Read Sehwi Yeremia 11 Bible Online

Yeremia 11 - Sehwi bible

Yeremia 11

¹AWURADE dwirɛ bɔ ɔlale ye ali hyirele Yeremia ne ɛhe:

²“Ɛ́mɔtie apam ne anu dwirɛ, ná ɛmɔhã nu dwirɛ behyire Yudafoɛ ne Yerusalemfoɛ.

³Kã kyire bɛ kyɛ, Bɔ AWURADE Yisrael Nyameɛ kã ɛhe: Ebiala bɔ wanni sɔ apam dwirɛ ne aso ne, ɔte ɛnomalɛ ma ye,

⁴apam bɔ nhyehyɛle mane ɛmɔ nana mɔ mmerɛ bɔ nyele bɛ mvili Misraim aseɛ so, buralɛ foonoo nu ne. Na ngane kyɛ, ɛ́mɔtie me dwirɛ, na ɛ́mɔli ahyɛdeɛ amukoraa bɔ mafa mama ɛmɔ ne aso. Ɔba ye sɔ a, ɛmɔkɔyɛ me maen, ná me koso mayɛ ɛmɔ Nyameɛ,

⁵amaa ɔnate so, ndaen bɔ nda ngyirele ɛmɔ nana mɔ kyɛ ngɔma bɛ aseɛ bɔ nyɔfone sue ne woɛ tengyɛ wɔ so, kyɛbɔ ɔte ɛnɛ ala ye ne, mamaa wawa nu.” Yeɛ mmuale kyɛ, “Ao AWURADE, maa ɔbra nu sɔ.”

⁶Na AWURADE sele me kyɛ, “Bɔ sɔ dwirɛ hemɔ amukoraa dawure wɔ Yuda nguro nemɔ anu ne Yerusalem mmorɔnoɛ nemɔ aso kyɛ, Ɛ́mɔtie sɔ apam he anu dwirɛ, ná ɛmɔli so.

⁷Ofikyɛ mmerɛ bɔ nyele ɛmɔ nana mɔ mvili Misraim aseɛ so mmale ne, mmɔle bɛ kɔkɔ kitii, na mahɔ so mabɔ bɛ kɔkɔ maa waadwu ɛnɛ kyɛ, Ɛ́mɔtie me dwirɛ.

⁸Nakoso bandie me dwirɛ, yeɛ banyɛ asoɛ bamma me, na mmom bɛ mukoraa belili bɛ bɔbɔ bɛ ti piri bɛyɔle bɔne bɔ bekuro ɔ. Yiti apam he anu dwirɛ amukoraa bɔ nhyɛle bɛ kyɛ beli so, nakoso banni so ne, mbraprale nguale bɛ so.”

⁹Na AWURADE sele me kyɛ, “Yudafoɛ ne Yerusalemfoɛ babɔ porɛ tɛɛ.

¹⁰Bɛ nana mɔ amumuyɛɛ bɔ bɛyɔle, bɔ banguro kyɛ bekotie me dwirɛ ne, basa baayɔ bie; baali nyameɛ foforɛ mɔ asi baso bɛ. Yisrael awuro ama ne Yuda awuro ama babu m’apam bɔ me ne bɛ nana mɔ yɛyɛle ne aso.

¹¹Yiti bɔ AWURADE kã ɛhe: Nahorɛ nu, mebaaprapra musue bɔ bɛngɔhora bɛngɔnwati bengofi nu ɔ megua bɛ so; ɔwɔ nu kyɛ bekosu bɛkɔfrɛ me, nakoso mengɔtɛ bɛ so.

¹²Na Yuda nguro ne Yerusalemfoɛ bekoosu bekohyire nyameɛ mɔ bɔ bɛyera ayirefona bɛma bɛ ne, nakoso bɛngɔhora bɛngɔpepɛ bengole bɛ wɔ b’amaneɛnwunɛ mmerɛ ne anu.

¹³Ofikyɛ Yuda, wɔ nyameɛ mɔ basone pee kyɛ wɔ nguro mɔ; afɔleɛ mmokyea bɔ ɛmɔasi bafa bagua ɛmɔ nyunu ase, bɔ ɛmɔyera ɛyɛɛ wɔ so bɛma Baal ne, bɛ somaa te kyɛ Yerusalem mmorɔnoɛ mɔ.

¹⁴“Yiti wɔ de, nnɛpa kyerɛ ma sɔ maen he, yeɛ nnɛgyina bɛ gya nu fa abisadeɛ anaa mbaeɛ to me nyunu, ofikyɛ b’amaneɛnwunɛ mmerɛ nu, besu bɛfrɛ me a, mengɔtɛ bɛ so.

¹⁵Nzikyɛ yeɛ me dɔfo ole ye ɔyɔ wɔ m’awuro wa, wɔ aberɛ bɔ wayɔ sɔ amumuyɛɛ nningyein mɔ ɔ? Aso bɔhyɛlɛ ne naen afɔleɛ kɔhora kosi wɔ musue ne nwo ate, amaa ɔnate so ali ahurusi anaa?

¹⁶Mmerɛ bie, AWURADE tole wɔ dumaa ‘Olive Bakaa Monɛ, bɔ ɔyɛ nyemene bɔ osu mmaa paa ɔ’, nakoso ɔkɔfa mvrama bɔ otu serɛserɛ ɔ kɔto nu see kɔpomba ye mmaen mɔ.

¹⁷Asafo AWURADE bɔ oluale wɔ ne, wahã musue dwirɛ wagua wɔ so, ɔnate bɔne bɔ Yisrael awuro ama ne Yuda awuro ama bayɔ [batia bɛ nwo], bɔ bayera ɛyɛɛ bama Baal bafa bawura me apue ne ati.

¹⁸AWURADE ye hyirele me maa nwuni ye, na ɛlale bɛ bɔne yɔleɛ nemɔ ali hyirele me.

¹⁹Nakoso né nde kyɛ boaen akrɔngrɔma brɛfo bɔ bɛ́fa ye bɛ́kɔ akumyɛɛ ɔ. Na né menze kyɛ babɔ me ti so porɛ kyɛ, “Ɛ́mɔma yɛsɛkye bakaa ne, ɔne ye mma ne, ɛ́mɔma yɛ́bu ye yɛ́fi ateasefoɛ aseɛ so, amaa ɔnate so bangaye ye dumaa ko!”

²⁰Nakoso Asafo AWURADE, wɔ bɔ ebua ndɛen turoloo, bɔ ɛpɛnzɛpɛnzɛ sona ahone nu ne ye ti anu ɔ, maa nwu wɔ wereɛtɔlɛ ne wɔ bɛ so, ofikyɛ wɔ yeɛ mafa me dwirɛ mawura wɔ sa ɔ.

²¹Yiti bɔ AWURADE kã fa Anatotefoɛ nwo ɛhe. Bɛ yeɛ bɛpena wɔ beku wɔ, ná bɛnwa, “Nnɛfa AWURADE dumaa hyɛ ngɔm, wanyɔ sɔ a yɛkohu wɔ.”

²²Yiti bɔ Asafo AWURADE kã ɛhe: “Tie, ngɔhwe bɛ so, mmerandeɛ nemɔ kɔtotɔ ngrandɛ noa, na ɛhɔen kɔma bɛ mma mmienzua ne bɛ mma mmrasua bekowuwu,

²³na bɛ nu biala ngɔha. Ofikyɛ ngɔprapra musue ngogua Anatotefoɛ so, wɔ b’asohwenɛ afoɛ ne anu.