Read Sehwi Yeremia 8 Bible Online

Yeremia 8 - Sehwi bible

Yeremia 8

¹“AWURADE nwa nyoo, sɔ mmerɛ ne anu, bekotu Yuda ahemvo mɔ mmowue, ye mbanyi mɔ mmowue, ye asɔfo mɔ mmowue, ye ngɔmhyɛlɛfoɛ mɔ mmowue ne Yerusalemfoɛ mmowue bekofi b’asieleɛ kumaa nemɔ anu.

²Bɛkɔfa bɛ bɛkɔsamo ɛhemɔ anyunu: eyia, ɛsraen ne nyameɛso abɔdeɛ amukoraa bɔ behurole bɛ dwirɛ, bɛsole bɛ, belili bɛ si, ná bɛhɔle bɛ berɛ abisa bɛsɔnene bɛ ne. Bɛngɔboaboa mmowue nemɔ anoa, yeɛ bengosie bɛ; bɛkɔyɛ kyɛ fofoɛ wɔ aseɛ so.

³Sɔ amumuyɛɛ abusua bɔ bɛkɔha ne amukoraa, nekaa biala bɔ mafoa bɛ maagua ne, bekohuro kyɛ bekowu tra kyɛ bɛkɔtena ngoa nu ɔ, Asafo AWURADE noa dwirɛ ɛne.

⁴“Kã kyire bɛ kyɛ, Bɔ AWURADE kã ɛhe: Sɛ mmenia befi ase a, benza bendwɔso ko anaa? Sɛ sona di makyebu a, aso onza ye si anaa?

⁵Na nzu ati yeɛ sɔ Yerusalemfoɛ ye, bafa asefinɛ bayɛ nnaa ye? Batira nnakannaka nu serɛserɛ, na bayɛ b’adwene kyɛ bengosa bɛ si.

⁶Mayɛ asoɛ matie, nakoso bɔ bɛkã ne, nahorɛ nne nu; ebiala nne berɛ bɔ onya ye bɔne nwo nnuhoɛ ɔ, bɔ ɔkã kyɛ, ‘Na nzikyɛ yeɛ mayɔ e?’ Ebiala wamakye waafa ye bɔbɔ ye atee so, kyɛ pɔngɔ bɔ ole amirika ɔkɔ koɛ noa ɔ.

⁷Akyemvona katakyie bɔ ɔwɔ ewienu ne po, ɔse ye mmerɛ; yeɛ aborɔma, nandwinoma ne bɔlanoma bɛse mmerɛ bɔ odi kyɛ bɛba ɔ; nakoso me maen de, benze AWURADE ahyɛdeɛ ne.

⁸Nzu ati yeɛ ɛmɔkã kyɛ, ‘Yɛse nworɛ, na AWURADE mmeraa ne, yɛ berɛ yeɛ ɔwɔ ɔ’? Nakoso tie, nahorɛ nu, ngondombo bɔ ahyerɛlɛfoɛ nemɔ bahyerɛ ne, wakakyi edwirɛ ne maa wayɛ anoanu.

⁹Nworɛfoɛ nyunu kogua ase, ahunundetelɛ kɔtɔ bɛ so, ná wahye bɛ. Tie, AWURADE dwirɛ yeɛ bapo ye e, na nzikyɛ nworɛ yeɛ bɛse ɔ?

¹⁰Yiti ngɔfa bɛ ye mɔ ngɔma mmenia foforɛ, ná mafa bɛ boo mɔ mama bɛ pɔfoɛ mɔ, ofikyɛ ofi kwahweabaa so bɔ ɔkwaadwu atitire paa so, bɛ mukoraa bedi aminɛ; ofi ngɔmhyɛlɛniɛ so bɔ ɔkwaadwu ɔsɔfo so, ebiala nate ngondombo atee so.

¹¹Bande bɛ nye bammia me maen ngena mɔ. Na bɛnwa, ‘Asomdwee oo, asomdwee oo,’ wɔ aberɛ bɔ asomdwee nne berɛ ɔ.

¹²Akyiwadeɛ nningyein bɔ bɛyɔle ne, aso ɔyɛle bɛ animguaseɛ? Daabi, wanyɛ bɛ nya koraa, bɛ nye ammɔ bɛ dwɛ po. Yiti bɛ koso bɛkɔtotɔ wɔ mmenia bɔ bɛtotɔ nemɔ anu. Mmerɛ bɔ ngɔhwe bɛ so ne, bekowuwu, AWURADE noa dwirɛ ɛne.

¹³Ngonua bɛ boso amba, AWURADE noa dwirɛ ɛne. Bengonwu bobe mmaa wɔ bobe bakaa so, yeɛ bengonwu borɔdoma wɔ borɔdoma bakaa so. Bɛ nyaa mɔ po kɔkese, na bɔ mva mane bɛ ne, okofi bɛ sa.

¹⁴Yɛtɛ te berɛ yɛyɔ nzu? Ɛ́mɔboaboa ɛmɔ noa, ná ɛ́mɔma yɛhɔ nguro bɔ bato bɛ nwo fasue nemɔ anu yɛɛwuwu wɔ dɔ, ofikyɛ AWURADE yɛ Nyameɛ wanoma yɛ kyɛ yɛwuwu, na wama yɛ nzue bɔ ɛborɔ wɔ nu ɔ kyɛ yɛno, ofikyɛ yayɔ bɔne yatia AWURADE.

¹⁵Yɛ nye lale asomdwee ate, nakoso nikye paa biala wamvi nu wamma, yɛ nye lale anwonyerɛsalɛ mmerɛ ate, nakoso ahunundetelɛ mmom yeɛ watɔ yɛ so ɔ.

¹⁶“Bɛte bɛ mbɔngɔ nemɔ nwomeɛlelɛ ne befi Dan; bɛ mbɔngɔ nyii nemɔ, bɛ suɛ ne, ye dede ne ma aseɛ ne amukoraa woso. Ofikyɛ bɛ́ba bɛbasɛkye aseɛ ne, ɔne so nningyein amukoraa, bɛbaabɔ kuro ne, ná bekũkũ nu ama.

¹⁷Tie, mésoma ewoo mɔ, ɛbɔnaa bɔ ewoo ayire ngora bɛ ɔ, maa bɛba ɛmɔ so na bɛkɔkeka ɛmɔ,” AWURADE noa dwirɛ ɛne.

¹⁸M’anigye atu amini, aworabɔlɛ atira me, me kra wora abɔ wɔ me nu.

¹⁹Tie, me maen awa brasua ye sufrɛ fi aseɛ ne ti kɔkã ye ti kyɛ, ‘Aso AWURADE nne Sion anaa? Aso ye Hene ne, ɔnne kuro ne anu anaa?’ “Nzu ati yeɛ bafa b’amoen nemɔ ne amaenmaenso mmosoen bawura me apue ye?”

²⁰Buberɛ ne apɛ nu, mmakaammaatelɛ mmerɛ ne wawa ayieleɛ, nakoso bellele yɛ ngoa.”

²¹Ɔnate me maen awa brasua ye puralɛ ne ati, me koso mapura, mébɔ awuye, na ahunundetelɛ atɔ me so.

²²Aso ayire biala nne Gileade anaa? Aso safoɛ biala nne berɛ anaa? Nzu ati yeɛ me maen awa brasua bennya bɛssale ye anwonyerɛ ye?