Read Sehwi Yeremia 28 Bible Online

Yeremia 28 - Sehwi bible

Yeremia 28

¹Sɔ afoɛ ne anu ala, wɔ Yuda hene Sedekia ahennie n’ahyɛaseɛ ne anu, bosome bɔ ɔtɔ so nnu wɔ afoɛ bɔ ɔtɔ so nna ne anu, Hanania bɔ ye baba ole ngɔmhyɛlɛniɛ Asure bɔ ofi Gibeon ne, osele me wɔ AWURADE awuro berɛ wɔ asɔfo nemɔ ne maen ne amukoraa bɛ nyunu kyɛ,

²“Asafo AWURADE Yisrael Nyameɛ nwa: Kɔnnua bɔ Babilɔn hene wafa wato ɛmɔ kɔme anu ne, mabubu nu.

³Kyɛ odwu afoɛ nyɔ ne, AWURADE awuro nningyein amukoraa bɔ Babilɔn hene Nebukadenesa sesa fili wa hɔle Babilɔn ne, ngosa ngɔfa ngɔwa wa.

⁴Asa koso, Yekonia bɔ ye baba ole Yuda hene Yehoakim ne, ɔne mmenia amukoraa bɔ bɛhyele bɛ nnure befili Yuda bɛhɔle Babilɔn ne, ngosa ngɔfa bɛ ngɔwa wa, AWURADE noa dwirɛ ɛne, ofikyɛ kɔnnua bɔ Babilɔn hene wafa wato ɛmɔ kɔme anu ne, ngobubu nu.”

⁵Yeɛ ngɔmhyɛlɛniɛ Yeremia dwudwo hyirele ngɔmhyɛlɛniɛ Hanania wɔ asɔfo ne mmenia amukoraa bɔ né begyigyi AWURADE awuro berɛ ne, bɛ nyunu.

⁶Na ngɔmhyɛlɛniɛ Yeremia sele kyɛ, “Amen! AWURADE ɔ́yɔ ye sɔ ala; ngɔm bɔ ahyɛ ye, AWURADE ɔ́ma ɔbra nu, ná osa ɔfa AWURADE awuro berɛ nningyein, ɔne mmenia bɔ bahye bɛ nnure nemɔ amukoraa ofi Babilɔn ɔbra wa.

⁷Nakoso tie edwirɛ bɔ mekã maa ɛte, ná maen ne amukoraa bɛte ne.

⁸Ngɔmhyɛlɛfoɛ bɔ belili me ne wɔ yɛ nyunu moa bɛhyɛle ngɔm fi daa tete ne, bɛhyɛle ngɔm kyɛ koɛ, ɛhɔen ne ewue anwonyerɛ kɔwa maen maen pee ne ahennie mbiri mbiri mɔ so.

⁹Na ngɔmhyɛlɛniɛ bɔ ɔhyɛ ngɔm kyɛ asomdwee kɔwa ne, sɛ sɔ ngɔmhyɛlɛniɛ ne ye dwirɛ ne ba nu a, ye de bekonwu ye kyɛ AWURADE yeɛ wasoma sɔ ngɔmhyɛlɛniɛ ne amba.”

¹⁰Yeɛ ngɔmhyɛlɛniɛ Hanania, ɔyele kɔnnua ne fili ngɔmhyɛlɛniɛ Yeremia kɔme anu, na obubuli nu.

¹¹Na Hanania dwudwole wɔ maen ne amukoraa bɛ nyunu kyɛ, “AWURADE nwa nyoo: Kyɛ odwu afoɛ nyɔ ne, sɔaa yeɛ ngobubu Babilɔn hene Nebukadenesa kɔnnua ne anu ngofi maen maen amukoraa bɛ kɔme anu ɔ.” Na ngɔmhyɛlɛniɛ Yeremia sili nu hɔle.

¹²Ngɔmhyɛlɛniɛ Hanania bubuli kɔnnua ne anu fili ngɔmhyɛlɛniɛ Yeremia kɔme anu ne, ye si ye, AWURADE lale ye dwirɛ ali hyirele Yeremia kyɛ,

¹³“Kɔhã kyire Hanania kyɛ, ‘AWURADE nwa nyoo: Abubu mmakaa kɔnnua ne anu, nakoso buralɛ deɛ yeɛ ɛkɔfa kosi ye gya nu ɔ!

¹⁴Ofikyɛ Asafo AWURADE, Yisrael Nyameɛ nwa nyoo: Mafa buralɛ kɔnnua mato maen hemɔ amukoraa bɛ kɔme anu, kyɛ bɛso Babilɔn hene Nebukadenesa, na bɛkɔso ye. Mafa eburo ngaka po mawura ye sa.’”

¹⁵Na ngɔmhyɛlɛniɛ Yeremia sele ngɔmhyɛlɛniɛ Hanania kyɛ, “Hanania, tie, nna AWURADE yeɛ wasoma wɔ ɔ, nakoso ama maen he bale ngondombo bali.

¹⁶Yiti AWURADE nwa nyoo, ‘Tie, ngɔye wɔ ngofi aseɛ ye aso. Afoɛ he ala yeɛ ekowu ɔ, ofikyɛ ahã ɛlɔenyɛlɛ dwirɛ atia AWURADE.’”

¹⁷Sɔ afoɛ ne ala, ye bosome bɔ ɔtɔ so nzoo ne anu, ngɔmhyɛlɛniɛ Hanania wuli.