Read Sehwi Hesekiel 26 Bible Online

Hesekiel 26 - Sehwi bible

Hesekiel 26

¹ Na ɔwale kyɛ, ye afoɛ buru ne ko ne anu, kyẽa bɔ oli moa wɔ bosome ne anu ne, AWURADE lale ye dwirɛ ali hyirele me kyɛ,

²“Sona awa, ɔnate kyɛ Tiro wahã wafa Yerusalem nwo kyɛ, ‘Ehee! Pambim bɔ né maen maen mɔ bɛfa nu bekodi dwaa ne, wabubu. Afei de, dwaa nningyein ne kɔkakyi kɔwa me berɛ; na kekesaala ye bɔ wabɔ ye de, ngonya me nwo,’ ne ati,

³bɔ AWURADE Nyameɛ kã hɔ ɛhe: Tie, wɔ Tiro, meko metia wɔ, na ngɔma maen maen pee bɛkɔfa koɛ bɛkɔɔtoa wɔ, kyɛbɔ ɛpo ɔbɔ ye asorɔkye ba ne.

⁴Bɛkɔɔsɛkye Tiro fasue nemɔ, na bekobubu ye abandenden nemɔ bekogua. Ngɔprapra so anweaa ne ngofi so, na ngɔmaa ɔkɔyɛ kyɛ nyɔbotaen wosee.

⁵Ɔkɔyɛ nekaa bɔ bɛworɛ asawu nu ɔ wɔ ɛpo nu; ofikyɛ me yeɛ mahã ɔ, na ɔkɔyɛ maen maen mɔ bɛ koɛ nu nzesadeɛ, AWURADE Nyameɛ noa dwirɛ ɛne.

⁶Ye mma mmrasua mɔ bɔ baha aseɛ ne aso ne, bɛkɔtotɔ ngrandɛ noa, na afei bekonwu kyɛ me ole AWURADE.

⁷“Ofikyɛ AWURADE Nyameɛ nwa nyoo: Tie, mebaafa Babilɔn hene Nebukadenesa bɔ ɔte ahemvo mɔ nu hene ne, ɔne mbɔngɔ, teaseɛnam mɔ, pɔngɔhanɛfoɛ ne koɛhonɛfoɛ ɛlɔen pee mefi sorɔ dɔ meba wɔ, Tiro so.

⁸Ɔkɔfa ngrandɛ kohũhũ wɔ mma mmrasua bɔ bɛwɔ aseɛ ne aso ne; ɔkɔyɔ nyinasoɛ bɔ bɛkɔfo so bɛkɔwa wɔ nu ɔ, ɔkɔboaboa anweaa sire wɔ wɔ si, na ɔkɔfa akokyɛm mɔ kɔwa wɔ so.

⁹Ɔkɔfa nikyee bɔ bɛfa bebubu fasue ɔ kɔwa wɔ so, na ɔkɔfa ye akodeɛ kobubu w’abandenden mɔ kogua.

¹⁰Ye mbɔngɔ nemɔ somaa ne ati, bɛ si mvuture kɔkata wɔ so. Na pɔngɔhanɛfoɛ nemɔ, akodeɛ teaseɛnam mɔ ne teaseɛnam nemɔ, bɛ dede bɔ bɛkɔyɔ ne, ɔkɔwoso wɔ fasue nemɔ, wɔ mmerɛ bɔ ɔfa wɔ pambim nemɔ anu ɔba, kyɛbɔ mmenia wura kuro bɔ bɔen la ye fasue nu nen.

¹¹Ye mbɔngɔ nemɔ, ɔkɔfa bɛ gya mbaboa ne kotiatia wɔ mmorɔnoɛ ne amukoraa so; ɔkɔfa ye ngrandɛ kohũhũ wɔ mmenia, na okosumu wɔ bonima mbiri nemɔ kogua ase.

¹²Bɛkɔfa w’anwonyadeɛ bɛkɔyɛ koɛ nu nzesadeɛ, ná bafẽ wɔ dwaa nningyein bafa. Bekobubu wɔ fasue nemɔ bekogua, ná basɛkye wɔ sua nyemenenyemene nemɔ. Na bekofindi wɔ nyɔboɛ mɔ ne wɔ mmakaa ne wɔ nnɛterɛ bekogua nzue ne anu.

¹³ Ngɔma w’anika dweintolɛ ne bo kɔpɛ, na wɔ sangoo ne nga koso, bɛngɔte ye ko.

¹⁴Ngɔmaa ɛkɔkakyi nyɔbotaen wosee; ɛkɔyɛ nekaa bɔ bɛworɛ asawu nu ɔ; bɛngɔkyekye wɔ (nguro nemɔ) ko, ofikyɛ me, AWURADE, me yeɛ mahã ɔ. AWURADE Nyameɛ noa dwirɛ ɛne.

¹⁵Bɔ AWURADE Nyameɛ ɔkã kyire Tiro ɛhe: W’asefinɛ ne, ye dede bɔ ɔkɔyɛ ne, mmerɛ bɔ mmenia bɔ bapura bɛbɔ awuye, bɔ ebiemɔ koso bekũkũ bɛ wɔ wɔ nu ne, aso ɔngɔma supɔ mɔ bɛngɔwoso?

¹⁶ Na afei, ɛpo so ahemvo amukoraa bekodwu ase bekofi b’ahennie bia so, bekopuropuro bɛ ndaadeɛ aguasoɛ, na bekodwa bɛ ndena bɔ bali adwii bagua nu ɔ bekogua berɛ. Ahunundetelɛ kɔtɔ bɛ so, bekopofo aseɛnwo, bɛ nwo kɔwoso bɛ mmerɛ biala, na ɔnate wɔ ti, bɛ nwo kodwiri bɛ.

¹⁷Na bɛkɔbɔ wɔ nwo awuye bekose wɔ kyɛ, ‘O kuro piri bɔ ale dumaa ɔ, bɔ mmenia bɔ bɛkɔ ɛpo ɔ bɛɛtenane wɔ so ɔ, kuro bɔ né wɔ nwo yɛ se wɔ ɛpo so ɔ, ɛne wɔ nu ama, ɛmɔmane ɛmɔ nwo suronyi tɔle mmenia mukoraa bɔ bɛte berɛ ɔ so.

¹⁸Kekesaala ye de, supɔ nemɔ bɛ nwo wosowoso bɛ wɔ w’asefinɛ kyẽa ne; yieee, ɛpo nu supɔ nemɔ, bɛ nwo adwiri bɛ wɔ w’ayieleɛ bɔ wayie wɔ ne anwo.’

¹⁹“AWURADE Nyameɛ nwa nyoo: Sɛ memaa ɛkakyi kuro bɔ wabɔ, kyɛ nguro bɔ sona nne so ne, mmerɛ bɔ ngɔma ɛpo kohwi kɔfa wɔ so, bɔ nzue pee kɔkata wɔ so ne a,

²⁰ye de, ngɔfa wɔ ngɔboka bɛ bɔ ofi tetetete bedwu ase bɛkɔ ɛborɔ kumaa nu ne aso, na ngofindi wɔ ngɔto ase. Ngɔmaa ɛkɔtena aseɛ bo dɔ, nekaa bɔ berɛ te aworabɔlɛ fi tetetete ne, ɛne bɛ bɔ bedwu ase bɛkɔ ɛborɔ kumaa nu ne, amaa ɔnate so ebiala wandena wɔ nu ko, na ngɔma animnyam kɔwa ateasefoɛ aseɛ so.

²¹Ngɔma w’ayieleɛ kɔyɛ suronyisuronyi, na wɔ boso komini. Bɛkɔpena wɔ boso de, nakoso bengonwu wɔ ko le, AWURADE Nyameɛ noa dwirɛ ɛne.”