Read Sehwi Yeremia 37 Bible Online

Yeremia 37 - Sehwi bible

Yeremia 37

¹Sedekia bɔ ye baba ole Yosia ne, Babilɔn hene Nebukadenesa fale ye lili Yuda maen so hene, na osili Yehoakim awa Konia gya nu lili hene.

²Nakoso ye oo, ye somvoɛ mɔ oo, aseɛ ne aso ama oo, bandie AWURADE dwirɛ bɔ ɔnate ngɔmhyɛlɛniɛ Yeremia so hane ne.

³Na Nana Sedekia somane Selemia awa Yehukale ne Maaseya awa ɔsɔfo Sefania wɔ Yeremia berɛ kyɛ, “Bɔ mbaeɛ kyire AWURADE yɛ Nyameɛ ma yɛ.”

⁴Sɔ mmerɛ ne, né Yeremia okyinikyini maen ne anu, ofikyɛ né bennya bɛffale ye bɛttole kuku nu.

⁵Né Faro koɛhonɛfoɛ befi Misraim bawa; na Kaldeafoɛ bɔ né batua Yerusalem ne, bɛtele bɛ nga pɛ, Kaldeafoɛ nemɔ fili Yerusalem bɛhɔle.

⁶Yeɛ AWURADE lale ye dwirɛ ali hyirele ngɔmhyɛlɛniɛ Yeremia kyɛ,

⁷“AWURADE Yisrael Nyameɛ nwa nyoo: Yuda hene bɔ ɔsomane ɛmɔ me berɛ kyɛ ɛmɔɔbisa me noa dwirɛ ne, ɛmɔhã behyire ye kyɛ, ‘Tie, Faro koɛhonɛfoɛ bɔ bɛɛbokale wɔ ne, bekosa bɛkɔhɔ Misraim, bɛ bɔbɔ bɛ maen nu.

⁸Na Kaldeafoɛ nemɔ bekosa bɛkɔwa bɛkɔfa koɛ bɛkɔɔtoa kuro he. Bekoli so ngonim, na bɛkɔto nu see.

⁹AWURADE nwa nyoo: Nnɛma ɛmɔlakalaka ɛmɔ nwo bɛkã kyɛ, “Kaldeafoɛ nemɔ bekofi yɛ nwo wa bɛkɔhɔ,” ofikyɛ bengofi wa bɛngɔhɔ.

¹⁰Ofikyɛ Kaldeafoɛ koɛhonɛfoɛ amukoraa bɔ bafa koɛ baatoa ɛmɔ ne, sɛ ɛmɔdi bɛ so ngonim, ná ɔka bɛ mmenia bɔ bapurapura angome twe po a, bɛ nu biala kodwɔso kofi ye tena sua nu, na bɛkɔfa see bɛkɔɔyera kuro he.’ ”

¹¹Na ɔwale kyɛ, mmerɛ bɔ Kaldeafoɛ koɛhonɛfoɛ nemɔ befili Yerusalem, ɔnate Faro koɛhonɛfoɛ bɔ né bɛ́ba ne ati nen,

¹²Yeremia sili nu fili Yerusalem kyɛ ɔkɔ Benyamin aseɛ so okode ye aseɛ deɛ ofi berɛ ama nemɔ, bɛ dɔ.

¹³Odwuli Benyamin pambim ne anu ne, né wɛmvoɛ mɔ so panyi bie bɔ bɛfrɛ ye Yiriya, bɔ ye baba ole Selemia bɔ ye baba ole Hanania ne, ɔwɔ berɛ. Ɔhyele ngɔmhyɛlɛniɛ Yeremia, na ɔhane kyɛ, “Wɔ, ɛnwati fa wɔ nwo kɔbɔ Kaldeafoɛ!”

¹⁴Yeɛ Yeremia buale kyɛ, “Daabi, ɔtte nahorɛ. Mennwati memva me nwo mengɔmmɔ Kaldeafoɛ.” Nakoso Yiriya wandie bɔ Yeremia kã ne, na ɔhyele ye fale ye hɔle mbanyi mɔ nyunu.

¹⁵Mbanyi nemɔ fɛle Yeremia so yaa hahii, na bɛbole ye bɛfale ye bɛtole kuku nu wɔ ahyerɛlɛniɛ Yonatan awuro, ofikyɛ né bafa berɛ bakakyi kuku nu.

¹⁶Bɛfale Yeremia bɛtole kumaa nu kuku nu ne anu, na ɔlale berɛ ngyẽa pee.

¹⁷Afei Nana Sedekia somane maa bɛɛfale ye bɛwale ye nyunu. Na Nana bisale ye mvealeɛ nu wɔ ye awuro berɛ kyɛ, “Aso AWURADE ala edwirɛ bie ali wahyire wɔ anaa?” Yeɛ Yeremia buale kyɛ, “Yoo, edwirɛ wɔ berɛ.” Afei Yeremia toale so kyɛ, “Bɛkɔfa wɔ bekowura Babilɔn hene sa.”

¹⁸Yeremia sa bisale Nana Sedekia kyɛ, “Nzikyɛ tɛɛ yeɛ mayɔ wɔ anaa wɔ mbanyi anaa maen he bɔ ɛmɔafa me bato kuku nu ye?

¹⁹Ɛmɔ ngɔmhyɛlɛfoɛ bɔ bɛhyɛle ɛmɔ ngɔm kyɛ, ‘Babilɔn hene ɔngɔfa koɛ ngɔtoa ɛmɔ ne maen he’ ne, bɛwɔ nisua?

²⁰Ao Nana, me mene, mesrɛ wɔ, tie m’abisadeɛ bɔ méfa méto wɔ nyunu ye, na nnɛmaa besa bɛfa me bɛkɔto ahyerɛlɛniɛ Yonatan awuro dɔ, ná mangɔanwu dɔ.”

²¹Yiti Nana Sedekia hyɛle maa bɛfale Yeremia bɛɛtole kuku nu aluo berɛ, na daa biala né bɛma ye paanoo mumua ko fi paanootonɛfoɛ borɔnoɛ so kɔpem kyɛ kuro berɛ paanoo amukoraa yiele ɔ. Yiti Yeremia hale kuku nu aluo berɛ.