Read Sehwi Lewitikɔso 7 Bible Online

Lewitikɔso 7 - Sehwi bible

Lewitikɔso 7

¹“Foɛlilɛ afɔleɛ nwo nhyehyɛleɛ ɛhe: ɔte krongron paa.

²Nekaa bɔ beku naen yeralɛ afɔleɛ ngaka ne, berɛ yeɛ odi kyɛ beku foɛlilɛ afɔleɛ kaka ne ɔ, na odi kyɛ behwie ye mogya ne begua afɔleɛ bokyea ne anwo bɛbra beyia.

³Odi kyɛ bɛfa ye loe ne amukoraa bɛbɔ afɔleɛ, ye dua pue ɔne ɛloe bɔ wato wafa ye kunu nningyein anwo ne,

⁴ɔne ye saa nyɔ ne ɔne bɛ nwo loe bɔ ɔwɔ ye sisia ne anu ne, ɔne ye boɛ ne bie bɔ odi kyɛ ɔye boka ye saa nemɔ aso ne.

⁵Na ɔsɔfo ne kɔyera bɛ afɔleɛ bokyea ne aso kyɛ afɔleɛ bɔ bɛyera ye see so bɛma AWURADE ɔ; ɔte foɛlilɛ afɔleɛ.

⁶Bienzua biala bɔ ɔwɔ asɔfo abusua kure ne anu ne, ɔkora di bie; odi kyɛ bedi ye wɔ nekaa bɔ ɔte krongron ɔ; ɔte krongron paa.

⁷“Foɛlilɛ afɔleɛ ne, ɔte kyɛ bɔne nwo afɔleɛ ne ala, ofikyɛ bɛ nwo nhyehyɛleɛ te ko; naen ne te ɔsɔfo bɔ ɔkɔbɔ sɔ afɔleɛ ne deɛ.

⁸Ɔsɔfo bɔ ɔkɔbɔ ebie naen yeralɛ afɔleɛ kɔma ye ne, kaka ne bɔ wafa wabɔ afɔleɛ ne nwomaa te ye deɛ.

⁹Aburoo afɔleɛ biala bɔ bato ye foonoo nu, ɔne bɔ bato ye turonzemaa nu, anaa kyɛnzee nu ne biala kɔyɛ ɔsɔfo bɔ ɔkɔbɔ afɔleɛ ne deɛ.

¹⁰Aburoo afɔleɛ biala, kyɛ bafa ngoo bafra ye oo, anaakyɛ ɔte wosee oo, Aarɔn mma mmienzua nemɔ amu bɛ deɛ ɔ; bɛ́hyɛ ye pɛpɛɛpɛ.

¹¹“Asomdwee afɔleɛ bɔ bɛbɔ bɛma AWURADE ne anwo nhyehyɛleɛ ɛhe:

¹²Sɛ ɛbɔ fa da AWURADE ase a, ye de odi kyɛ ɛfa taterɛ kabrɛdi bɔ bafa ngoo bafete ɔ, apiti kabrɛdi bɔ bafa ngoo bafa ye nwo ɔ, ɔne mɔle paa taterɛ bɔ bafa ngoo bafete ɔ boka asennaa afɔleɛ ne aso.

¹³Na w’asomdwee afɔleɛ bɔ ɛfa da ase ne de, odi kyɛ ɛfa mɔle harewaa paanoo ɛboka so.

¹⁴Odi kyɛ ɛye paanoo ko fi afɔleɛ ne biala nu maa ɔyɛ akyɛdeɛ bɔ ɛfa brɛ AWURADE ɔ; ɔsɔfo bɔ ohwie asomdwee afɔleɛ mogya ne gua ne, ɔte ye deɛ.

¹⁵Na wɔ asennaa asomdwee afɔleɛ naen ne de, odi kyɛ edi ye kyẽa bɔ ɛkɔbɔ afɔleɛ ne ala; onni kyɛ ɛma aleɛ kye ebie so.

¹⁶Nakoso sɛ w’afɔleɛ ne te bɔhyɛlɛ afɔleɛ anaa akyɛdeɛ afɔleɛ a, odi kyɛ edi ye ɛlɛho bɔ ɛkɔbɔ afɔleɛ ne ala, na aleɛ kye a, di ye ngaa bɔ waha ne.

¹⁷Nakoso ye ɛlɛsa ne aso, afɔleɛ naen bɔ ɔkɔha ne de, odi kyɛ bɛfa see bɛyera ye.

¹⁸Sɛ ebie di asomdwee afɔleɛ naen ne bie ye ɛlɛsa ne aso a, afɔleɛ ne ngɔsɔ Nyameɛ nye, yeɛ Nyameɛ ngole sona bɔ ɔbɔle ne ngɔto nu; naen ne te akyiwadeɛ na sona bɔ okoli ne, ye musue kɔbɔ ye ti so.

¹⁹Naen bɔ ɔkɔha nikyee biala bɔ ye nwo nde ne, onni kyɛ bedi; odi kyɛ bɛfa see bɛyera ye. Naen ne de, ebiala bɔ ye nwo te ne kora di bie,

²⁰nakoso ebiala bɔ ye nwo nde ná okoli AWURADE asomdwee afɔleɛ naen ne bie nen, sɔ sona ne, odi kyɛ bɛpɛ ye asue befi maen ne anu.

²¹Na sɛ ebiala nwo ka nikyee bɔ ye nwo nde: sɛ nikyee fiɛ bɔ ofi sona nu oo, anaa kaka bɔ ye nwo nde oo, anaa abɔdeɛ biala bɔ ye nwo nde oo, na sɛ odi AWURADE asomdwee afɔleɛ naen ne bie a, odi kyɛ bɛpɛ sɔ sona ne asue befi maen ne anu.”

²²Na AWURADE sele Mose kyɛ,

²³“Ka kyire Yisraelfoɛ kyɛ, Nnɛma ɛmɔdi nandwie loe, anaa boaen loe, anaa abɔngye loe.

²⁴Kaka biala bɔ ye bɔbɔ okowu, anaakyɛ bɔ kaka aboyaa bie kohũ ye ne, ɛmɔkɔhora bɛkɔfa ye loe bɛkɔyɔ nikyee foforɛ, nakoso nnɛma ɛmɔdi.

²⁵Kaka bɔ bayera ye bafa babɔ afɔleɛ bama AWURADE ne, ebiala bɔ okoli ye loe ne, odi kyɛ bɛpɛ ye asue befi maen ne anu.

²⁶ Afei ɛmɔ atenaleɛ biala anu, nnɛma ɛmɔdi anomaa anaakyɛ kaka biala mogya.

²⁷Ebiala bɔ okoli kaka mogya nen, odi kyɛ bɛpɛ ye asue befi maen ne anu.”

²⁸Na AWURADE sele Mose kyɛ,

²⁹“Se Yisraelfoɛ kyɛ, ‘Ebiala bɔ ɔkɔbɔ ye asomdwee afɔleɛ kɔma AWURADE ne, odi kyɛ ɔfa asomdwee afɔleɛ ne anu bie ɔyɛ akyɛdeɛ ɔbrɛ AWURADE.

³⁰Odi kyɛ ɔfa afɔleɛ bɔ bɛfa see bɛbɔ bɛma AWURADE ne otira ba; odi kyɛ ɔfa ye loe ɔboka ye sa ne aso, ná ɔpagya ye sa ne maa ɔyɛ ɛnwahanɛ afɔleɛ wɔ AWURADE nyunu.

³¹Odi kyɛ ɔsɔfo ne yera ɛloe ne wɔ afɔleɛ bokyea ne aso. Nakoso kaka ne sa ne de, Aarɔn ne ye mma mmienzua mɔ bɛ deɛ ɔ.

³²Na ye sɔ famaa ne de, odi kyɛ ɛmɔfa bɛma ɔsɔfo ne kyɛ akyɛdeɛ bɔ ofi ɛmɔ asomdwee afɔleɛ ne anu ɔ.

³³Aarɔn mma nemɔ anu ko bɔ yeɛ ɔkɔfa asomdwee afɔleɛ ye mogya ne ye loe kɔbɔ afɔleɛ ne, ye yeɛ kaka ne sɔ famaa ne kɔyɛ ye deɛ ɔ.

³⁴Ofikyɛ ɛnwahanɛ afɔleɛ kaka sa ne, ɔne ye sɔ bɔ bɛfa bɛbɔ afɔleɛ ne, maye mafi Yisraelfoɛ asomdwee afɔleɛ ne anu, na mafa mama ɔsɔfo Aarɔn ɔne ye mma mmienzua mɔ kyɛ bɛ bue deɛ bɔ ofi Yisraelfoɛ berɛ afebɔɔ ɛne.

³⁵See so afɔleɛ bɔ bɛbɔ bɛma AWURADE ne, ye bue bɔ ɔte Aarɔn ne ye mma bɛ deɛ hɔ ɛne; kyẽa bɔ AWURADE yele bɛ siele berɛ kyɛ ye sɔfo mɔ ne yeɛ ɔɔyɛle bɛ deɛ ɔ;

³⁶Kyẽa bɔ AWURADE popale bɛ ngoo ne yeɛ ɔhyɛle Yisraelfoɛ kyɛ bɛfa bɛma bɛ ɔ; ɔte nhyehyɛleɛ afebɔɔ bɔ ɔwɔ berɛ ma b’aworɛ ndoatoasoɛ mukoraati ɔ.

³⁷Naen yeralɛ afɔleɛ, aburoo afɔleɛ, bɔne nwo afɔleɛ, foɛlilɛ afɔleɛ, sɔfohyɛlɛ afɔleɛ, ɔne asomdwee afɔleɛ anwo nhyehyɛleɛ ɛhe;

³⁸ná ɛhemɔ yeɛ AWURADE hyɛle Mose wɔ Sinai bokaa ne aso kyẽa bɔ AWURADE hyɛle Yisraelfoɛ kyɛ bɛfa b’afɔleɛ bɛbrɛ ye AWURADE wɔ Sinai ɛserɛ so ne.