Read Sehwi Lewitikɔso 24 Bible Online

Lewitikɔso 24 - Sehwi bible

Lewitikɔso 24

¹ AWURADE sele Mose kyɛ,

²“Hyɛ Yisraelfoɛ kyɛ bɛ́fa olive ngoo bɔ bahwi ye gyengɔgyengɔ ɔ bɛbrɛ wɔ, maa ɛfa gua kanea ne anu, ná kanea ne ahɔ so agye daa.

³Odi kyɛ Aarɔn fa kanea ne sie ɛtena sua atenaleɛ ne anu wɔ Adanzeɛ mbɛmuɛ tena ne asi, maa ɔta fi nɔsoa kodwu ngyerɛmɔ wɔ AWURADE nyunu daa. Ɔkɔyɛ ahyɛdeɛ afebɔɔ kɔma ɛmɔ wɔ aworɛ ndoatoasoɛ mukoraa nu.

⁴Odi kyɛ ɔfa kanea nemɔ siesie sikaa kɔkorɛ paa kanea bakaa so wɔ AWURADE nyunu daa.

⁵ “Odi kyɛ ɛfa esam paa, ná ɛfa to paanoo buru ne nyɔ. Fa esam ne olonka nyɔ to paanoo ko biala.

⁶Hyehyɛ bɛ folii nyɔ wɔ sikaa kɔkorɛ paa poen ne aso; ma folii ko biala ɔyɛ paanoo nzia.

⁷Fa ɛyɛɛ paa gua folii biala so, maa ɔ́yɛ ngayeɛ nikye bɔ ɔboka paanoo ne aso ɔ, ná ɔ́yɛ afɔleɛ bɔ bɛbɔ ye see so bɛma AWURADE ɔ.

⁸Afofikyẽa biala, odi kyɛ Aarɔn gyina Yisraelfoɛ gya nu, ná ɔ́hyehyɛ paanoo ne wɔ AWURADE nyunu daa, amaa wayɛ apam afebɔɔ.

⁹Paanoo nemɔ kɔyɛ Aarɔn ne ye boso ama deɛ, na odi kyɛ bedi ye wɔ nekaa bɔ ɔte krongron ɔ. Ofikyɛ afɔleɛ bɔ bɛbɔ ye see so bɛma AWURADE ne, Aarɔn bue deɛ bɔ ɔte krongron paa ma ye ɛne, na ɔte bɛ deɛ afebɔɔ.”

¹⁰Biaa bie bɔ oni te Yisraelniɛ ná ɔse te Misraimniɛ fili ye ɛtena sua nu fitele. Sɔ biaa bɔ oni yeɛ ɔte Yisraelniɛ ne, ɔne biaa bie bɔ oni ne ɔse amunyɔ bɛte Yisraelfoɛ nyane edwudwolɛ wɔ asikyeleɛ ne anu.

¹¹Biaa bɔ oni yeɛ ɔte Yisraelniɛ ne, ɔbɔle Dumaa bɔ bɛmmɔ ne ɔfa nomale, na ɔkekane musue dwirɛ tiale ye dumaa. Bɛfale ye bɛwale Mose nyunu. Oni dumaa ole Selomite, bɔ oni ole Dibri bɔ ofi Dan abusua kure nu ne.

¹²Bɛfale ye bɛtole kuku nu maa odwuli kyɛ bɛtele bɔ AWURADE le ye ka wɔ edwirɛ ne anwo ɔ.

¹³AWURADE sele Mose kyɛ,

¹⁴“Fa biaa bɔ wabɔ musue ne kɔ asikyeleɛ ne asi dɔ; ná ma mmenia bɔ bɛtele edwirɛ ne bɛ so anu ne amukoraa, bɛ́fa bɛ sa bégua ye ti so, ná ma maen ne amu bɛ́boro ye nyɔboɛ béhu ye.

¹⁵Na ka kyire Yisraelfoɛ kyɛ, Ebiala bɔ ɔkɔnoma Nyameɛ ne, ye bɔne kɔbɔ ye bɔbɔ ye ti so.

¹⁶Ebiala bɔ ɔkɔha musue dwirɛ kotia AWURADE dumaa ne, odi kyɛ beku ye ɔ; sona bɔ ɔkɔha musue dwirɛ ne, odi kyɛ maen ne amukoraa bɛboro ye nyɔboɛ beku ye. Ɛwɔfoɛ oo, kuromani oo, sɛ bɛ nu biala ka musue dwirɛ tia Nyameɛ Dumaa a, odi kyɛ beku ye ɔ.

¹⁷Ebiala bɔ okoli awue ne, odi kyɛ beku ye bie.

¹⁸Ebiala bɔ okohu ebie kaka ne, odi kyɛ ɔfa bie si ye gya nu, ngoa yeɛ bɛ́fa bési ngoa gya nu ɔ.

¹⁹ Ebiala bɔ okoli obiɛngo nnɛen ne, odi kyɛ ye koso bedi ye sɔ nnɛen ne bie ala betua kerɛ:

²⁰Sɛ ebu ebie bowue nu a, bekobu wɔ deɛ nu bekotua kerɛ; bɔ ɛkɔfa kɔyɛ ebie nye ne, sɔ ala yeɛ bɛkɔyɛ wɔ bie bekotua kerɛ ɔ; bɔ ɛkɔfa kɔyɛ ebie gye ne, sɔ ala yeɛ bɛkɔyɛ wɔ bie bekotua kerɛ ɔ; sɛ epura ebie a, sɔ ala yeɛ odi kyɛ bepura wɔ bie betua kerɛ ɔ.

²¹Ebiala bɔ okohu ebie kaka ne, odi kyɛ ɔfa bie si ye gya nu; nakoso ebiala bɔ okohu sona ne de, odi kyɛ beku ye ɔ.

²² Mmeraa bɔ bɛfa bedi kuromani ne, ye ala yeɛ ɔsɛ kyɛ bɛfa bedi ɛwɔfoɛ koso ɔ: ofikyɛ Me ole AWURADE ɛmɔ Nyameɛ.”

²³Yiti sɔ ala yeɛ Mose sele Yisraelfoɛ ɔ. Bɛfale sona bɔ wakekã musue dwirɛ ne bɛhɔle asikyeleɛ ne asi dɔ, na bɛborole ye nyɔboɛ behuni ye. Yisraelfoɛ yɔle kyɛbɔ AWURADE hyɛle Mose ne ala.