Read Sehwi Yeremia 30 Bible Online

Yeremia 30 - Sehwi bible

Yeremia 30

¹Edwirɛ bɔ AWURADE lale ye ali hyirele Yeremia ɛhe:

²“AWURADE Yisrael Nyameɛ nwa nyoo: Kyerɛ edwirɛ amukoraa bɔ mahã mahyire wɔ ne gua nwomaa nu.

³Na tie, AWURADE nwa nyoo: Mmerɛ bie ɔ́ba bɔ ngosa ngɔfa me maen Yisrael ne Yuda ngofi nnurehyelɛ nu ngɔwa ɔ, AWURADE noa dwirɛ ɛne, na aseɛ bɔ mva mane bɛ nana mɔ ne, ngosa ngɔfa bɛ ngɔwa so maa bɛkɔfa bɛkɔyɛ bɛ deɛ.”

⁴AWURADE dwirɛ bɔ ɔhã fale Yisrael ne Yuda nwo ɛhe:

⁵“AWURADE nwa nyoo: Yate ahunundetelɛ nga, yate esurolɛ nga, nna asomdwee ɔ.

⁶Afei, ɛ́mɔbisa ná ɛmɔnwu ye e, sɛ aso bienzua kɔhora kɔfo aworɛ so anaa? Nakoso ɔwale ye sɛ bɔ menwu kyɛ bienzua katakyie biala wasɔ ye sisia kyɛ brasua bɔ wafo aworɛ so ye, bɔ bɛ mukoraa bɛ nyunu ayɛ hoyaa ye?

⁷Edwirɛ awa oo! Ofikyɛ sɔ kyẽa ne, ɔte kyẽa piri, bɔ kyẽa biala nne berɛ bɔ ɔte kyɛ ye ɔ. Ɔte aworabɔlɛ mmerɛ ma Yakob, nakoso okonya ye ti kodidi nu kofi nu.

⁸“Na Asafo AWURADE nwa nyoo: Ɔkɔwa kyɛ, sɔ kyẽa ne, ngobubu ye kɔnnua ne anu ngofi wɔ kɔme anu, na ngɔtete nyamaa bɔ ɔkyekye wɔ ne anu, na amanvrafoɛ bɛngɔfa ye bɛngɔyɛ akoaa ko.

⁹Na mmom bɛkɔso AWURADE bɛ Nyameɛ ne bɛ hene Dawide[5] bɔ ngosiesie ye ngɔma bɛ ne.

¹⁰“Yiti wɔ, me somvoɛ Yakob, nnɛsuro, AWURADE noa dwirɛ ɛne. Ao Yisrael, nnɛma wɔ kunu tete wɔ; ofikyɛ tie, ngɔpepɛ ngole wɔ ngofi dedeede, na wɔ boso ama mɔ, ngɔpepɛ ngole bɛ ngofi aseɛ bɔ bahye bɛ nnure bahɔ so ne aso. Yakob kosa kɔwa kɔɔtena asomdwee nu konn, na ebiala ngonwunanwuna ye.

¹¹Ofikyɛ ngyi wɔ si kyɛ ngɔpepɛ ngole wɔ, AWURADE noa dwirɛ ɛne; na maen maen amukoraa bɔ mabɔ wɔ masande maagua so ne, ngɔbɔ bɛ tɔɔ, nakoso wɔ de, mengɔbɔ wɔ tɔɔ. Na mmom ngɔhwe wɔ so kyɛbɔ ɔfata ɔ, na mengɔma ɛngɔfa wɔ nwo ngoli tɔtorɔtɔɔ.

¹²“Ofikyɛ AWURADE nwa nyoo: Wɔ kena ne te kenangɔ, wɔ puralɛ ne yɛ suro.

¹³Ebiala nne berɛ bɔ odi wɔ dwirɛ ma wɔ bɔ ɔkɔteta wɔ ngena nemɔ anu ɔ. Wɔ, kena ayire biala nne berɛ mma wɔ.

¹⁴Wɔ dɔfo amukoraa bɛ wora afi wɔ; bɛmbena wɔ si atee, ofikyɛ mapura wɔ kyɛbɔ pɔfoɛ kopura wɔ ɔ; yeɛ mahwe wɔ so kyɛbɔ atianuserɛniɛ kɔhwe wɔ so ɔ, ofikyɛ w’amumuyɛɛ sone pee, yeɛ wɔ bɔne ayɛ buburugyaa.

¹⁵Nzu ati yeɛ ɔnate wɔ puralɛ ne ati esu ɔ? Wɔ nwo bɔ otutu wɔ ne, olle ayire. Ɔnate kyɛ w’amumuyɛɛ sone pee, ná wɔ bɔne ayɛ buburugyaa ne, yiti yeɛ mafa sɔ dwirɛ he mali wɔ ye.

¹⁶Yiti bɛ bɔ bɛtete wɔ nu pasapasa ne amukoraa, bɛ koso ebiemɔ kɔtete bɛ nu pasapasa, na wɔ pɔfoɛ mɔ amukoraa, bɛ nu biala bɛkɔhye ye nnure bɛkɔhɔ; bɛ bɔ bɛfẽ wɔ nningyein ne, bɛ koso ebie mɔ kɔfẽ bɛ deɛ, na bɛ bɔ bɛbɔ wɔ so apaa ne, ngɔmaa ebiemɔ kɔbɔ bɛ mukoraa bɛ so apaa.

¹⁷Ofikyɛ ngɔmaa ekosa kɔte apɔ, yeɛ ngɔma wɔ ngena nemɔ kɔhɔ, AWURADE noa dwirɛ ɛne. Ofikyɛ bɛfrɛle wɔ: Bɔ bapɛ ye asue ɔ. ‘Sion bɔ ebiala mbena ye si atee ɔ!’

¹⁸“Bɔ AWURADE kã ɛhe: Tie, ngɔfa Yakob ɛtena sua mɔ ngosa ngofi nnurehyelɛ nu ngɔwa, na ngonwu ye atenaleɛ nemɔ anwumvoin. Bekosa bɛkɔkyekye kuro ne wɔ ye boso, ná bagyina ahemvie ne wɔ nekaa bɔ né ogyi daa ne.

¹⁹Asennaa dwein kofi bɛ nu kɔwa, yeɛ esebɔlɛ koso kofi bɛ nu kɔwa. Ngɔmaa bɛkɔta bɛkɔyɛ pee, na bɛngɔyɛ kãa bie. Ngɔmaa bekonya animnyam koso, na bɛ nyunu ngogua ase.

²⁰Bɛ mma mɔ kɔyɛ kyɛbɔ né bɛte daa ne ala, bɛ badwa ne kotindim wɔ me nyunu; na bɛ bɔ bɛtane bɛ nye ne, ngɔhwe bɛ mukoraa bɛ so.

²¹Bɛ bɔbɔ bɛ nu yeɛ b’atitirefoɛ kofi ɔ, yeɛ bɛ maenbulɛniɛ ne koso kofi bɛ nu. Ngɔmaa ɔkɔhwe kopingye, na okopingye me; ofikyɛ nwa yeɛ ɔkɔhora kosi ye hue kopingye me ɔ? AWURADE noa dwirɛ ɛne.

²²Ɛmɔkɔyɛ me maen, ná me koso mayɛ ɛmɔ Nyameɛ.”

²³Ɛ́mɔtie, AWURADE mvrama bɔ ɔpɛ ye nwo ne! Ole ɛyaa otu kɔ, mvrama bɔ ɔpɛ ye nwo bɔ ongyina ɔ, na okotu koofĩ bɔnefoɛ ti so.

²⁴AWURADE ɛyaa piri ne, ongosa ye si, kɔpem kyɛ bɔ wayɛ ye adwene kyɛ ɔkɔyɔ ne, ɔkɔyɔ koyie koraa ɔ. Ngyẽa bɔ oli nziɛ ne, ɛmɔkɔte ɛhe abo.