Read Sehwi Hesekiel 14 Bible Online

Hesekiel 14 - Sehwi bible

Hesekiel 14

¹Yeɛ Yisrael mbanyi nemɔ bie wale me berɛ bɛɛtenane me nyunu.

²Na ɔwale kyɛ, AWURADE lale ye dwirɛ ali hyirele me kyɛ,

³“Sona awa, mmenia hemɔ b’ahone bata bɛ mmosoen nemɔ anwo, na bafa amumuyɛɛ bɔ ɔte bɛ sundidua ne bato bɛ nyunu. Aso mma bebisa me, na ngyire bɛ bɔ odi kyɛ bɛyɔ anaa?

⁴Yiti dwudwo kyire bɛ ná se bɛ kyɛ, AWURADE Nyameɛ nwa nyoo: Ebiala bɔ ofi Yisrael awuro ama nu, bɔ ɔkɔ ngɔmhyɛlɛniɛ berɛ, wɔ aberɛ bɔ ɔma ye ahone bata ye mmosoen mɔ nwo, ná ɔfa amumuyɛɛ bɔ ɔte ye sundidua ɔto ye nyunu ne, me AWURADE, kyɛbɔ ye mmosoen mɔ bɛ somaa te ne, me bɔbɔ ngɔma ye mmuayɛɛ.

⁵Na ɔba ye sɔ a, Yisrael awuro ama amukoraa bɔ ɔnate bɛ mmosoen ti bayakyi me si lilɛ ne, ngɔma b’adwene kɔwa me so.

⁶“Yiti kã kyire Yisrael awuro ama kyɛ, AWURADE Nyameɛ nwa nyoo: Ɛ́mɔsakyera ɛmɔ adwene ná ɛ́mɔyakyi ɛmɔ mmosoen nemɔ si lilɛ; ná ɛ́mɔhwe ɛmɔ nwo befi ɛmɔ akyiwadeɛ amukoraa anwo.

⁷Ofikyɛ ebiala bɔ ofi Yisrael awuro ama nu, anaa ɛwɔfoɛ biala bɔ waatena Yisrael, bɔ ɔba ngɔmhyɛlɛniɛ berɛ babisa me maa mekyire ye bɔ odi kyɛ ɔyɔ ɔ, wɔ aberɛ bɔ wahwe ye nwo wafi me nwo, wama ye ahone abata ye mmosoen mɔ nwo, ná wafa amumuyɛɛ bɔ ɔte ye sundidua wato ye nyunu ne, me AWURADE, me bɔbɔ ngɔma ye mmuayɛɛ.

⁸Ngotu me nye ngosie sɔ sona ne aso, ngɔfa ye ngɔkakyi sɛngyerɛnneɛ ne ngorohoɛ dwirɛ, ngotu ye ngofi me maen nu, ná ɛmɔanwu kyɛ me ole AWURADE.

⁹Na sɛ ngɔmhyɛlɛniɛ ne ma ye nwo ate maa bɛlakalaka ye, ná ɔkã dwirɛ a, ye de me AWURADE yeɛ malakalaka sɔ ngɔmhyɛlɛniɛ ne ɔ. Ngɔtengyɛ me sa ngɔhwe ye so, ná mahũ ye mafi me maen Yisrael nu.

¹⁰B’amumuyɛɛ kɔbɔ bɛ ti so: ngɔmhyɛlɛniɛ ne, ye asohwenɛ ne, ɔte kyɛ sona bɔ wahɔ abisa ɔ ye asohwenɛ deɛ ne ala;

¹¹amaa ɔnate so Yisrael awuro ama banni makyebu ko banyakyi me si lilɛ, yeɛ bɛngɔfa bɛ mmeraatolɛ amukoraa bengogua bɛ nwo fiɛ ko; na mmom bɛkɔyɛ me maen maa me koso ngɔyɛ bɛ Nyameɛ, AWURADE Nyameɛ noa dwirɛ ɛne.”

¹²Na ɔwale kyɛ, AWURADE lale ye dwirɛ ali bieku hyirele me kyɛ,

¹³“Sona awa, sɛ maen bie ɔyɔ bɔne tia me, bɔ wanni nahorɛ wamma me, ná sɛ metengyɛ me sa metwe ye so, ná mema aleɛ nwo yɛ se wɔ nu, ná mema ɛhɔen pe so, ná mekũkũ mmenia ne ngaka mefi nu,

¹⁴ná sɛ sɔ mmenia nza hemɔ: Nowa, Daniel ne Yob po bɛwɔ nu a, bɛ tenenee yeɛ okole bɛ bɔbɔ bɛ kra ɔ, AWURADE Nyameɛ noa dwirɛ ɛne.

¹⁵Yeɛ sɛ mema ngaka aboyaa bɛba aseɛ ne aso, bekũkũ so ama maa ɔyɛ kurofoen, bɔ ɔnate ngaka ne ati sona biala mbɛ nu berɛ a,

¹⁶sɛ sɔ mmenia nza ne po bɛwɔ so a, kyɛ nde ase ye de, AWURADE Nyameɛ noa dwirɛ ɛne, bengole mmaa mmienzua anaa mmaa mmrasua po ngoa; sana bɛ ngome yeɛ bekonya ngoa ɔ, nakoso aseɛ ne de, ɔkɔkakyi kurofoen.

¹⁷“Anaakyɛ, sɛ metwe ngrandɛ metia sɔ maen ne, ná mekã kyɛ, ‘Ngrandɛ, fa aseɛ ne aso maa ngukũ mmenia ne ngaka mvi so a;

¹⁸na sɛ sɔ mmenia nza ne po bɛwɔ so a, kyɛ nde ase ye de, AWURADE Nyameɛ noa dwirɛ ɛne, bengole mmaa mmienzua anaa mmaa mmrasua ngoa; sana bɛ ngome yeɛ bekonya ngoa ɔ.

¹⁹Yeɛ sɛ mema ewue anwonyerɛ pe aseɛ ne aso, ná mema m’ahone hu mede bɛ ngoa mefi bɛ sa nu, mekũkũ mmenia ne ngaka mefi so a,

²⁰sɛ Nowa ne Daniel ne Yob po bɛwɔ so a, kyɛ nde ase ye de, AWURADE Nyameɛ noa dwirɛ ɛne, bengole mmaa mmienzua anaa mmaa mmrasua ngoa; nakoso bɛ bɔbɔ de, bɛ tenenee yeɛ okole bɛ ngoa ɔ.

²¹ “AWURADE Nyameɛ nwa nyoo: Nzaade me ndɛenbualɛ suronyisuronyi nna, bɔ bɛ ole ngrandɛ, ɛhɔen, awerɔm ngaka aboyaa ne ewue anwonyerɛ ne, sɛ meprapra megua Yerusalem so mekũkũ so mmenia ne ngaka mefi so ɛ?

²²Nakoso mmaa mmienzua ne mmaa mmrasua bɔ bekonya bɛ ti bekodidi nu nen, bɛkɔfa bɛ bekofi nu bekofite. Ɛ́mɔtie, bɛkɔwa ɛmɔ berɛ, na sɛ ɛmɔnwu bɛ suban ne bɛ yɔleɛ a, ye de musue bɔ maprapra magua Yerusalem so, ɔne edwirɛ bɔ mamaa wato ye ne amukoraa, ɛmɔkonya nu aworakyekyerɛ.

²³Na sɛ ɛmɔnwu bɛ suban ne bɛ yɔleɛ a, bɛkɔkyekye ɛmɔ wora, na ɛmɔkɔte ye bo kyɛ, bɔ mayɔ amukoraa wɔ Yerusalem ne, manyɔ ye mbaen, AWURADE Nyameɛ noa dwirɛ ɛne.”