Read Sehwi Hesekiel 1 Bible Online

Hesekiel 1 - Sehwi bible

Hesekiel 1

¹ Na ɔwale kyɛ, afoɛ aburasa ne aso, bosome bɔ ɔtɔ so nna ne anu, ye elennu ne aso, mmerɛ bɔ né nwɔ mmenia bɔ bahye bɛ nnure nemɔ anu wɔ asue Kebare noa berɛ ne, nyameɛso bukyele, na nyane nyekyire nwuni Nyameɛ.

² Na kyẽa bɔ ɔtɔ so nnu wɔ bosome ne anu ne, (bɛhyele Nana Yehoakim nnure bɛhɔle ɔ, né ye afoɛ nnu ɛne),

³AWURADE lale ye dwirɛ ali hyirele ɔsɔfo Hesekiel bɔ ye baba ole Busi ne wɔ Kaldeafoɛ aseɛ so wɔ asue Kebare noa; na berɛ yeɛ AWURADE tumi wale ye so ɔ.

⁴Ndole me nye nneane, na yieee, mvrama piri bie tu fili sorɔ dɔ, munungum pirikua bie bɔ kanea hyireinn apɛ ye nwo ayia ɔ, bɔ ogye see ɔ, bɔ see n’afia ne ɔte kyɛ kɔɔbere bɔ ogye monyerɛnmonyerɛn ɔ.

⁵ Yeɛ abɔdeɛ ateasefoɛ bɛ sɛso nna befili see ne anu bɛwale. Sɔaa yeɛ né bɛ sue te ɔ: Né bɛ sue te kyɛ sona,

⁶nakoso né bɛ nu biala ye nyunu te nna, yeɛ né ebiala ye ndaa koso te nna.

⁷Né bɛ gya nemɔ tengyɛ fɔngɔnn, na bɛ gya kunu te kyɛ nandwie ba deɛ ne ala; na né bɛ nwo ta te kyɛ kɔɔbere bɔ bahwi ye nwo nahanaha ɔ.

⁸Na bɛ bue nna ne, wɔ bɛ ndaa nemɔ abo, né sona sa mɔ betuatua berɛ. Yiti abɔdeɛ nna ne, né bele bɛ nyunu mɔ ne bɛ ndaa mɔ.

⁹Bɛ ndaa ne, ko deɛ kɔkã obiɛngo deɛ; na bɛkɔ a, bɛkɔ bɛ nyunu tee bɔ ebiala ɔngakyi ye nwo ɔ.

¹⁰ Sɔaa yeɛ bɛ nyunu ne osoma ɔ: Bɛ mmɛnna ne, ebiala le sona nyunu; ebiala le gyata nyunu wɔ ye famaa so; bɛ mmɛnna ne, ebiala le nandwie nyunu wɔ ye bɛen so, na ebiala le kɔleɛ nyunu [wɔ ye si][1].

¹¹Sɔ yeɛ né bɛ nyunu te ɔ. Né bɛ ndaa ne anu trɛtrɛ kɔ anwuro; abɔdeɛ ko biala ndaa te nyɔ, na ndaa nyɔ ne, ko biala trɛ kɔkã obiɛngo deɛ, yeɛ bɛ ndaa nyɔ nyɔ katakata bɛ nwonaen ne anwo.

¹²Bɛ nu biala kɔ ye nyunu tee; nekaa bɔ sunzum ne kɔ ne, berɛ yeɛ bɛkɔ ɔ, na bɛngakyikakyi bɛ nwo.

¹³ Abɔdeɛ ateasefoɛ nemɔ bɛ sue ne, besoma see bɔ wasɔ gonn ɔ, besoma kanea bɔ ɔkɔ ye nyunu ne ye si wɔ abɔdeɛ ateasefoɛ nemɔ b’afia ɔ. Né see ne ta, na agralaa tete fili see ne anu.

¹⁴Né abɔdeɛ ateasefoɛ nemɔ bele amirika bedi akɔneaba kyɛ agralaa bɔ ɔte yerɛmyerɛm ɔ.

¹⁵Na ngu so menea abɔdeɛ ateasefoɛ nemɔ nen, nwuni kango ko wɔ aseɛ so, bɔ ye nyunu nna ɔ, wɔ abɔdeɛ ateasefoɛ nemɔ nwo berɛ.

¹⁶Sɔaa yeɛ kango nemɔ bɛ sue ɔne kyɛbɔ besi bɛyɔle bɛ ɔ ɔte ɔ: bɛ nwo sue ne te kyɛ nyɔboɛ krisolite bɔ ɔte hyɛmhyɛm ɔ, na bɛ mmɛnna ne, bɛ sue te ko. Kango nemɔ bɛ sue, ɔne kyɛbɔ besi bɛyɔle bɛ ne, ɔte kyɛ kango bɔ owura kango nu ɔ.

¹⁷Sɛ bɛkɔ a, bɛfa bɛ bue nna ne yeɛ bɛnate ɔ, na bɛkɔ a, bɛngakyikakyi bɛ nwo.

¹⁸ Na bɛ hangra ne, né ɔwale kɔ anwuro alaa maa ɔyɛ suro; na né anyeɛ tuatua bɛ mmɛnna nwo amukoraa bra yia.

¹⁹Na sɛ abɔdeɛ ateasefoɛ nna nemɔ bɛkɔ a, kango nemɔ di bɛ ngyɛnu bɛkɔ bie; yeɛ sɛ abɔdeɛ ateasefoɛ nemɔ bɛpagya bɛ nwo befi aseɛnwo a, kango nemɔ koso bɛpagya bɛ nwo bie.

²⁰Nekaa biala bɔ sunzum ne kɔ ne, berɛ yeɛ bɛkɔ ɔ; na kango nemɔ, bɛ ne bɛ bɛpagya bɛ nwo bɛbɔ nu, ofikyɛ abɔdeɛ ateasefoɛ ne, ye sunzum wɔ kango nemɔ anu.

²¹Sɛ bɛkɔ a, né bɛ koso bɛkɔ, yeɛ sɛ begyina a, né bɛ koso bagyina. Yeɛ sɛ bɛpagya bɛ nwo befi aseɛnwo a, kango nemɔ ne bɛ bɛpagya bɛ nwo, ofikyɛ abɔdeɛ ateasefoɛ ne, ye sunzum wɔ kango nemɔ anu.

²²Né nikyee bie bɔ ɔte kyɛ nikyee bɔ batrɛtrɛ nu ɔ ɔwɔ abɔdeɛ ateasefoɛ nemɔ bɛ ti so bɔ ɔta kyɛ nyɔboɛ hyɛnhyɛnn, bɔ nu atrɛtrɛ wakata bɛ ti so ɔ.

²³Né batrɛtrɛ bɛ ndaa nu bɔ ebiala ndaa kɔkã obiɛngo deɛ wɔ nikyee tɛtrɛtɛɛ ne abo ɔ; na abɔdeɛ teasefoɛ nemɔ, né ebiala le ndaa nyɔ bɔ ɔkɔta ye nwo ɔ.

²⁴ Na bɛkɔ ne, ndele dede bɔ bɛ ndaa nemɔ yɔle ne, na né ɔte kyɛ asue mbiri bɔ bɛsẽ wuruwuru ɔ, kyɛ Tuminiɛ ne bɔ ɔbɔ nu kurudududu ɔ, kyɛ koɛhonɛfoɛ bɔ bɛbɔ ese ɔ. Na sɛ begyina a, né bahã bɛ ndaa ne ase.

²⁵Na nikyee tɛtrɛtɛɛ bɔ ɔwɔ bɛ ti so anwuro ne, komviɛ bie fili nu wale; na begyinane, bɛhane bɛ ndaa ne beguale ase.

²⁶ Nikyee tɛtrɛtɛɛ bɔ ɔwɔ bɛ ti so anwuro ne, né nikyee bie bɔ osoma ahennie bia bɔ bafa nyɔboɛ bɔ osoma safire bayɔ ɔ ɔwɔ ye ti so anwuro. Na nikyee bɔ osoma ahennie bia ne, né nikyee bie bɔ ye sue te kyɛ sona ɔ ɔwɔ so anwuro.

²⁷Na nekaa bɔ osoma ye sisia ne, ye anwuro, nwuni nikyee bie te kyɛ kɔɔbere bɔ ogye ɔ, kyɛ see bɔ ogye bra yia ɔ. Yeɛ bɔ osoma ye sisia ne, ye aseɛnwo wora, nwuni nikyee bie bɔ ɔte kyɛ see ɔ, na né wata wabra wayia ye nwo.

²⁸Na kyɛbɔ nyangondoen bɔ ɔwɔ munungum nu, wɔ kyẽa bɔ esue tɔ ɔ osi te ne, sɔ ala yeɛ ye nwo bɔ né wata hyireinn wabra wayia ne, ɔte ɔ. Ye sɛso ne, osoma AWURADE animnyam ne. Na nwuni ye ne, mvale me nyunu mmutuli berɛ, na ndele bɔ odwudwo ne komvi.