Read Sehwi Yeremia 7 Bible Online

Yeremia 7 - Sehwi bible

Yeremia 7

¹AWURADE dwirɛ bɔ ɔfa mane Yeremia ne ɛhe:

²“Gyina AWURADE awuro anoa piri ne anu berɛ, ná bɔ sɔ dwirɛ he dawure wɔ berɛ kyɛ: Yudafoɛ amukoraa bɔ ɛmɔwura sɔ anoa mbiri hemɔ anu bɛkɔsɔne AWURADE ɔ, ɛ́mɔtie AWURADE dwirɛ.

³Bɔ Asafo AWURADE Yisrael Nyameɛ kã hɔ ɛhe: Ɛ́mɔsesã ɛmɔ atee bɔ ɛmɔnate so ne ɛmɔ yɔleɛ, na ngɔma ɛmɔkɔtena wa.

⁴Nnɛma ɛ́mɔfa ɛmɔ wora bewura ngondombo dwirɛ hemɔ anu: ‘AWURADE asɔneyɛɛ sua ne, AWURADE asɔneyɛɛ sua ne, AWURADE asɔneyɛɛ sua ne ɛhe.’

⁵Ofikyɛ sɛ ɛmɔsesã ɛmɔ atee bɔ ɛmɔnate so, ɔne ɛmɔ yɔleɛ nahorɛ nu, sɛ ɛmɔbua mmenia afia ndɛen bɔ ɔtengyɛ,

⁶sɛ ɛmɔanhyɛ ɛwɔfoɛ mɔ, nyisiaa ne akunafoɛ mmrasua mɔ so, sɛ ɛmɔanga mogya bɔ odi be ɔ bangua wɔ wa, ná ɛmɔanzo nyameɛ foforɛ mɔ bamva banha ɛmɔ nwo a,

⁷ye de ngɔma ɛmɔkɔtena wa, aseɛ bɔ daa ne mva mane ɛmɔ nana mɔ afebɔɔ ne aso.

⁸“Nakoso ngondombo dwirɛ bɔ ɔmmoka ɛmɔ ne yeɛ ɛmɔfa ɛmɔ nwo bɛto so ɔ.

⁹Aso ɛmɔkowua, ɛmɔkoli awue, ɛmɔkɔsɛkye agyaa, ɛmɔkɔta ngondombo ndaen, ɛmɔkɔyera ɛyɛɛ bɛkɔma Baal, ɛmɔkoli nyameɛ foforɛ mɔ bɔ ɛmɔnze bɛ ɔ bɛ si,

¹⁰ná afei ɛmɔagyina me nyunu wɔ awuro ye bɔ me dumaa la so ɔ ye anu, ná ɛmɔahã kyɛ, ‘Edwirɛ tɛɛ biala ngɔto yɛ!’ ná ɛmɔahɔ so babɔ sɔ akyiwadeɛ bra he amukoraa?

¹¹Awuro ye bɔ me dumaa la so ye, aso wakakyi awuefoɛ afealeɛ wɔ ɛmɔ nye so anaa? Tie, me bɔbɔ manwu bɔ ɔkɔ so ɔ, AWURADE noa dwirɛ ɛne.

¹²Afei, ɛmɔhɔ m’atenaleɛ bɔ né ɔwɔ Silo, nekaa bɔ nnili moa mvale me dumaa ndole so ne, ná ɛmɔɔnea nikyee bɔ ɔnate me maen Yisrael ye bɔne ti mva nyɔle ye ɔ.

¹³Na afei, AWURADE nwa nyoo, ɔnate kyɛ ɛmɔayɔ sɔ nningyein hemɔ amukoraa, bɔ ngɔle so ndwudwole ngyirele ɛmɔ dee bɔ ɛmɔandie ne, ná mvrɛle ɛmɔ ne, ɛmɔandɛ me so ne ati,

¹⁴yiti awuro he bɔ me dumaa la so, bɔ ɛmɔafa bɛ wora bawura nu ne, ɔne nekaa bɔ mva mane ɛmɔ ne ɛmɔ nana mɔ ne, edwirɛ bɔ mamaa wato Silo ne yeɛ ngɔmaa ɔkɔto ye ɔ.

¹⁵Na ngɔfoa ɛmɔ ngofi me nyunu, kyɛbɔ mvoane ɛmɔ aliɛma mɔ amukoraa, Efraim boso ama amukoraa ne.

¹⁶“Yiti wɔ de, nnɛpa kyerɛ ma sɔ maen he, nnɛsũ ma bɛ, nnɛbɔ mbaeɛ ma bɛ, yeɛ nnɛsrɛ ma bɛ, ofikyɛ mengɔtɛ wɔ so.

¹⁷Bɔ bɛyɔ ye wɔ Yuda nguro nemɔ aso ne Yerusalem dwaa nemɔ aso ye, aso ennwu ye?

¹⁸Ngwadaa bubu eyein, seɛ mɔ sɔ see, na mmrasua mɔ fete mɔle bɛfa bɛto taterɛ bɛma bosoen bɔ bɛfrɛ ye Nyameɛso Hemmaa ne; na behwie anonneɛ afɔleɛ bɛma mmosoen foforɛ mɔ bɛfa bewura me apue.

¹⁹Me yeɛ bewura me apue ye? AWURADE noa dwirɛ ɛne. Aso nna bɛ bɔbɔ yeɛ bɛha bɛ nwo ɔ?

²⁰Yiti bɔ AWURADE Nyameɛ kã hɔ ɛhe: Tie, m’ahonehulɛ ne me yaa piri ne, ngohwie ngogua ɛwa, kuro sona ne ngaka so, eburo mmakaa ne aseɛ so mmakaammaa so; ɔkɔyera bɔ ongonua ɔ.

²¹Bɔ Asafo AWURADE Yisrael Nyameɛ kã hɔ ɛhe: “Ɛ́mɔfa ɛmɔ naen yeralɛ afɔleɛ bɛ́boka ɛmɔ afɔleɛ mɔ so, ná ɛmɔli naen ne.

²²Ofikyɛ kyẽa bɔ nyele ɛmɔ nana mɔ mvili Misraim aseɛ so mmale ne, mangã naen yeralɛ afɔleɛ ne afɔleɛbɔlɛ nwo dwirɛ mangyire bɛ, yeɛ manhyehyɛ ye nwo mmeraa biala mamma bɛ.

²³Nakoso mmeraa bɔ mva mane bɛ ole kyɛ, ‘Ɛ́mɔtie me dwirɛ, na ngɔyɛ ɛmɔ Nyameɛ, ná ɛmɔ wora ɛmɔayɛ me maen. Na atee amukoraa bɔ nhyehyɛle mmane ɛmɔ ne, so ala yeɛ odi kyɛ ɛmɔfa ɔ, amaa ɔnate so wayie ɛmɔ yé.’

²⁴Nakoso bandie me dwirɛ, yeɛ banyɛ asoɛ bamma me. Na mmom, belili bɛ bɔbɔ bɛ ti piri bɛyɔle bɔne bɔ bekuro ɔ. Bɛkakyili bɛ si bɛmane me bɔ bannea me nyunu ɔ.

²⁵Ofi kyẽa bɔ ɛmɔ nana mɔ befili Misraim aseɛ so bɛwale bɔ ɔbaadwu ɛnɛ ɔ, mahɔ so masoma me somvoɛ ngɔmhyɛlɛfoɛ amukoraa dee wɔ ɛmɔ berɛ,

²⁶nakoso bandie me dwirɛ, yeɛ bandɛ me so, na mmom bɛsoale bɛ kɔme so kyeinn. Bɛyɔle bɔ ɔtte mayee bɛtrale bɛ nana mɔ.

²⁷“Yiti ɛkɔhã sɔ dwirɛ he amukoraa kohyire bɛ, nakoso bengotie wɔ dwirɛ. Ɛkɔfrɛ bɛ, nakoso bɛngɔtɛ wɔ so.

²⁸Kã kyire bɛ kyɛ, ‘Maen bɔ wandie AWURADE ye Nyameɛ dwirɛ, ná wanne ɛtengyɛlɛ bɔ ɔtengyɛ ye wando nu ne, ye ɛhe. Nahorɛ ayie, watu wamini wafi bɛ noa.

²⁹Tete wɔ ti nwiaa gyi gua; bɔ awuye wɔ mmokaa pralaa nemɔ aso, ofikyɛ aworɛ ndoatoasoɛ bɔ bahu AWURADE ahone ne, wapo bɛ waye ye sa wafi bɛ bo.’

³⁰“Ofikyɛ AWURADE nwa nyoo: Yudafoɛ bayɔ bɔne wɔ me nye so. Bagyinagyina b’akyiwadeɛ nningyein ne wɔ sua bɔ me dumaa la so ne anu, maa ɔnate so bafa efiɛ bahã ye.

³¹Na basisi Tofete asɔneyɛɛ nemɔ bɔ ɔwɔ Hinom awa bɔnza ne anu ne, kyɛ bɛfa bɛyera bɛ mma mmienzua ne bɛ mma mmrasua wɔ see nu. Ɛhe te nikyee bɔ mamva ye nwo ahyɛdeɛ mamma bɛ ɔ, yeɛ wamma me ti anu po.

³²Yiti tie, AWURADE nwa nyoo: Mmerɛ bie ɔ́ba bɔ bɛngɔfrɛ ye Tofete anaa Hinom Awa bɔnza ko, na mmom bɛkɔfrɛ ye Akumyɛɛ bɔnza. Ofikyɛ bekosie fuin wɔ Tofete alaa maa okoodwu kyɛ bennya nekaa ko ɔ.

³³Maen he anu ama bɛ fuin kɔyɛ aleɛ kɔma ewienu nnomaa ne aseɛnwo ngaka, na ebiala ngɔfoa bɛ maa bɛngɔnwati.

³⁴Na Yuda nguro nemɔ anu ne Yerusalem dwaa nemɔ aso, ahurusililɛ nwo nga, anigye nwo nga, atɔmvorɛ biaa nwo nga, yeɛ atɔmvorɛ braa nwo nga, ngotu bɛ bo, ofikyɛ aseɛ ne kɔyɛ kurofoen.