Read Sehwi Yeremia 3 Bible Online

Yeremia 3 - Sehwi bible

Yeremia 3

¹Mebisa ɛmɔ kyɛ, “Sɛ bienzua bie yira ɔye, ná braa ne fi ye berɛ kɔ, ná sɛ biaa foforɛ gya ye a, aso biaa ne kosa koogya ye bieku? Aso sɔ aseɛ ne nwo ngogua fiɛ petee? Ayɛ gyanderaniɛ ɛne wɔ kurofoɛ pee babɔ adwaman, nakoso ɛpena kyɛ esa ba me berɛ? AWURADE noa dwirɛ ɛne.

²To wɔ nye nea mmokaa pralaa nemɔ aso! Nisua yeɛ bɛ ne wɔ ammɔ adwaman ɔ? Ɛte atee mɔ noa yeɛ ɛnwondɛ wɔ kurofoɛ mɔ, kyɛ Araboniɛ bɔ ɔwɔ ɛserɛ so ɔ. Afa w’adwaman ne wɔ bɔne yɔleɛ agua aseɛ ne anwo fiɛ.

³Yiti nyenyenzue ne ayakyi tɔlɛ, yeɛ bamborɔ ne koso ɔndɔ ko, nakoso wɔ ndo nwiaa te kyɛ gyanderaniɛ deɛ, na ɛnze fɛrelɛ.

⁴Aso anzu amvrɛ me kekesaala ye kyɛ, ‘Me baba, ɛte me ndaluwa nu abiɛngoɛ,

⁵ɔkɔfɛ yaa afebɔɔ anaa, ye ahonehulɛ ne, ɔkɔtena berɛ kɔhɔ ayieleɛ?’ Tie, ahã sɔ de, nakoso ayɔ bɔne yɔleɛ kyɛbɔ ɛkɔhora ɔ.”

⁶Nana Yosia aberɛ so, AWURADE sele me kyɛ, “Yisrael bɔ onni nahorɛ mma me ne, anwu bɔ wayɔ ɔ? Kyɛbɔ osi fo hɔle bokaa biala so, ná ɔhɔle bakaa monɛ biala abo ɔɔbɔle adwaman wɔ berɛ ɔ?”

⁷Na ngane ye me ti anu kyɛ, ‘Ɛhe amukoraa bɔ wayɔ ye, ye si ye, okosa kɔwa me berɛ.’ Nakoso wanza wamma, na oliɛma brasua ngondomboniɛ Yuda nwuni ye.

⁸Onwuni kyɛ ɔnate adwaman bɔ asoserɛniɛ Yisrael ɔbɔle ne ati, nyirale ye mmane ye agyaayiralɛ krataa maa ɔhɔle; nakoso oliɛma brasua ngondomboniɛ Yuda wanzuro, na mmom ye koso ɔhɔle ɔɔbɔle adwaman.

⁹Ɔnate kyɛ né ommu adwamanbɔlɛ kyɛ ɔtte mayee ne ati, oguale aseɛ ne anwo fiɛ, na ɔne nyɔboɛ mɔ ne mmakaa yeɛ bɛbɔle adwaman ɔ.

¹⁰Nakoso ɛhe amukoraa si ne, oliɛma brasua ngondomboniɛ Yuda wanza wamva ye ahone amukoraa wamma me berɛ, na mmom ɔyɔle sɔ wɔ nnakannaka atee so, AWURADE noa dwirɛ ɛne.”

¹¹Yeɛ AWURADE sele me kyɛ, “Asoserɛniɛ Yisrael wahyire kyɛ ɔtengyɛ tra ngondomboniɛ Yuda.

¹²Kɔ sorɔ dɔ, ná kɔbɔ sɔ dwirɛ ne dawure kyɛ, ‘AWURADE nwa nyoo: Sa bra, asoserɛniɛ Yisrael. Mengɔfɛ wɔ so yaa, ofikyɛ mese anwumvoin, yiti mengɔfɛ yaa afebɔɔ, AWURADE noa dwirɛ ɛne.

¹³Wɔ de, de w’amumuyɛɛ to nu, kyɛ ayɛ AWURADE wɔ Nyameɛ nwo lɔen, afa wɔ ɔdɔ ama ɛwɔfoɛ mɔ wɔ bakaa monɛ biala abo, na ɛmɔandie me noa dwirɛ, AWURADE noa dwirɛ ɛne.

¹⁴Ao, mmaa asoserɛfoɛ, ɛ́mɔsa bɛbra, AWURADE noa dwirɛ ɛne. Me yeɛ nde ɛmɔ Mene ɔ; ngɔye sona ko ngofi kuro biala so, ná maye mmenia nyɔ mafi abusua biala anu, ná mafa ɛmɔ mawa Sion.

¹⁵“ ‘Ngɔye neafoɛ mɔ bɔ bɛla m’ahone nwo ɔ ngɔma ɛmɔ, bɔ bɛkɔfa nimdeɛ ne nworɛ bɛkɔtete ɛmɔ ɔ.

¹⁶Na ɔkɔwa kyɛ, sɛ ɛmɔta pee ná ɛmɔsone wɔ aseɛ ne aso sɔ mmerɛ ne anu a, ye de bɛngɔhɔ so bɛngɔhã kyɛ, ‘AWURADE apam alaka ne.’ Ɔngɔwa bɛ ti anu, bɛngɔkaye, bɛngɔdwenedwene ye nwo, yeɛ bɛngɔyɛ ye foforɛ ko, AWURADE noa dwirɛ ɛne.

¹⁷Sɔ mmerɛ ne, bɛkɔfrɛ Yerusalem AWURADE ahennie bia, na maen maen amukoraa bekooyia berɛ, wɔ AWURADE dumaa nu wɔ Yerusalem, na bɛngɔyɛ asoserɛ bɛngɔyɔ b’apɛdeɛ tɛɛ nemɔ ko.

¹⁸Sɔ mmerɛ ne anu, Yuda awuro ama kɔboka Yisrael awuro ama nemɔ aso, na aseɛ bɔ mva mane ɛmɔ nana mɔ maa ɔyɛle b’agyapadeɛ ne, bɛkɔbɔ nu bekofi sorɔ dɔ aseɛ ne aso bɛkɔwa so.

¹⁹“ ‘Ndwenene kyɛ ngɔmaa ɛkɔyɛ titire paa wɔ me mma mɔ anu, na ngɔma wɔ aseɛ bɔ ɔkye aleɛ ɔ, bɔ ɔte maen mɔ b’agyapadeɛ paa paa ɔ. Na né medwene kyɛ ɛkɔfrɛ me ‘Me Baba’ bɔ ɛngɔyakyi me si lilɛ ɔ.

²⁰Amba, brasua bɔ onni nahorɛ ne, kyɛbɔ onni nahorɛ mma ohu ne, sɔ ala yeɛ Yisrael awuro ama, ɛmɔanni nahorɛ bamma me ɔ, AWURADE noa dwirɛ ɛne.

²¹Mmenia te komviɛ bie wɔ mmokaa pralaa nemɔ aso, bɔ Yisrael mma mɔ besu bɛpa kyerɛ ɔ, ofikyɛ bali b’atee nwo makyebu, na bama bɛ wora afi AWURADE bɛ Nyameɛ.

²²Ao mmaa asoserɛfoɛ, ɛ́mɔsa bɛbra, na ngɔsa ɛmɔ asoserɛ ne anwonyerɛ. Yɛsrɛ wɔ, yɛba wɔ berɛ, ofikyɛ wɔ yeɛ ɛte AWURADE yɛ Nyameɛ ɔ.

²³Amba, dede bɔ ɔwɔ mmokaa nemɔ aso ne, ɔne mmokaa nemɔ aso anigye ne, ɔte mbaen. Amba, AWURADE yɛ Nyameɛ nu yeɛ Yisrael ngoalelɛ wɔ ɔ.

²⁴“Nakoso ofi yɛ mmerandeɛ nu yeɛ sɔ animguaseɛ nikyee ne wamaa bɔ yɛ nana mɔ bafɛ bapena ne amukoraa wafi yɛsa ɔ: bɛ mmoaen ne bɛ nandwie, yeɛ bɛ mma mmienzua ne bɛ mma mmrasua.

²⁵Ɛ́mɔma yɛlela berɛ wɔ y’animguaseɛ nu, ná yɛ nwo nyanzoen ne ɔkata yɛ so, ofikyɛ ofi yɛ ngwadaa nu bɔ ɔbaadwu ɛnɛ ye, yɛ ne yɛ nana mɔ yayɔ bɔne yatia AWURADE yɛ Nyameɛ, na yanyɛ sotie yamma AWURADE yɛ Nyameɛ noa dwirɛ.”