Read Sehwi Yeremia 34 Bible Online

Yeremia 34 - Sehwi bible

Yeremia 34

¹ Mmerɛ bɔ Babilɔn hene Nebukadenesa ne ye koɛhonɛfoɛ amukoraa ne aseɛ so ahennie amukoraa bɔ bewura ye bo, ɔne maen maen amukoraa bɛfale koɛ bɛɛtetale Yerusalem ne ye nwo nguro amukoraati ne, AWURADE lale ye dwirɛ ali hyirele Yeremia kyɛ,

²“Bɔ AWURADE Yisrael Nyameɛ kã ɛhe: Kɔ ná ɛne Yuda hene Sedekia beedwudwo, na se ye kyɛ, ‘Tie, ngɔfa kuro he ngowura Babilɔn hene sa, na ɔkɔto nu see kɔyera ye.

³Engonya wɔ ti ngodidi nu ngofi ye sa nu, na mmom ɛhyelɛ yeɛ bɛkɔhye wɔ bɛkɔfa wɔ bekowura ye sa ɔ. Wɔ nye kɔbɔ Babilɔn hene nyunu ma ye wora ye nye kɔbɔ wɔ nyunu. Ɔne wɔ bekodwudwo, na ɛkɔhɔ Babilɔn.

⁴Nakoso, ao Yuda hene Sedekia, tie AWURADE noa dwirɛ! Bɔ AWURADE kã fa wɔ nwo ole kyɛ, ‘Engowu wɔ ngrandɛ noa,

⁵na mmom ekowu asomdwee nu. Na kyɛbɔ bɛyerale ayirefona bɛmane wɔ nana mɔ bɔ belili wɔ nyunu moa belili hene ne, sɔ ala yeɛ mmenia kɔyera ayirefona bɛkɔma wɔ, ná basu wɔ kyɛ, “Yɛ mene, yaakɔ oo!” Ofikyɛ me yeɛ mahã edwirɛ ne ɔ, AWURADE noa dwirɛ ɛne.”

⁶Yeɛ ngɔmhyɛlɛniɛ Yeremia hane sɔ dwirɛ ne amukoraa hyirele Yuda hene Sedekia wɔ Yerusalem,

⁷mmerɛ bɔ Babilɔn hene koɛhonɛfoɛ bɛfale koɛ bɛɛtetale Yerusalem ne Yuda nguro bɔ baha ne amukoraa, yeɛ Lakise ne Aseka ne; ofikyɛ bɛ ngome yeɛ né bɛte Yuda nguro bɔ baha bɔ babɔ bɛ nwo waen ɔ.

⁸AWURADE lale ye dwirɛ he ali hyirele Yeremia. Anzana ɔbaala ye ali ne, né Nana Sedekia ne maen ne amukoraa bayɛ apam wɔ Yerusalem, kyɛ ɔfa ɔbɔ fawɔnwodi nwo dawure ma bɛ kyɛ,

⁹odi kyɛ ebiala yakyi ye Hebriniɛ kanganiɛ anaa Hebriniɛ afaneɛ maa ɔfa ye nwo di, maa ye sɔ ti onni kyɛ ebiala fa oliɛma Yudaniɛ yɛ kanganiɛ.

¹⁰Na atitire nemɔ amukoraa ne maen ne amukoraa bɔ belele apam ne bɛtole nu kyɛ ebiala ɔyakyi ye kanganiɛ maa ɔfa ye nwo oli ne, kyɛ bienzua oo, kyɛ brasua oo, bɔ onni kyɛ ɔso bɛ ko ne, bɛ mukoraa bɛyɛle sotie, na bɛyakyili bɛ maa bɛfale bɛ nwo belili.

¹¹Nakoso nziɛ ye, besa bɛsesane b’adwene, na bɛhyele nganga ne afaneɛ mɔ bɔ bayakyi bɛ maa bafa bɛ nwo bali ne, na bɛhyɛle bɛ so maa besa bɛyɛle nganga ne afaneɛ mɔ.

¹²Yiti AWURADE dwirɛ fili AWURADE berɛ sele Yeremia kyɛ,

¹³“AWURADE Yisrael Nyameɛ nwa nyoo: Mmerɛ bɔ nyele ɛmɔ nana mɔ mvili ngoaasolɛ tebea nu wɔ Misraim aseɛ so mmale ne, me ne bɛ yɛyɛle apam kyɛ,

¹⁴‘Afoɛ nzoo biala ayieleɛ, odi kyɛ ɛmɔ anu biala yakyi oliɛma Hebriniɛ biala bɔ batɔne ye bama wɔ, bɔ waso wɔ afoɛ nzia ɔ maa ɔfa ye nwo odi ofi wɔ sa nu.’ Nakoso ɛmɔ nana mɔ bandie me dwirɛ, yeɛ banyɛ asoɛ bamma me.

¹⁵Na ɛlɛsa ye, ɛmɔsakyerale ɛmɔ adwene bɛyɔle bɔ ɔte paa wɔ me nye so ɔ, kyɛ odi kyɛ ebiala ma obiɛngo nya ye fawɔnwodi. Na ɛmɔyɛle apam wɔ me nyunu wɔ awuro bɔ me dumaa la so ne anu.

¹⁶Nakoso ɛmɔsesane ɛmɔ adwene bɛfale efiɛ bɛhane me dumaa, na ebiala osa ɔɔhyele ye kanganiɛ bienzua anaa brasua, bɔ wamaa wafa ye nwo wali kyɛbɔ né ye nye la so ne, na ɛmɔsa bɛfale bɛ bɛwale ngoaasolɛ nu maa bɛɛyɛle ɛmɔ nganga ne afaneɛ mɔ.

¹⁷Yiti AWURADE nwa nyoo: Ɛmɔandie me dwirɛ, na ebiala wamma oliɛma ne obiɛngo bannya bɛ fawɔnwodi. Nzaade AWURADE noa dwirɛ ɛhe: Ɛ́mɔtie, me koso fawɔnwodi he yeɛ mefa mema ɛmɔ ɔ, kyɛ ngɔma ngrandɛ, ewue anwonyerɛ ne ɛhɔen kɔwa ɛmɔ so ɔ. Na ngɔmaa ɛmɔkɔyɛ anwodwiri nikyee wɔ aseɛ so ahennie amukoraa nu.

¹⁸Na mmenia bɔ babu m’apam ne aso, ná banni edwirɛ bɔ ɔwɔ apam bɔ bɛyɛle ye wɔ me nyunu ne aso ne, ngɔmaa bɛkɔyɛ kyɛ nandwie akrɔngrɔma bɔ bɛpakyele ye nu nyɔ bɛnatele bue nyɔ nemɔ b’afia[7] ne,

¹⁹Yuda atitire, Yerusalem atitire, sayɛɛ nemɔ, asɔfo nemɔ ne maen ne anu mmenia amukoraa bɔ bɛnatele nandwie akrɔngrɔma bue nyɔ nemɔ b’afia ne,

²⁰ngɔfa bɛ ngowura bɛ pɔfoɛ mɔ ne mmenia bɔ bɛpena bɛ beku bɛ ɔ bɛ sa, na bɛ fuin kɔyɛ ewienu nnomaa ne aseɛ ye aso ngaka b’aleɛ.

²¹Yuda hene Sedekia ne ye atitirefoɛ, ngɔfa bɛ ngowura bɛ pɔfoɛ mɔ ne mmenia bɔ bɛpena bɛ beku bɛ ɔ bɛ sa, yeɛ ngɔfa bɛ ngowura Babilɔn hene koɛhonɛfoɛ bɔ basa bɛ si bafi ɛmɔ nwo wa ne, bɛ sa.

²²Ɛ́mɔtie, ngɔfa ahyɛdeɛ ngɔma, na ngosa ngɔfa bɛ ngɔwa kuro ye aso, AWURADE noa dwirɛ ɛne. Bɛkɔfa koɛ bɛkɔteta kuro ye, bekoli so ngonim, na bɛkɔto nu see bɛkɔyera ye. Na ngɔma Yuda nguro nemɔ bɛkɔyɛ kurofoen bɔ sona fee ɔnne so ɔ.