Read Sehwi Yeremia 33 Bible Online

Yeremia 33 - Sehwi bible

Yeremia 33

¹AWURADE lale ye dwirɛ ali hyirele Yeremia ye pɛen nyɔ so, mmerɛ bɔ né ɔtɛ la kuku nu aluo berɛ ne, kyɛ,

²“AWURADE bɔ ɔbɔle nikye ɔ, AWURADE bɔ ɔhyehyɛle fa tindimuni berɛ, bɔ ye dumaa ole AWURADE ne, ɔnwa nyoo:

³Sũ frɛ me, na ngobua wɔ, na ngɔla edwirɛ mbiri mbiri bɔ wafea wɔ bɔ ɛnze ɔ ali ngohyire wɔ.

⁴Ofikyɛ kuro he aso sua mɔ ne Yuda ahemvo mɔ sua mɔ bɔ bɛfale nyinasoɛ ne ngrandɛ bedwiri beguale ne, bɔ AWURADE Yisrael Nyameɛ, ɔkã fa bɛ nwo ɛhe:

⁵Bɛ ne Kaldeafoɛ nemɔ bɛbaaho, na bɛkɔfa mmenia bɔ nne ɛyaa ne ahonehulɛ ngukuni bɛ nemɔ bɛ fuin bɛkɔsamo nguro nemɔ aso tɛkyɛ, ofikyɛ maye me nye mafea sɔ kuro he, ɔnate b’amumuyɛɛ amukoraa ne ati.

⁶Tie, ngɔma kuro he anwo kɔsande ye ná wate apɔ, na ngɔsa bɛ anwonyerɛ. Na ngɔla asomdwee ne nahorɛlilɛ mmorosoɛ ali ngohyire bɛ.

⁷Na Yuda ne Yisrael mmenia bɔ bahye bɛ nnure bahɔ ne, ngɔmaa bekosa bɛkɔwa, na ngɔmaa bekosa bekotindim kyɛ bɛ daa ne ala.

⁸B’amumuyɛɛ amukoraa bɔ ɔnate so bayɔ bɔne batia me ne, ngɔte bɛ nwo ngofi ye nwo. Na b’amumuyɛɛ amukoraa bɔ ɔnate so bayɔ bɔne, ná bayɔ mvomsoɛ batia me ne, ngɔfa ngɔhyɛ bɛ.

⁹Na kuro he dumaa kɔyɛ anika, ayɛyelɛ ne animnyam kɔma me wɔ aseɛ ye aso maen amukoraa bɛ nyunu, na bɛkɔte nningyein paa amukoraa bɔ meyɔ mema bɛ ne; bekosuro, ná bɛ nwo kodwiri bɛ, ɔnate nningyein paa amukoraa ne asomdwee amukoraa bɔ ngɔfa ngɔma bɛ ne ati.

¹⁰“AWURADE nwa nyoo: Ɛwa bɔ ɛmɔnwa, ‘Wayɛ kurofoen bɔ sona anaa kaka biala ɔnne so’ ne, Yuda nguro ne Yerusalem dwaa mɔ so bɔ wayɛ kurofoen, bɔ sona anaa kuromani anaa kaka biala ɔnne so ne, bekosa bɛkɔte

¹¹ahurusililɛ nwo nga, anigye nwo nga, atɔmvorɛ biaa nwo nga, yeɛ atɔmvorɛ braa nwo nga; yeɛ bɛ bɔ bɛto dwein bɛfa ayɛyelɛ afɔleɛ bɛba AWURADE awuro berɛ ɔ, bɛ nga kyɛ, Ɛ́mɔye Asafo AWURADE ayɛ, ofikyɛ AWURADE te paa, na ye ɔdɔ bɔ onni ngasi ne, ɔwɔ berɛ afebɔɔ!’ Ofikyɛ bɛ bɔ bahye bɛ nnure bafi aseɛ ye aso bahɔ ne, ngosa ngɔfa bɛ ngɔwa, kyɛ daa ne ala, AWURADE noa dwirɛ ɛne.

¹²“Bɔ Asafo AWURADE kã ɛhe: Ɛwa bɔ wayɛ kurofoen, bɔ sona anaa kaka biala ɔnne so ye, yeɛ ye nguro ne amukoraa so, ɔkɔkakyi nekaa bɔ mmoaenneafoɛ bɛma bɛ mmoaen kure aleɛ, ná bɛmaa bɛdeda berɛ ɔ.

¹³Mmokaa maen nguro nemɔ aso, bɔnza nu nguro nemɔ aso, ngwaen dɔ nguro nemɔ aso, Benyamin aseɛ so, Yerusalem nwo aseɛ nemɔ aso, yeɛ Yuda nguro nemɔ aso, sona bɔ ɔka mmoaen onwu bɛ somaa ne, okosa ɔkɔha bɛ, AWURADE noa dwirɛ ɛne.

¹⁴“Tie, mmerɛ bie ɔ́ba, bɔ ndɛenvɛen bɔ mva nhyɛle Yisrael awuro ama ne Yuda awuro ama bɛ bɔ ne, ngɔmaa ɔkɔwa nu ɔ, AWURADE noa dwirɛ ɛne.

¹⁵ Sɔ ngyẽa nemɔ anu, sɔ mmerɛ ne, ngɔmaa Tenenee Mmaen bie kofifi kɔma Dawide; na okobua ndɛen turoloo, ná wayɔ bɔ ɔte tenenee ɔ wɔ aseɛ ne aso.

¹⁶Sɔ ngyẽa nemɔ anu, Yuda konya ye ti kodidi nu, na Yerusalem kɔtena asomdwee nu. Na dumaa bɔ bɛkɔfa bɛkɔfrɛ ye ole, ‘AWURADE Yɛ Tenenee.’

¹⁷“Ofikyɛ AWURADE nwa nyoo: Sona bɔ ɔkɔtena Yisrael awuro ama ahennie bia so ne, ɔngɔbɔ Dawide le,

¹⁸na sona bɔ ogyina me nyunu ɔbɔ naen yeralɛ afɔleɛ, aburoo afɔleɛ ne afɔleɛ mɔ afebɔɔ ne, ɔngɔbɔ Lewifoɛ bɔ bɛte asɔfo ne le.”

¹⁹AWURADE lale ye dwirɛ ali hyirele Yeremia kyɛ,

²⁰“AWURADE nwa nyoo: Sɛ ɛmɔkɔhora bɛkɔsɛkye me ne eyia y’apam, yeɛ me ne kɔngɔen y’apam, amaa ɔnate so alehyeleɛ ne alesaleɛ bɛngɔwa mmerɛ bɔ odi kyɛ bɛba hɔ a,

²¹ye de me ne me somvoɛ Dawide apam ne kɔhora kɔsɛkye, amaa ɔnate so ongonya baa bienzua bɔ ɔkɔtena ye ahennie bia so koli hene ɔ; na sɔ ala yeɛ me ne me somvoɛ mɔ Lewifoɛ bɔ bɛte asɔfo nemɔ y’apam ne ɔte ɔ.

²²Kyɛbɔ bɛngɔhora ewienu nzramaa ka, ná bɛngɔhora mboanoa anweaa susu ne, sɔ alaa yeɛ ngɔmaa me somvoɛ Dawide ye boso ama, yeɛ Lewifoɛ bɔ bɛso me ne, bɛkɔta pee ɔ.”

²³Na AWURADE sa lale ye dwirɛ ali hyirele Yeremia kyɛ,

²⁴“Aso ɛttele kyɛ maen he bɛkekã kyɛ, ‘AWURADE apo mmusua nyɔ bɔ ɔneaneane nu yele bɛ ne’ ɔ? Ye sɔ ati, mmenia abu me maen animtia bɔ bemmu bɛ ko kyɛ bɛtte maen ɔ.

²⁵Yiti AWURADE nwa nyoo: Sɛ me ne alehyeleɛ ne alesaleɛ y’apam, yeɛ anwuro ne aseɛ nhyehyɛleɛ ne, mamma bandindim a,

²⁶ahaa ye de ngɔpo Yakob ne me somvoɛ Dawide bɛ boso ama, bɔ mengɔneanea nu mengɔye ye boso ama nemɔ anu ko maa ongoli hene wɔ Abraham, Yisake ne Yakob bɛ boso ama so ɔ. Ofikyɛ ngosa ngɔfa bɛ ngofi nnurehyelɛ nu ngɔwa, na ngonwu bɛ anwumvoin.”