Read Sehwi Yeremia 12 Bible Online

Yeremia 12 - Sehwi bible

Yeremia 12

¹Ao AWURADE, sɛ mebɔ wɔ kwaadu a, edi be kaenn. Nakoso maa mva me dwirɛ ndo wɔ nyunu. Nzu ati yeɛ oyie bɔnefoɛ yé e? Nzu ati yeɛ ngɔngɔnzaafoɛ amukoraa bɛ so anu atɔ bɛ ɔ?

²Wɔ yeɛ edua bɛ ɔ, na betira ndii; benyi besu mmaa; wɔ dumaa lela bɛ noa, nakoso b’ahone de, ombingye wɔ.

³Nakoso AWURADE, wɔ de ɛse me. Anwu me aso me anea, na anwu kyɛbɔ nzi nde ɔ. Twe bɛ kɔ kyɛ mmoaen bɔ bɛ́fa bɛ bɛ́kɔ akumyɛɛ ɔ, na tu bɛ sie berɛ ma ehunɛ kyẽa ne.

⁴Aseɛ ne kɔbɔ awuye koodwu kyinzu, na eboo biala so ndire kɔkese maa okoodwu kyinzu? Ofikyɛ aseɛ ne aso ama, b’amumuyɛɛ ti, ngaka ne nnomaa batu bamini, ofikyɛ mmenia nwa, “Ongonwu y’ayieleɛ.”

⁵“Sɛ ɛne mmenia bɔ bɛnate bɛ gya kunu po betu amirika, ná bɛmaa ɛfɛ a, ɔkɔyɛ sɛɛ né ahora ɛne mbɔngɔ batu amirika? Na sɛ aseɛ bɔ so la berɛ pralaa po efi ase wɔ so a, ye de Yɔɔdan ɛhɔayeɛ ne anu, ɛkɔyɛ ye sɛ?

⁶Ofikyɛ wɔ nwo ama ne wɔ bɔbɔ w’abusuafoɛ, bɛ po baye wɔ bama; amba, bɛ́bɔ wɔ tutue bedi wɔ si. Ɔwɔ nu kyɛ bɛkã edwirɛ fɛɛ bekyire wɔ de, nakoso nnede bɛ di.”

⁷“M’awuro ne, mapo ye; m’agyapadeɛ ne, mayakyi ye si lilɛ. Me kra ye dɔfo ne, mafa ye mawura ye pɔfoɛ mɔ sa.

⁸M’agyapadeɛ ne, wakakyi kyɛ ɛhɔayeɛ nu gyata wama me; wama ye komvi so wabobɔ nu wagua me so, yiti mepɔ ye.

⁹M’agyapadeɛ ne, ɔte kyɛ akorɔma anwo kyerekyerɛɛ ma me. Akorɔma mɔ bapɛ ye nwo bayia. Ɛmɔhɔ bɛɛboaboa ngaka aboyaa amukoraa noa maa bɛbra bɛɛhye ye beli.

¹⁰Neafoɛ pee basɛkye me bobe boo ne, bahwi bafa me bue deɛ so, me bue deɛ nyemenenyemene ne, basɛkye ye pasaa.

¹¹Basɛkye ye pasaa, osũ kyire me kyɛ wasɛkye pasaa. Aseɛ ne amukoraa wayɛ pralaa, nakoso ebiala nne berɛ bɔ ɔdwene ye nwo ɔ.

¹²Ɛserɛ so mmokaa pralaa ne amukoraa so, yeɛ sɛkyefoɛ nemɔ bawa ɔ, ofikyɛ AWURADE ngrandɛ ne okũkũ mmenia, fi aseɛ ne noa kɔkã ye noa; asomdwee nne berɛ mma sona biala.

¹³Balua atokoɔ, nakoso bate mmowue, bafɛ alaa, nakoso bannya ye nwo mvasoɛ biala. Ɔnate AWURADE yaa piri bɔ wafɛ ne ati, ɛmɔ fieso nningyein bɔ ɛmɔkonya ye ne, ɔkɔyɛ bɛ fɛre.”

¹⁴Maen maen bɔnefoɛ bɔ me ne bɛ yɛbɔ wɛen, bɔ bɛte bɛ sa bɛkã agyapadeɛ bɔ mafa mama me maen Yisrael maa wayɛ ye deɛ ne, bɔ AWURADE kã fa bɛ nwo ole kyɛ, “Tie, ngotu bɛ bo ngofi b’aseɛ ne aso, na ngotu Yuda awuro ama bo ngofi bɛ nu.

¹⁵Na ɔkɔwa kyɛ, sɛ metu bɛ bo mefi berɛ a, ngosa ngonwu bɛ anwumvoin, na ngosa ngɔfa bɛ nu biala ngɔwa ye agyapadeɛ nu ne ye aseɛ so.

¹⁶Na sɛ bɛkɔyere bɛ nwo bekosua me maen ye atee, ná bɛkɔfa me dumaa bɛkɔta ndaen kyɛ, ‘Kyɛ AWURADE te ase ye’, kyɛbɔ behyirele me maen maa bɛfale Baal bɛtale ndaen ne a, ye de bɛ bo kotimu wɔ me maen ne anu.

¹⁷Nakoso maen bɔ wandie ne, ye de ngotu sɔ maen ne abo ngɔsɛkye ye pasaa. AWURADE noa dwirɛ ɛne.”