Read Sehwi Yeremia 49 Bible Online

Yeremia 49 - Sehwi bible

Yeremia 49

¹ Bɔ AWURADE kã fa Amonfoɛ nwo ole kyɛ, “Aso Yisrael olle mmaa mmienzua anaa? Olle sona bɔ okoli ye bia anaa? Ɔyɛle sɛɛ bɔ bɛ hene[11] yeɛ odi Gade so, bɔ ye mmenia tete ye nguro mɔ so ye?

²Yiti ɛ́mɔtie, mmerɛ bie ɔ́ba, AWURADE noa dwirɛ ɛne, bɔ ngɔmaa bɛkɔte koɛ nwo ngunga wɔ Amonfoɛ kuro Raba; ɔkɔkakyi kurofoen so sire, na bɛkɔfa see bɛkɔyera ye nwo nguraa mɔ. Na bɛ bɔ Yisrael agyapadeɛ oolili bɛ dɔ ne, Yisrael kosa kole ye nikye, AWURADE noa dwirɛ ɛne.

³“Hesebon, bɔ awuye, ofikyɛ Aye abɔ! Raba mma mmrasua mɔ, ɛ́mɔsu. Ɛ́mɔfa ɛsɛen tena bɛhera, ɛ́mɔbɔ awuye ná ɛmɔli akɔneaba wɔ fasue nemɔ afia! Ofikyɛ bɛkɔhye bɛ hene ne nnure bɛkɔhɔ, bɔ ye asɔfo ne atitire mɔ bɛboka so ɔ.

⁴Wɔ, baa brasua bɔ ayɛ lɔen ɔ, Nzu ati yeɛ ɛfa wɔ bɔnza nemɔ hoahoa wɔ nwo ɔ, wɔ bɔnza bɔ ɔkye aleɛ ne, wɔ bɔ ɛfale wɔ nwo tole w’anwonyadeɛ so hane kyɛ, ‘Nwa yeɛ okodwɔso kotia me ɔ?’

⁵Tie, bɛ bɔ bapɛ wɔ nwo bayia amukoraa, ngɔfa bɛ nwo suronyi ngɔto wɔ so, Asafo AWURADE Nyameɛ noa dwirɛ ɛne. Na bɛkɔfoa ɛmɔ ngoko ngoko bɔ sona li ebiala si ɔ, na bɛ bɔ banwati nemɔ, ebiala ngɔhora bɛ noa boaboa.

⁶Na ye si ye, ngosa ngɔfa Amonfoɛ ngofi nnurehyelɛ nu ngɔwa, AWURADE noa dwirɛ ɛne.”

⁷ Bɔ Asafo AWURADE kã fa Edom nwo ole kyɛ, “Aso nworɛ nne Teman ko? Aso nworɛfoɛ bendu foɛ ko anaa? Aso bɛ nworɛ atu amini anaa?

⁸Ɛmɔ, Dedanfoɛ, ɛ́mɔnwati, ɛ́mɔsa ɛmɔ si, ɛ́mɔfeafea ngumaa nemɔ anu, ofikyɛ ngɔprapra Yisɔ amaneɛnwunɛ ngogua ye so wɔ mmerɛ bɔ ngɔɔhwe ye so ne.

⁹Sɛ bobetelɛfoɛ bɛba wɔ berɛ a, aso bɛngɔyakyi bobe mmaa ne kãa wɔ so? Sɛ awuefoɛ bɛba kɔngɔen a, aso nna bɔ bekuro ɔ yeɛ bekowua ɔ?

¹⁰Nakoso Yisɔ de, mabɔ ye kwaterekwa, mama ye afealeɛ mɔ nwo alela berɛ, na ɔngora mva ye nwo mvea. Bahũhũ ye boso ama mɔ, oliɛma mɔ ne ye mmango mɔ, na ye boso anua.

¹¹Yakyi wɔ nyisiaa nemɔ berɛ, na ngɔmaa bɛkɔtena ngoa nu; na odi kyɛ wɔ kunafoɛ nemɔ, bɛfa bɛ wora bewura me nu.”

¹²Na AWURADE nwa nyoo, “Tie, sɛ bɛ bɔ ahaa onni kyɛ bɛno sɔ kwangoa ne (anoa) po bano amba a, né aso wɔ de ɛkɔfa wɔ nwo koli anaa? Ɛngɔfa wɔ nwo ngoli, na mmom amba, ɛkɔno kwangoa ne (anoa).

¹³Ofikyɛ mata me bɔbɔ me nwo ndaen kyɛ Bosra kɔyɛ kurofoen, ngorohoɛ nikye, kuro bɔ wabɔ ɔ, ɔne ɛnomalɛ nikye, na ye nwo nguro amukoraa kɔyɛ nguro bɔ babɔ ɔ afebɔɔ, AWURADE noa dwirɛ ɛne.”

¹⁴Mate edwirɛ bie mafi AWURADE berɛ, na basoma ɛbɔfoɛ wɔ maenmaensofoɛ nemɔ berɛ kyɛ, “Ɛ́mɔboaboa ɛmɔ noa, ɛ́mɔdwɔso bɛɛfa koɛ bɛtoa ye, ɛ́mɔdwɔso bɛhɔ koɛ ne!”

¹⁵Ofikyɛ tie, ngɔmaa ɛkɔyɛ kãa wɔ maen maen mɔ nu bɔ bebu wɔ animtia wɔ mmenia nu ɔ.

¹⁶Wɔ nwo suronyi ne w’ahone nu anwomasoɛ ne, balakalaka wɔ. Wɔ bɔ ɛte nyɔbotaen bɔen mɔ nu, ɔne bokaa ti afia paa ɔ, ɔwɔ nu kyɛ ɛnwo wɔ saen anwuro anwuro kyɛ kɔleɛ deɛ de, nakoso ngɔhwe wɔ ngofi dɔ ngɔto ase, AWURADE noa dwirɛ ɛne.

¹⁷“Edom kɔyɛ kurofoen, na ebiala bɔ ɔpɛ nu ye nwo berɛ ne, ɔkɔyɛ ye anwodwiri. Na ɔnate amaneɛ amukoraa bɔ wato Edom ne ati, sɔ sona ne kosobi ye noa.

¹⁸Na kyɛbɔ bɛsɛkyele Sodom ne Gomora ne nguro bɔ bepingyepingye bɛ nemɔ nen, kuro sona biala ngɔtena berɛ, yeɛ dasaniɛ biala ngotu ngɔtena nu, AWURADE noa dwirɛ ɛne.

¹⁹Ɛ́mɔtie, ɔkɔwa kyɛ gyata bɔ ofi Yɔɔdan ɛhɔayeɛ nu, bɔ ɔba bako tia anwoserɛfoɛ atenaleɛ ne ɔ, nakoso mvum nu, ngɔma Edom kofi berɛ kɔnwati. Na sona bɔ maneanea nu maye ne, ngɔfa berɛ ngowura ye sa. Na nwa yeɛ ɔte kyɛ me ɔ? Nwa yeɛ ɔkɔhora kobisa me dwirɛ ɔ? Na mmoaenneafoɛ beni yeɛ ɔkɔhora me nyunu gyina ɔ?

²⁰Yiti ɛ́mɔtie AWURADE nhyehyɛleɛ bɔ wayɛ wafa Edom nwo ɔ, ɔne adwene bɔ wadwene wafa Temanfoɛ nwo ɔ. Amba, bɛkɔhwe bɛ bɛkɔhɔ kyɛ mmoaen nemɔ anu mmaa mmaa paa nemɔ. Amba, ɔnate bɔ wato bɛ ne ati, b’atenaleɛ nwo kodwiri bɛ.

²¹B’asefinɛ nwo dede ne kɔma aseɛ kɔwoso, na awuye bɔ bɛbɔ ne, bɛkɔte ye wɔ Ɛpo Kɔkorɛ noa dɔ paa.

²²Tie, ɔkɔfo ná watu kyɛ kɔleɛ, na ɔkɔtrɛtrɛ ye ndaa nu wɔ Bosra so. Na sɔ kyẽa ne, Edom anwoserɛfoɛ bɛ kra kɔnwati kofi bɛ nwo, kyɛ brasua bɔ wafo aworɛ so ɔ ye deɛ.

²³ Bɔ ɔfa Damasko nwo ɛhe: Hamate ne Apade nyunu agua ase, ofikyɛ bate edwirɛ bɔ ɔnyɛ fɛ ɔ; ahunundetelɛ atɔ bɛ so, aworabɔlɛ wɔ ɛpo so, ɔngora nyɛ konn.

²⁴Damasko ayɛ hodwoo, wakakyi ye nwo kyɛ ɔnwati, ahunundetelɛ atɔ ye so, yealɛ ne aworabɔlɛ ato ye kyɛ brasua bɔ wafo aworɛ so ɔ.

²⁵Ayɛyelɛ kuro ne, m’anika kuro ne! Nea kyɛbɔ banyakyi ye ɔ!

²⁶Yiti ye mmerandeɛ nemɔ kɔtotɔ wɔ ye mmorɔnoɛ nemɔ aso, na bekohũhũ koɛhonɛfoɛ nemɔ amukoraa sɔ kyẽa ne, Asafo AWURADE noa dwirɛ ɛne.

²⁷Na ngɔto Damasko fasue ne anu see, na ɔkɔyera Ben Hadade anwoserɛ afealeɛ nemɔ.

²⁸Kedare ne Hasɔ ahennie mɔ bɔ Babilɔn hene Nebukadenesa kɔbɔ bɛ ne, bɔ AWURADE kã fa bɛ nwo ɛhe: “Ɛ́mɔdwɔso bɛfa koɛ bɛɛtoa Kedare, ná ɛ́mɔnua eyia afiteleɛfoɛ nemɔ boso.

²⁹ Odi kyɛ ɛmɔsesa b’ɛtena sua mɔ ne bɛ mmoaen bɛkɔ; ɛ́mɔsesa bɛ mbɛmuɛ tena mɔ, bɛ ngukue amukoraa ne b’afupɔngɔ mɔ bɛhɔ. Na ɛ́mɔtea nu bégua bɛ so kyɛ, ‘Ahunundetelɛ apɛ ɛmɔ anwo amukoraa ayia!’

³⁰Ao Hasɔfoɛ, ɛ́mɔnwati, ɛmɔhɔ dedeede, ɛmɔɔfeafea ngumaa nemɔ anu, AWURADE noa dwirɛ ɛne. Ofikyɛ Babilɔn hene Nebukadenesa wabɔ ɛmɔ nwo porɛ, na wafa ɛmɔ nwo adwene tɛɛ.

³¹“Ɛ́mɔdwɔso, ɛ́mɔfa koɛ bɛɛtoa maen bɔ ye nwo atɔ ye, bɔ ɔte asomdwee nu, bɔ olle pambim mɔ anaa buralɛ bɔ ɔbeabea pambim mɔ si, maen bɔ ye ngome yeɛ ɔte berɛ ne, AWURADE noa dwirɛ ɛne.

³²Bɛ mbɔngɔ kɔyɛ koɛ nu nzesadeɛ, yeɛ bɛ nyɛmmoa kɔyɛ nikyee bɔ bɛfẽ bɛfa ɔ. Na bɛ bɔ bepiapia bɛ ti angyɛnu ne, ngɔbɔ bɛ ngɔsande ngogua nekaa amukoraa; ngɔmaa b’amaneɛnwunɛ kofi nekaa biala kɔɔto bɛ, AWURADE noa dwirɛ ɛne.

³³Hasɔ kɔyɛ ɛserɛ so ngyea b’atenaleɛ ne kurofoen afebɔɔ; sona biala ngɔtena berɛ, dasaniɛ biala ngɔtena nu.”

³⁴Yuda hene Sedekia ahennie n’ahyɛaseɛ ne, AWURADE lale ye dwirɛ ali hyirele ngɔmhyɛlɛniɛ Yeremia fale Elam nwo kyɛ,

³⁵Asafo AWURADE noa dwirɛ ɛhe: “Tie, Elam agyaen bɔ yeɛ ɔte b’anwoserɛ titire ne, ngobubu nu,

³⁶na ngɔfa mvrama nna ne ngofi nyameɛso ndweasoɛ nna ne aso ngɔwa Elam so, na ngɔbɔ bɛ ngɔsande ngoogua sɔ mvrama ne amukoraa so. Maen biala nne berɛ bɔ sɔ Elamfoɛ bɔ bafoa bɛ maa banwati ne, bɛ nu bie ngɔhɔ so ɔ.

³⁷Ofikyɛ ngɔma Elam kunu kɔtete ye wɔ bɛ pɔfoɛ mɔ ne bɛ bɔ bɛpena bɛ beku bɛ ɔ, bɛ nyunu; na ngɔprapra amaneɛ ne me yaafɛlɛ piri ne ngogua bɛ so, AWURADE noa dwirɛ ɛne. Na ngɔsoma ngrandɛ maa okoli bɛ si kɔpem kyɛ ngonua bɛ boso ɔ.

³⁸Ngɔfa m’ahennie bia ngosie Elam, na ngohũhũ b’ɛhene ne b’atitire nemɔ, AWURADE noa dwirɛ ɛne.

³⁹Nakoso ngyẽa bɔ oli nziɛ ne anu, ngosa ngɔfa Elam ngofi nnurehyelɛ nu ngɔwa, AWURADE noa dwirɛ ɛne.