Read Sehwi Yeremia 25 Bible Online

Yeremia 25 - Sehwi bible

Yeremia 25

¹Yehoakim bɔ ye baba ole Yuda hene Yosia ne, ye ahennie afoɛ bɔ ɔtɔ so nna ne anu (sɔ mmerɛ ne te Babilɔn hene Nebukadenesa ahennie afoɛ bɔ oli moa ɔ), AWURADE dwirɛ bɔ ɔlale ye ali hyirele Yeremia fale Yudafoɛ amukoraa nwo,

²bɔ ngɔmhyɛlɛniɛ Yeremia hã hyirele Yudafoɛ amukoraa ne Yerusalemfoɛ amukoraa ne, ye ɛhe:

³“Ofi Yuda hene Yosia bɔ ye baba ole Amon ne, ye ahennie afoɛ bɔ ɔtɔ so buru ne nza bɔ ɔbaadwu ɛnɛ, bɔ ɔte afoɛ aburanyɔ ne nza ɔ, AWURADE ala ye dwirɛ ali ahyire me, na mahɔ so mahã mahyire ɛmɔ, nakoso ɛmɔandie.

⁴Na ɔwɔ nu kyɛ AWURADE hɔle so somane ye somvoɛ ngɔmhyɛlɛfoɛ amukoraa maa bɛwale ɛmɔ berɛ de, nakoso ɛmɔandie, yeɛ ɛmɔanyɛ asoɛ bandie.

⁵Bɛhane kyɛ, ‘Odi kyɛ ɛmɔ anu biala sakyera ye adwene fi ye bɔne atee ne ye bɔne yɔleɛ nwo, ná ɛmɔtena aseɛ bɔ AWURADE fa mane ɛmɔ ne ɛmɔ nana mɔ fi tete ne aso afebɔɔ.

⁶Na onni kyɛ ɛmɔkodi nyameɛ foforɛ mɔ asi bɛso bɛ bɛsɔne bɛ; yeɛ nnɛma ɛmɔfa ɛmɔ sa noa adwuma behu m’ahone maa mefɛ yaa, amaa ɔnate so mambrapra amaneɛ mangua ɛmɔ so.’

⁷Nakoso ɛmɔandie me dwirɛ, AWURADE noa dwirɛ ɛne. Na ɛmɔafa ɛmɔ sa noa adwuma bahu m’ahone maa mafɛ yaa bɔ wakakyi ɛmɔ so amaneɛnwunɛ ɔ.

⁸“Yiti Asafo AWURADE nwa nyoo: Ɔnate kyɛ ɛmɔandie me dwirɛ ne ati,

⁹yiti ɛ́mɔtie, ngɔsoma maa bɛkɔɔfa sorɔ dɔ mmusua amukoraa ne me somvoɛ Babilɔn hene Nebukadenesa bɛkɔwa, AWURADE noa dwirɛ ɛne, na ngɔfa bɛ ngɔwa maa bɛkɔho bekotia maen he, ɔne so ama, ɔne maen hemɔ amukoraa bɔ bapɛ ye nwo bayia ɔ. Ngohũhũ bɛ pasaa, ná mamaa bayɛ anwodwiri nikye, maen bɔ mmenia sobi bɛ noa gua bɛ so ɔ, ɔne kurofoen afebɔɔ.

¹⁰Asa koso, ngotu ɛhemɔ bo ngofi bɛ berɛ: anigye dwein nwo nga, ahurusililɛ nwo nga, atɔmvorɛ biaa nwo nga, atɔmvorɛ braa nwo nga, nyɔkoa nga, yeɛ kaneatalɛ.

¹¹Aseɛ ne amukoraa kɔkakyi kurofoen ne anwodwiri nikye, na maen maen hemɔ, bɛkɔso Babilɔn hene afoɛ aburasoo.

¹²Na ɔkɔwa kyɛ, afoɛ aburasoo ne asi ne, Babilɔn hene ne sɔ maen ne bɔ ɔte Kaldeafoɛ b’aseɛ ne, ngɔhwe bɛ so, ɔnate b’amumuyɛɛ ti, na ngɔma aseɛ ne kɔyɛ kurofoen afebɔɔ, AWURADE noa dwirɛ ɛne.

¹³Na me dwirɛ amukoraa bɔ mahã matia sɔ aseɛ ye, bɔ bahyerɛ ye mukoraa wɔ nwomaa he anu, bɔ Yeremia fa hyɛle ngɔm tiale maen maen mukoraa ne, ngɔmaa ɔkɔwa sɔ maen ne aso.

¹⁴Ofikyɛ maen maen mɔ pee ne ahemvo atitire kɔfa bɛ kɔyɛ ngoaa. Na ngotua bɛ so kerɛ kyɛbɔ bɛ yɔleɛ ne bɛ sa noa adwuma te ɔ.”

¹⁵AWURADE Yisrael Nyameɛ sele me kyɛ, “Ɛyaafɛlɛ nzaa kwangoa he bɔ otira me sa nu ye, de, ná ma maen amukoraa bɔ ngɔsoma wɔ bɛ berɛ ne bɛno.

¹⁶Bɛkɔno bɛkɔnate fofalifofali ná babobɔ laen, ɔnate ngrandɛ bɔ mésoma ye bɛ nu ne ati.”

¹⁷Yiti nnele kwangoa ne wɔ AWURADE sa nu, na mmane maen maen amukoraa bɔ AWURADE somane me bɛ berɛ ne bɛnone.

¹⁸Bɛ ɛhe: Yerusalem ne Yuda nguro, nu ahemvo ne nu nnehyeɛ, kyɛ bɛyɛ kurofoen, anwodwiri nikye, bɔ mmenia besobi bɛ noa gua bɛ so ɔ, ɔne ɛnomalɛ nikye, kyɛbɔ ɔte ɛnɛ ye;

¹⁹Misraim hene Faro, ye somvoɛ mɔ, ye nnehyeɛ mɔ ne ye maen amukoraa;

²⁰ne amanvrafoɛ amukoraa, Yuse aseɛ so ahemvo amukoraa, Filisti aseɛ so ahemvo amukoraa, yeɛ Asekelɔn, Gasa, Ekron ne Asedɔde ngaa ne;

²¹Edom, Moabo ne Amonfoɛ;

²²Tiro ahemvo amukoraa, Sidon ahemvo amukoraa ne supɔ amukoraa bɔ bɛwɔ ɛpo asi ne b’ahemvo,

²³Dedan, Tema, Buse ne mmenia amukoraa bɔ bepiapia bɛ ti angyɛnu ɔ;

²⁴Arabia ahemvo amukoraa, amanvrafoɛ bɔ bɛtete ɛserɛ so ɔ, b’ahemvo amukoraa;

²⁵Simiri ahemvo amukoraa, Elam ahemvo amukoraa, yeɛ Media ahemvo amukoraa,

²⁶sorɔ dɔ ahemvo amukoraa bɔ bɛwɔ dede ne bɛ bɔ bepingye ɔ bɛ nu biala, yeɛ wiase ahennie amukoraa bɔ bɛwɔ aseɛ ye aso ɔ. Na ɛhemɔ asi ne, Sesake[2] hene koso kɔno bie.

²⁷“Na ekose bɛ kyɛ, ‘Asafo AWURADE, Yisrael Nyameɛ nwa nyoo: Ɛ́mɔno ná ɛ́mɔbobo, ná ɛ́mɔfefe béfifi ase bɔ ɛmɔngodwɔso ko ɔ, ɔnate ngrandɛ bɔ ngɔfa ngɔwa ɛmɔ nu ne ati.’

²⁸“Na sɛ bambene so kyɛ bekole kwangoa bɔ otira wɔ sa nu ne bɛkɔno a, ye de se bɛ kyɛ, ‘Asafo AWURADE nwa nyoo: Odi kyɛ ɛmɔno!

²⁹Ofikyɛ, tie, kuro bɔ me dumaa la so ne yeɛ médi moa meprapra musue megua ye so ɔ, na ɛmɔ de, ɛmɔkɔfa ɛmɔ nwo bekoli tɔtorɔtɔɔ anaa? Ɛmɔngɔfa ɛmɔ nwo bengoli tɔtorɔtɔɔ, ofikyɛ mebaasoma ngrandɛ meba aseɛ so ama amukoraa so, Asafo AWURADE noa dwirɛ ɛne.’

³⁰“Yiti, fa sɔ dwirɛ hemɔ amukoraa hyɛ ngɔm tia bɛ, ná se bɛ kyɛ, ‘AWURADE kofi anwuro anwuro kɔbobɔ nu, na ɔkɔtea nu kofi ye atenaleɛ krongron ne anu berɛ; ɔkɔbobɔ nu serɛserɛ kogua ye atenaleɛ so, na ɔkɔtea nu kyɛ bɛ bɔ bétwi bobe ɔ kogua aseɛ ye aso ama amukoraa so.

³¹Dedeyɛlɛ ne kɔtrɛ kɔɔhã aseɛ noa dɔ, ofikyɛ AWURADE abɔ maen maen mɔ kwaadu; okobua anwoɔnaen amukoraa ndɛen, na ɔkɔma bɔnefoɛ mɔ bɛkɔtotɔ ngrandɛ noa, AWURADE noa dwirɛ ɛne.’

³²Asafo AWURADE nwa nyoo: Tie, musue piri ne ɔkɔtrɛ kofi maen so koodwu maen so, na mvrama piri bɔ ɔpɛ ye nwo ne okotu kofi aseɛ ne noa dɔ mɔ paa!

³³“Na bɛ bɔ AWURADE kohũhũ bɛ sɔ kyẽa ne, bɛkɔsamo berɛ kofi aseɛ noa kɔkã ye noa. Bengosu bɛ, bɛngɔboaboa bɛ noa, yeɛ bengosie bɛ, na bɛkɔkakyi fofoɛ wɔ aseɛ so.

³⁴“Ɛmɔ, mmoaenneafoɛ, ɛ́mɔbɔ awuye ná ɛ́mɔsu; mmoaen kure nemɔ so atitire mɔ, ɛ́mɔmunumunu ɛmɔ nwo wɔ nzoen nu, ofikyɛ ɛmɔ hunɛ ne ɛmɔ ayabɔlɛ ngyẽa ne wadwu, na ɛmɔkowuwu kyɛ mmoaen nyii bɔ balɔ ɔ.

³⁵Na mmoaenneafoɛ nemɔ, bengonya nekaa bɛngɔbɔ bɛ nwo adwaa; yeɛ mmoaen kure nemɔ so atitire nemɔ, bengonya atee bɛngɔnwati bɛngɔhɔ.

³⁶Tie! Mmoaenneafoɛ nemɔ bɛ suɛ, yeɛ mmoaen kure nemɔ bɛ so atitire nemɔ b’awuyebɔlɛ ne! Ofikyɛ AWURADE asɛkye bɛ nekaa bɔ bedidi ne.

³⁷Na asomdwee atenaleɛ nemɔ asɛkye pasaa, ɔnate AWURADE ɛyaafɛlɛ piri ne ati.

³⁸Wafi ye dabea kyɛ gyata; ofikyɛ bɛ maen ne akakyi kurofoen ɔnate pɔfoɛ ngrandɛ ne, ɔne ye ɛyaafɛlɛ piri ne ati.”