Read Sehwi Yeremia 6 Bible Online

Yeremia 6 - Sehwi bible

Yeremia 6

¹Ao Benyaminfoɛ, ɛ́mɔnwati béfi Yerusalem bɛɛbɔ ɛmɔ nwo adwaa! Ɛ́mɔhu totorobɛndo ne wɔ Tekoa, na ɛ́mɔma nwosina frangaa otu hɔ anwuro wɔ Bete Hakerem, ofikyɛ musue ne amaneɛ piri bie waye ye ti wafi sorɔ dɔ.

²Mafa Sion awa brasua ne matoto taluwa anwonyemene sɔkyee nwo.

³Mmoaenneafoɛ ne bɛ mmoaen kure kɔwa ye so. Bekosi bɛ tena sua bɛkɔbra ye nwo bekoyia, na bɛ nu biala kodidi ye bɔbɔ ye nekaa.

⁴“Ɛ́mɔfa koɛ bɛɛteta ye; ɛ́mɔdwɔso maa yɛfa koɛ yɛɛtoa ye eyiagyina!” “Yawu oo, aleɛ pena sa, nɔsoa wawoɛ mɔ bayɛ ndendenn!”

⁵“Ɛ́mɔdwɔso bɛ́ma yɛɛfa koɛ yɛteta ye kɔngɔen, ná yɛɛbubu ye ahemvie nemɔ!”

⁶Ofikyɛ bɔ Asafo AWURADE ɔkã hɔ ɛhe: “Ɛ́mɔbubu Yerusalem mmakaa bégua, ɛ́mɔfa bɛ́yɛ nyinasoɛ bɛ́fo bɛhɔ kuro ne anu. Ɔte kuro bɔ ɔfata kyɛ bɛtwe ye so ɔ, nhyɛsoɛ ngome yeɛ ɔwɔ nu ɔ.

⁷Kyɛbɔ abura pu ye nzue ba ne, sɔ ala yeɛ Yerusalem di nzɛmmɔne ɔ; atianuserɛ ne atutureasɛm yeɛ bɛte ye wɔ kuro ne anu ɔ; anwonyerɛ ne epuralɛ yeɛ menwu ye daa ɔ.

⁸Ao Yerusalem, fa ɛhe tu wɔ nwo foɛ, wanyɛ sɔ a, me kra kɔhwe ye nwo kofi wɔ nwo, na ngɔmaa ɛkɔkakyi kurofoen, aseɛ bɔ sona biala ɔtte so ɔ.

⁹Bɔ Asafo AWURADE kã hɔ ɛhe: “Bɛkɔyeye Yisraelfoɛ bɔ baha nemɔ anu, kyɛ bobe mmaa bɔ bɛyeye nu ɔ, kyɛbɔ ebie bɔ ɔtete bobe ne, osa fa ye sa tete bɔ waha mmaen ne aso ne gua kɛndɛen nu ɔ.”

¹⁰Nwa yeɛ ndwudwo ngyire ye mmɔ ye kɔkɔ maa otie ɔ? Nea, batuatua bɛ so, bɛngora bɛnde dwirɛ. Nea, AWURADE dwirɛ ne te ngorohoɛ dwirɛ ma bɛ; bɛ nye ngye ye nwo.

¹¹Yiti AWURADE ahonehulɛ ne wawura me nu tɛkyɛ bɔ mengora me nwo so hyɛ ɔ. “Ngɔfa me yaa piri ne ngɔhɔ ngwadaa so wɔ mmorɔnoɛ nemɔ aso, yeɛ mmerandeɛ kure ne aso; ofikyɛ bɛkɔhye biaa ne ɔye po, yeɛ nworowaa ne mmenia bɔ banyi paa ɔ koso.

¹²Na b’awuro mɔ kɔɔyɛ mmeni foforɛ deɛ, bɔ bɛ boo mɔ ne bɛ ye mɔ boka so ɔ; ofikyɛ ngɔtengyɛ me sa wɔ aseɛ ne aso ama bɛ so,” AWURADE noa dwirɛ ɛne.

¹³Ofikyɛ ofi bɛ nu kwahweabaa mɔ so bɔ ɔkwaadwu bɛ nu titire paa mɔ so ɔ, apoobɔlɛ ali ebiala ti; ofi ngɔmhyɛlɛniɛ so bɔ ɔkwaadwu ɔsɔfo so po, ebiala nga nahorɛ.

¹⁴Bande bɛ nye bammia me maen ye ngena mɔ. Na bɛnwa, ‘Asomdwee oo, asomdwee oo,’ wɔ aberɛ bɔ asomdwee nne berɛ ɔ.

¹⁵Akyiwadeɛ nningyein bɔ bɛyɔle ne, aso ɔyɛle bɛ animguaseɛ? Daabi, wanyɛ bɛ nya koraa, bɛ nye ammɔ bɛ dwɛ po. Yiti bɛ koso bɛkɔtotɔ wɔ mmenia bɔ bɛtotɔ nemɔ anu. Mmerɛ bɔ ngɔhwe bɛ so ne, bekowuwu, AWURADE noa dwirɛ ɛne.

¹⁶ Bɔ AWURADE kã hɔ ɛhe: “Ɛ́mɔgyina atee nemɔ aso, ná ɛ́mɔnea; ɛ́mɔbisa bɛ́pena tete atimbire nemɔ, nekaa bɔ atee paa ne la ne, ná ɛ́mɔfa so, amaa ɔnate so ɛmɔanya nwomelelɛ bama ɛmɔ kra. Nakoso bɛnwa, ‘Yɛngɔfa so.’

¹⁷ Asa koso, nyeyele awɛmvoɛ kyɛ bɛbɔ ɛmɔ kɔkɔ kyɛ, ‘Ɛ́mɔtie totorobɛndo ne hulɛ ne!’ Nakoso bɛnwa, ‘Yɛngotie.’

¹⁸Yiti, amaenmaen mɔ, ɛ́mɔtie, ná mmenia bɔ bayia nu, ɛ́mɔnwu nikyee bɔ ɔkɔto bɛ ɔ.

¹⁹Ao aseɛ, tie! Nea, mebaaprapra musue megua maen he aso; bɛ yɔleɛ ne, mmaa bɔ wasu hɔ ɛne, ofikyɛ bandie me noa dwirɛ, na me mmeraa koso, bapo.

²⁰Ɛyɛɛ bɔ bɛ ne ye fi Hyeba bɛba, yeɛ ayirefona bɔ bɛ ne ye fi dedeede maen bie aso bɛba ne, aso bɛ nwo le mvasoɛ ma me? Me nye ngye ɛmɔ ɛyeralɛ afɔleɛ nemɔ anwo, yeɛ ɛmɔ afɔleɛ mɔ koso bɛnzɔ me nye.

²¹Yiti bɔ AWURADE kã hɔ ɛhe: ‘Tie, ngɔfa sundidua ngɔto maen he anyunu, bɔ seɛ mɔ ne mmaa mɔ bɛkɔfofo so bekofi ase ɔ; na abiɛngoɛ mɔ ne adamvoa mɔ bekowuwu.’ ”

²² Yiti bɔ AWURADE kã hɔ ɛhe: “Tie, mmenia bie fi sorɔ dɔ aseɛ ne aso bɛ́ba, maen piri bie kodwɔso kofi aseɛ noa dɔ paa.

²³Betiratira agyaen ne pealɛɛ; bɛ ti anu yɛ se, na bɛnze anwumvoin; bɛ komvi bobɔ nu kyɛ ɛpo asorɔkye, bɛtete mbɔngɔ so. Ao Sion awa brasua, baboa bɛ nwo bɛba wɔ so kyɛ mmenia bɔ bɛkɔ koɛ ɔ!”

²⁴Yate sɔ dwirɛ ne, y’abasa nu agoho; ahunundetelɛ atɔ yɛ so, na yɛnwu yealɛ kyɛ brasua bɔ wafo aworɛ so ɔ.

²⁵ Nnɛma ɛmɔkɔ buro, yeɛ nnɛma ɛmɔnate atee so; ofikyɛ pɔfoɛ nemɔ ngrandɛ ne ahunundetelɛ bapɛ ɛmɔ nwo amukoraa bayia.

²⁶ Ao, me maen awa brasua, kera ɛsɛen tena, munumunu wɔ nwo wɔ nzoen nu, ná sũ hahii kyɛ esu bahorɛ ɔ, bɔ awuye yealɛ paa, ofikyɛ mvum nu yeɛ sɛkyefoɛ ne kɔwa yɛ so ɔ.

²⁷“Matu wɔ masie berɛ kyɛ ɛpɔ me maen nwo, kyɛbɔ sona pɔ buralɛ nwo ɔ, amaa ɔnate so anwu b’atee bɔ bɛnate so ɔ ná apɔ ye nwo.

²⁸Bɛ mukoraa bɛte asoserɛfoɛ bɔ bayɛ lɔen ɔ, bɛnate bedi nzekure; bɛte kɔɔbere ne buralɛ, bɛ mukoraa bɛte ngondombofoɛ.

²⁹Afaa ne, ogye wuronyiwuronyi, see ohuro sum ne; ye nwo pɔlɛ ne kɔ so mbaen, ofikyɛ bendu bɔnefoɛ nemɔ abo.

³⁰Bɛfrɛ bɛ ‘Kɔɔbere Bɔ Bapo Ye Ɔ’, ofikyɛ AWURADE apo bɛ.”