Read Sehwi Lewitikɔso 25 Bible Online

Lewitikɔso 25 - Sehwi bible

Lewitikɔso 25

¹Na AWURADE sele Mose wɔ Sinai bokaa ne aso kyɛ,

² “Ka kyire Yisraelfoɛ kyɛ, ‘Sɛ ɛmɔdwu aseɛ bɔ méfa méma ɛmɔ ne aso a, afoɛ nzoo biala, odi kyɛ ɛmɔma aseɛ ne da berɛ de ye nwome ma AWURADE.

³Afoɛ nzia yeɛ fa yɔ wɔ boo nu adwuma ɔ. Wɔ bobe mmakaa ne, sɔ afoɛ nzia ne ala yeɛ fa pepɛ bɔ wafifi ye nwo ne, ná fa te ye mma ne ɔ.

⁴Nakoso afoɛ bɔ ɔtɔ so nzoo ne de, odi kyɛ ɔyɛ afofi afoɛ bɔ aseɛ ne de ye nwome bɔkɔɔ ma AWURADE ɔ. Nnɛdua hwee wɔ wɔ fieso yeɛ nnɛpepɛ bɔ wafefɛ wɔ bobe mmakaa nwo ne.

⁵Sɛ ɛfa wɔ fieso aleɛ ne yie a, aleɛ bɔ okofifi ye si ne, nnɛfa; yeɛ wɔ bobe mmakaa bɔ ambepɛ bɔ wafifi ye nwo ne, nnɛtete ye mma: ma aseɛ ne ole ye nwome bɔkɔɔ sɔ afoɛ ne.

⁶Aleɛ bɔ okosu wɔ aseɛ ne aso wɔ ye afofi afoɛ ne anu ne, ɔkɔyɛ ɛmɔ aleɛ: ɛne wɔ ngoaa ne w’afaneɛ mɔ, w’apaafoɛ ɔne ɛwɔfoɛ bɔ baatena wɔ berɛ ɔ;

⁷wɔ nyɛmmoa koso, ɔne eburo ngaka bɔ bɛwɔ w’aseɛ ne aso ne, sɔ aleɛ ne amukoraa kɔyɛ b’aleɛ.

⁸“Ka afofi afoɛ nzoo,[6] afoɛ nzoo ahoroɔ nzoo, na afofi afoɛ ahoroɔ nzoo ne kɔyɛ afoɛ aburanna ne ngona.

⁹Na bosome bɔ ɔtɔ so nzoo ne, eleburu ne aso bɔ yeɛ ɔte mbata kyẽa ne, maa behu totorobɛndo serɛserɛ; maa behũ ye wɔ ɛmɔ maen ne anu amukoraa.

¹⁰Ɛ́mɔma afoɛ bɔ ɔtɔ so aburannu ne ɔyɛ krongron, ná ɛ́mɔbɔ fawɔnwodi nwo dawure behyire aseɛ ne aso ama mukoraa wɔ maen ne amukoraati nu. Ɔte Yubilee afoɛ ma ɛmɔ, na ɛmɔ nu biala, odi kyɛ ye sa osa ka ye aseɛ bɔ wafi ye sa ɔ, ná sona biala bɔ ɔwɔ ngoaasolɛ nu ne, osa kɔ ye abusua nu.

¹¹Ɛ́mɔma afoɛ aburannu ne ɔyɛ Yubilee ɔma ɛmɔ. Nnɛma ɛmɔdua hwee; sɛ ɛmɔfa ɛmɔ fieso aleɛ a, aleɛ bɔ okofifi ye si ne, nnɛma ɛmɔbu, yeɛ bobe mmakaa bɔ ambepɛ bɔ wafifi bɛ nwo ne, nnɛma ɛmɔtete bɛ mma.

¹²Ofikyɛ ɔte Yubilee afoɛ; na odi kyɛ ɔyɛ krongron ma ɛmɔ: ɛ́mɔli aleɛ bɔ ye bɔbɔ okofifi wɔ aseɛ ne aso angome.

¹³“Sɔ Yubilee afoɛ ye, odi kyɛ ɛmɔ nu biala ye sa osa ka ye aseɛ bɔ wafi ye sa ɔ.

¹⁴Kyɛ ɛtɔne nikyee ma ebiɛngo oo, anaakyɛ ɛtɔ nikyee fi ye berɛ oo, nnɛma ɛmɔdi bɛ nwo aminɛ.

¹⁵Sɛ ɛtɔ nikyee fi ebiɛngo berɛ a, afoɛ bɔ waha kora ne Yubilee ne aso ne yeɛ okohyire ye nyɔboɛ ɔ; bɔ ɔtɔne ye ne koso, afoɛ somaa bɔ ɛkɔfa kɔyɛ so adwuma ne yeɛ odi kyɛ ogyina so pɛ ye nyɔboɛ ɔ.

¹⁶Sɛ afoɛ bɔ waha ne sone a, to ye nyɔboɛ ne anu, nakoso sɛ afoɛ bɔ waha ne anzo a, te ye nyɔboɛ ne aso; ofikyɛ afoɛnoa afoɛnoa aleɛ bɔ ekonya ye ne yeɛ ɔtɔne ye ma wɔ ɔ.

¹⁷Nnɛma ɛmɔ nu biala sisi obiɛngo, na mmom suro wɔ Nyameɛ; ofikyɛ me ole AWURADE ɛmɔ Nyameɛ.

¹⁸“Ɛ́mɔli m’ahyɛdeɛ so ná ɛ́mɔyɛ sotie bɛ́ma me nhyehyɛleɛ nahorɛ nu, amaa ɛmɔatena aseɛ ne aso asomdwee nu.

¹⁹Aseɛ ne kɔhye aleɛ, na ɛmɔkoli ma ɛmɔ ko koyi, ná ɛmɔatena aseɛ ne aso asomdwee nu.

²⁰Ebiaa né ɛmɔabisa kyɛ, ‘Sɛ yɛngolua hwee anaakyɛ yɛngɔfa yɛ boo nu noa de a, né nzaade nzikyɛ yeɛ yɛkoli ye afoɛ bɔ ɔtɔ so nzoo ne anu ɔ?’

²¹Ngɔma me saleɛ kohwie kogua ɛmɔ so wɔ afoɛ bɔ ɔtɔ so nzia ne anu, ná aseɛ ne kɔma ɛmɔ afoɛ nza aleɛ.

²²Sɛ ɛmɔdua nningyein afoɛ mmɔtwɛ ne anu a, ɛmɔkɔhɔ so bekoli aleɛ daa ne; ɛmɔkɔhɔ so bekoli aleɛ daa ne maa okoodwu afoɛ ngona ne bɔ afoɛ mmɔtwɛ ne anu aleɛ koti ɔ.

²³Onni kyɛ bɛte aseɛ ne terama, ofikyɛ aseɛ ne te me deɛ, na me nyunu de, ɛmɔte ɛwɔfoɛ ne hwɛsofoɛ.

²⁴Aseɛ biala bɔ ɔwɔ ɛmɔ sa nu ne, ɛ́mɔma ye nwo ate ma bɛpɔ ye.

²⁵“Sɛ ebiɛngo nwo kyere ye, ná ɔtɔne ye agyapadeɛ bie ma wɔ a, odi kyɛ ye nwoniɛ kaenn ɔbapɔ bɔ ye abusuaniɛ ne atɔne ye ne.

²⁶Sɛ sona ne olle ebiala bɔ ɔkɔpɔ agyapadeɛ ne, nakoso nziɛ ye ye bɔbɔ ɔbayɛ yee, ná onya sikaa bɔ ɔkɔhora kɔpɔ agyapadeɛ ne a,

²⁷odi kyɛ bɛnea afoɛ somaa bɔ watɔne agyapadeɛ ne maa wali ye berɛ ɔ, ná bɛsesẽ afoɛ bɔ waha ne nwo sikaa betua bɛma sona bɔ ɔtɔle agyapadeɛ ne, ná agyapadeɛ ne osa ooli ye mene ne sa nu.

²⁸Nakoso sɛ olle sikaa bɔ ɔkɔso agyapadeɛ ne pɔ a, agyapadeɛ bɔ watɔne ye ne kɔha sona bɔ watɔ ne berɛ maa okoodwu Yubilee afoɛ ne; sɛ Yubilee afoɛ ne so a, odi kyɛ ɔfa ye mene ne nikyee ma ye, ná agyapadeɛ ne sa bayɛ ye mene deɛ.

²⁹“Sɛ ebie tɔne awuro, wɔ kuro bɔ bato ye nwo fasue nu, ná onnya ɔbbole afoɛ ko a, sona ne kɔhora kɔpɔ ye; ole ye nwo ate alaa maa okodwu afoɛ ko kyɛ ɔkora pɔ ye ɔ.

³⁰Sɛ wambɔ ye ná afoɛ ko pɛ nu a, ye de awuro bɔ ɔwɔ kuro bɔ bato ye nwo fasue nu ne kɔyɛ bɔ ɔtɔle ne deɛ afebɔɔ wɔ ye aworɛ ndoatoasoɛ nu; onni kyɛ bɔ ɔtɔle ne kakyi ma ye mene Yubilee afoɛ ne anu.

³¹Nakoso awuro mɔ bɔ bɛwɔ nguraa mɔ bɔ fasue ɔnne bɛ nwo nu ne de, odi kyɛ bebu bɛ kyɛ bɛte namue; bɛkɔhora bɛkɔpɔ bɛ, na odi kyɛ besa bɛkakyi bɛma bɛ mene mɔ Yubilee afoɛ ne anu.

³²Na Lewifoɛ nguro nemɔ de, Lewifoɛ le ye nwo ate afebɔɔ kyɛ bɛpɔ bɛ nguro nemɔ anu awuro mɔ ɔ.

³³Sɛ Lewiniɛ bie wambɔ ye awuro bɔ batɔne ye wɔ bɛ nguro ne bie aso a, ye de odi kyɛ besa bɛkakyi awuro ne bɛma ye mene wɔ Yubilee afoɛ ne anu; ofikyɛ awuro mɔ bɔ bɛwɔ Lewifoɛ nguro nemɔ anu ne, bɛte Lewifoɛ mɔ agyapadeɛ wɔ Yisraelfoɛ nu.

³⁴Nakoso aseɛ bɔ wapɛ Lewifoɛ nguro nemɔ anwo wayia ne de, onni kyɛ bɛtɔne ye; ofikyɛ ɔte Lewifoɛ mɔ agyapadeɛ afebɔɔ.

³⁵ “Sɛ wɔ nwoniɛ bie kɔ anwokyere nu, ná ɔfa ye anwokyere ne bato wɔ so a, odi kyɛ ɛboka ye ɔ; maa ɔne wɔ bɛtena kyɛ ɛwɔfoɛ anaa bataniɛ bɔ waasikye wɔ ɔ.

³⁶ Nnɛde ye dɔ nzihoɛ, yeɛ nnɛdidi ye nwo, na mmom suro wɔ Nyameɛ, ná ma eliɛma ne ɔne wɔ bɛtena.

³⁷Sɛ ɛbɔ ye bosea a, nnɛde ye dɔ nzihoɛ, yeɛ w’aleɛ bɔ ɛfa ma ye ne, nnɛhuru ye nyɔboɛ.

³⁸Me ole AWURADE ɛmɔ Nyameɛ bɔ nyele ɛmɔ mvili Misraim aseɛ so kyɛ mefa Kanaan aseɛ mema ɛmɔ ɔ, na me yeɛ nde ɛmɔ Nyameɛ ɔ.

³⁹ “Sɛ ohia ebiɛngo Yisraelniɛ bie alaa maa ɔyɛ ye nwo atɔen ma wɔ a, nnɛfa ye yɛ kanganiɛ.

⁴⁰Maa ɔne wɔ bɛtena kyɛ paaniɛ anaa bataniɛ, ná ɔso wɔ maa oodwu kyɛ Yubilee afoɛ ne kodwu ɔ.

⁴¹Na ɛhe asi ye, ɔne ye mma mɔ bekofi wɔ bo, bekosa bɛkɔhɔ b’abusua nu ná basa baafa bɛ nana mɔ agyapadeɛ.

⁴²Ofikyɛ bɛte me ngoaa bɔ nyele bɛ mvili Misraim aseɛ so ɔ; onni kyɛ bɛtɔne bɛ kyɛbɔ bɛtɔne nganga ɔ.

⁴³Nnɛhyɛ bɛ so, na mmom suro wɔ Nyameɛ.

⁴⁴Wɔ nganga ne w’afaneɛ mɔ de, maen maen bɔ bapɛ ɛmɔ nwo bayia ne anu yeɛ odi kyɛ ɛtɔ bɛ fi ɔ.

⁴⁵Ɛmɔkɔhora koso bɛkɔtɔ bie bekofi ɛhemɔ anu: ɛwɔfoɛ mɔ bɔ baatena ɛmɔ nu, yeɛ b’abusuafoɛ bɔ baawo bɛ wɔ ɛmɔ maen nu, amaa bayɛ ɛmɔ deɛ.

⁴⁶Ɛmɔkɔhora bɛkɔfa bɛ bɛkɔyɛ agyapadeɛ bɛkɔyakyi ɛmɔ mma mɔ, yeɛ ɛmɔkɔhora bɛkɔfa bɛ bɛkɔyɛ ɛmɔ nganga. Nakoso ɛmɔ mmango Yisraelfoɛ de, nnɛma ebiala hyɛ obiɛngo so.

⁴⁷“Na sɛ ɛwɔfoɛ bie bɔ waatena ɛmɔ nu bayɛ sikaniɛ, ná sɛ ohia eliɛma Yisraelniɛ bie ma ye sɔ ti ɔtɔne ye nwo ma ɛwɔfoɛ ne anaakyɛ ɛwɔfoɛ ne sasoniɛ biala a,

⁴⁸sɛ ɔtɔne ye nwo yie a, atee wɔ berɛ ma ye kyɛ bɛpɔ ye ɔ; oliɛma Yisraelniɛ kɔhora kɔɔpɔ ye.

⁴⁹Ye baba aliɛma bienzua, anaakyɛ ye baba aliɛma bienzua awa bienzua anaa ye nwoniɛ kaenn kɔhora kɔpɔ ye. Anaakyɛ ye bɔbɔ sɛ sikaa ba ye sa nu a, ɔkɔhora kɔpɔ ye nwo.

⁵⁰Odi kyɛ Yisraelniɛ ne, ɔne ɛwɔfoɛ bɔ ɔtɔle sɔ Yisraelniɛ ne, bɛsesẽ befi afoɛ bɔ ɔtɔnene ye nwo mane ye ne maa okodwu Yubilee afoɛ ne. Ye pɔlɛ ne nyɔboɛ kogyina afoɛ ne somaa so: mmerɛ bɔ ne ɔwɔ ye mene sa nu ne, bekobu ye kyɛ ɔte paaniɛ mmerɛ.

⁵¹Sɛ afoɛ bɔ waha ne sone a, ye ti nyɔboɛ bɔ bɛfa bɛtɔle ye ne, odi kyɛ otua ye bue bɔ ɔte piri ɔ ɔfa ɔpɔ ye nwo.

⁵²Nakoso sɛ afoɛ bɔ waha koraka né Yubilee afoɛ ne aso ne ɔnzone de a, sɔaa yeɛ odi kyɛ ɔsese ye ɔ: ɔ́nea afoɛ bɔ waha ne ná ótua ye pɔlɛ sikaa ne.

⁵³Nakoso sɛ ɔtɛwura ɛwɔfoɛ ne bo de a, odi kyɛ ɔyɛ afoɛnoa afoɛnoa paaniɛ ma ye mene ne. Na ɛ́mɔnea kyɛ ye mene ne, ɔngɔhyɛ ye so ɔ.

⁵⁴Na sɛ bamva sɔ atee he biala so bambɔ ye a, ye de sana Yubilee afoɛ ne anu yeɛ ɔne ye mma mɔ bekonya bɛ fawɔnwodi ɔ.

⁵⁵Ofikyɛ Yisraelfoɛ te me ngoaa, bɛte me ngoaa bɔ nyele bɛ mvili Misraim aseɛ so ɔ: Me ole AWURADE ɛmɔ Nyameɛ.