Read Sehwi Hesekiel 21 Bible Online

Hesekiel 21 - Sehwi bible

Hesekiel 21

¹Yeɛ AWURADE lale ye dwirɛ ali hyirele me kyɛ,

²“Sona awa, fa wɔ nye kyire Yerusalem, ná kã dwirɛ fa nekaa krongron nemɔ anwo; hyɛ ngɔm tia Yisrael aseɛ ne,

³ná se Yisrael aseɛ ne kyɛ, AWURADE nwa nyoo: Tie, meko metia wɔ, ngɔhwe me sɛpɔ ne ngofi ye bɔha nu, na teneneefoɛ oo, bɔnefoɛ oo, ngonua bɛ boso ngofi wɔ nu.

⁴Wɔ nu teneneefoɛ oo, bɔnefoɛ oo, ngonua bɛ boso; na ɔnate sɔ ati, me sɛpɔ ne kofi ye bɔha nu koohũhũ anwoɔnaen biala, ofi ngwaen dɔ maa okoodwu sorɔ dɔ;

⁵na anwoɔnaen amukoraa konwu kyɛ me, AWURADE, me yeɛ mahwe me sɛpɔ mafi ye bɔha nu ɔ; na mengɔfa ngowura ye bɔha ne anu ko.

⁶“Na wɔ, Sona awa, fa aworabɔlɛ ne yealɛlilɛ gua anwongokoɔ bɔ bɛ nye tua ɔ.

⁷Na sɛ bebisa wɔ kyɛ, ‘Nzu ati yeɛ egua anwongokoɔ e?’ a, bua kyɛ, ‘Edwirɛ bɔ ɔ́ba ne ati ɔ. Ɔba a, ahunundetelɛ kɔtɔ ebiala so, ebiala abasa nu kodwo, ebiala nwo ngaka kotu komini, na ebiala nangoroma nu kɔyɛ mmerɛ kyɛ nzue. Ɛ́mɔnea, ɔ́ba, na ɔkɔwa nu koso amba,’ ” AWURADE Nyameɛ noa dwirɛ ɛne.

⁸Yeɛ AWURADE lale ye dwirɛ ali bieku hyirele me kyɛ,

⁹“Sona awa, hyɛ ngɔm ná kã kyɛ, AWURADE nwa nyoo: Kã kyɛ: Ngrandɛ, ngrandɛ bɔ basi ɔ, bɔ bahwi ye nwo ɔ,

¹⁰bɔ basi kyɛ bɛfa bekũkũ ɔ, bɔ bahwi ye nwo maa ɔte yerɛmyerɛm kyɛ agralaa ɔ! Aso odi kyɛ yɛfa edwirɛ ne yɛdi angorɛ anaa? Mma, abu mbire ne ne asohwenɛ amukoraa animtia.

¹¹“ ‘Ɔfale ngrandɛ ne mane kyɛ behwi ye nwo, amaa sɛ betira nu a wayɛ yee. Basi ngrandɛ ne, yeɛ bahwi ye nwo, kyɛ bɛfa bewura sonahunɛniɛ ne sa nu.

¹²Sona awa, sũ ná bɔ awuye, ofikyɛ sɔ dwirɛ ne kɔto me maen; ɔkɔto Yisrael mbanyi amukoraa; mafa bɛ ne me maen mawura ngrandɛ sa, yiti fa wɔ sa gua w’ahone so di aworabɔlɛ.

¹³“ ‘Ɛ́mɔdwene ye nwo: Sɛ ɛmɔbu mbire ne animtia a, aso edwirɛ ne ngosi anaa? AWURADE Nyameɛ noa dwirɛ ɛne.’

¹⁴“Na wɔ, Sona awa, hyɛ ngɔm ná bɔ wɔ sa nu. Ma ngrandɛ ne ohũhũ ye pɛen nyɔ so ɔne ye pɛen nza so. Mmenia huhunɛ ngrandɛ ne, ɔte ngrandɛ bɔ bɛbaafa bekũkũ mmenia pee bɔ wahã bɛ wapua ɔ.

¹⁵Mafa ngrandɛ anoa nnaennaen magyinagyina bɛ pambim amukoraa nu, amaa ɔnate so ahunundetelɛ atɔ bɛ so, ná b’amaneɛnwunɛ ayɛ pee. Ah! ɔte yerɛmyerɛm kyɛ agralaa, na bahwi ye nwo bɔ bɛbaafa bekũkũ ɔ.

¹⁶O ngrandɛ, pɛ kɔ famaa so, pɛ kɔ bɛen so, pɛ kɔ nekaa biala bɔ bɛkɔfa wɔ nyunu bekohyire ne.

¹⁷Me koso ngɔbɔ me sa nu, ná afei mama m’ahone atɔ nzue nu. Me, AWURADE, me yeɛ mahã ɔ.”

¹⁸Na AWURADE lale ye dwirɛ ali hyirele me bieku kyɛ,

¹⁹“Wɔ, Sona awa, atee nyɔ bɔ Babilɔn hene ngrandɛ ɔkɔfa so kɔwa ne, fa beabea berɛ. Ma bɛ munyɔ bɛhyɛ ye bo befi aseɛ komapɛ aso bɛbra. Na ngwandaa bɔ ɔkɔ kuro ne anu ne, fa frangaa bie pena berɛ bɔ okyire atee ne ɔ.

²⁰Fa atee ko bea berɛ bɔ ngrandɛ ne kɔfa so kɔwa Amonfoɛ kuro Raba so ɔ, ɔne atee ko koso bɔ ɔkɔfa so kɔwa Yuda ɔ, mékyire Yerusalem bɔ bato ye nwo fasue ne.

²¹Ofikyɛ Babilɔn hene waagyina ngwandaa ne aso, nekaa bɔ atee nyɔ nemɔ beyia ne, kyɛ ɔkɔ abisa. Ɔnwaha agyaen, obisa abusua amoen ne, na ɔnea brɛboɛ mɔ nu.[7]

²²Ye sa famaa ne anu serewagualɛ ne, waye Yerusalem. Wahyɛ kyɛ behũhũ mmenia, ɔ́bɔ ese, wayɔ nikyee bɔ bɛfa bebubu pambim ɔ, bɔ bɛfa betua kuro ɔ, ɔne atweleɛ mɔ bɔ begyina so betua kuro ɔ.

²³Na bɛ bɔ bata ndaen ne de, bekobu sɔ dwirɛ ne kyɛ ngɔndorɔ bie ɔ. Nakoso ye de, ɔkɔkaye b’amumuyɛɛ ne, na ɔkɔhye bɛ nnure.

²⁴“Yiti AWURADE Nyameɛ nwa nyoo: Ɛmɔ mmeraatolɛ ne, wala ali maa ɔnate so ɛmɔamaa wakaye ɛmɔ amumuyɛɛ, bɔ ɛmɔ bɔne da adi wɔ bɔ ɛmɔyɔ amukoraa nu ɔ. Na ɔnate kyɛ bɛkaye ɛmɔ ne ati, bɛkɔhye ɛmɔ nnure.

²⁵“ ‘Na wɔ, Yisrael panyi busueniɛ amumuyɛɛniɛ bɔ wɔ kyẽa ne adwu ɔ, wɔ so hwenɛ mmerɛ ne adwu bɔkɔɔ;

²⁶na AWURADE Nyameɛ nwa nyoo: Tu abotire ne, tu ɛhene abotire ne, na dibea ne ngɔyɛ kyɛ ye daa ne ala. Ma awiɛmvoɛ ne aso, ná brɛ anwomasoɛniɛ ne ase.

²⁷Ngɔbɔ ye oo, ngɔbɔ ye oo, ngɔbɔ kuro ne, na ɛhe ngosi, kɔpem kyɛ bɔ ndɛenbualɛ wura ye sa ne kɔwa ɔ, na ye yeɛ ngɔfa ngowura ye sa ɔ.’

²⁸ “Na wɔ, Sona awa, hyɛ ngɔm ná kã kyɛ: Bɔ AWURADE Nyameɛ kã fa Amonfoɛ ne bɛ ngorohoɛ nwo ɛhe. Kã kyɛ, “ ‘Ngrandɛ, bahwe ngrandɛ kyɛ bɛ́fa behũhũ, bahwi ye nwo kyɛ oli awue, kyɛ ɔ́tete yerɛmyerɛm kyɛ agralaa;

²⁹wɔ aberɛ bɔ ngondombo nyekyire yeɛ benwu ye bɛma wɔ ɔ, bɛhyɛ wɔ ngɔm bɔ ɔtte nahorɛ ɔ, kyɛbɔ bɛkɔfa sɔ ngrandɛ ne bɛkɔpepɛ bɔnefoɛ bɛ ti ɔ, amumuyɛɛfoɛ bɔ bɛ kyẽa apingye, bɔ b’asohwenɛ mmerɛ adwu ne.

³⁰Sa fa wɔ ngrandɛ ne wura ye bɔha nu, nekaa bɔ bɛbɔle wɔ ne, aseɛ bɔ bɛwole wɔ bɛtole so ne aso, berɛ yeɛ ngobua wɔ ndɛen ɔ.

³¹Ngɔfɛ wɔ so yaa piri paa, m’anyeborolɛ see ne, ngohu ngogua wɔ so; na ngɔfa wɔ ngowura atianuserɛfoɛ bɔ nzɛmmɔne ali bɛ ti ɔ bɛ sa.

³²Bɛkɔfa wɔ bɛkɔkakyi eyein bekohua see, bɛkɔhã wɔ mogya bekogua wɔ aseɛ ne aso, na bɛngɔkaye wɔ ko, ofikyɛ me, AWURADE, me yeɛ mahã ɔ.’ ”