Read Sehwi Yeremia 26 Bible Online

Yeremia 26 - Sehwi bible

Yeremia 26

¹Yehoakim bɔ ɔte Yuda hene Yosia awa ne, ye ahennie n’ahyɛaseɛ ne, AWURADE lale sɔ dwirɛ he ali kyɛ,

²“AWURADE nwa nyoo: Gyina AWURADE awuro n’aluo berɛ, ná dwudwo kyire Yuda nguro nemɔ amukoraa bɔ bɛba AWURADE awuro berɛ bɛbasɔne ne. Na edwirɛ amukoraa bɔ mahyɛ wɔ kyɛ ɛhã hyire bɛ ne, kã kyire bɛ; nnɛye ko po fi nu.

³Ebiaa bekotie, ná ebiala wahwe ye nwo wafi ye bɔne atee nwo, amaa ɔnate so amaneɛ bɔ ɔnate bɛ bɔne yɔleɛ ti madwene ye nwo kyɛ ngɔprapra ngogua bɛ so ne, masesã m’adwene wɔ ye nwo.

⁴Kã kyire bɛ kyɛ, ‘AWURADE nwa nyoo: Sɛ ɛmɔanyɛ sotie bamma me banni me mmeraa bɔ mahyehyɛ mama ɛmɔ ne aso,

⁵ná ɛmɔandie me somvoɛ ngɔmhyɛlɛfoɛ nemɔ bɔ ngɔle so nzomane bɛ ɛmɔ berɛ ne bɛ noa dwirɛ, bɔ yeɛ ɛmɔandie ne,

⁶ye de, ngɔyɛ awuro he kyɛ Silo, na ngɔma kuro he kɔyɛ ɛnomalɛ nikyee ngɔma aseɛ ye aso maen maen amukoraa.’ ”

⁷Yiti asɔfo nemɔ ne ngɔmhyɛlɛfoɛ nemɔ ne maen ne amukoraa bɛtele kyɛ Yeremia ɔkã sɔ dwirɛ ne wɔ AWURADE awuro berɛ ɔ.

⁸Na ɔwale kyɛ, Yeremia hane edwirɛ amukoraa bɔ AWURADE fale ahyɛdeɛ mane ye kyɛ ɔhã hyire maen ne amukoraa yiele nen, asɔfo nemɔ ne ngɔmhyɛlɛfoɛ ne maen ne amukoraa bɛhyele ye, na bɛhane kyɛ, “Ehunɛ ala yeɛ odi kyɛ yɛku wɔ ɔ!

⁹Nzu ati yeɛ afa AWURADE dumaa ahyɛ ngɔm kyɛ, ‘Awuro he kɔyɛ kyɛ Silo, ná kuro ye koso kɔyɛ kurofoen, bɔ ebiala ngɔtena so ɔ’?” Na mmenia ne amukoraa bɛpɛle Yeremia nwo beyiale wɔ AWURADE awuro berɛ.

¹⁰Na Yuda mbanyi tele sɔ dwirɛ nemɔ nen, befili ahemvie berɛ bɛwale AWURADE awuro berɛ, na bɛtenatenane AWURADE awuro Anoa Foforɛ ne anu berɛ.

¹¹Yeɛ asɔfo nemɔ ne ngɔmhyɛlɛfoɛ nemɔ besele mbanyi nemɔ ne maen ne amukoraa kyɛ, “Sɔ akoaa he, ɔfata kyɛ beku ye ɔ, ofikyɛ wahyɛ ngɔm watia kuro ye, kyɛbɔ ɛmɔ bɔbɔ ɛmɔate ne.”

¹²Yeɛ Yeremia sele mbanyi nemɔ amukoraa ne maen ne amukoraa kyɛ, “AWURADE yeɛ ɔsomane me kyɛ mva edwirɛ bɔ ɛmɔate ye amukoraa nhyɛ ngɔm ndia awuro he ɔne kuro he ɔ.

¹³Yiti kekesaala ye, ɛ́mɔsakyera ɛmɔ adwene ne ɛmɔ yɔleɛ, ná ɛ́mɔtie AWURADE ɛmɔ Nyameɛ dwirɛ, na AWURADE kɔsesã ye adwene wɔ musue bɔ wahã kyɛ ɔkɔprapra kogua ɛmɔ so ne anwo.

¹⁴Na me mmom de, ɛ́mɔtie, nwɔ ɛmɔ sa nu. Bɔ ɔte paa ná ɔtengyɛ wɔ ɛmɔ nye so ne, ɛ́mɔfa beli me.

¹⁵Na mmom, ɛ́mɔnwu ye kyɛ amba, sɛ ɛmɔku me a, mogya bɔ odi be ɔ yeɛ ɛmɔkɔmaa ɔkɔbɔ ɛmɔ bɔbɔ deinn, kuro he ɔne nu ama bɛ ti so ɔ. Ofikyɛ nahorɛ nu, AWURADE yeɛ ɔsomane me ɛmɔ berɛ kyɛ mmanga sɔ dwirɛ ye amukoraa ngyire ɛmɔ maa ɔhɔ ɛmɔ so anu ɔ.”

¹⁶Yeɛ mbanyi nemɔ ne maen ne amukoraa besele asɔfo nemɔ ne ngɔmhyɛlɛfoɛ nemɔ kyɛ, “Biaa he, ɔmvata kyɛ beku ye ɔ, ofikyɛ AWURADE yɛ Nyameɛ dumaa nu yeɛ ogyi bɔ wadwudwo wahyire yɛ ɔ.”

¹⁷Yeɛ aseɛ ne aso mbanyi nemɔ bie bedwɔsole, na besele maen badwa ne amukoraa kyɛ,

¹⁸“Moreseteniɛ Mika hyɛle ngɔm wɔ Yuda hene Hesekia aberɛ so, na osele Yudafoɛ amukoraa kyɛ, ‘Bɔ Asafo AWURADE kã ɛhe: Bekofundam Sion kyɛ eboo, Yerusalem kɔkakyi esire esire, na bokaa bɔ awuro ne gyi so ne, ɔkakyi ɛhɔayeɛ.’

¹⁹Aso Yuda hene Hesekia ne Yudafoɛ amukoraa behuni ye anaa? Aso wanzuro AWURADE, yeɛ aso wanzrɛ AWURADE kyɛ ɔlo ye, maa ɔnate so AWURADE wanzesã ye adwene wɔ musue bɔ ɔhane kyɛ ɔkɔprapra kogua bɛ so ne anwo anaa? Nakoso yɛ de, musue piri paa yeɛ ɛmɔmaa yɛtwetwe yɛbrɛ yɛ nwo ɔ!”

²⁰Né biaa foforɛ bie koso wɔ berɛ bɔ ɔfa AWURADE dumaa hyɛ ngɔm ɔ. Ye ole Yuria bɔ ye baba ole Kiriate Yearimniɛ Semaya ne. Ye yeɛ ɔhyɛle ngɔm tiale kuro he ne aseɛ he, kyɛbɔ Yeremia deɛ ne te ne ala ɔ.

²¹Na mmerɛ bɔ Nana Yehoakim, ɔne ye katakyie mɔ amukoraa ne ye mbanyi amukoraa, bɛtele ye dwirɛ bɔ ɔhane nen, ɛhene ne yɛle ye adwene kyɛ okohu ye. Nakoso Yuria tele ye sɔ nen, né osuro, yiti ɔnwatili hɔle Misraim.

²²Yeɛ Nana Yehoakim somane Akibɔ awa bienzua Elnatan ne mmienzua bie mɔ maa bɛbokale ye so bɛhɔle Misraim,

²³na bɛɛhyele Yuria befili Misraim bɛfale ye bɛbrɛle Nana Yehoakim. Ɔfale ngrande huni Yuria, na ogyili ye fuin ne tole maen asieleɛ so.

²⁴Nakoso Yeremia de, né Safan awa Ahikam ogyi ye si, maa ye sɔ ati banye ye banwura maen ne sa maa bangu ye.