Read Sehwi Lewitikɔso 27 Bible Online

Lewitikɔso 27 - Sehwi bible

Lewitikɔso 27

¹AWURADE sele Mose kyɛ,

²“Ka kyire Yisraelfoɛ kyɛ, Sɛ ebie to ye noa nu tui fa kuro sona ye ti nyɔboɛ bɔ AWURADE anohoba sonongo a, odi kyɛ otua ye kyɛbɔ bahyehyɛ bato berɛ ne ala.

³Bienzua biala bɔ wali afoɛ aburanyɔ bɔ ɔkwaadwu aburasia ne, ye ti nyɔboɛ te ɛdwetɛ sekel aburannu, kyɛbɔ nekaa krongron sekel te ɔ.

⁴Sɛ sona ne te brasua a, ye ti nyɔboɛ te sekel aburasa.

⁵Sɛ sona ne ali afoɛ nnu bɔ ɔkwaadwu afoɛ aburanyɔ a, bienzua ti nyɔboɛ te sekel aburanyɔ yeɛ brasua deɛ te sekel buru.

⁶Sɛ sona ne ali bosome ko bɔ ɔkwaadwu afoɛ nnu a, bienzua ti nyɔboɛ te ɛdwetɛ sekel nnu yeɛ brasua deɛ te ɛdwetɛ sekel nza.

⁷Na sɛ sona ne ali afoɛ aburasia bɔ ɔkɔ ne a, bienzua ti nyɔboɛ te sekel buru ne nnu, yeɛ brasua deɛ te sekel buru.

⁸Sɛ ɔnate ehiaa ti sona bɔ wabɔ anohoba ne ɔngɔhora ye ti nyɔboɛ ne tua a, odi kyɛ ɔfa sona bɔ wafa ye wabɔ anohoba ne ɔba ɔsɔfo ne nyunu maa ɔsɔfo ne pɛ ye ti nyɔboɛ. Ɔsɔfo ne kɔsesẽ nyɔboɛ ne, kyɛbɔ sona bɔ wahyɛ bɔ ne ye nwo kɔsõ so ɔ.

⁹“Sɛ aboadeɛ ne te kaka bɔ bɛkora bɛfa bɛbɔ afɔleɛ bɛma AWURADE a, kaka biala bɔ bɛfa bɛma AWURADE ne, odi kyɛ ɔyɛ krongron.

¹⁰Onni kyɛ bɛfa foforɛ besi ye gya nu anaa bɛfa bɛsesã ye. Nnɛmaa bɛfa bɔ ɔte paa bɛsesã bɔ ɔtte mayee, yeɛ nnɛmaa bɛfa bɔ ɔtte mayee bɛsesã bɔ ɔte paa ɔ. Sɛ ɛfa kaka bie si kaka foforɛ gya nu a, kaka ne ɔne bɔ bafa basi ye gya nu ne amukoraa odi kyɛ bɛyɛ krongron.

¹¹Sɛ ɔte kaka bɔ ye nwo nde bɔ bɛmva bɛmmɔ afɔleɛ mma AWURADE a, ye de ɔsɛ kyɛ bɛfa kaka ne bɛba ɔsɔfo ne nyunu.

¹²Odi kyɛ ɔsɔfo ne nea kaka ne, kyɛ ɔte paa anaa ɔtte mayee, na nyɔboɛ bɔ ɔsɔfo ne kɔfa kɔto so ne, sɔ ala yeɛ okogyina ɔ.

¹³Nakoso sɛ kaka ne mene kuro kyɛ ɔpɔ kaka ne a, odi kyɛ ye nyɔboɛ ne, ɔfa nnu nu ngyɛmuɛ ko ɔboka so.

¹⁴“Sɛ ebie tu ye awuro sie berɛ kyɛ ɔte krongron ma AWURADE a, odi kyɛ ɔsɔfo ne, ɔnea kyɛ awuro ne ɔte paa anaa ɔtte mayee. Nyɔboɛ bɔ ɔsɔfo ne kɔfa kɔto so ne, sɔ ala yeɛ okogyina ɔ.

¹⁵Na sɛ sona bɔ otuli awuro ne siele berɛ mane AWURADE ne, okuro kyɛ ɔpɔ awuro ne a, odi kyɛ ye nyɔboɛ ne, ɔfa nnu nu ngyɛmuɛ ko ɔboka so, maa osa bayɛ ye deɛ.

¹⁶“Sɛ ebie tu aseɛ bie bɔ bawu bafa bayakyi ye sie berɛ ma AWURADE a, ye nyɔboɛ ne sesenɛ kogyina nningyein somaa bɔ ɛkora dua ye so ne aso: odi kyɛ ɔfa ɛdwetɛ sekel aburannu otua ayuo angora ko biala kerɛ.

¹⁷Na sɛ sɔ sona ne otu aseɛ sie berɛ ma AWURADE Yubilee afoɛ ne anu a, ye nyɔboɛ ne kɔyɛ kyɛbɔ apɛ ato berɛ ne ala.

¹⁸Nakoso sɛ otu aseɛ ne sie berɛ ma AWURADE Yubilee afoɛ ne asi a, ye de odi kyɛ ɔsɔfo ne ɔnea afoɛ somaa bɔ waha koraka né Yubilee afoɛ bieku adwu koraka né wapɛ ye nyɔboɛ; na odi kyɛ ogyina so ɔte ye nyɔboɛ ne aso.

¹⁹Na sɛ sona bɔ watu aseɛ ne wasie berɛ wama AWURADE ne, okuro kyɛ ɔpɔ ye a, ye de odi kyɛ ye nyɔboɛ ne, ɔfa nnu nu ngyɛmuɛ ko ɔboka so, maa osa bayɛ ye mene ne deɛ.

²⁰Nakoso sɛ wambɔ aseɛ ne a, anaa sɛ ɔtɔne ye ma sona foforɛ a, ye de ne ɔpɔ ye a ɔnyɛ yé ko.

²¹Nakoso sɛ Yubilee afoɛ ne so, bɔ odi kyɛ ebiala sa ka ye agyapadeɛ ne a, aseɛ ne kɔyɛ krongron kɔma AWURADE kyɛ aseɛ bɔ batu basie berɛ bama AWURADE ne ala; ɔkɔyɛ ɔsɔfo ne deɛ.

²²Na sɛ ebie tu aseɛ bɔ watɔ ɔ sie berɛ ma AWURADE, bɔ nna aseɛ bɔ bawu bafa bayakyi ye ne bie ahɔ a,

²³odi kyɛ ɔsɔfo ne ɔsese ye nyɔboɛ fi sɔ mmerɛ ne kodwu Yubilee afoɛ ne, na kyɛbɔ ye nyɔboɛ te nen, odi kyɛ sɔ kyẽa ne ala, ye mene ne ótua fa yɛ akyɛdeɛ krongron ma AWURADE.

²⁴Yubilee afoɛ ne anu, aseɛ ne kosa kɔyɛ sona bɔ bɛtɔ befili ye berɛ, bɔ ye agyapadeɛ ahɔ ɔ ne deɛ.

²⁵Odi kyɛ bɛfa nekaa krongron berɛ sekel ne yeɛ bɛsesẽ nyɔboɛ ne amukoraa ɔ: gyera aburanyɔ te sekel ko.

²⁶“Nnɛma ebiala tu kaka biala bamuɛbaa sie berɛ ma AWURADE; ɔnate kyɛ ɔte bamuɛbaa ne ati, ɔte AWURADE deɛ. Kyɛ nandwie ahɔ oo, anaa boaen ahɔ oo, AWURADE deɛ ɔ.

²⁷Sɛ ɔte kaka bɔ ye nwo nde a, ye de sese ye nyɔboɛ, ná ma ye mene ne ɔfa nnu nu ngyɛmuɛ ko ɔboka so ɔpɔ ye; sɛ wambɔ ye a, odi kyɛ bɛtɔne ye kyɛbɔ asi asese ye nyɔboɛ ne ala.

²⁸ “Nakoso ebiala ye nikyee biala bɔ okotu kosie berɛ kɔma AWURADE ne, kyɛ sona oo, kyɛ kaka oo, anaa aseɛ bɔ bawu bafa bayakyi ye oo, ɔngɔhora ngɔtɔne ye, yeɛ ɔngɔhora ngɔpɔ ye. Nikyee biala bɔ batu basie berɛ bama AWURADE ne, ɔte krongron paa ma AWURADE.

²⁹Sona biala bɔ babua kyɛ behũ ye ne, bɛngɔhora bɛngɔpɔ ye; odi kyɛ beku ye ɔ.

³⁰“Aseɛ ne aso aleɛ buru nu ngyɛmuɛ ko ne, kyɛ betu befili aseɛnwo oo, anaakyɛ ɔte mmakaammaa oo, ye mukoraa te AWURADE deɛ; bɛte krongron bɛma AWURADE.

³¹Na sɛ ebie kuro kyɛ osa fa ye buru nu ngyɛmuɛ ko ne anu bie a, ye de odi kyɛ ye nyɔboɛ ne, ɔfa nnu nu ngyɛmuɛ ko ɔboka so.

³²Nandwie kure ne mmoaen kure nemɔ buru nu ngyɛmuɛ ko ne, sɛ mmoaenneafoɛ ne bukye bɛ na bɛbaase bɛfa ye pɔmaa ne abo a, bɛ nu biala bɔ ɔtɔ so buru ne, bɛkɔyɛ krongron bɛkɔma AWURADE.

³³Nnɛma ebiala sa ngaka nemɔ anu kyɛ ɔte paa anaa ɔtte mayee, yeɛ nnɛmaa ɔfa ebie sesã ye; sɛ ɔsesã ye a, ye de sɔ kaka ne ɔne bɔ wafa wasesã ye ne bɛkɔyɛ krongron, na bɛ mene pɔ bɛ a ɔnyɛ yé.”

³⁴Ɛhemɔ ole mmeraa dwirɛ bɔ AWURADE nate Mose so fa mane Yisraelfoɛ wɔ Sinai bokaa ne aso ne.