Read Sehwi Yeremia 36 Bible Online

Yeremia 36 - Sehwi bible

Yeremia 36

¹Yuda hene Yehoakim bɔ ye baba ole Yosia ne, ye ahennie afoɛ bɔ ɔtɔ so nna ne anu, AWURADE dwirɛ bɔ ɔlale ye ali hyirele Yeremia ole kyɛ,

²“Fa nwomaa bɔ babobɔ ɔ, na nikyee amukoraa bɔ mahã mahyire wɔ kyɛ ngɔyɔ ngotia Yisrael ne Yuda ne maen maen amukoraa, ofi kyẽa bɔ ndwudwo ngyirele wɔ, ofi Yosia aberɛ so bɔ ɔbaadwu ɛnɛ ne, kyerɛ gua nu.

³Ebiaa Yuda awuro ama bɛkɔte musue amukoraa bɔ mayɛ m’adwene kyɛ ngɔprapra ngogua bɛ so ne, amaa ɔnate so ebiala asakyera ye adwene wafi ye bɔne atee nwo, ná mafa b’amumuyɛɛ ne bɛ bɔne mahyɛ bɛ.”

⁴Yeɛ Yeremia frɛle Baruku bɔ ye baba ole Neria ne, na AWURADE dwirɛ amukoraa bɔ ɔhã hyirele Yeremia ne, Yeremia hã mane Baruku hyerɛ guale nwomaa bɔ babobɔ ɔ bie anu.

⁵Na Yeremia fale ahyɛdeɛ mane Baruku kyɛ, “Me de, bato me nu bɔ mengɔhora mengɔhɔ AWURADE awuro berɛ ɔ;

⁶yiti kɔ AWURADE awuro berɛ akɔngyere kyẽa, na AWURADE dwirɛ bɔ nga maa ɛhyerɛle ne, kenga fi nwomaa bɔ babobɔ ne anu maa maen ne bɛte. Afei koso, kenga ma Yudafoɛ amukoraa bɔ befi bɛ nguro mɔ so bawa ne bɛte.

⁷Ebiaa bɛkɔfa bɛ sufrɛ bɛkɔto AWURADE nyunu, na bɛ nu biala kɔsakyera ye adwene kofi ye bɔne atee nwo, ofikyɛ AWURADE ɛyaafɛlɛ ne ahonehulɛ bɔ wahã kyɛ ɔkɔmaa ɔkɔwa maen he aso ne, ɔte piri.”

⁸Yeɛ Baruku bɔ ye baba ole Neria ne, ɔyɔle bɔ ngɔmhyɛlɛniɛ Yeremia hyɛle ye ne amukoraa. Ɔkengale AWURADE dwirɛ bɔ ɔwɔ nwomaa bɔ babobɔ ne anu wɔ AWURADE awuro berɛ.

⁹Na ɔwale kyɛ, Yuda hene Yehoakim bɔ ye baba ole Yosia ne, ye ahennie afoɛ bɔ ɔtɔ so nnu ne, bosome ngona ne anu, Yerusalemfoɛ amukoraa ne mmenia amukoraa bɔ befili Yuda nguro nemɔ aso bɛwale Yerusalem ne, bɛyɛle akɔngyere wɔ AWURADE nyunu.

¹⁰Yeɛ Baruku kengale Yeremia noa dwirɛ fili nwomaa ne anu wɔ AWURADE awuro berɛ hyirele maen ne amukoraa maa bɛtele. Ɔkengale ye wɔ Gemaria bɔ ye baba ole ahyerɛlɛniɛ Safan ye pumbu bɔ ɔwɔ aborɔsaen so, bɔ ɔwɔ AWURADE awuro berɛ Anoa Foforɛ ne anu berɛ ne.

¹¹Mmerɛ bɔ Makaya bɔ ye baba ole Gemaria bɔ ye baba ole Safan ne, ɔtele AWURADE dwirɛ amukoraa bɔ ofi nwomaa ne anu ne,

¹²ɔhɔle ahyerɛlɛniɛ ne pumbu ne anu wɔ ahemvie berɛ. Né atitirefoɛ nemɔ amukoraa bɛtete berɛ. Bɛ ole ahyerɛlɛniɛ Elisama, Delaya bɔ ye baba ole Semaya ne, Elnatan bɔ ye baba ole Akibɔ ne, Gemaria bɔ ye baba ole Safan ne, Sedekia bɔ ye baba ole Hanania ne, yeɛ atitirefoɛ nemɔ amukoraa.

¹³Na Makaya hane edwirɛ amukoraa bɔ ɔtele mmerɛ bɔ Baruku kengale nwomaa ne hyirele maen ne ne.

¹⁴Yeɛ atitire nemɔ amukoraa bɛsomane Yehudi bɔ ye baba ole Netania, bɔ ye baba ole Selemia, bɔ ye baba ole Kuse kyɛ oose Baruku kyɛ, “Nwomaa bɔ ɛkengale nu dwirɛ mane maen ne bɛtele ne, fa tira bra.” Yiti Baruku bɔ ye baba ole Neria ne, ɔfale nwomaa ne tirale, na ɔhɔle bɛ berɛ.

¹⁵Na besele ye kyɛ, “Tena ase ná kenga maa yɛtie.” Yiti Baruku kengale maa betiele.

¹⁶Na ɔwale kyɛ, bɛtele sɔ dwirɛ ne amukoraa nen, bɛ nwo dwirili bɛ maa ebiala neane obiɛngo nyunu, na besele Baruku kyɛ, “Odi kyɛ yɛfa edwirɛ he amukoraa yɛkɔbɔ Nana amaneɛ.”

¹⁷Yeɛ bebisale Baruku kyɛ, “Kã kyire yɛ, ɛyɛle sɛɛ yeɛ ɛhyerɛle ye noa dwirɛ he amukoraa ɔ?”

¹⁸Na Baruku buale bɛ kyɛ, “Ye noa yeɛ ɔfa hane sɔ dwirɛ he amukoraa hyirele me ɔ, na me koso mvale ayirebire yeɛ ngyerɛle nguale nwomaa ne anu ɔ.”

¹⁹Yeɛ atitire nemɔ sele Baruku kyɛ, “Ɛne Yeremia, ɛmɔɔfea, na nnɛmɔma ebiala nwu ɛmɔ si atee.”

²⁰Bɛyakyili nwomaa ne wɔ ahyerɛlɛniɛ Elisama ye pumbu ne anu. Bɛhɔle ɛhene ne berɛ wɔ ye pato nu berɛ, na bɛfale edwirɛ ne amukoraa bɛbɔle ɛhene ne amaneɛ.

²¹Yeɛ ɛhene ne somane Yehudi kyɛ ɔɔfa nwomaa ne ɔbra. Ɔɔfa fili ahyerɛlɛniɛ Elisama ye pumbu nu dɔ, na Yehudi kengale hyirele ɛhene ne, ɔne atitire amukoraa bɔ né begyigyi ɛhene ne anwo berɛ ne.

²²Bosome ngona ne anu ɛne, na né ɛhene ne te ye prakasua sua ne anu. Né basɔ see wɔ nyangaa nu wɔ ye nyunu berɛ.

²³Na sɛ Yehudi kenga edwirɛ ne porɛ nza anaa nna biala a, né ɛhene ne wafa dadeɛba wapɛ berɛ ne wagyi wato nyangaa ne anu see ne anu, kɔpem kyɛ nwomaa ne amukoraa yerale wɔ nyangaa ne anu see ne anu ɔ.

²⁴Nakoso ɛhene ne oo, ye somvoɛ mɔ bɔ bɛtele edwirɛ ne amukoraa ne oo, bɛ nu biala ye kunu wande ye, yeɛ banzunzua bɛ ndaadeɛ nu koso.

²⁵Ɔwɔ nu kyɛ Elnatan ne Delaya ne Gemaria bɛsrɛle ɛhene ne kyɛ nnɛmaa ɔyera nwomaa ne de, nakoso wandɛ bɛ so.

²⁶Yeɛ ɛhene ne fale ahyɛdeɛ mane ɔwa bienzua Yerameel ne Seraya bɔ ye baba ole Asriɛl ne Selemia bɔ ye baba ole Abideel ne kyɛ bɛɛhye ahyerɛlɛniɛ Baruku ne ngɔmhyɛlɛniɛ Yeremia bɛbra, nakoso AWURADE fale bɛ feale.

²⁷Na ɛhene ne yerale nwomaa ne anu dwirɛ bɔ Yeremia hane ma Baruku hyerɛle ne yiele nen, afei AWURADE lale ye dwirɛ ali hyirele Yeremia kyɛ,

²⁸“Fa nwomaa bɔ babobɔ ɔ foforɛ, na edwirɛ daa ne amukoraa bɔ né ɔwɔ nwomaa bɔ babobɔ bɔ oli moa ne anu, bɔ Yuda hene Yehoakim wayera ye ne, kyerɛ gua nu.

²⁹Na Yuda hene Yehoakim de, se ye kyɛ, ‘AWURADE nwa nyoo: Ayera nwomaa he, na ɛnwa, “Nzu ati yeɛ ahyerɛ ye wɔ nu kyɛ, amba, Babilɔn hene kɔwa kɔɔsɛkye maen he, ná okonua mmenia ne ngaka bɛ boso kofi so ɔ?”

³⁰Yiti bɔ AWURADE ɔkã fa Yuda hene Yehoakim nwo ɛhe: Ongonya koliagyaa maa ɔngɔtena Dawide ahennie bia ne aso, na bekogyi ye fuin bɛkɔto maa eyia kɔbɔ ye eyia, ná ɛyerɛ ahu ye kɔngɔen.

³¹Na ngɔhwe ye ne ye boso ama ne ye somvoɛ mɔ bɛ so, ɔnate b’amumuyɛɛ ti. Na bɛ ne Yerusalemfoɛ ne Yudafoɛ, musue amukoraa bɔ ngane kyɛ ngɔmaa ɔkɔto bɛ ne, ngɔprapra ngogua bɛ so, nakoso bengotie.’ ”

³²Yeɛ Yeremia fale nwomaa bɔ babobɔ ɔ foforɛ, na ɔfa mane ahyerɛlɛniɛ Baruku bɔ ye baba ole Neria ne. Ye yeɛ Yeremia hane nwomaa ko bɔ Yuda hene Yehoakim fale see yerale ye ne anu dwirɛ amukoraa maa ɔhyerɛle ɔ, na ɔfale edwirɛ bɔ ɔte kyɛ sɔ dwirɛ nemɔ ɔ pee bokale so.