne, ye kyẽa bɔ oli moa ne, ɛ́mɔma ɔ́yɛ afofikyẽa bɔkɔɔ ma ɛmɔ; ɛ́mɔfa totorobɛndohulɛ béyia nyianu krongron.

²⁵Nnɛma ɛmɔyɔ adwuma biala, na ɛmɔbɔ see so afɔleɛ bɛma AWURADE.”

²⁶Na AWURADE sele Mose kyɛ,

²⁷“Sɔ bosome nzoo ne ala, ye kyẽa bɔ ɔtɔ so buru ne, ɔte mbata kyẽa; ɛ́mɔyɛ nyianu krongron. Odi kyɛ ɛmɔkye ɛhɔen ná ɛ́mɔbɔ see so afɔleɛ bɛma AWURADE.

²⁸Nnɛma ɛmɔyɔ adwuma biala sɔ kyẽa ne amukoraa, ofikyɛ ɔte mbata kyẽa bɔ yeɛ bɛpata bɛma ɛmɔ wɔ AWURADE ɛmɔ Nyameɛ nyunu ɔ.

²⁹Ebiala bɔ wangye hɔen sɔ kyẽa ne amukoraa ne, odi kyɛ bɛpɛ ye asue befi maen ne anu.

³⁰Na ebiala bɔ ɔkɔyɔ adwuma biala sɔ kyẽa nen, sɔ sona ne, ngohũ ye ngofi maen ne anu.

³¹Nnɛma ɛmɔyɔ adwuma biala: ɔte ahyɛdeɛ afebɔɔ ma ɛmɔ wɔ ɛmɔ aworɛ ndoatoasoɛ amukoraati nu, wɔ nekaa biala bɔ ɛmɔkɔtena ɔ.

³²Ɔkɔyɛ nwomelelɛ kyẽa bɔkɔɔ kɔma ɛmɔ, na odi kyɛ ɛmɔkye ɛhɔen fi bosome ne, ye ɛlɛhona ne nɔsoa; ɔsɛ kyɛ ɛmɔdi afofikyẽa ne aso fi nɔsoa kodwu nɔsoa.”

³³Na AWURADE sele Mose kyɛ,

³⁴“Ka kyire Yisraelfoɛ kyɛ, Bosome nzoo ne, ye kyẽa bɔ ɔtɔ so buru ne nnu ne, odi kyɛ bedi Asese aluolue ɛlɛsoo bɛma AWURADE.

³⁵Kyẽa bɔ oli moa ne, odi kyɛ ɛmɔyɛ nyianu krongron; nnɛma ɛmɔyɔ adwuma biala.

³⁶Ɛlɛsoo yeɛ ɛ́mɔbɔ see so afɔleɛ bɛ́ma AWURADE ɔ; na ye ɛlɛbɔtwɛ ne aso, ɛ́mɔyɛ nyianu krongron ná ɛ́mɔbɔ see so afɔleɛ bɛma AWURADE; ɔte nyianu krongron; nnɛma ɛmɔyɔ adwuma biala.

³⁷“Ɛhemɔ ole AWURADE aluolue ahoroɔ bɔ odi kyɛ ɛmɔyɛ nyianu krongron bedi ɔ. Na kyɛbɔ kyẽa bɔ watu wasie berɛ wama aluolue biala te nen, ɛ́mɔbɔ see so afɔleɛ bɛ́ma AWURADE: naen yeralɛ afɔleɛ, aburoo afɔleɛ, ngaka afɔleɛ ne anonneɛ afɔleɛ.

³⁸AWURADE afofingyẽa nemɔ koso, odi kyɛ ɛmɔdi so, ná ɛ́mɔfa ɛmɔ ayɛyɛdeɛ, ɛmɔ aboadeɛ afɔleɛ amukoraa, ɔne ɛmɔ akyɛdeɛ afɔleɛ amukoraa bɔ ɛmɔfa bɛbrɛ AWURADE ne bɛboka so.

³⁹“Afei, bosome nzoo ne, ye kyẽa bɔ ɔtɔ so buru ne nnu ne, mmerɛ bɔ ɛmɔafa aseɛ ne aso aleɛ bayie ne, ɛ́mɔli AWURADE aluolue ne ɛlɛsoo. Kyẽa bɔ oli moa ne, ɔne ɛlɛbɔtwɛ ne, ɛ́mɔli afofi bele bɛ nwome bɔkɔɔ.

⁴⁰Kyẽa bɔ oli moa ne, ɛ́mɔfa mmakaa paa bɛ mma, ɛberɛ, bakaa kusuu mmaen frɔmfrɔm, ɔne asuenoa mmakaa; ná ɛ́mɔli ahurusi AWURADE ɛmɔ Nyameɛ nyunu ɛlɛsoo.

⁴¹Afoɛ biala, ɛ́mɔli sɔ aluolue ne ɛlɛsoo bɛ́ma AWURADE; ɛ́mɔli ye bosome bɔ ɔtɔ so nzoo ne anu, na ɛ́mɔma ɔyɛ ahyɛdeɛ ma ɛmɔ aworɛ ndoatoasoɛ amukoraa nu.

⁴²Odi kyɛ ɛmɔtena asese nu ɛlɛsoo; ebiala bɔ ɔte Yisraelniɛ ne kɔtena asese nu,

⁴³amaa ɛmɔ aworɛ ndoatoasoɛ anwu kyɛ mmane Yisrael ama tenane asese nu mmerɛ bɔ nyele bɛ mvili Misraim aseɛ so ne: Me ole AWURADE ɛmɔ Nyameɛ.

⁴⁴Yiti Mose fale AWURADE aluolue ahoroɔ bɔ AWURADE ahyehyɛ ne tole Yisraelfoɛ nyunu.