Read Sehwi Yeremia 24 Bible Online

Yeremia 24 - Sehwi bible

Yeremia 24

¹Babilɔn hene Nebukadenesa hyele Yekonia bɔ ye baba ole Yuda hene Yehoakim, ɔne Yuda mbanyi, adwiililɛfoɛ ne dwumvoɛ mɔ nnure fale bɛ fili Yerusalem hɔle Babilɔn. Ye si ye, AWURADE lale nyekyire ali hyirele me, na nwuni borɔdoma ngɛndɛen nyɔ bɔ begyigyi AWURADE asɔneyɛɛ sua ne anyunu ɔ.

²Né borɔdoma paa paa bɔ ɔte kyɛ borɔdoma bɔ bali moa bate ɔ wɔ kɛndɛen ko anu; nakoso kɛndɛen ko ne de, borɔdoma bɔ ɔtte mayee koraa bɔ bedi a ɔnyɛ yé yeɛ ɔwɔ nu ɔ.

³Na AWURADE bisale me kyɛ, “Yeremia, bɔ enwu ye e, nzikyɛ ɛne?” Na mmuale kyɛ, “Borɔdoma ɔ. Borɔdoma paa nemɔ, ɔte paa paa, yeɛ borɔdoma bɔ ɔtte mayee nemɔ, ɔtte mayee koraa bɔ bedi ɔnyɛ yé ɔ.”

⁴Yeɛ AWURADE sa lale ye dwirɛ ali hyirele me kyɛ,

⁵“AWURADE Yisrael Nyameɛ nwa nyoo: Bɛ bɔ bahye bɛ nnure bafi Yuda, bɔ maye bɛ mafi ɛwa mahɔ Kaldeafoɛ aseɛ so ne, ngobu bɛ kyɛ bɛte paa kyɛ borɔdoma paa hemɔ.

⁶Bɛ yeeyɛlɛ ti, ngɔma me nye kɔhɔ bɛ nwo, na ngosa ngɔfa bɛ ngɔwa aseɛ he aso. Ngɔmaa bɛ bo kotimu, na mengɔma bɛngɔtɔ ase. Ngolua bɛ, na mengotutu bɛ bo.

⁷Na ngɔma bɛ nimdeɛ bɔ ɔkɔmaa bekonwu me kyɛ me ole AWURADE ɔ. Bɛkɔyɛ me maen, ná me wora mayɛ bɛ Nyameɛ, ofikyɛ bɛkɔfa b’ahone amukoraa bekosa bɛkɔwa me berɛ.

⁸“Nakoso AWURADE nwa nyoo: Kyɛbɔ borɔdoma bɔ ɔtte mayee, bɔ bedi a ɔnyɛ yé ne ɔte ne, sɔ ala yeɛ ngobu Yuda hene Sedekia ɔne ye mbanyi ne Yerusalemfoɛ ngaa bɔ bɛkɔha aseɛ he aso ne, ɔne bɛ bɔ bɛte Misraim aseɛ so ne ɔ.

⁹Na ngɔyakyi bɛ maa bɛkɔsoa bɛ bɛkɔhɔ aseɛ ye aso ahennie amukoraa so maa bekonwu amaneɛ, na ngɔmaa bɛkɔkakyi animguaseɛ nikye, anyandera dwirɛ, ngorohoɛ nikye ne ɛnomalɛ nikye wɔ nekaa amukoraa bɔ ngɔfoa bɛ ngoogua ne.

¹⁰Na ngɔsoma ngrandɛ, ɛhɔen ne ewue anwonyerɛ maa bɛkɔhɔ bɛ so, kɔpem kyɛ bɛ boso konua bɔkɔɔ kofi aseɛ bɔ mva mane bɛ ne bɛ nana mɔ ne aso ɔ.