Read Sehwi Hesekiel 20 Bible Online

Hesekiel 20 - Sehwi bible

Hesekiel 20

¹Afoɛ bɔ ɔtɔ so nzoo ne, bosome nnu ne anu, ye eleburu ne aso, Yisrael mbanyi nemɔ anu biemɔ wale AWURADE berɛ kyɛ bɛbaabisa ye bɔ odi kyɛ bɛyɔ ɔ, na bɛtenatenane me nyunu.

²Na AWURADE lale ye dwirɛ ali hyirele me kyɛ,

³“Sona Awa, se Yisrael mbanyi nemɔ kyɛ, ‘AWURADE Nyameɛ nwa nyoo: Me berɛ abisa ti yeɛ ɛmɔwale hɔ anaa? Kyɛ nde ase ye de, mengɔma ɛmɔngɔfa ɛmɔ abisa ngɔto me nyunu, AWURADE Nyameɛ noa dwirɛ ɛne.

⁴Ekobua bɛ ndɛen anaa, Sona awa? Ekobua bɛ ndɛen anaa? Nzaade maa benwu bɛ nana mɔ b’akyiwadeɛ bra bɔ bɛbɔle ɔ;

⁵ ná se bɛ kyɛ, AWURADE Nyameɛ nwa nyoo: Kyẽa bɔ nneanea nu nyele Yisrael ne, ndale ndaen mvoale so ngyirele Yakob awuro ama, na nyele me nwo ali ngyirele bɛ wɔ Misraim aseɛ so. Na ndale ndaen ngyirele bɛ kyɛ, Me ole AWURADE ɛmɔ Nyameɛ ne.

⁶Na sɔ kyẽa ne, ndale ndaen ngyirele bɛ kyɛ ngɔye bɛ ngofi Misraim aseɛ so ngɔfa bɛ ngɔhɔ aseɛ bɔ mapena mato berɛ mama bɛ ne aso, aseɛ bɔ nyɔfonesue ne woɛ tengyɛ wɔ so, aseɛ bɔ ɔyɛ nyemene tra aseɛ biala ne.

⁷Na nzele bɛ kyɛ: Odi kyɛ ɛmɔ nu biala ogyi akyiwadeɛ nningyein bɔ ɛmɔ nye gye ye nwo ne ogua. Nnɛma ɛmɔfa Misraim mmosoen begua ɛmɔ nwo fiɛ. Me ole AWURADE ɛmɔ Nyameɛ ne.

⁸Nakoso bɛyɛle me nwo lɔen, bɔ bandɛ me so ɔ. Bɛ nu biala wangyi akyiwadeɛ nningyein bɔ ye nye gye ye nwo ne wangua, yeɛ banyakyi Misraim mmosoen sɔnenɛ. Yiti ngane kyɛ ngɔma m’ahone kohu bɛ so, bɔ me yaafɛlɛ ne kɔyɔ bɛ nwo adwuma koyie ɔ, wɔ Misraim aseɛ so.

⁹Nakoso ɔnate me dumaa ti, ndwe nzale, amaa ɔnate so me dumaa nwo angua fiɛ wɔ maen maen bɔ bɛte so nemɔ anyunu; maen maen bɔ so ama bɛ nye tua kyɛbɔ nyele me nwo ali ngyirele bɛ, ná nyele bɛ mvili Misraim aseɛ so ne.

¹⁰Yiti nyele bɛ mvili Misraim aseɛ so, na mvale bɛ male ɛserɛ ne aso.

¹¹Yeɛ mvale m’ahyɛdeɛ mane bɛ, na ngyirele bɛ me mmeraa bɔ sɛ sona di so a onya ngoa ne.

¹²Asa koso, mvale m’afofingyẽa nemɔ mane bɛ, kyɛ ɔte sɛngyerɛnneɛ bɔ ɔla me ne bɛ y’afia ɔ, amaa ɔnate so banwu kyɛ me, AWURADE, me yeɛ mete bɛ nwo ɔ.

¹³Nakoso Yisrael awuro ama yɛle me nwo lɔen wɔ ɛserɛ ne aso; banni m’ahyɛdeɛ so, na mmom bɛpole me mmeraa bɔ sɛ sona di so a onya ngoa ne; na beguale m’afofingyẽa nemɔ nwo fiɛ piri paa. “Yeɛ ngane kyɛ: Ngɔma m’ahone kohu bɛ so wɔ ɛserɛ ne aso, ná mahuhu bɛ.

¹⁴Nakoso ɔnate me dumaa ti, ndwe nzale, amaa ɔnate so me dumaa nwo angua fiɛ wɔ maen maen nemɔ bɛ nyunu, maen maen bɔ bɛ nye tua kyɛ nyele bɛ mvili berɛ male ne.

¹⁵ Nza ndale ndaen ngyirele bɛ wɔ ɛserɛ ne aso, kyɛ mengɔfa bɛ ngɔhɔ aseɛ bɔ mva mane bɛ ne aso, aseɛ bɔ nyɔfonesue ne woɛ tengyɛ wɔ so, aseɛ bɔ ɔyɛ nyemene tra aseɛ biala ne;

¹⁶ɔnate kyɛ, bɛpole me mmeraa, banni m’ahyɛdeɛ so, yeɛ beguale m’afofingyẽa nemɔ nwo fiɛ, ofikyɛ b’ahone oolili bɛ mmosoen nemɔ asi.

¹⁷Nakoso nwuni bɛ anwumvoin, bɔ mangũkũ bɛ, anaa mannua bɛ boso wɔ ɛserɛ ne aso ɔ.

¹⁸“Na nzele bɛ mma mɔ wɔ ɛserɛ ne aso kyɛ, ‘Ɛmɔ nana mɔ yɔleɛ ne, nnɛma ɛmɔyɔ bie, nnɛma ɛmɔtu b’agyirɛ bɔ betuli ne bie, yeɛ nnɛma ɛmɔsɔne bɛ mmosoen nemɔ begua ɛmɔ nwo fiɛ.

¹⁹Me ole AWURADE ɛmɔ Nyameɛ ne; ɛ́mɔli m’ahyɛdeɛ so, ná ɛmɔli me mmeraa so nahorɛ nu;

²⁰ɛ́mɔyɛ m’afofingyẽa nemɔ krongron ma bɛyɛ sɛngyerɛnneɛ bɔ ɔla me ne ɛmɔ y’afia ɔ, amaa ɔnate so ɛmɔanwu kyɛ me ole AWURADE ɛmɔ Nyameɛ ne.

²¹Nakoso mmaa nemɔ yɛle me nwo lɔen; banni m’ahyɛdeɛ so, yeɛ me mmeraa ne bɔ sona di so a onya ngoa ne, ye koso banni so; na m’afofingyẽa ne koso, beguale bɛ nwo fiɛ. Yiti ngane kyɛ: Ngɔma m’ahone kohu bɛ so, na ngɔma me yaafɛlɛ ne kɔyɔ bɛ nwo adwuma koyie wɔ ɛserɛ ne aso.

²²Nakoso ɔnate me dumaa ti, ndwe nzale; nyɔle sɔ, amaa ɔnate so me dumaa nwo angua fiɛ wɔ maen maen nemɔ bɛ nyunu, maen maen bɔ bɛ nyunu yeɛ nyele bɛ mvili berɛ male ne.

²³ Nza ndale ndaen ngyirele bɛ wɔ ɛserɛ ne aso, kyɛ ngɔbɔ bɛ ngɔsande ngɔhɔ maen maen mɔ nu, ná mato bɛ mapete aseɛ mɔ so;

²⁴ɔnate kyɛ banni me mmeraa so, na mmom bɛpole m’ahyɛdeɛ, beguale m’afofingyẽa nemɔ nwo fiɛ, yeɛ bɛ nye oolili bɛ nana mɔ mmosoen nemɔ asi.

²⁵Afei de, nyele bɛ mane ahyɛdeɛ bɔ ɔtte mayee ɔ, ɔne mmeraa bɔ bengonya ngoa wɔ nu ɔ;

²⁶na nguale bɛ nwo fiɛ wɔ b’ayɛyɛdeɛ nu, nyakyili bɛ maa bɛfale bɛ bamuɛbaa mɔ amukoraa bɛbɔle afɔleɛ wɔ see nu, amaa ɔnate so masɛkye bɛ pasapasa. Nyɔle sɔ, kyɛbɔ ɔkɔyɛ bɔ bekonwu kyɛ me ole AWURADE ɔ.

²⁷“Yiti, Sona awa, dwudwo kyire Yisrael awuro ama, ná se bɛ kyɛ, ‘AWURADE Nyameɛ nwa nyoo: Sɔ atee he aso koso yeɛ ɛmɔ nana mɔ bɛfa betiatiale me ɔ, ofikyɛ banni nahorɛ bamma me.

²⁸Ofikyɛ, aseɛ bɔ ndale ye nwo ndaen kyɛ ngɔfa ngɔma bɛ ne, mvale bɛ mmale so nen, nekaa biala bɔ benwuni pambaa tendenn biala, anaa bakaa pusaa biala nen, bɛbɔle b’afɔleɛ wɔ berɛ, na bɛfale b’ayɛyɛdeɛ bɔ bɛfa bɛba ne behuli m’ahone. Berɛ yeɛ bɛbɔle ɛyɛɛ fonafona afɔleɛ, ná bɛbɔle bɛ nzaa afɔleɛ ɔ.

²⁹Na mmisale bɛ kyɛ, Asɔneyɛɛ so bɔ ɛmɔkɔ ne, ɔte nzu?’ ” Ye sɔ ne ati, bɛtɛfrɛ berɛ Bama[5] maa waadwu ɛnɛ.

³⁰“Yiti kã kyire Yisrael awuro ama kyɛ, AWURADE Nyameɛ nwa nyoo: Atee bɔ ɛmɔ nana mɔ bɛfale so beguale bɛ nwo fiɛ, ɔne bɔ bɛfale so bɛbɔle b’akyiwadeɛ bra ne, yiti odi kyɛ ɛmɔ koso ɛmɔfa sɔ adwamanbɔlɛ atee ne aso bie anaa?

³¹Sɛ ɛmɔfa ɛmɔ ayɛyɛdeɛ ne bɛba, ná ɛmɔfa ɛmɔ mma mɔ bɛbɔ afɔleɛ wɔ see nu a, ɛhe kyire kyɛ ɛmɔkɔ so bɛfa ɛmɔ mmosoen begua ɛmɔ nwo fiɛ maa waadwu ɛnɛ. O Yisrael awuro ama, aso odi kyɛ mema ɛmɔba me berɛ abisa anaa? Kyɛ nde ase ye de, mengɔma ɛmɔngɔwa me berɛ abisa, AWURADE Nyameɛ noa dwirɛ ɛne.

³²“Bɔ ɔwɔ ɛmɔ adwene nu ne, ɔngɔwa nu le. Ɛmɔnwa: Ɛ́mɔma yɛyɛ kyɛ maen maen nemɔ, kyɛ aseɛ nemɔ aso mmusua nemɔ, ná yɛsɔne bakaa ne nyɔboɛ.

³³“Kyɛ nde ase ye, AWURADE Nyameɛ noa dwirɛ ɛne, nahorɛ nu, tumi piri ne tumi asaa ne ahonehulɛ yeɛ ngɔfa ngoli ɛmɔ so hene ɔ.

³⁴Ngɔye ɛmɔ ngofi maen maen mɔ nu, ná maboaboa ɛmɔ noa mafi aseɛ mɔ bɔ mamaa ɛmɔabɔ aya bahɔ so ne aso, na tumi piri ne tumi asaa ne ahonehulɛ so yeɛ ngɔyɔ sɔ ɔ.

³⁵Ngɔfa ɛmɔ ngɔwa maen maen mɔ b’ɛserɛ so, na berɛ yeɛ me bɔbɔ ngɔwa ngoobua ɛmɔ ndɛen bɔ ɛmɔ nye tua ɔ.

³⁶Na kyɛbɔ mmuale ɛmɔ nana mɔ ndɛen ɛserɛ so wɔ Misraim aseɛ so ne, sɔ ala yeɛ ngobua ɛmɔ ndɛen ɔ, AWURADE Nyameɛ noa dwirɛ ɛne.

³⁷Ngɔmaa ɛmɔkɔsẽ bɛkɔfa pɔmaa ne abo, na ngɔmaa ɛmɔkoli apam ne aso.

³⁸Na mmenia bɔ bayɛ lɔen, ɔne bɛ bɔ bɛto me mmeraa ne, ngɔpa nu ngɔye bɛ ngofi ɛmɔ nu. Ngɔɔye bɛ ngofi aseɛ bɔ bɛtete so ne aso de, nakoso bɛ gya baa ngotia Yisrael aseɛ so. Na afei ɛmɔkonwu kyɛ me ole AWURADE.

³⁹“Na ɛmɔ, Yisrael awuro ama, AWURADE Nyameɛ nwa nyoo: Sɛ ɛmɔngotie me dwirɛ de a, nzaade afei ɛmɔ nu biala ɔhɔ ɔɔso ye mmosoen. Nakoso ye si ye, nnɛma ɛmɔfa ɛmɔ akyɛdeɛ ne ɛmɔ mmosoen ne begua me dumaa krongron ne nwo fiɛ ko.

⁴⁰“Ofikyɛ me bokaa krongron ne aso, Yisrael bokaa tendenn ne aso, berɛ yeɛ Yisrael awuro ama amukoraa, bɛ mukoraa bɔ bɛwɔ aseɛ ne aso ɔ bɛkɔso me ɔ. AWURADE Nyameɛ noa dwirɛ ɛne. Berɛ yeɛ ngole bɛ ngɔto nu ɔ, na berɛ yeɛ ngɔnea ate kyɛ ɛmɔkɔfa ɛmɔ ndoboa, ɛmɔ fieso aleɛ bɔ ɛmɔkoli moa bɛkɔfa ɔ, ɔne ɛmɔ afɔleɛ krongron bɛkɔbrɛ me ɔ.

⁴¹ Ngole ɛmɔ ngɔto nu kyɛ ɛyɛɛ fonafona, mmerɛ bɔ ngɔye ɛmɔ ngofi maen maen mɔ so, bɔ ngɔboaboa ɛmɔ noa ngofi aseɛ mɔ bɔ mabɔ ɛmɔ masande maagua so ne aso ne. Na ɔnate ɛmɔ so, me krongronyɛlɛ kɔla ali wɔ maen maen nemɔ bɛ nyunu.

⁴²Na ɛmɔkonwu kyɛ me ole AWURADE, mmerɛ bɔ ngɔfa ɛmɔ ngɔwa Yisrael aseɛ so, aseɛ bɔ ndale ndaen kyɛ ngɔfa ngɔma ɛmɔ nana mɔ ne.

⁴³ Berɛ yeɛ ɛmɔkɔkaye atee bɔ ɛmɔnate so ɔ, ɔne bɔ ɛmɔayɔ amukoraa bafa bagua ɛmɔ nwo fiɛ ɔ; na ɔnate ɛmɔ bɔne amukoraa bɔ ɛmɔayɔ ne ati, ɛmɔ nwo kɔyɛ ɛmɔ tɛ.

⁴⁴O Yisrael awuro ama, sɛ me dumaa ti menwu ɛmɔ anwumvoin, ná mangyina ɛmɔ bɔne so, anaa ɛmɔ yɔleɛ tɛɛ so me ne ɛmɔ yanni ye weewee a, ye de ɛmɔkonwu kyɛ me ole AWURADE; AWURADE Nyameɛ noa dwirɛ ɛne.”

⁴⁵Afei AWURADE lale ye dwirɛ ali hyirele me kyɛ,

⁴⁶“Sona awa, fa wɔ nye kyire ngwaen dɔ,[6] kã dwirɛ fa ngwaen dɔ nwo, hyɛ ngɔm tia ngwaen dɔ ɛhɔayeɛ aseɛ ne,

⁴⁷ná se ngwaen dɔ ɛhɔayeɛ ne kyɛ, ‘Tie AWURADE noa dwirɛ. AWURADE Nyameɛ nwa nyoo: Tie, mebaato wɔ nu see, na ɔkɔyera bakaa monɛ ne bakaa wuruwaa biala bɔ ɔwɔ wɔ nu ɔ. Ɔte see bɔ ogye wuronyiwuronyi bɔ ongonua ɔ, na ofi ngwaen bɔ ɔkwaadwu sorɔ ne, ɔkɔyera bɔ ɔwɔ so amukoraa.

⁴⁸Na anwoɔnaen mukoraa konwu kyɛ me, AWURADE yeɛ ndole nu see ɔ, na see ne ngonua.”

⁴⁹Yeɛ nzele kyɛ, “Yieee, AWURADE Nyameɛ! Bɛkekã bɛfa me nwo kyɛ, ‘Aso nna anyandera nu yeɛ odwudwo e?’ ”