Read Sehwi Yeremia 40 Bible Online

Yeremia 40 - Sehwi bible

Yeremia 40

¹Awɛmvoɛ nemɔ aso safohene Nebusaradan, onwuni Yeremia kyɛ bagua ye ngɔnzɔngɔnzɔ bɔ ɔboka mmenia amukoraa bɔ bahye bɛ nnure bafi Yerusalem ne Yuda bɔ bɛ́fa bɛ bɛ́kɔ Babilɔn ne aso. Nebusaradan sangyele Yeremia wɔ Rama, na ye si ye, AWURADE lale ye dwirɛ ali hyirele Yeremia.

²Awɛmvoɛ nemɔ aso safohene ne fale Yeremia hɔle ahameɛ, na osele Yeremia kyɛ, “AWURADE wɔ Nyameɛ yeɛ ɔhane kyɛ ɔkɔmaa musue he kɔto ɛwa ɔ.

³Na afei, AWURADE amaa wawa nu, na wayɔ kyɛbɔ ɔhane ne ala: ofikyɛ ɛmɔayɔ bɔne batia AWURADE, na ɛmɔandie ye dwirɛ, yiti yeɛ sɔ amaneɛ he wato ɛmɔ ye.

⁴Afei, tie, ɛnɛ kyẽa ye, mesangye ngɔnzɔngɔnzɔ bɔ ogua wɔ sa ne. Sɛ ekuro a, ɛne me hɔ Babilɔn, na ngɔte me nye ngɔnea wɔ. Nakoso sɛ enguro kyɛ ɛne me kɔhɔ Babilɔn a, ye de nnɛkɔ. Nea, aseɛ ye amukoraa yeɛ ɔla wɔ nyunu tɛtrɛtɛɛ ye; nekaa biala bɔ ɔte paa ma wɔ bɔ ekuro kyɛ ɛkɔ ne, kɔ.”

⁵Anzana Yeremia ɔbaasa kɔ ne, Nebusaradan sele ye kyɛ, “Sa kɔ Gedalia bɔ ye baba ole Ahikam, bɔ ye baba ole Safan, bɔ Babilɔn hene afa ye ali Yuda nguro so amrado ne berɛ, na ɛne ye bɛɛtena maen ne anu, anaa kɔ nekaa biala bɔ ede di kyɛ ɔte paa ma wɔ kyɛ ɛkɔhɔ ɔ.” Yiti awɛmvoɛ nemɔ aso safohene ne mane ye aleɛ bɔ okoli ye atee nu, ɔne akyɛdeɛ, na ɔmane ye ate maa ɔhɔle.

⁶Yeɛ Yeremia hɔle Ahikam awa Gedalia berɛ wɔ Misepa, na ɔne ye bɛɛtenane wɔ mmenia bɔ bayakyi bɛ wɔ aseɛ ne aso nemɔ anu.

⁷Mmerɛ bɔ koɛhonɛfoɛ so safohene amukoraa bɔ bɛwowɔ eburo ne, bɛ ne bɛ koɛhonɛfoɛ bɛtele kyɛ Babilɔn hene wafa Ahikam awa Gedalia wali maen ne aso amrado, ná wafa mmienzua, mmrasua, ngwadaa ne aseɛ ne aso anwumvoin mmenia bɔ bangye bɛ nnure bie bangɔ Babilɔn ne wawura ye sa nen,

⁸bɛhɔle Gedalia dɔ wɔ Misepa. Bɛ ole Yismael bɔ ye baba ole Netania, Yohanan ne Yonatan bɔ bɛ baba ole Karea, Seraya bɔ ye baba ole Tanhumete, Netofaniɛ Efae ye mma mmienzua, Yesania bɔ ye baba te Maakatiniɛ ne, bɛ ne bɛ koɛhonɛfoɛ.

⁹Gedalia bɔ ye baba ole Ahikam, bɔ ye baba ole Safan ne, ɔtale ndaen hyirele bɛ ne bɛ koɛhonɛfoɛ nemɔ kyɛ, “Nnɛma ɛmɔsuro kyɛ ɛmɔkɔso Kaldeafoɛ nemɔ ɔ. Ɛ́mɔtena aseɛ ye aso, ná ɛ́mɔso Babilɔn hene, na okoyie ɛmɔ yé.”

¹⁰Ɛ́mɔtie, me de ngɔtena Misepa ngɔso Kaldeafoɛ bɔ bɛkɔwa yɛ wa ne, na ɛmɔ de, ɛ́mɔboaboa nzaa ne borɔdoma ne ngoo noa. Ɛ́mɔfa bégua ɛmɔ nningyein nu, ná ɛ́mɔtena ɛmɔ nguro bɔ ɛmɔatena so nemɔ aso.”

¹¹Sɔ ala koso, mmerɛ bɔ Yudafoɛ amukoraa bɔ né bɛwɔ Moabo ne Amonfoɛ nemɔ anu, ne Edom ne maen amukoraa so ne, bɛtele kyɛ Babilɔn hene wayakyi mmenia ne kãa wɔ Yuda, ná wafa Gedalia bɔ ye baba ole Ahikam, bɔ ye baba ole Safan ne wali bɛ so safohene nen,

¹²yeɛ Yudafoɛ amukoraa befili nekaa amukoraa bɔ bafoa bɛ baagua ne, na besa bɛwale Yuda aseɛ so bɛhɔle Gedalia berɛ wɔ Misepa, na bɛboaboale nzaa ne borɔdoma pee noa.

¹³Afei Kerea awa Yohanan ne koɛhonɛfoɛ so safohene mɔ bɔ né bɛwowɔ eburo ne, bɛwale Gedalia berɛ wɔ Misepa,

¹⁴na bebisale ye kyɛ, “Aso ɛse kyɛ Amonfoɛ hene Baalise wasoma Netania awa Yismael kyɛ oohu wɔ ɔ?” Nakoso Ahikam awa Gedalia wanne bɛ dwirɛ ne wanni.

¹⁵Yeɛ Kerea awa Yohanan hane ye ahameɛ hyirele Gedalia wɔ Misepa kyɛ, “Mesrɛ wɔ, maa ngɔ ngongu Netania awa Yismael, na ebiala ngonwu sona bɔ ohuni ye ɔ. Nzu ati yeɛ odi kyɛ oku wɔ maa Yudafoɛ amukoraa bɔ bapɛ wɔ nwo bayia ne bɛbɔ aya, ma Yuda ngaa ne bɛ boso nua ɔ?”

¹⁶Nakoso Ahikam awa Gedalia buale Karea awa Yohanan kyɛ, “Nnɛyɔ sɔ nikyee ne, ofikyɛ bɔ ɛkã fa Yismael nwo ne, ɔtte nahorɛ.”