Read Sehwi Yeremia 14 Bible Online

Yeremia 14 - Sehwi bible

Yeremia 14

¹AWURADE dwirɛ bɔ ɔlale ye ali hyirele Yeremia fale wawa piri ne anwo ne, ye ɛhe:

²Yuda di aworabɔlɛ, ye pambim mɔ ayɛ hodwoo; bɛlela ase aworabɔlɛ nu, na Yerusalem sufrɛ afo ahɔ anwuro.

³Ye atitire mɔ bɛsoma bɛ somvoɛ mɔ kyɛ bɛɛpena nzue; bɛbadwu abura nemɔ anwo, nakoso bennya nzue, yiti bɛfa bɛ bua mɔ too besa bɛkɔ. Bɛ nyunu agua ase, bafɛre, na bɛkata bɛ ti so.

⁴Aseɛnwo ayɛ katerepee, ɔnate esue bɔ ɔndɔ ngua aseɛ ne aso ti; akuafoɛ nemɔ nyunu agua ase, na bɛkata bɛ ti so.

⁵Ɛwanzane bɔ ɔwɔ buro po, ɔyakyi ɔwa adɔma berɛ, ɔnate kyɛ onnya aleɛ mma ye ne ati.

⁶Eburo afunum mɔ begyigyi mmokaa pralaa nemɔ aso, bede nwomeɛ ndɛndɛ bɛpena mvrama kyɛ ɛserɛ so ngyea, bɛ nye so yɛ bɛ wusiwusi, ofikyɛ bennya nyaa benni.

⁷“Ɔwɔ nu kyɛ y’amumuyɛɛ bua yɛ fɔ de, nakoso AWURADE, wɔ dumaa ti, boka yɛ. Yasa yɛ si paa, na yayɔ bɔne yatia wɔ.

⁸Ao Yisrael anyelasoɛ, ye Defoɛ wɔ amaneɛnwunɛ mmerɛ nu, nzu ati yeɛ ɛyɛ wɔ nwo kyɛ ɛwɔfoɛ wɔ aseɛ ye aso ɔ, kyɛ akwanduniɛ bɔ aleɛ asa bɔ ɔpena nekaa osikye ɔ?

⁹Nzu ati yeɛ ayɛ kyɛ ebie bɔ ye adwene ayɛ ye nwunyaenn ɔ, kyɛ katakyie bɔ ɔngora mbepɛ nne mmenia ɔ? Nakoso, ao AWURADE, ɛne yɛ yeɛ yɛte ɔ, na wɔ dumaa yeɛ ɔla yɛ so ɔ; nnɛyakyi yɛ nu!”

¹⁰Bɔ AWURADE kã kyire sɔ maen ye ɛhe, “Ɔyɛ bɛ fɛ kyɛ bekyinikyini ɔ, bɛnhyɛ bɛ nwo so wɔ bɛ hyininɛ nu. Yiti AWURADE nne bɛ ndo nu, afei ɔkɔkaye b’amumuyɛɛ, ná wahwe bɛ so wɔ bɛ bɔne nwo.”

¹¹Na AWURADE sele me kyɛ, “Nnɛsrɛ ma maen he ye yeeyɛlɛ.

¹²Sɛ bɛyɔ akɔngyere a, mengotie bɛ sufrɛ. Yeɛ sɛ bɛbɔ naen yeralɛ afɔleɛ ne aburoo afɔleɛ po a, mengole bɛ mengɔto nu. Na mmom ngɔfa ngrandɛ, ɛhɔen ne ewue anwonyerɛ ngohũhũ bɛ pasapasa.”

¹³Yeɛ ngane kyɛ, “Aa, AWURADE Nyameɛ! Nea kyɛ ngɔmhyɛlɛfoɛ nemɔ bɛkekã bekyire bɛ kyɛ, ‘Ngrandɛ ngohũhũ ɛmɔ, yeɛ ɛhɔen ngɔpe ɛmɔ wa, na mmom ngɔmaa ɛmɔkonya asomdwee bɔ odi mu ɔ wɔ ɛwa.’”

¹⁴Na AWURADE sele me kyɛ, “Ngɔmhyɛlɛfoɛ nemɔ bɛfa me dumaa bɛhyɛ ngɔndorɔ. Nnzomane bɛ, mmmane bɛ ahyɛdeɛ biala, yeɛ nngane edwirɛ biala nngyirele bɛ. Ngondombo nyekyire, ngonyaayelɛ, edwirɛ mbaen mbaen ne bɛ bɔbɔ bɛ ti anu dwirɛ yeɛ bɛhyɛ ye nwo ngɔm bekyire ɛmɔ ɔ.

¹⁵Yiti bɔ AWURADE kã fa sɔ ngɔmhyɛlɛfoɛ nemɔ nwo ɛhe: Bɛ yeɛ bɛfa me dumaa bɛhyɛ ngɔm, bɔ nna me yeɛ nzomane bɛ ɔ. Nakoso bɛnwa, ‘Koɛ ne ɛhɔen ngɔwa aseɛ he aso.’ Sɔ ngɔmhyɛlɛfoɛ nemɔ, ngrandɛ ne ɛhɔen yeɛ okohũhũ bɛ ɔ.

¹⁶Mmenia bɔ ngɔmhyɛlɛfoɛ nemɔ bɛhyɛ ngɔm bekyire bɛ ne, bekogyi bɛ (fuin) bekogua Yerusalem dwaaso, ɔnate ɛhɔen ne ngrandɛ ne ati. Na bengonya ebiala maa ongosie bɛ ne bɛ ye mɔ ne bɛ mma mmienzua mɔ ne bɛ mma mmrasua mɔ, ofikyɛ ngɔma b’amumuyɛɛ kɔbɔ bɛ ti so.

¹⁷“Yiti kã sɔ dwirɛ he kyire bɛ: ‘Ma me nye ɔporo moen kɔngɔen ne eyia, nnɛma ye bo pɛ; ofikyɛ me maen awa brasua ababunu ne, babɔ ye bato ase buramm; bapura ye piri paa.

¹⁸Sɛ mekɔ buro a, yieee, bɛ bɔ batotɔ ngrandɛ noa ɛhe! Yeɛ sɛ mewura kuro ne anu a, yieee, bɛ bɔ ɛhɔen ama babɔ anwonyerɛ ɛhe! Ofikyɛ ngɔmhyɛlɛniɛ ne ɔsɔfo po, bekyinikyini wɔ aseɛ bɔ bɛnze so ɔ so.’ ”

¹⁹Aso apo Yuda koraa? Sion nwo ayɛ wɔ kra tɛ anaa? Nzu ati yeɛ abobɔ yɛ agua berɛ maa yɛnnya ye noa ayire ye? Yɛ nye lale asomdwee ate, nakoso nikye paa biala wamvi nu wamma. Yɛ nye lale anwonyerɛsalɛ mmerɛ ate, nakoso, yieee, ahunundetelɛ mmom yeɛ watɔ yɛ so ɔ!

²⁰Ao AWURADE, yɛde yɛ bɔne yɛto nu, yeɛ yɛde yɛ nana mɔ b’amumuyɛɛ yɛto nu, ofikyɛ yayɔ bɔne yatia wɔ.

²¹Ɔnate wɔ dumaa ti, nnɛpo yɛ, nnɛgua w’animnyam ahennie bia ne anyunu ase; kaye, na nnɛpɛ w’apam bɔ ɛne yɛ yayɛ ne anu.

²²Amaenmaenso mmosoen nemɔ, aso bɛ nu bie kɔhora kɔma esue kɔtɔ? Anaa ewienu kɔhora kɔma esue kɔnyenenyene? Ao AWURADE yɛ Nyameɛ, aso nna wɔ ɔ? Ye sɔ ne ati, yafa yɛ wora yawura wɔ nu, ofikyɛ wɔ yeɛ ɛyɔ ɛhemɔ amukoraa ɔ.