Read Sehwi Lewitikɔso 4 Bible Online

Lewitikɔso 4 - Sehwi bible

Lewitikɔso 4

¹Na AWURADE sele Mose kyɛ,

² “Ka kyire Yisraelfoɛ kyɛ, ‘Nningyein bɔ AWURADE akanzo ɛmɔ kyɛ nnɛma ɛmɔyɔ ne, sɛ ebie ɔyɔ nu biala, bɔ sɔ sona ne ɔnze kyɛ wayɔ bɔne a,

³sɛ ɔsɔfo bɔ bapopa ye ngoo yeɛ ɔyɔ bɔne, ná ɔnate so ɔfa foɛbualɛ ba maen ne aso a, ɔnate bɔne bɔ wayɔ ne ati, odi kyɛ ɔfa nandwie nyii akrɔngrɔma bɔ ollili nnɛen biala ɔ ɔbɔ bɔne nwo afɔleɛ ma AWURADE.

⁴Odi kyɛ ɔfa nandwie nyii ne ɔba AWURADE nyunu wɔ ɛtena sua atenaleɛ anoa nu berɛ. Odi kyɛ ɔfa ye sa to nandwie ne ti so, ná oku nandwie ne wɔ AWURADE nyunu.

⁵Odi kyɛ ɔsɔfo bɔ bapopa ye ngoo ne, ɔfa nandwie ne mogya ne bie ná ɔfa ba ɛtena sua atenaleɛ ne anu;

⁶odi kyɛ ɔsɔfo ne ɔfa ye sa mmɛseka ɔbɔ mogya ne anu ná ɔfa bie pete pɛen nzoo, AWURADE nyunu, wɔ nekaa krongron mbɛmuɛ tena ne anyunu.

⁷Ɛyɛɛ fona afɔleɛ bokyea mmɛen mɔ bɔ bɛwɔ ɛtena sua atenaleɛ nu berɛ ne, odi kyɛ ɔsɔfo ne fa mogya ne bie oguagua so wɔ AWURADE nyunu. Na naen yeralɛ afɔleɛ bokyea bɔ ɔwɔ ɛtena sua atenaleɛ anoa nu berɛ ne, odi kyɛ ohwie nandwie mogya ne ngaa ne ogua ye bo.

⁸Na bɔne nwo afɔleɛ nandwie nyii ne, odi kyɛ ɔye ye loe ne amu fi nu, mekyire ɛloe bɔ wato wafa ye kunu nningyein anwo ne ɔne ɛloe bɔ ɔwɔ ye kunu nningyein ne anu ne amukoraa,

⁹ye saa nyɔ ne ɔne bɛ nwo loe bɔ ɔwɔ ye sisia ne anu ne, ɔne ye boɛ ne bie bɔ ɔkɔye kɔboka ye saa nemɔ aso ne,

¹⁰(kyɛbɔ bɛye ɛhemɔ befi asomdwee afɔleɛ nandwie nu ne), na odi kyɛ ɔsɔfo ne ɔyera bɛ wɔ naen yeralɛ afɔleɛ bokyea ne aso.

¹¹Nakoso nandwie nyii ne, ye nwomaa ne ye naen ne amu, ye ti, ye gya, ye kunu nningyein, ɔne ye fure:

¹²kaka ne mumua ne, odi kyɛ ɔsoa kɔ asikyeleɛ ne asi nekaa bɔ berɛ te sannwuu, nekaa bɔ bɛto nzoen begua ɔ, ná ɔ́yera ye wɔ see so. Nekaa bɔ bɛto nzoen begua ne yeɛ odi kyɛ ɔyera ye ɔ.

¹³ “Na sɛ Yisrael ama mukoraa bammoapa ná bɛyɔ bɔne, ná sɛ bɔne ne ɔfea mmenia ne amu a, sɛ bɛyɔ nningyein bɔ AWURADE abra bɛ kyɛ nnɛmaa bɛyɔ ne anu biala, ná yiti bedi ye nwo fɔ a,

¹⁴sɛ bɔne bɔ bayɔ ne batɔ dwaa a, odi kyɛ maen ne fa nandwie nyii akrɔngrɔma babɔ bɔne nwo afɔleɛ, na ɔsɛ kyɛ bɛfa bɛba ɛtena sua atenaleɛ anoa nu berɛ.

¹⁵Odi kyɛ maen mbanyi nemɔ, bɛfa bɛ sa bɛto nandwie ne ti afia wɔ AWURADE nyunu, ná beku nandwie ne wɔ AWURADE nyunu.

¹⁶Na odi kyɛ ɔsɔfo bɔ bapopa ye ngoo ne, ɔfa nandwie nyii mogya ne bie ba ɛtena sua atenaleɛ ne anu,

¹⁷na ɔsɛ kyɛ ɔsɔfo ne fa ye sa mmɛseka bɔ mogya ne anu na ɔpete ye pɛen nzoo, AWURADE nyunu wɔ ɛtena bɔ onwi sua ne anoa ne nyunu.

¹⁸Afɔleɛ bokyea mmɛen mɔ bɔ bɛwɔ AWURADE nyunu wɔ ɛtena sua atenaleɛ nu berɛ ne, odi kyɛ ɔfa mogya ne bie ogua so. Na naen yeralɛ afɔleɛ bokyea ne bɔ ɔwɔ ɛtena sua atenaleɛ nu berɛ ne de, odi kyɛ ohwie mogya ne ngaa ne gua ye bo.

¹⁹Na odi kyɛ ɔye ye loe ne amu ofi nu ná ɔyera ye wɔ afɔleɛ bokyea ne aso.

²⁰Kyɛbɔ ɔfale bɔne nwo afɔleɛ nandwie nyii ne yɔle ne, sɔ ala yeɛ ɔsɛ kyɛ ɔfa sɔ nandwie ne ɔyɔ ɔ. Ɔsɔfo ne kɔpata kɔma bɛ, ná Nyameɛ kɔfa bɛ bɔne kɔhyɛ bɛ.

²¹Na odi kyɛ ɔsoa nandwie nyii ne kɔ asikyeleɛ ne asi dɔ, ná ɔ́yera ye kyɛbɔ ɔyerale nandwie nyii bɔ oli moa ne; ɔte bɔne nwo afɔleɛ ma maen ne.

²²“Sɛ maen panyi bie yɔ bɔne, bɔ wayɔ nningyein bɔ AWURADE ye Nyameɛ akanzo ɛmɔ kyɛ nnɛma ɛmɔyɔ ne anu biala, bɔ sɔ sona ne ɔnze kyɛ wayɔ bɔne, ná ɔnate so maa odi fɔ,

²³ná sɛ bɛfa bɔne bɔ yeɛ wayɔ ne bɛto ye nyunu a, ɔsɛ kyɛ ɔfa abɔngye nyii bɔ ollili nnɛen biala ɔ ɔbabɔ afɔleɛ.

²⁴Ɔsɛ kyɛ ɔfa ye sa to abɔngye ne ti afia, ná oku kaka ne wɔ nekaa bɔ yeɛ beku naen yeralɛ afɔleɛ ngaka wɔ AWURADE nyunu ne; ɔte bɔne nwo afɔleɛ.

²⁵Na odi kyɛ ɔsɔfo ne ɔfa ye sa mmɛseka bɔ bɔne nwo afɔleɛ mogya ne anu ná ɔfa kekã naen yeralɛ afɔleɛ bokyea mmɛen nemɔ. Mogya ne ngaa ne, odi kyɛ ohwie ogua naen yeralɛ afɔleɛ bokyea ne abo.

²⁶Odi kyɛ ɔyera ye loe ne amu wɔ afɔleɛ bokyea ne aso kyɛbɔ ɔyerale asomdwee afɔleɛ ɛloe nen. Ɔsɔfo ne kɔpata wɔ sona ne bɔne nwo kɔma ye, na Nyameɛ kɔfa ye bɔne kɔhyɛ ye.

²⁷ “‘Nningyein bɔ AWURADE akanzo ɛmɔ kyɛ nnɛma ɛmɔyɔ ne, sɛ maen baa bie ɔyɔ nu biala, bɔ sɔ sona ne ɔnze kyɛ wayɔ bɔne, maa ɔnate so odi fɔ,

²⁸ná sɛ bɛfa bɔne bɔ yeɛ wayɔ ne bɛto ye nyunu a, ɔsɛ kyɛ ɔfa abɔngye beleɛ bɔ ollili nnɛen biala ɔ ɔbabɔ afɔleɛ, ɔnate bɔne bɔ wayɔ ne ati.

²⁹Ɔsɛ kyɛ ɔfa ye sa to bɔne nwo afɔleɛ ne ti afia, ná oku ye wɔ nekaa bɔ bɛbɔ naen yeralɛ afɔleɛ nen.

³⁰Na odi kyɛ ɔsɔfo ne ɔfa ye sa mmɛseka ɔbɔ bɔne nwo afɔleɛ mogya ne anu ná ɔfa kekã naen yeralɛ afɔleɛ bokyea mmɛen nemɔ. Mogya ne ngaa ne, odi kyɛ ohwie gua afɔleɛ bokyea ne abo.

³¹Na odi kyɛ ɔye ye loe ne amu, kyɛbɔ bɛye ɛloe befi asomdwee afɔleɛ nu ne, na ɔsɔfo ne ɔ́yera ye wɔ afɔleɛ bokyea ne aso maa ɔ́yɛ nikyee bɔ ɔbo AWURADE fona ɔ. Ɔsɔfo ne kɔpata kɔma ye, na Nyameɛ kɔfa ye bɔne kɔhyɛ ye.

³²“Sɛ boaen yeɛ ɔfa babɔ bɔne nwo afɔleɛ a, odi kyɛ ɔfa beleɛ bɔ ollili nnɛen biala ɔ.

³³Odi kyɛ ɔfa ye sa to bɔne nwo afɔleɛ ne ti afia, ná oku ye fa yɛ bɔne nwo afɔleɛ wɔ nekaa bɔ yeɛ beku naen yeralɛ afɔleɛ ne.

³⁴Na odi kyɛ ɔsɔfo ne ɔfa ye sa mmɛseka bɔ bɔne nwo afɔleɛ mogya ne anu ná ɔfa kekã naen yeralɛ afɔleɛ bokyea ne mmɛen nemɔ, ná mogya ne ngaa ne, óhwie ógua afɔleɛ bokyea ne abo.

³⁵Na odi kyɛ ɔye ye loe ne amukoraati, kyɛbɔ bɛye asomdwee afɔleɛ boaen nu loe ne, na odi kyɛ ɔsɔfo ne ɔfa gua afɔleɛ bɔ bafa babrɛ AWURADE ne aso, ná ɔyera ye wɔ afɔleɛ bokyea ne aso; na ɔsɔfo ne kɔpata kɔma ye wɔ bɔne bɔ wayɔ ne anwo, na Nyameɛ kɔfa ye bɔne kɔhyɛ ye.