Read Sehwi Yeremia 51 Bible Online

Yeremia 51 - Sehwi bible

Yeremia 51

¹AWURADE nwa nyoo: “Tie, ngɔkanyane sɛkyefoɛ sunzum bie ngotia Babilɔn, yeɛ bɛ bɔ baatena mmenia bɔ bɛko betia me nemɔ anu ne.

²Ngɔsoma mmenia bɔ behuhu so ɔ maa bɛkɔhɔ Babilɔn, na bekohuhu ye so, ná babɔ ye maen ne tɔɔ, ofikyɛ amaneɛnwunɛ kyẽa ne, bɛkɔfa koɛ bɛkɔteta ye bɛkɔbra bekoyia.

³Ma agyaentolɛniɛ ɔto ye agyaen ɔfa koɛ teta sona bɔ okundu ye agyaen nu ne, ɔne bɔ ɔfa ye buralɛ akokyɛm hoahoa ye nwo ne. Nnɛmɔma ye mmerandeɛ nemɔ bɛfa bɛ nwo bedi, na ɛ́mɔnua ye lɔen ne amukoraa bɛ boso bɔkɔɔ.

⁴Bɛ bɔ bahũhũ bɛ nemɔ, bekoguagua Kaldeafoɛ aseɛ ne aso, na bɛ bɔ bapurapura bɛ ne, bekoguagua ye dwaa nemɔ aso.

⁵ Ofikyɛ Yisrael ne Yuda bɛ Nyameɛ Asafo AWURADE ne, ɔppole bɛ, ɔwɔ nu kyɛ bɛ bɔne bɔ bayɔ batia Yisrael Krongronniɛ ne, wayi b’aseɛ ne aso to de.

⁶ “Ɛ́mɔnwati béfi Babilɔn, ɛ́mɔma ebiala ɔpepɛ ole ye kra; nnɛmɔmaa ɔnate ye amumuyɛɛ ti ɛmɔ boso nua, ofikyɛ AWURADE ye wereɛtɔlɛ mmerɛ ne ɛhe, na okotua ye so kerɛ.

⁷ Né Babilɔn te AWURADE sa nu esikaa kɔkorɛ kulie bɔ ɔmane aseɛ amukoraa bole ɔ; maen maen mɔ bano ye nzaa ne bie, yiti maen maen mɔ babobɔ laen.

⁸Mvum nu, Babilɔn afi ase, na wabɔ, ɛ́mɔsu ye! Ɛ́mɔfa ayire bɛwasa ye nwo bɔ otutu ye ne aso, ebiaa ye nwo kɔsande ye.

⁹Ahaa yɛpena kyɛ yɛsa Babilɔn anwonyerɛ, nakoso wande apɔ. Ɛ́mɔpo ye, ná ɛ́mɔma yɛ nu biala ɔhɔ ye bɔbɔ ye maen nu, ofikyɛ ye ndɛen bɔ babua ye ne, wafo wadwu nyameɛso, na bama so baadwu ewienu dɔ.

¹⁰AWURADE ala yɛ tenenee ali, ɛmɔbra maa yɛbɔ AWURADE yɛ Nyameɛ nnwumaa nwo dawure wɔ Sion.

¹¹“Ɛ́mɔsi agyaen nemɔ noa! Ɛ́mɔma akokyɛm nemɔ aso! AWURADE akanyane Medese ahemvo mɔ sunzum, ofikyɛ wanya Babilɔn nwo adwene kyɛ ɔkɔsɛkye ye, AWURADE wereɛtɔlɛ ne, ye ɛne; ye asɔneyɛɛ sua nwo wereɛtɔlɛ ne, yɛ ɛne.

¹²Ɛ́mɔfa frangaa bɛpena Babilɔn fasue nemɔ aso; ɛ́mɔma ɛwɛnenɛ ne anu ɔ́yɛ se, ɛ́mɔma awɛmvoɛ nemɔ bɛte begyinagyina, ɛ́mɔma mmenia ne bɛtetɛ, ofikyɛ bɔ AWURADE hã fale Babilɔnfoɛ nwo ne, wahyehyɛ, na wamaa wawa nu koso.

¹³ Ao, wɔ bɔ ɛte asue pee noa, bɔ anwonyadeɛ abu wɔ so ɔ, w’ayieleɛ awa, na wɔ ngoa nyamaa nu ate.

¹⁴Asafo AWURADE ata ye bɔbɔ ye nwo ndaen kyɛ: Amba, ngɔma mmenia koyi wɔ nu mitimiti kyɛ mmɛbɛ, na bɛkɔbɔ wɔ nwo ese.

¹⁵“Ye yeɛ ole ye tumi ɔbɔle aseɛ ɔ, ye nworɛ yeɛ ɔnate so fale wiase tindimuni berɛ ɔ, na ye nimdeɛ yeɛ ɔfa trɛtrɛle ewienu nu ɔ.

¹⁶Ɔbɔ nu kurudududu a, nzue pee ba ewienu, ɔma tutue fi aseɛ noa dɔ tu kɔ anwuro; esue tɔ a, ɔma agralaa tete, na ɔma mvrama tu fi nekaa bɔ osie ye nningyein ne.

¹⁷Sona biala te kwaseaa bɔ olle nimdeɛ ɔ; esikaa kɔkorɛ dwumvoɛ biala, ye mmosoen yeɛ begua ye nyunu ase ɔ; ye amoen nemɔ te nnakannaka, na nwomeɛ biala ɔnne bɛ nu.

¹⁸Bɛte nningyein mbaen, bɛte ngorohoɛ nikye, na b’asohwenɛ mmerɛ ne anu, bɛ boso konua.

¹⁹Yakob ye bue deɛ de, ɔtte kyɛ sɔ nningyein nemɔ, ofikyɛ ye de, ye yeɛ ɔyɔle nningyein amukoraa ɔ. Yisrael te abusua kure bɔ ɔte ye agyapadeɛ ɔ, na ye dumaa ole Asafo AWURADE.

²⁰Wɔ yeɛ ɛte m’abopura ne koɛ nu akodeɛ ɔ, mefa wɔ yeɛ mebubu maen maen mɔ nu ɔ, na mefa wɔ yeɛ mesɛkye ahennie mɔ ɔ;

²¹wɔ yeɛ mefa wɔ mebubu pɔngɔ ne pɔngɔhanɛniɛ nu gɔsɔgɔsɔ ɔ, na wɔ yeɛ mefa wɔ mebubu teaseɛnam ne teaseɛnamhanɛniɛ nu gɔsɔgɔsɔ ɔ;

²²wɔ yeɛ mefa wɔ mebubu bienzua ne brasua nu gɔsɔgɔsɔ ɔ, wɔ yeɛ mefa wɔ mebubu mbanyi ne ngwadaa nu gɔsɔgɔsɔ ɔ, na wɔ yeɛ mefa wɔ mebubu aberandeɛ ne taluwa nu gɔsɔgɔsɔ ɔ;

²³wɔ yeɛ mefa wɔ mebubu mmoaenneafoɛ ne ye mmoaen kure nu gɔsɔgɔsɔ ɔ, wɔ yeɛ mefa wɔ mebubu kuaniɛ ne ye nandwie nyii nyɔ bɔ bafa kɔnnua basosɔ bɛ babɔ nu ɔ nu gɔsɔgɔsɔ ɔ; wɔ yeɛ mefa wɔ mebubu maenbulɛfoɛ mɔ ne safohene mɔ nu gɔsɔgɔsɔ ɔ.

²⁴“Na ngotua Babilɔn ne Kaldeafoɛ amukoraa bɛ so kerɛ, ɔnate b’amumuyɛɛ amukoraa bɔ bayɔ ye wɔ Sion bɔ ɛmɔ nye tua ne ati, AWURADE noa dwirɛ ɛne.

²⁵“Tie, wɔ, bokaa sɛkyefoɛ bɔ ɛsɛkye aseɛ ye amukoraa ɔ, meko metia wɔ, na ngɔtengyɛ me sa ngɔhwe wɔ so; ngomunu wɔ ngofi nyɔbotaen nemɔ aso ngɔto ase, na ngɔmaa ɛkɔyɛ bokaa bɔ wayera ɔ, AWURADE noa dwirɛ ɛne.

²⁶Bɛngɔfa nyɔboɛ biala bengofi wɔ so bɛngɔyɛ ndweasoɛ, yeɛ bɛngɔfa wɔ nyɔboɛ bɛngɔyɛ nyinasoɛ, na mmom ɛkɔyɛ kurofoen afebɔɔ, AWURADE noa dwirɛ ɛne.

²⁷Ɛ́mɔfa frangaa bɛpena aseɛ ne aso, ɛ́mɔhu totorobɛndo wɔ maen maen mɔ nu; ɛ́mɔboaboa maen maen mɔ noa maa bɛɛfa koɛ bɛtoa ye, ɛ́mɔfrɛfrɛ ahennie hemɔ maa bɛɛfa koɛ bɛtoa ye: Ararate, Mini ne Asekenase; ɛ́mɔye safohene maa ɔfa koɛ ɔtoa ye, ɛ́mɔma mbɔngɔ bɛbra maa bɛyɛ mitimiti kyɛ mmɛbɛ.

²⁸Ɛ́mɔsiesie maen maen mɔ maa bɛɛfa koɛ bɛɛtoa ye, mekyire Medese ahemvo, bɛ safohene mɔ, bɛ mbanyi amukoraa, ɔne maen biala bɔ owura bɛ bo ɔ.

²⁹Na aseɛ ne woso di aworabɔlɛ, ofikyɛ AWURADE nhyehyɛleɛ biala bɔ ɔfa Babilɔn nwo ne, wawa nu, kyɛ ɔkɔmaa Babilɔn aseɛ ne kɔyɛ kurofoen, bɔ sona fee ɔtte so ɔ.

³⁰Babilɔn koɛhonɛfoɛ bayakyi koɛhonɛ, baafeafea b’anwoserɛ afealeɛ mɔ nu. B’anwoserɛ ayie, bakakyi mmrasua; mmenia ato ye atenaleɛ mɔ nu see, mmuralɛ bɔ ɔbeabea ye pambim mɔ asi ne, babubu nu.

³¹Amirikatulɛniɛ ko tu amirika koyia obiɛngo amirikatulɛniɛ, ɛbɔfoɛ ko tu amirika koyia obiɛngo ɛbɔfoɛ, kyɛ bɛkwaabɔ Babilɔn hene amaneɛ, kyɛ ebiemɔ ali ye kuro ne aso ngonim ofi ye ti kɔkã ye ti:

³²batua asue apɛleɛ nemɔ, bafa see bayerayera elemmire nemɔ, na ahunundetelɛ atɔ koɛhonɛfoɛ nemɔ aso.

³³Ofikyɛ Asafo AWURADE Yisrael Nyameɛ nwa: Babilɔn awa brasua te kyɛ nekaa bɔ bɛboro aburoo ɔ, mmerɛ bɔ betiatia ye so ɔ, nakoso ɔngɔhyɛ biala, né ye buberɛ ne wadwu.”

³⁴“Babilɔn hene Nebukadenesa wapura me, wapɛkyɛ me; wayɛ me tondura too, wame me kyɛ sasrabɔnzam yeɛ wame me ɔ; wafa me kunu nningyein fɛɛ wayi ye ko, na wafe me wato ase.

³⁵Odi kyɛ Sionfoɛ bɛkã kyɛ, Amaneɛ bɔ me ne me nwonaen yanwu ye ne, ɔkɔbɔ Babilɔn ti so.” Yeɛ odi kyɛ Yerusalem kã kyɛ, “Me mogya kɔbɔ Kaldeafoɛ bɛ ti so.”

³⁶Yiti AWURADE nwa nyoo: “Tie, ngoli wɔ dwirɛ ngɔma wɔ, ná matɔ ye so wereɛ mama wɔ. Ngɔma ye ɛpo ne kɔwewe, ná mama ye asue mɔ bawewe.

³⁷Na Babilɔn kɔkakyi esire, ɛserɛ so ngyea atenaleɛ, anwodwiri nikye ne ngorohoɛ nikye bɔ sona fee ɔtte berɛ ɔ.

³⁸“Bɛkɔbɔ nu bɛkɔbobɔ nu kyɛ gyata mɔ, na bekopo kyɛ gyata mmaa.

³⁹Sɛ benya akɔnnɔ ná bɛsɔ a, ngɔto bɛ poen, na ngɔmaa bɛkɔbo, kɔpem kyɛ bɛ nye kɔgye ɔ, bɛkɔla nnaa afebɔɔ, na bengotingye, AWURADE noa dwirɛ ɛne.

⁴⁰Ngɔfa bɛ ngɔtorotoro ngɔhɔ kyɛ mmoaen akrɔngrɔma bɔ bɛfa bɛ bɛkɔ akumyɛɛ ɔ, kyɛ mmoaen nyii ne mbɔngye nyii.

⁴¹Nea kyɛbɔ basi bali Sesake[14] so ngonim ɔ, nea kyɛbɔ wiase amukoraa anwohoahoa ne, basi babɔ ye tɔɔ ɔ! Nea kyɛbɔ Babilɔn asi akakyi anwodwiri nikye wɔ maen maen mɔ nu ɔ!

⁴²Ɛpo ayi afa Babilɔn; ye asorɔkye wuruwuru ne abu afa ye so.

⁴³Ye nguro mɔ akakyi kurofoen, aseɛ katerepee ne ɛserɛ, aseɛ bɔ sona fee ɔtte so ɔ, bɔ dasaniɛ biala ɔmva so ɔ.

⁴⁴Ngɔhwe Bel so wɔ Babilɔn, ná ngɔye bɔ wame ne ngofi ye noa nu. Maen maen ngobiri ngɔwa ye berɛ ko, amba, Babilɔn fasue ne adwiri agua ase.

⁴⁵“Me maen, ɛ́mɔfi ye nu befite! Odi kyɛ ebiala ɔpepɛ de ye kra fi AWURADE yaafɛlɛ piri ne anu.

⁴⁶Nnɛmɔma ɛmɔ kunu tete ɛmɔ, yeɛ nnɛma ɛmɔsuro wɔ edwirɛ mɔ bɔ ɛmɔtete ye wɔ aseɛ ne aso ne anwo, sɛ afoɛ ko ɛmɔtete edwirɛ a, ye si ye afoɛ bieku ɛmɔsa bɛtete dwirɛ; basabasayɔlɛ kɔ so wɔ aseɛ ne aso, na bɔ ole tumi ɔ dwɔso tia ebie bɔ ole tumi ɔ.

⁴⁷Yiti, tie, mmerɛ bie ɔ́ba, bɔ ngɔhwe Babilɔn amoen mɔ bɛ so ɔ, ye maen ne amukoraa nyunu kogua ase, na ye mmenia bɔ bahũhũ bɛ ne, bɛkɔbeabea berɛ wɔ ye nu.

⁴⁸Yeɛ anwuro ne aseɛ, ɔne bɛ nu nningyein amukoraa, bɛkɔtea nu bekɔbɔ Babilɔn nwo ese, ofikyɛ sɛkyefoɛ mɔ kofi sorɔ dɔ bɛkɔfa koɛ bɛkɔɔteta ye, AWURADE noa dwirɛ ɛne.

⁴⁹Kyɛbɔ Babilɔn ama Yisraelfoɛ bɔ bahũhũ bɛ nemɔ bɛbeabea berɛ ne, sɔ ala yeɛ aseɛ so mmenia amukoraa bɔ bahũhũ bɛ ne, bɛkɔbeabea berɛ wɔ Babilɔn ɔ.

⁵⁰“Ɛmɔ bɔ ɛmɔanya ɛmɔ ti badidi nu bafi ngrandɛ noa ɔ, ɛ́mɔfi wa bɛhɔ, nnɛma ɛmɔgyina! Odi kyɛ ɛmɔkaye AWURADE wɔ dedeede dɔ, ná ɛ́mɔkaye Yerusalem koso.

⁵¹‘Yɛ nyunu agua ase, ofikyɛ yate nzoaa pepɛlɛ, animguaseɛ abia yɛ, ofikyɛ ɛwɔfoɛ mɔ bawa AWURADE awuro berɛ nekaa krongron nemɔ anu.’

⁵²“Yiti, tie, mmerɛ bie ɔ́ba, bɔ ngɔhwe ye amoen mɔ so, na ye aseɛ ne aso amukoraa, bɛ bɔ bapurapura ne, bɛkɔpenepene, AWURADE noa dwirɛ ɛne.

⁵³Sɛ Babilɔn fo kɔ anwuro anwuro, ná omiamia ye anwoserɛ abandenden ne anu po a, sɛkyefoɛ kofi me berɛ kɔhɔ ye so, AWURADE noa dwirɛ ɛne.

⁵⁴“Tie, awuye bie fi Babilɔn! Ɛsɛkyelɛ kandinga nwo ndeateamuɛ fi Kaldeafoɛ aseɛ ne aso dɔ!

⁵⁵Ofikyɛ AWURADE asɛkye Babilɔn, na wamaa wahã ye noa serɛserɛ ne wato nu. Ye asorɔkye mɔ bɛsẽ wuruwuru kyɛ asue mbiri, na dede bɔ bɛyɔ, ne ɔgyegye;

⁵⁶ofikyɛ sɛkyefoɛ ne awa ye so, wawa Babilɔn so; bahyehye ye koɛhonɛfoɛ nemɔ, babubu b’agyaen nemɔ anu, ofikyɛ AWURADE Nyameɛ bɔ otua kerɛ ne, okotua kerɛ amba.

⁵⁷Na ngɔma ye atitire mɔ, ye nworɛfoɛ, ye safohene mɔ, ye maen mbanyi mɔ ne ye koɛhonɛfoɛ mɔ bɛkɔbobo, bɛkɔla nnaa afebɔɔ, na bengotingye. Ɛhene bɔ ye dumaa ole Asafo AWURADE ne, ye noa dwirɛ ɛne.

⁵⁸“Yiti Asafo AWURADE nwa nyoo: Bekodwiri Babilɔn fasue tɛtrɛtɛɛ nemɔ bekogua ase, na ye pambim ndendenn nemɔ, bɛkɔfa see bɛkɔyera bɛ; mmenia kɔfɛ kogua mbaen, na nningyein bɔ maen maen mɔ bafɛ banya ye ne, see yeɛ ɔkɔyera ye ɔ.”

⁵⁹Seraya bɔ ye baba ole Neria, bɔ ye baba ole Maaseya ne, ɔne Yuda hene Sedekia bɛhɔle Babilɔn wɔ Sedekia ye ahennie afoɛ bɔ ɔtɔ so nna ne anu nen, edwirɛ bɔ ngɔmhyɛlɛniɛ Yeremia fa tuale Seraya noa ne, ye ɛne. Né Seraya te sanaahene.

⁶⁰Yiti musue amukoraa bɔ ɔkɔto Babilɔn ne, edwirɛ he amukoraa bɔ bahyerɛ bafa Babilɔn nwo ne, Yeremia hyerɛle guale nwomaa bie anu.

⁶¹Na Yeremia sele Seraya kyɛ, “Sɛ ekodwu Babilɔn a, nea kyɛ ɛkɔkenga edwirɛ he amukoraa ɔ;

⁶²ná kã kyɛ, ‘Ao AWURADE, wɔ yeɛ ahã musue dwirɛ bɔ ɔfa ɛwa sɔa nwo ɔ, kyɛ ɛkɔsɛkye ye bɔkɔɔ bɔ ebiala ngɔtena wa ɔ, kyɛ sona oo, kyɛ kaka oo, na mmom ɔkɔkakyi kurofoen afebɔɔ ɔ.’

⁶³Na sɛ ɛkenga nwomaa he yie a, kyekye nyɔboɛ bata ye, findi to asue Yufreti nu,

⁶⁴ná kã kyɛ, ‘Sɔ ala yeɛ Babilɔn kɔmono, bɔ ongodwɔso ko ngofi musue bɔ ngɔprapra ngogua ye so ne anu ɔ.’ ” Na b’ayieleɛ koyie bɛ. Yeremia noa dwirɛ n’ayieleɛ ɛne.