Read Sehwi Awuye 3 Bible Online

Awuye 3 - Sehwi bible

Awuye 3

¹Me ole sona bɔ manwu amaneɛ wɔ ye yaafɛlɛ mbire ne anoa ne.

²Wahwe me wafa me wahɔ awosii nu, na mmom nna hyireinn nu ɔ.

³Amba, me ngome yeɛ watu ye nye wasie me so ɔ, na ɔfa ye sa ogyina me nwo daa biala.

⁴Wama me nwonaen ne me wereɛ atwindwam; wabubu me mmowue nu.

⁵Wafa abɔwee ne amaneɛnwunɛ wato me nwo fasue wabra wayia.

⁶Wafa me watena awosii nu kyɛ daa tete awufoɛ nemɔ ala.

⁷Wayɔ aberedwaa wafa me nwo bɔ mengora memvite ɔ, wagua me ngɔnzɔngɔnzɔ nonɛnonɛ.

⁸Yeɛ sɛ mebɔ awuye metea nu koso a, osi me mbaeɛ nwo ate.

⁹Wafa nyɔboɛ bɔ badwa ɔ watua m’atimbire, wakondokondo m’atee.

¹⁰Ɔte kyɛ kwabrafo bɔ ɔtetɛ ɔ ma me, kyɛ gyata bɔ ɔwɔ mvealeɛ nu ɔ.

¹¹Wamaa mali makyebu, na watete me nu pasapasa: wamaa waha me ngome oo.

¹²Wasina ye agyaen, na wafa agyaen ne wahyire me so.

¹³Wama ye ndokue nu agyaen wasina me nyaa nu.

¹⁴Ngakyili ngorohoɛ nikyee mane me maen amukoraa, ngakyili bɛ noa nu dwein daa biala.

¹⁵Wafa yealɛ wayi me nu to, wamaa mano awɔwee maa wafo me boɛ so.

¹⁶Wamaa mafa me gye mapesa nyɔboseka; wafa nzoen wagua me nwo amukoraa.

¹⁷Ama me kra ne asomdwee afia atee awale, me wora afi nikyee bɔ bɛfrɛ ye anwotɔ ɔ.

¹⁸Na ngane kyɛ, “M’anwoserɛ ne m’anyelasoɛ atu amini afi AWURADE nu.”

¹⁹Kaye m’amaneɛnwunɛ ne m’anwokyere, ɔte awɔwee ne abɔwee.

²⁰Me kra tɛ kaye bɛ, na wabrɛ ye nwo ase wɔ me nu.

²¹Nakoso ɛhe yeɛ mekaye wɔ me ti anu ɔ, yiti anyelasoɛ wɔ berɛ ma me.

²²AWURADE adaworoma yeɛ yɛ boso wannua ɔ, ofikyɛ ye anwumvoinnwunɛ ye bo ngɔpɛ le.

²³Ngyerɛmɔ biala ɔte foforɛ, wɔ nahorɛlilɛ te piri.

²⁴Me kra nwa, “AWURADE yeɛ ɔte me bue deɛ ɔ, yiti ngɔfa me wora ngowura ye nu.”

²⁵AWURADE te paa ma bɛ bɔ bɛ nye la ye ate ɔ, ɔte paa ma ɛkra bɔ ɔpena ye si atee ɔ.

²⁶Ɔte paa kyɛ ɛkɔyɛ konn anyelasoɛ nu kɔnwondɛ AWURADE ngoalelɛ ne ɔ.

²⁷Ɔte paa ma sona kyɛ ɔkɔfa kɔnnua ne kɔto ye kɔme nu wɔ ye mmerandeɛ nu ɔ.

²⁸Sɛ ɔfa to sona ne kɔme anu a, odi kyɛ ye ngome ɔtena berɛ ɔyɛ konn.

²⁹Odi kyɛ ɔfa ye noa butu nnɛterɛ nu, ebiaa né anyelasoɛ wɔ berɛ ma ye.

³⁰Odi kyɛ ɔkakyi ye so taa nu ma sona bɔ ɔkɔbɔ ye so anu ne, ná ɔmaa bɛbɔ ye alapaa pasaa.

³¹Ofikyɛ AWURADE ngɔpo sona afebɔɔ.

³²Na sɛ ɔma ebie wora bɔ po a, okonwu ye anwumvoin kyɛbɔ ye anwumvoinnwunɛ ne, ye piri ɔte ne.

³³Ofikyɛ nna bɔ okuro ole kyɛ ɔkɔprapra amaneɛ kogua sona so, anaakyɛ ɔkɔma adasa mmaa bɛ wora kɔbɔ ɔ.

³⁴Sɛ ebie pɛkyɛ aseɛ ye aso kukunufoɛ amukoraa wɔ ye gya bo a,

³⁵sɛ obua ebie ndɛengyea wɔ Anwuro Anwuroniɛ ne nyunu a,

³⁶sɛ bedi dwirɛ betia ebie a, AWURADE mbene so sɔ.

³⁷Nwa yeɛ ɔkã maa ɔba nu wɔ aberɛ bɔ nna AWURADE yeɛ wahyehyɛ ye sɔ ɔ?

³⁸Tɛɛ oo, paa oo, aso nna Anwuro Anwuroniɛ ne noa nu yeɛ befi bɛba ɔ?

³⁹Nzu ati yeɛ odi kyɛ dasaniɛ ɔbɔ somoɛ wɔ ye bɔne nwo asohwenɛ nwo ɔ?

⁴⁰Ɛ́mɔma yɛneanea y’atee nu ná yɛpɛnzɛpɛnzɛ nu, ná yɛsa yɛbra AWURADE berɛ!

⁴¹Ɛ́mɔma yɛfi y’ahone nu yɛma yɛ sa so yɛbɔ mbaeɛ yɛhyire Nyameɛ wɔ nyameɛso kyɛ,

⁴²“Yayɛ amumuyɛɛ, yeɛ yayɛ lɔen, na amva angyɛ.

⁴³Afa ɛyaafɛlɛ amundu wɔ nwo, na atane yɛ nye: ahũhũ bɔ annwu anwumvoin ɔ.

⁴⁴Afa munungum amundu wɔ nwo, kyɛbɔ ɔkɔyɛ bɔ yɛ mbaeɛ ngɔfa nu ngodwu wɔ berɛ ɔ.

⁴⁵Amaa yakakyi kyɛ ewura ne fofoɛ wɔ maen maen mɔ b’afia.

⁴⁶“Yɛ pɔfoɛ mɔ amukoraa, batu bɛ noa bagua yɛ so.

⁴⁷Ahunundetelɛ, kumaa, ɛsɛkyelɛ ne amaneɛ yeɛ wawa yɛ so ɔ.

⁴⁸Me nye poro moen kyɛ asue nu nzue, ɔnate me maen awa brasua ye amaneɛnwunɛ ne ati.

⁴⁹“Me nye moen poro, ɔnyakyi porolɛ, na ye bo mbɛ,

⁵⁰kɔpem kyɛ AWURADE kɔto ye nye kofi nyameɛso kɔnea ase ɔ.

⁵¹Me nye ma me wora bɔ, ɔnate me kuro mma mmrasua amukoraa bɛ ti.

⁵²“Me pɔfoɛ mɔ bɛfoa me anyeborolɛ so mbaen kyɛ anomaa.

⁵³Bafindi me bato kumaa nu anyekaenn so, na bahuru nyɔboɛ bagua me so.

⁵⁴Nzue bu fale me ti so, na ngane kyɛ, ‘Mawu mayie oo!’

⁵⁵“Ao AWURADE, mvi kumaa ne bo dɔ nzu mvrɛle wɔ dumaa.

⁵⁶Atie me sufrɛ, nnɛtuatua wɔ so wɔ me mbaeɛ ne me suɛ nwo.

⁵⁷Kyẽa bɔ nzu mvrɛle wɔ ne, ɛhwe pingyele me, na ɛhane kyɛ, ‘Nnesuro!’

⁵⁸“Ao AWURADE, ali me kra dwirɛ ama ye; apepɛ ale me ngoa.

⁵⁹Ao AWURADE, anwu edwirɛ tɛɛ bɔ bafa bali me ɔ, di me dwirɛ ma me.

⁶⁰Anwu bɛ wereɛtɔlɛ amukoraa, ɔne me nwo porɛ bɔ babɔ amukoraa.

⁶¹Ao AWURADE, ate ɛgorolɛ bɔ bɛgoro me nwo, ɔne me nwo porɛ bɔ babɔ amukoraa.

⁶²Bɛ bɔ bedwɔso betia me ne, ate bɛ noa dwirɛ, ɔne adwene tɛɛ bɔ bɛdwene me nwo daa biala ɔ.

⁶³B’asetenalɛ nu oo, bɛ dwɔsolɛ nu oo, me yeɛ mayɛ bɛ ngorohoɛ dwein ɔ.

⁶⁴Ao AWURADE, tua bɛ so kerɛ kyɛbɔ bɛ yɔleɛ te ɔ.

⁶⁵Ma bɛ wora ɔbɔ, ná wɔ ɛnomalɛ ne ɔbra bɛ so.

⁶⁶Ao AWURADE, fɛ yaa foa bɛ kũkũ bɛ fi wɔ nyameɛso ne abo.