Read Sehwi Awuye 1 Bible Online

Awuye 1 - Sehwi bible

Awuye 1

¹Ao, kuro bɔ né mmenia ayɛ nu mitimiti ne, ye yeɛ afei waha ye ngome e! Kuro bɔ né odi mu wɔ maen maen mɔ nu ne, ye yeɛ afei wakakyi kyɛ kunaniɛ ye! Kuro bɔ né odi maen maen mɔ so hemmaa ne, ye yeɛ afei de bede ye ndɔ e!

²Osũ hahii kɔngɔen, ɛmoen songyi ye nye abo, na bɛ bɔ bekuro ye ne amukoraa, onnya bɛ nu ko po mma ɔngyekye ye wora; ye mmango amukoraa bali ye ngasi, na bakakyi ye pɔfoɛ mɔ.

³Amaneɛnwunɛ ne nhyɛsoɛ kandinga nu yeɛ bahye Yuda nnure bahɔ ɔ. Waatena amaen maen mɔ nu, na onnya nekaa bɔ ɔkɔtena kole ye nwome ɔ, bɛ bɔ bɛfoa ye ne amukoraa baato ye, bahã ye bapua wɔ atee kyenɔnn bie aso.

⁴Sion atimbire nemɔ bedi aworabɔlɛ, ofikyɛ sona biala mma aluolue nemɔ abo, ye pambim amukoraa bɛlela berɛ too, ye asɔfo mɔ bedi yealɛ, ye mmabunu mɔ bayɛ anwumvoin anwumvoin, na ye bɔbɔ wora onwu amaneɛ paa.

⁵Bɛbɔ bekyi ye ne, bakakyi ye mene mɔ, wayie ye pɔfoɛ mɔ yé, ofikyɛ AWURADE aprapra amaneɛ wagua ye so. Na ɔnate ye mmeraatolɛ worawora ne ati, ye pɔfoɛ mɔ bahye ye mma mɔ nnure, na bafa bɛ bahɔ.

⁶Sion awa brasua ne, ye anwonyemene amukoraa atu amini; ye atitire mɔ bayɛ kyɛ dabɔɔ bɔ bennya aleɛ benni ɔ, na banwati bɔ b’anwoserɛ ayie, wɔ bɛ bɔ bɛfoa bɛ nemɔ bɛ nyunu.

⁷Na Yerusalem ye anwokyere ne aworabɔlɛ mmerɛ nu, ɔkayele ye nningyein nyemene amukoraa, bɔ mmerɛ bie né ole ye ne. Mmerɛ bɔ ye mmenia beelili pɔfoɛ ne sa nu, bɔ wannya ebiala maa wammoka ye ne, bɛ bɔ bekyi ye nemɔ benwuni ye, na bɛgorole ye nwo, ɔnate ye asefinɛ ne ati.

⁸Yerusalem ayɔ bɔne paa, yiti ye nwo agua fiɛ. Bɛ bɔ né bebu ye ne amukoraa, bebu ye animtia, ofikyɛ banwu ye nwo; amba ye bɔbɔ deinn ogua anwongokoɔ, na wakakyi ye si.

⁹Ye nwo bɔ wagua fiɛ ne, wayɛ ye ataadeɛ ne anu; wangaye ye ayieleɛ, yiti wafi ase buramm, na olle aworakyekyerɛniɛ biala. “Ao AWURADE, nea m’amaneɛnwunɛ, ofikyɛ pɔfoɛ ne, wali ngonim.”

¹⁰Pɔfoɛ ne, watengyɛ ye sa wɔ ye nningyein nyemene ne amukoraa so, na wanwu kyɛ maenmaensofoɛ nemɔ, bɔ ahyɛ bɛ kyɛ nnɛmaa bɛkɔ wɔ badwa ne anu ne, bahɔ ye nekaa krongron ne anu.

¹¹Ye mmenia amukoraa bedi yealɛ, bɛpena aleɛ; bafa bɛ nningyein nyemenenyemene ne basesã aleɛ bama bɛ kra nwo atɔ ye. “Ao AWURADE, nea ná nwu ye, ofikyɛ bebu me animtia.”

¹²“Ɛmɔ bɔ ɛmɔpɛ nu wa amukoraa, aso ɔmva ɛmɔ nwo? Ɛ́mɔnea ná ɛ́mɔnwu ye, sɛ aworabɔlɛ bie wɔ berɛ, bɔ ɔte kyɛ m’aworabɔlɛ bɔ wato me ye, bɔ AWURADE aprapra wagua me so, wɔ ye yaafɛlɛ piri kyẽa ne anu ye.

¹³“Wasoma see wafi anwuro maa waawura me mmowue nu, na ɔyerayera nu; wasua me gya ngaen, wamaa masa me si, wamaa waha me ngome oo, na meyɛ hodwoo daa biala.

¹⁴“Wafa ye sa wakyekye me mmeraatolɛ ne maa wakakyi kɔnnua. Basina baya me kɔme anu, wama m’anwoserɛ ayie. Bɛ bɔ mengora bɛ nyunu gyina ne, AWURADE afa me wawura bɛ sa.

¹⁵“M’anwoserɛfoɛ amukoraa bɔ bɛwɔ me nu ne, AWURADE atiatia bɛ so. Wafrɛfrɛ mmenia pee maa babɔ dwaa batia me, kyɛ behũhũ me mmerandeɛ mɔ. AWURADE atiatia Yuda awa brasua ababunu ne aso, kyɛbɔ bɛyɔ ye wɔ kumaa bɔ betwi nu nzaa ne anu ne ala.

¹⁶“Sɔ nningyein nemɔ ati yeɛ mesu ye; me nye moen poro nzue, ofikyɛ aworakyekyerɛniɛ bɔ odi kyɛ ɔkyekye me kra wora ne, ɔwɔ dedeede.” Waha me mma mɔ angome oo, ofikyɛ pɔfoɛ ne ali ngonim.

¹⁷Sion atrɛtrɛ ye sa nu, na olle ebiala maa ɔngyekye ye wora. AWURADE ama Yakob nwo ahyɛdeɛ, kyɛ ye pɔfoɛ mɔ bɛpɛ ye nwo beyia. Yerusalem akakyi kyɛ nikyee bɔ ye nwo nde ɔ wɔ bɛ nu.

¹⁸“AWURADE di be, ofikyɛ mayɛ ye mmeraa nwo lɔen. Maen maen amukoraa, mesrɛ ɛmɔ, ɛ́mɔtie, ná ɛ́mɔnea m’aworabɔlɛ ye. Bahye me ndaluwa mɔ ne me mmerandeɛ mɔ nnure bahɔ.

¹⁹“Mvrɛfrɛle bɛ bɔ mekuro bɛ nemɔ, nakoso bɛlakalakale me. M’asɔfo ne me mbanyi mɔ, bɛtotɔle wɔ kuro ne anu, mmerɛ bɔ né bɛpena bɛ noa aleɛ ma bɛ kra mɔ nwo tɔ bɛ ne.

²⁰“Ao AWURADE, nea, na edwirɛ ato me, me kunu tete me; me wora abɔ, ofikyɛ mayɛ ɛlɔen kandinga paa. Ngrandɛ ne kũkũ me mma wɔ dwaaso, yeɛ ewue koso kũkũ bɛ wɔ awuro.

²¹“Bate kyɛ medi yealɛ, na ebiala nne berɛ bɔ ɔkyekye me wora ɔ. Me pɔfoɛ mɔ amukoraa bate m’amaneɛnwunɛ ne, na bɛ nye agye kyɛ ayɔ sɔ ɔ. Kyẽa bɔ ahyehyɛ ato berɛ ne, ɛkɔmaa ɔkɔwa nu, na bɛkɔyɛ kyɛ me ala.

²²“Ma b’amumuyɛɛ amukoraa oodwu wɔ nyunu, na ɛne bɛ li kyɛbɔ ɔnate m’amumuyɛɛ amukoraa ne ati, ɛne me ali ne. Ofikyɛ me yealɛlilɛ ne wasone, na ahunundetelɛ atɔ me so.