Read Sehwi Hesekiel 11 Bible Online

Hesekiel 11 - Sehwi bible

Hesekiel 11

¹Afei Sunzum ne mane me so, na ɔfale me wale AWURADE awuro berɛ eyia afiteleɛ anoa piri bɔ ye nye kyire eyia afiteleɛ ne anyunu. Na nwuni mmienzua aburanyɔ ne nnu wɔ anoa piri ne anyunu berɛ, na nwuni Asure awa Yaasania ne Benaya awa Pelatia bɔ bɛte maen mbanyi ne kyɛ bɛboka bɛ so ɔ.

²Na osele me kyɛ, “Sona awa, mmenia bɔ bɛdwene amumuyɛɛ adwene ná besa betu foɛ tɛɛ wɔ kuro he anu ne, bɛ ɛne.

³Bɛ yeɛ bɛnwa: ‘Mmerɛ bɔ bɛfa besisi sua ne onnya oddwuli. Kuro he ole turonzemaa ne, yeɛ yɛ ole naen ne.’

⁴Yiti hyɛ ngɔm tia bɛ, O Sona awa, hyɛ ngɔm.”

⁵Yeɛ AWURADE Sunzum wale me so, na osele me kyɛ, “Kã kyɛ AWURADE nwa nyoo: O Yisrael awuro ama, bɔ ɛmɔkã hɔ ɛne, ofikyɛ mese ɛmɔ ti anu adwene biala.

⁶Ɛmɔahũhũ mmenia pee wɔ kuro ye anu, na ɛmɔafa mmenia bɔ ɛmɔahũhũ bɛ ɔ bɛ fuin bayi mmorɔnoɛ nemɔ aso to.

⁷Yiti AWURADE Nyameɛ nwa nyoo: Mmenia bɔ ɛmɔahũhũ bɛ bagua nu ne, bɛ ole naen ne, yeɛ kuro he ole turonzemaa ne; nakoso ɛmɔ de, ngotu ɛmɔ ngofi nu.

⁸Ngrandɛ yeɛ ɛmɔsuro ye ɔ, yiti ngrandɛ yeɛ ngɔfa ngɔwa ɛmɔ so ɔ, AWURADE Nyameɛ noa dwirɛ ɛne.

⁹Ngotu ɛmɔ ngofi kuro ne anu, ngɔfa ɛmɔ ngowura ɛwɔfoɛ mɔ sa, na ngobua ɛmɔ ndɛen.

¹⁰Ɛmɔkɔtotɔ ngrandɛ noa, ngɔhwe ɛmɔ so wɔ Yisrael ɛwɛen so, na ɛmɔkonwu kyɛ me ole AWURADE.

¹¹Sɔ kuro he ngɔyɛ ɛmɔ turonzemaa, yeɛ ɛmɔngɔyɛ naen wɔ nu; na ngobua ɛmɔ ndɛen wɔ Yisrael wɛen so.

¹²Na ɛmɔkonwu kyɛ me ole AWURADE; ofikyɛ ɛmɔanni m’ahyɛdeɛ so, yeɛ ɛmɔanni me nhyehyɛleɛ so; na maen maen bɔ bapɛ ɛmɔ nwo bayia ne, bɛ yɔleɛ mmom yeɛ ɛmɔ koso ɛmɔayɔ bie ɔ.”

¹³Na ɔwale kyɛ, mmerɛ bɔ ngu so mehyɛ ngɔm ne, Benaya awa Pelatia wuli. Yeɛ mvale me nyunu mmutuli ase, na ndeane nu serɛserɛ kyɛ, “Ao, AWURADE Nyameɛ, aso ɛbaanua Yisraelfoɛ bɔ baha ne bɛ boso anaa?”

¹⁴Na AWURADE lale ye dwirɛ ali hyirele me bieku kyɛ,

¹⁵“Sona awa, Yerusalemfoɛ bahã bahyire eliɛma nemɔ, w’abusuafoɛ, ɔne wɔ mmango mɔ bɔ bɛhyele bɛ nnure, yeɛ Yisrael awuro ama amukoraa kyɛ, ‘Ɛ́mɔhwe ɛmɔ nwo befi AWURADE nwo bɛhɔ dededede, na yɛ yeɛ bafa aseɛ he bama yɛ kyɛ yɛfa yɛyɛ yɛ deɛ ɔ.’

¹⁶Yiti kã kyɛ, ‘AWURADE Nyameɛ nwa nyoo: Ɔwɔ nu kyɛ nzesale bɛ ngɔle maen maen mɔ so dedeede de, yeɛ ndole bɛ mbetene aseɛ mɔ so de, nakoso nde nekaa krongron mema bɛ wɔ mmerɛ kãa bie, wɔ aseɛ mɔ bɔ bɛhɔle so nemɔ aso.

¹⁷Yiti kã kyɛ, ‘AWURADE Nyameɛ nwa nyoo: Mebaaboaboa ɛmɔ noa mefi maen maen nemɔ anu, ná meboaboa ɛmɔ noa mefi aseɛ mɔ bɔ mato ɛmɔ mapete so ne aso, na ngɔfa Yisrael aseɛ ne ngɔma ɛmɔ.’

¹⁸Na bɛkɔwa berɛ, na bɛkɔye so nningyein tɛɛ mukoraa ne akyiwadeɛ mukoraa bekofi so.

¹⁹ Na ngɔma bɛ ahone ko, ngɔfa sunzum foforɛ ngowura bɛ nu, ngɔye nyɔboɛ ahone ne ngofi bɛ nwonaen nu, na ngɔma bɛ anwoɔnaen ahone,

²⁰amaa ɔnate so bali m’ahyɛdeɛ so, ná bafa me nhyehyɛleɛ babɔ bɛ bra, ná bayɛ ye nwo sotie, ná bayɛ me maen, ná me koso mayɛ bɛ Nyameɛ.

²¹Nakoso bɛ bɔ b’adwene li bɛ nningyein tɛɛ ne b’akyiwadeɛ si ne de, ngɔma bɛ yɔleɛ kɔbɔ bɛ bɔbɔ bɛ ti so, AWURADE Nyameɛ noa dwirɛ ɛne.”

²² Afei kɛrubim nemɔ momane bɛ ndaa so; né kango nemɔ wɔ bɛ ngyɛnu, na né Yisrael Nyameɛ animnyam ne ɔwɔ bɛ so anwuro.

²³Yeɛ AWURADE animnyam ne mane ye nwo so fili kuro ne anu, na oogyinane bokaa bɔ ɔwɔ kuro berɛ eyia afiteleɛ ne aso.

²⁴Yeɛ Sunzum ne mane me so, na ɔnate Nyameɛ Sunzum so, wɔ nyekyire nu, ɔfale me hɔle mmenia bɔ bahye bɛ nnure bahɔ Kaldea nemɔ berɛ. Na afei nyekyire bɔ nwuni ye ne, ofili me so hɔle anwuro.

²⁵Na ngane bɔ AWURADE ye hyirele me ne amukoraa ngyirele bɛ bɔ bahye bɛ nnure ne.