Read Sehwi Yeremia 47 Bible Online

Yeremia 47 - Sehwi bible

Yeremia 47

¹AWURADE dwirɛ bɔ ɔlale ye ali hyirele ngɔmhyɛlɛniɛ Yeremia fale Filistifoɛ nwo, koraka yeɛ Faro ɔkwaali Gasa so ngonim ne, ye ɛhe:

²“AWURADE nwa nyoo: Tie, nzue ma ye nwo so fi sorɔ dɔ, na ɔkɔyɛ asue bɔ oyi bu fa so ɔ; na okobu kɔfa aseɛ ne aso nningyein amukoraa so, kuro ne, ɔne nu ama. Mmenia kɔteatea nu, na aseɛ ne aso ama amukoraa bɛkɔbɔ awuye.

³Ye mbɔngɔ anwoserɛfoɛ nemɔ, bɛ gya bɔ bɛfa bɛpempem berɛ kum kum kum kum ne, yeɛ ye teaseɛnam mɔ bɔ bɛkɔ hwii ne, ɔne bɛ gya bɔ ɔyɛ kunguronn kunguronn ne, ɔngɔma seɛ mɔ bɛngɔpɛne bɛ nye bɛngɔnea bɛ mma mɔ. B’abasa nu ayɛ hodwoo,

⁴ɔnate kyẽa bɔ ɔbaahũhũ Filistifoɛ amukoraa ne ati, ɔne kyɛ ɔbaanua bokafoɛ biala bɔ waha wɔ Tiro ne Sidon ɔ, bɛ bo. Ofikyɛ AWURADE kohũhũ Filistifoɛ bɔ bɛ ole Kafito supɔ ngaa nemɔ ne.

⁵Gasa ti so apa, Asekelɔn abɔ. Wɔ bɔ aha bɔnza ne anu ɔ, ɛkɔtete wɔ nwonaen maa okoodwu kyinzu?

⁶Ao, AWURADE ngrandɛ, kyinzu yeɛ ɛkɔyɛ konn ɔ? Kowura wɔ bɔha nu, de wɔ nwome ná yɛ konn!

⁷Ɔkɔyɛ sɛɛ né wayɛ konn, wɔ aberɛ bɔ AWURADE ama ye ahyɛdeɛ kyɛ ɔfa koɛ ɔteta Asekelɔn ne mboanoa ne ɔ? Berɛ yeɛ wafa wawura ye sa ɔ.”