Read Sehwi Awuye 5 Bible Online

Awuye 5 - Sehwi bible

Awuye 5

¹Ao AWURADE, kaye edwirɛ bɔ wato yɛ ye, fa wɔ nye to, ná nea y’animguaseɛ ye.

²Y’agyapadeɛ waali ɛwɔfoɛ mɔ bɛ sa nu, y’awuro mɔ baali amanvrafoɛ mɔ bɛ sa nu.

³Yakakyi nyisiaafoɛ bɔ belle seɛ ɔ, yɛ ni mɔ akakyi kunafoɛ.

⁴Nzue bɔ yɛno ɔ, sana yɛtua ye kerɛ, na yɛ nwuaka koso, bɛtɔne ye bɛma yɛ.

⁵Yɛ kɔme wura ndaneanyeɛ bo; yɛyɔ adwuma bɔ bɛmma yɛnne yɛ nwome ɔ.

⁶Yafa yɛ nwo yawura Misraimfoɛ ne Asiriafoɛ bɛ bo, kyɛbɔ ɔkɔyɛ bɔ yɛkonya aleɛ yɛkoli ɔ.

⁷Yɛ nana mɔ bayɔ bɔne, na bawuwu, na yɛ yeɛ yasoa b’amumuyɛɛ ɔ.

⁸Nganga mɔ yeɛ bedi yɛ so ɔ, na ebiala nne berɛ bɔ okole yɛ kofi bɛ sa nu ɔ.

⁹Yɛfa yɛ ngoa yɛto serewa koraka né yanya aleɛ yali, ɔnate ɛserɛ so ngrandɛ ne ati.

¹⁰Yɛ nwonaen apini tunn kyɛ bokyea, ɔnate ɛhɔen kandinga ne ati.

¹¹Bɛtole Sion mmrasua nemɔ mmɔnaa, yeɛ Yuda nguro nemɔ aso ndaluwa koso sɔ ala.

¹²Bɛkyekye bɛ nnehyeɛ mɔ sa besinze berɛ beku bɛ, bɛmva anidie bɛmma mbanyi.

¹³Bɛhyɛle mmerandeɛ mɔ maa besili aburoo, na ngwadaa soa eyein bɔ bɛngora bɛ gya tu ɔ.

¹⁴Nworowaa mɔ bayakyi kuro berɛ pambim ne anu hɔlɛ, na mmerandeɛ bayakyi bɛ dweintolɛ ne.

¹⁵Y’ahone nu anigye atu amini, na y’abilie akakyi yealɛlilɛ.

¹⁶Y’ahennie abotire ne, watu wafi yɛ ti so. Edwirɛ ato yɛ oo, ɔnate kyɛ yayɔ bɔne!

¹⁷Ɔnate ɛhe ati, yɛ wora abɔ. Ɛhemɔ ati, yɛ nye ayɛ musinamusina.

¹⁸Sion bokaa ne ayɛ kurofoen, yiti eburo ngyea natenate so.

¹⁹Nakoso AWURADE, wɔ de ɛwɔ berɛ afebɔɔ; w’ahennie bia wɔ berɛ aworɛ ndoatoasoɛ amukoraa nu.

²⁰Nzu ati yeɛ ama wɔ wora afi yɛ afebɔɔ ye, ná ayakyi yɛ nu mmerɛ tendenn sɔa ye?

²¹Ao AWURADE, ma yɛ nye osa kakyi ɔbra wɔ berɛ, na yɛkosa yɛkɔwa. Maa yɛsa yɛpe yɛ daa nu.

²²Nakoso apo yɛ bɔkɔɔ, w’ahone ahu yɛ so paa.