Read Sehwi Hesekiel 19 Bible Online

Hesekiel 19 - Sehwi bible

Hesekiel 19

¹Na wɔ, bɔ Yisrael atitirefoɛ nwo awuye,

²ná kã kyɛ: Nwa yeɛ ɔte eni ɔ? Ɔte gyata beleɛ bɔ obutu gyata nyii mɔ nu, bɔ ɔtete ye mma mmaa mmaa ɔ.

³Ɔtetele ye mma mmaa mmaa nemɔ nu ko maa ɔɔyɛle gyata akrɔngrɔma, osuane naenhyelɛ; na ɔhyehyele mmenia.

⁴Maen maen mɔ tele ye nga, besuale ye ngaen wɔ bɛ kumaa nu bɛhyele ye, na beguale ye ngɔnzɔngɔnzɔ bɛhwene ye bɛhɔle Misraim aseɛ so.

⁵Na oni nwuni kyɛ wanwondɛ tonn, nakoso ye anyelasoɛ ayie ne, osa fale ye mma mmaa mmaa nemɔ nu ko, na ɔyɛle ye gyata akrɔngrɔma.

⁶Ohyinihyinini wɔ gyata nemɔ anu, ofikyɛ né wayɛ gyata akrɔngrɔma, osuane naenhyelɛ, na ɔhyehyele mmenia.

⁷Ɔsɛkyele b’anwoserɛ afealeɛ mɔ, na ɔbɔle bɛ nguro mɔ. Na ye komvi bobɔle nu maa ɔgyegyele, na aseɛ ne aso ama mukoraa bɛ nwo dwirili bɛ.

⁸Yeɛ maen maen mɔ bɔ bɛwɔ mbɔtam berɛ ne, bedwɔso betiale ye, bɛtole b’asawu beguale ye so, na bɛhyele ye wɔ bɛ kumaa nu.

⁹Beguale ye ngɔnzɔngɔnzɔ, begyili ye bɛtole tuin nu, bɛfale ye bɛbrɛle Babilɔn hene, na bɛfale ye bɛtole kuku nu, kyɛbɔ ɔkɔyɛ bɔ bɛngɔte ye komvi ko wɔ Yisrael mmokaa nemɔ aso ɔ.

¹⁰Ahaa né wɔ maame te kyɛ bobe turo nu bobe bɔ balua ye nzue noa ɔ; na nzue somaa bɔ onyane ye ne ati, onyane mmaen pee, na osuli mmaa.

¹¹Ye mmaen nemɔ anu yɛle se, na ɔkakyili ahemvo mɔ bɛ hɔtɔ. Ɔyɛle tendenn paa trale mmaen frɔmfrɔm pusaa nemɔ, na ebiala nwuni ye tendenn ne ye mmaen pusaa ne.

¹²Nakoso betutuli bobe bakaa ne abo anyeborolɛ so, na begyili ye bɛtole ase. Eyia afiteleɛ mvrama kesene ye mma nemɔ, ye mmaen serɛserɛ nemɔ wuli, na see yerale bɛ.

¹³Afei de, batu baalua ye wɔ ɛserɛ so, wɔ aseɛ wosee bɔ nzuhɔen ku ye ɔ so.

¹⁴Na see afi bakaa ne anu, waatɔ ye mmaen nemɔ anu, ɔne ye mma ne anu wayera bɛ. Yiti mmaen serɛserɛ biala nne berɛ ko bɔ ɔkɔyɛ ahemvo mɔ bɛ hɔtɔ ɔ. Ɛhe te awuyebɔlɛ, na waayɛ awuyebɔlɛ.