Read Sehwi Yeremia 27 Bible Online

Yeremia 27 - Sehwi bible

Yeremia 27

¹Yehoakim[3] bɔ ye baba ole Yuda hene Yosia ne, ye ahennie ne bo hyɛle ne, AWURADE lale sɔ dwirɛ ye ali hyirele Yeremia kyɛ,

²Bɔ AWURADE sele me ɛhe, “Fa nyamaa ne mmakaa yɔ kɔnnua ná fa to wɔ kɔme.

³Na fa ma ɛbɔfoɛ mɔ bɔ bawa Yuda hene Sedekia berɛ wɔ Yerusalem ne maa bɛɛfa bɛma Edom hene, Moabo hene, Amonfoɛ hene, Tiro hene ne Sidon hene.

⁴Fa ahyɛdeɛ ma bɛ maa bɛɛhã behyire bɛ mene nemɔ kyɛ, ‘Asafo AWURADE, Yisrael Nyameɛ nwa nyoo: Ɛ́mɔhã behyire ɛmɔ mene nemɔ kyɛ,

⁵“Me yeɛ mvale me tumi piri ne me tumi asaa mmɔle aseɛ, so mmenia ne so ngaka ɔ, na mefa mema ebiala bɔ me bɔbɔ mekuro ɔ.

⁶Na afei, mafa sɔ aseɛ nemɔ amukoraa mawura me somvoɛ Babilɔn hene Nebukadenesa sa, na mafa eburo ngaka mɔ po mawura ye sa kyɛ bɛso ye.

⁷Na maen maen amukoraa kɔso ye ne ɔwa ne ye anomaa, kɔpem kyɛ mmerɛ bɔ mahyehyɛ kyɛ ye maen ne ɔbra ayieleɛ ne okodwu ɔ; na afei maen maen pee ne ahemvo atitire kɔmaa ɔkɔso bɛ.

⁸Nakoso ɔkɔwa kyɛ, sɛ maen bie anaa ahennie bie yɛ kyɛ ɔngɔso sɔ Babilɔn hene Nebukadenesa, ná ɔngɔfa ye kɔme ngowura Babilɔn hene kɔnnua ne anu a, ye de ngɔfa ngrandɛ, ɛhɔen ne ewue anwonyerɛ ngɔhwe sɔ maen ne aso, kɔpem kyɛ ngɔfa ye so ngɔbɔ sɔ maen ne tɔɔ ɔ, AWURADE noa dwirɛ ɛne.

⁹Yiti, nnɛma ɛmɔtie ɛmɔ ngɔmhyɛlɛfoɛ, ɛmɔ ahɔmeɛ, ɛmɔ mmenia bɔ bekyirekyire laleɛ bo, ɛmɔ ngonyaayelɛfoɛ, anaa ɛmɔ musueyelɛfoɛ bɔ bɛkekã bekyire ɛmɔ kyɛ, ‘Ɛmɔngɔso Babilɔn hene’ ne.

¹⁰Ofikyɛ ngɔndorɔ yeɛ bedi bekyire ɛmɔ ɔ, kyɛbɔ ɔkɔyɛ bɔ bekotu ɛmɔ bo bekofi ɛmɔ aseɛ so maa ɛmɔkɔhɔ dedeede ɔ; kyɛbɔ ɔkɔyɛ bɔ ngɔfoa ɛmɔ ngofi ɛwa maa ɛmɔkowuwu ɔ.

¹¹Nakoso maen biala bɔ ɔkɔfa ye kɔme kowura Babilɔn hene kɔnnua ne anu ná ɔkɔso ye ne, ngɔmaa ɔkɔha ye bɔbɔ ye aseɛ so, AWURADE noa dwirɛ ɛne. Na bɛkɔyɔ so adwuma bɛkɔtena so.’ ”

¹²Sɔ dwirɛ ne amukoraa yeɛ nga ngyirele Yuda hene Sedekia ɔ. Ngane kyɛ, “Ɛ́mɔfa ɛmɔ kɔme bewura Babilɔn hene ye kɔnnua ne anu, ná ɛ́mɔso ye ne ye maen, amaa ɛmɔanya ɛmɔ ti badidi nu.

¹³Nzu ati yeɛ odi kyɛ ɛne wɔ maen bewuwu wɔ ngrandɛ, ɛhɔen ne ewue anwonyerɛ noa, kyɛbɔ AWURADE wahã wafa maen biala bɔ ɔngɔso Babilɔn hene nwo ne ɔ?

¹⁴Ngɔmhyɛlɛfoɛ bɔ bɛkekã bekyire ɛmɔ kyɛ, ‘Nnɛma ɛmɔso Babilɔn hene’ nen, nnɛma ɛmɔtie bɛ dwirɛ, ofikyɛ ngɔndorɔ yeɛ bedi bekyire ɛmɔ ɔ.

¹⁵Ofikyɛ nnzomane bɛ, AWURADE noa dwirɛ ɛne. Nakoso bɛfa me dumaa bedi ngɔndorɔ. Ye sɔ ne ati, ngɔfoa ɛmɔ ngofi wa, na ɛmɔ ne ngɔmhyɛlɛfoɛ bɔ bedi ngɔndorɔ bekyire ɛmɔ ne, ɛmɔkowuwu.”

¹⁶Yeɛ nzele asɔfo nemɔ ne maen ne amukoraa kyɛ, “AWURADE nwa nyoo: Nnɛma ɛmɔtie ngɔmhyɛlɛfoɛ bɔ bɛhyɛ ngɔm bekyire ɛmɔ kyɛ, ‘Ɛ́mɔtie, ɔngɔhyɛ biala, bekosa bɛkɔfa AWURADE awuro berɛ nningyein nemɔ bekofi Babilɔn bɛkɔwa’ ne, ofikyɛ bédi ngɔndorɔ bekyire ɛmɔ.

¹⁷Nnɛma ɛmɔtie bɛ dwirɛ; odi kyɛ ɛmɔso Babilɔn hene, amaa ɔnate so ɛmɔanya ɛmɔ ti badidi nu. Nzu ati yeɛ odi kyɛ kuro he ɔbɔ ɔ?

¹⁸Na sɛ bɛte ngɔmhyɛlɛfoɛ amba, ná sɛ AWURADE fa bɛ so dwudwo amba de a, ye de maa bɛkoto bɛsrɛ Asafo AWURADE, amaa ɔnate so nningyein bɔ waha AWURADE awuro berɛ, Yuda hene ahemvie berɛ, ne Yerusalem ne, wangɔanni Babilɔn.

¹⁹Ofikyɛ bɔ AWURADE kã fa mbuna nemɔ, ayaa ne, nyinasoɛ nemɔ, ɔne nningyein ngaa bɔ waha kuro he anu,

²⁰bɔ Babilɔn hene Nebukadenesa wanzesa wangɔ, mmerɛ bɔ ɔhyele Yekonia bɔ ye baba ole Yuda hene Yehoakim, ɔne Yuda ne Yerusalem atitire amukoraa nnure fili Yerusalem hɔle Babilɔn ne, ye ɛhe:

²¹Nahorɛ nu, edwirɛ bɔ Asafo AWURADE, Yisrael Nyameɛ ɔkã fa nningyein bɔ waha AWURADE awuro berɛ, Yuda hene ahemvie ne Yerusalem nwo ole kyɛ:

²²Bɛkɔsesa bɛ bɛkɔhɔ Babilɔn, na bɛkɔha dɔ kɔpem kyẽa bɔ me nye kɔwa bɛ so ɔ, AWURADE noa dwirɛ ɛne. Na ngosa ngɔfa bɛ ngoogua wa bieku.”