Read Sehwi Hesekiel 24 Bible Online

Hesekiel 24 - Sehwi bible

Hesekiel 24

¹Na ɔwale kyɛ, ye afoɛ ngona ne anu, bosome buru ne anu, ye eleburu ne aso, AWURADE lale ye dwirɛ ali hyirele me bieku kyɛ,

² “Sona awa, kyerɛ ɛnɛ kyẽa ye dumaa to berɛ, ɛnɛ kyẽa ye ala. Babilɔn hene watua Yerusalem ɛnɛ kyẽa ye.

³Bu ɛlɔenyɛlɛ abusua ne anyandera, ná se bɛ kyɛ, AWURADE Nyameɛ nwa nyoo: Fa kukue ne sie see so, fa sie so, hwie nzue gua nu;

⁴fa naen porɛ porɛ ne gua nu, porɛ porɛ paa ne amukoraa, ye sɔ ne ye awaen ne, ná fa mmowue paa nemɔ gua so ma oyi.

⁵Mmoaen nemɔ, ye nu ko bɔ walɔ paa ne, kua see wɔ kukue ne abo; to naen ne ma ɔbe paa, ná to ye mmowue ne koso wɔ nu ma ɔbe.

⁶“Yiti AWURADE Nyameɛ nwa nyoo: ‘Awuelilɛ kuro, wɔ yaakɔ! Wɔ bɔ ɛte dadesɛn bɔ nu ali naakye, bɔ ye naakye ne omvi nu ɔ! Yeye naen porɛ porɛ ne fi nu ngoko ngoko, bɔ ɛngɔpa nu ngɔyakyi bie ɔ.

⁷Ofikyɛ mogya bɔ wahã wagua ne, ɔtɛwɔ nu, ɔhã guale wɔ nyɔbotaen wosee so, wanhwie wangua aseɛnwo maa anweaa angata so.

⁸Na mogya bɔ wahã wagua ne, mafa magua nyɔbotaen wosee so, kyɛbɔ so ngɔkata ɔ, amaa ɔnate so m’ahone ahu, ná matɔ so wereɛ.

⁹Yiti AWURADE Nyameɛ nwa nyoo: Awuelilɛ kuro, wɔ yaakɔ! Me koso ngɔboaboa nwuaka ne noa maa ɔkɔhɔ anwuro.

¹⁰Fa eyein pee guagua so, maa see ne ogye, ma naen ne ɔbe paa, kã nu ma ɔfra, ná ma mmowue ne ɔyera.

¹¹Afei, fa dadesɛn ne too sie see ne aso, maa ɔyɛ hye paa bɔ nu kɔɔbere ne kɔbe kɔyɛ kɔɔ ɔ, amaa ɔnate so nu fiɛ ne wahuro wɔ nu, ná ye naakye ne watu wafi nu.

¹²Na ɛfɛɛ yeɛ wafɛ wagua mbaen ɔ,[8] ofikyɛ see po, ɔngora ndu nu naakye bɔ wataataa so ne mvi nu.

¹³Nu naakye ne gyi berɛ ma w’adwaman bra ne. Ahaa mepena kyɛ mete wɔ nwo mefi w’adwaman bra ne anwo, nakoso amma wɔ nwo ande wamvi wɔ nyanzoen bra ne anwo, yiti wɔ nwo ngɔte ngofi wɔ nwo fiɛ ne anwo ko, kɔpem kyɛ ngɔhwe wɔ so maa m’ahone bɔ wahu wɔ so ne ɔkɔtɔ nzue nu ɔ

¹⁴Me, AWURADE, me yeɛ mahã ɔ, na ɔkɔwa nu amba. Mengɔhwe ngosa, mengonwu anwumvoin, yeɛ mengɔsesã m’adwene. Na kyɛbɔ w’atee ne wɔ yɔleɛ te ne, so yeɛ ngogyina ngobua wɔ ndɛen ɔ, AWURADE Nyameɛ noa dwirɛ ɛne.’ ”

¹⁵Yeɛ AWURADE lale ye dwirɛ ali hyirele me kyɛ,

¹⁶“Sona awa, bɔ ɔla w’ahone nwo ne, mebaamaa ofi wɔ sa mvum nu. Nakoso ɔnzɛ kyɛ ɛbɔ awuye, esu, anaa ɛporo moen.

¹⁷Gua anwongokoɔ konn, yeɛ nnɛsũ sona bɔ wawu ne. Bɔ w’abotire, ná fa wɔ mbaboa wura. Nnɛfa nikyee kata wɔ noa, yeɛ nnɛdi ɛsɛenvoɛ aleɛ.”

¹⁸Yiti ndwudwo ngyirele maen ne ngyerɛmɔ, na ye nɔsoa ne, me ye ne wuli. Na aleɛ hyene ngyerɛmɔ ne, nyɔle kyɛbɔ ɔhyɛle me kyɛ nyɔ ne ala.

¹⁹Na mmenia ne bisale me kyɛ, “Ɛhemɔ bɔ ɛyɔ e, aso ɛngɔhã kyɛbɔ osi fa yɛ nwo ɔ engohyire yɛ?”

²⁰Yeɛ nzele bɛ kyɛ, “AWURADE lale ye dwirɛ ali hyirele me kyɛ,

²¹‘Kã kyire Yisrael awuro ama kyɛ, AWURADE Nyameɛ nwa nyoo: Tie, mebaagua me nekaa krongron ne anwo fiɛ, bɔ ɔte ɛmɔ anwoserɛ bɔ ɛmɔfa bɛhoahoa ɛmɔ nwo ne, nikyee bɔ ɔla ɛmɔ ahone nwo ne, ɔne bɔ ɛmɔ kra nye gye ye nwo ne. Na ɛmɔ mma mmienzua ne ɛmɔ mma mmrasua bɔ ɛmɔyakyili bɛ berɛ bɛwale ne, bɛkɔtotɔ ngrandɛ noa.

²²Na ɛmɔkɔyɔ bɔ mayɔ ne bie, ɛmɔngɔfa nikyee bɛngɔkata ɛmɔ noa, yeɛ ɛmɔngoli ɛsɛenvoɛ aleɛ.

²³Ɛmɔkɔbɔ ɛmɔ abotire, yeɛ ɛmɔkowura ɛmɔ mbaboa. Ɛmɔngɔbɔ awuye, yeɛ ɛmɔngosu, na mmom ɛmɔkoli aworabɔlɛ bekonwu ɛmɔ amumuyɛɛ nwo amaneɛ, na ɛmɔkɔpenepene bekohyirehyire ɛmɔ nwo ngoko ngoko.

²⁴Sɔ yeɛ Hesekiel kogyina berɛ kɔma ɛmɔ kyɛ sɛngyerɛnneɛ ɔ; na bɔ wayɔ ne amukoraa, ɛmɔ koso ɛmɔkɔyɔ bie. Na sɛ sɔ dwirɛ ne si a, afei ɛmɔkonwu kyɛ me ole AWURADE Nyameɛ.’

²⁵“Na wɔ, Sona awa, kyẽa bɔ ngole ɛhemɔ ngofi bɛ sa nu ne: anwoserɛ, b’animnyam nwo anika, bɔ bɛ nye gye ye nwo, bɔ ɔla b’ahone nwo, yeɛ bɛ mma mmienzua ne bɛ mma mmrasua ne,

²⁶sɔ kyẽa ne, sona bɔ wanya ye ti wadidi nu ɔ, ɔkɔwa wɔ berɛ kɔɔfa edwirɛ ne kɔbɔ wɔ amaneɛ.

²⁷Sɔ kyẽa ne, ɛkɔhora dwudwo, ekodwudwo kohyire bɔ wanya ye ti wadidi nu ne, ekodwudwo, na ɛngɔtɔ mumu ko. Ekogyina berɛ kɔma bɛ kyɛ sɛngyerɛnneɛ, na bekonwu kyɛ me ole AWURADE.”