Read Sehwi Yeremia 38 Bible Online

Yeremia 38 - Sehwi bible

Yeremia 38

¹Afei Sefatia bɔ ye baba ole Matan, Gedalia bɔ ye baba ole Pasure, Yukale bɔ ye baba ole Selemia, yeɛ Pasure bɔ ye baba ole Malkiya ne, bɛtele edwirɛ bɔ né Yeremia ɔkã kyire maen ne amukoraa ne kyɛ,

²“Bɔ AWURADE kã ɛhe: Ebiala bɔ ɔkɔtena kuro he anu ne, ɔkɔtɔ ngrandɛ noa, na ɛhɔen ne ewue anwonyerɛ kɔmaa okowu. Nakoso sona bɔ ɔkɔhɔ Kaldeafoɛ nemɔ dɔ ne de, okonya ye ti kodidi nu, okonya ye ngoa kyɛ koɛ nu nzesadeɛ, na ɔkɔtena ngoa nu.

³AWURADE nwa nyoo: Bɛkɔfa kuro ye bekowura Babilɔn hene koɛhonɛfoɛ mɔ sa maa bekoli so ngonim.”

⁴Yeɛ mbanyi nemɔ hã hyirele ɛhene ne kyɛ, “Yɛsrɛ wɔ, maa behũ akoaa he, ofikyɛ ɔnate ye dwirɛ bɔ ɔkekã kyire bɛ ne aso, obu koɛhonɛfoɛ bɔ baha kuro ye anu, ɔne maen ne amukoraa b’abasa nu. Ofikyɛ akoaa he ɔmbena maen he yé, na mmom ɔpena ye ne tɛɛ.”

⁵Na Nana Sedekia sele kyɛ, “Ɛ́mɔtie, ɔwɔ ɛmɔ sa nu, ofikyɛ me bɔ nde ɛhene ne, mengɔhora mengotu ɛmɔ noa dwirɛ mengogua.”

⁶Yiti bɛhyele Yeremia, na beegyili ye bɛtole Nana awa Malkiya ye abura bɔ ɔwɔ kuku nu aluo berɛ ne anu. Bɛfale nyamaa yeɛ bedwurale Yeremia bɛtole nu ɔ. Né nzue nne abura ne anu, na mmom asaa ngome, na Yeremia mene wɔ asaa ne anu.

⁷Na Yitiopianiɛ sayɛɛ Ebede Meleke, bɔ né ɔwɔ ahemvie berɛ ne, ɔtele kyɛ bafa Yeremia bato kumaa nu kuku ne anu. Sɔ mmerɛ ne, né ɛhene ne te Benyamin anoa piri ne anu berɛ.

⁸Yeɛ Ebede Meleke fili ahemvie berɛ fitele, na oosele ɛhene ne kyɛ,

⁹“Nana, me mene, bɔ mmenia hemɔ bafa bali ngɔmhyɛlɛniɛ Yeremia ne amukoraa, bayɔ bɔne. Bafa ye bato kumaa nu kuku nu kyɛ ɛhɔen hu ye maa owu wɔ nekaa bɔ ɔwɔ ne, ofikyɛ aleɛ biala nne kuro ye anu.”

¹⁰Yeɛ ɛhene ne fale ahyɛdeɛ mane Yitiopianiɛ Ebede Meleke kyɛ, “Fa mmienzua aburasa[8] fi wa boka wɔ nwo so, ná kɔye ngɔmhyɛlɛniɛ Yeremia fi abura ne anu, ná wanwu.”

¹¹Yiti Ebede Meleke fale mmenia ne bokale ye nwo so, na ɔhɔle ahemvie berɛ nekaa bɔ bɛfa nningyein besie ne. Ɔɔfale ndangurɛ ne ndaadeɛ teterewaa, na ɔfale nyamaa dwurale sɔ nningyein ne ase mane Yeremia wɔ abura ne anu.

¹²Yeɛ Yitiopianiɛ Ebede Meleke sele Yeremia kyɛ, “Fa ndangurɛ ne, ɔne ndaadeɛ teterewaa nemɔ wura wɔ mvorɔma nu wɔ nyamaa ne abo.” Na Yeremia yɔle sɔ.

¹³Yeɛ bɛfale nyamaa ne bɛtwetwene Yeremia bɛyele ye befili abura ne anu. Na Yeremia hale kuku nu aluo berɛ.

¹⁴Nana Sedekia somane maa bɛɛfale ngɔmhyɛlɛniɛ Yeremia bɛbrɛle ye wɔ AWURADE awuro berɛ anoa bɔ ɔtɔ so nza ne anyunu berɛ. Yeɛ ɛhene ne sele Yeremia kyɛ, “Mebaabisa wɔ dwirɛ; nnɛfa hwee fea me.”

¹⁵Na Yeremia buale Sedekia kyɛ, “Sɛ mekã mekyire wɔ a, aso nna ehunɛ yeɛ ekohu me ɔ? Yeɛ sɛ metu wɔ foɛ a, engotie me foɛtulɛ ne.”

¹⁶Yeɛ Nana Sedekia feale ye nwo tale ndaen hyirele Yeremia kyɛ, “Kyɛ AWURADE bɔ ɔbɔle yɛ kra ɔte ase ye, mengohu wɔ, yeɛ mengɔfa wɔ mengowura bɛ bɔ bɛpena wɔ beku wɔ nemɔ bɛ sa.”

¹⁷Yeɛ Yeremia sele Sedekia kyɛ, AWURADE Asafo Nyameɛ, Yisrael Nyameɛ ne, ɔnwa nyoo: Sɛ ekofite kɔfa wɔ nwo kɔɔma Babilɔn hene mbanyi nemɔ a, ye de ekonya wɔ ti kodidi nu, bɛngɔfa see bɛngɔyera kuro ye, yeɛ ɛne wɔ awuro ama ɛmɔkonya ngoa.

¹⁸Nakoso sɛ amvite amva wɔ nwo angɔamma Babilɔn hene mbanyi nemɔ a, ye de, kuro ye koowura Kaldeafoɛ bɛ sa, na bɛkɔfa see bɛkɔto nu bɛkɔyera ye, na engonya wɔ ti ngodidi nu ngofi bɛ sa nu.”

¹⁹Yeɛ Nana Sedekia sele Yeremia kyɛ, “Mesuro Yudafoɛ bɔ baafa bɛ nwo bama Kaldeafoɛ ne. Annea a, né Kaldeafoɛ bafa me bawura bɛ sa maa bagoro me nwo.”

²⁰Nakoso Yeremia buale kyɛ, Bɛngɔfa wɔ bengowura bɛ sa. Mesrɛ wɔ, tie AWURADE noa dwirɛ bɔ mekã mekyire wɔ ye, na okoyie wɔ yé, na wɔ kra konya ye ti kodidi nu.

²¹Nakoso sɛ ambene so amvite (amva wɔ nwo angɔamma bɛ) a, ye de, edwirɛ bɔ AWURADE ala ye ali wahyire me ole kyɛ,

²²Tie, mmrasua amukoraa bɔ baha wɔ Yuda hene ahemvie ne, bɛkɔfa bɛ bekofite bɛkɔɔma Babilɔn hene mbanyi mɔ, na mmrasua nemɔ kɔhã kyɛ, ‘Wɔ mmango mɔ balakalaka wɔ bali wɔ so ngonim; afei bɔ wɔ gya atimu asaa nu ye, bakakyi bɛ si bama wɔ.’

²³Bɛkɔfa ɛye mɔ amukoraa ne wɔ mma mɔ bekofite bɛkɔɔma Kaldeafoɛ. Wɔ wora, engonya wɔ ti ngodidi nu ngofi bɛ sa nu, na mmom Babilɔn hene kɔhye wɔ, na kuro he de, bɛkɔfa see bɛkɔto nu bɛkɔyera ye.”

²⁴Yeɛ Sedekia sele Yeremia kyɛ, “Nnɛbɔ edwirɛ he aso kyire ebiala, na bengohu wɔ.

²⁵Sɛ mbanyi nemɔ bɛte kyɛ me ne wɔ yali ngɔmɔ, ná bɛba wɔ berɛ bɛbase wɔ kyɛ, ‘Edwirɛ bɔ ɛhã hyirele Nana, ɔne bɔ Nana ɔhã hyirele wɔ ne, kã kyire yɛ; nnɛfa hwee fea yɛ, na yɛngohu wɔ’ a,

²⁶ye de kã kyire bɛ kyɛ, ‘Mvale me dwirɛ ndole Nana nyunu kyɛ nnɛmaa ɔmaa besa bɛfa me bɛkɔ Yonatan awuro maa mekowu dɔ.’ ”

²⁷Yeɛ mbanyi nemɔ amukoraa bɛwale Yeremia berɛ beebisale ye, na ɔhane edwirɛ amukoraa bɔ ɛhene ne hyɛle ye kyɛ ɔhã ne hyirele bɛ. Yiti bɛpɛle edwirɛ ne aso, ofikyɛ né ebiala ɔttele edwirɛ ne.

²⁸Na Yeremia hale kuku nu aluo berɛ kɔpem kyẽa bɔ belili Yerusalem so ngonim ɔ. [Na belili Yerusalem so ngonim ne, né ɔtɛ wɔ berɛ.]