Read Sehwi Hesekiel 15 Bible Online

Hesekiel 15 - Sehwi bible

Hesekiel 15

¹Yeɛ AWURADE lale ye dwirɛ ali hyirele me kyɛ,

²“Sona awa, nzikyɛ yeɛ bobe bakaa fa tra bakaa biala ɔ, anaa nzikyɛ yeɛ bobe mmaen ɔfa tra ɛhɔayeɛ nu mmakaa mɔ ɔ?

³Aso bɛfa ye bakaa bɛyɔ nikyee bie anaa? Aso mmenia pɛ ye tɔkorɔ, kyɛ bɛfa nikyee bie besinze so anaa?

⁴Tie, bɛfa bɛsɔ see maa ye ti ne ye ti ne ɔyera, na ye afia ne tɔ nzoen a, aso bɛfa bɛyɔ nikyee bie a ɔyɛ yee anaa?

⁵Tie, ɛfa ye mumua ne ɛyɔ nikyee a ɔnyɛ yee, na sɛ see yera ye maa ɔtɔ nzoen a, ɔkɔyɛ sɛɛ né ahora afa ayɔ nikyee bie maa wayɛ yee?

⁶Yiti AWURADE Nyameɛ nwa nyoo: Kyɛbɔ bobe bakaa bɔ ɔfra ɛhɔayeɛ nu mmakaa nu, bɔ mafa masɔ see mayera ye nen, sɔ ala yeɛ ngɔmaa ɔkɔto Yerusalemfoɛ ɔ.

⁷Ngotu me nye ngosie bɛ so. Ɔwɔ nu kyɛ benyane bɛ ti bedidili nu befili see nu de, nakoso see foforɛ kɔyera bɛ; na sɛ metu me nye mesie bɛ so a, ɛmɔkonwu kyɛ me ole AWURADE.

⁸Ngɔma aseɛ ne kɔkakyi kurofoen, ofikyɛ banni nahorɛ bamma me, AWURADE Nyameɛ noa dwirɛ ɛne.”