Read Sehwi Hesekiel 3 Bible Online

Hesekiel 3 - Sehwi bible

Hesekiel 3

¹ Afei osele me kyɛ, “Sona awa, bɔ enwu ye ne, di; di nwomaa he bɔ babobɔ ne, ná kɔ kodwudwo kyire Yisrael awuro ama.”

²Yiti mmukyele me noa nu, na ɔmaa nnili nwomaa bɔ babobɔ ne.

³Na osele me kyɛ, “Sona awa, nwomaa he bɔ mabobɔ, bɔ mafa mama wɔ ne, di maa wɔ ko yi.” Yiti nnili, na ɔyɛle me noa nu menemene kyɛ woɛ.

⁴Na osele me kyɛ, “Sona awa, kɔ Yisrael awuro ama berɛ, ná kɔhã me dwirɛ ne kyire bɛ.

⁵Ofikyɛ nna mmenia bɔ ɛnde bɛ dwudwolɛ anaa bɛ bɔ bɛ dwudwolɛ ne ɔyɛ se ɔ berɛ yeɛ mésoma wɔ ɔ, na mmom Yisrael awuro ama berɛ.

⁶Nna maen pee bɔ ɛnde bɛ dwudwolɛ, anaa bɔ bɛ dwudwolɛ ne ɔyɛ se, bɔ yeɛ ɛnde bɛ dwudwolɛ ɔ bɛ berɛ ɔ. Amba, sɛ bɛ berɛ po yeɛ nzomane wɔ a, ahaa bekotie wɔ.

⁷Nakoso Yisrael awuro ama de, bengotie wɔ, ofikyɛ benguro kyɛ bekotie me; ofikyɛ Yisrael awuro ama amukoraa bɛte aniammɔwoho ne asoserɛ.

⁸Tie, mama wɔ hue ayɛ se bɔ ɛkɔfa kogyina bɛ nyunu ɔ, yeɛ mama w’ahone ayɛ se bɔ ɛkɔfa kogyina bɛ nyunu ɔ.

⁹Mama w’ahone ayɛ se watra nyɔboɛ bɔ ɔyɛ se tra twerɛboɛ ɔ. Nnɛsuro bɛ, yeɛ nnɛsuro bɛ nyunu, ofikyɛ bɛte abusua bɔ bayɛ lɔen ɔ.”

¹⁰Na osa sele me kyɛ, “Sona awa, me dwirɛ amukoraa bɔ mebaahã mekyire wɔ ne, fa wɔ so tie ná ma ɔhɔ wɔ ti anu.

¹¹Si nu kɔ mmenia bɔ bahye bɛ nnure bahɔ ne berɛ, wɔ maen mmaa nemɔ berɛ kɔhã kyire bɛ. Sɛ betie oo, sɛ bandie oo, kã kyire bɛ kyɛ, ‘Bɔ AWURADE Nyameɛ kã hɔ ɛhe.’ ”

¹²Yeɛ Sunzum ne mane me so,[2] na ndele komviɛ bie bɔ ɔma aseɛ woso ɔ wɔ me si dɔ kyɛ, “Asennaa te AWURADE animnyam ne deɛ wɔ ye atenaleɛ berɛ!”

¹³Na dede bɔ abɔdeɛ ateasefoɛ nemɔ bɛ ndaa bɔ otwitwi ye nwo ne ɔyɔ ne, ndele; yeɛ ndele bɛ nwo kango nemɔ bɛ dede ne, ɔne dede bɔ ɔma aseɛ woso ne.

¹⁴Sunzum ne mane me so fale me hɔle, na ngɔle ye yealɛlilɛ nu, ɔne sunzum nu anyeborolɛ so, na né AWURADE tumi ne wɔ me so paa.

¹⁵Yeɛ bɛ bɔ bahye bɛ nnure bahɔ bɔ bɛwɔ Tel Abibo, bɔ bɛtete asue Kebare noa ne, mmale bɛ berɛ. Ndenane nekaa bɔ bɛte ne ɛlɛsoo, na me nwo dwirili me.

¹⁶ Na ɛlɛsoo pɛle nu ne, AWURADE lale ye dwirɛ ali hyirele me kyɛ,

¹⁷“Sona awa, mafa wɔ mayɛ Yisrael awuro ama so wɛmvoɛ; yiti tie me noa dwirɛ, ná fa bɔ bɛ kɔkɔ ma me.

¹⁸Sɛ mekã mekyire bɔnefoɛ kyɛ, ‘Ewue yeɛ ekowu ɔ,’ ná ammɔ ye kɔkɔ, anaa anga angyire bɔnefoɛ ne maa wandwe ye nwo wamvi ye bɔne nwo, amaa ɔnate so wannya ngoa a, ye de sɔ bɔnefoɛ ne kowu ye amumuyɛɛ nu de; nakoso ye mogya de, wɔ berɛ yeɛ ngobisa ngofi ɔ.

¹⁹Nakoso sɛ ɛbɔ bɔnefoɛ ne kɔkɔ, ná mmom wandwe ye nwo wamvi ye bɔne nwo, anaa ye amumuyɛɛ nwo a, ye de okowu ye amumuyɛɛ nu, nakoso wɔ de, apepɛ ale wɔ kra.

²⁰Yeɛ sɛ teneneeniɛ odi ye tenenee nwo makyebu ɔkɔyɔ amumuyɛɛ, ná mefa sundidua meto ye atee nu a, okowu. Na ɔnate kyɛ ammɔ ye kɔkɔ ne ati, okowu ye bɔne nu, na bɛngɔkaye ye tenenee bra bɔ ɔbɔle ne; nakoso ye mogya de, wɔ berɛ yeɛ ngobisa ngofi ɔ.

²¹Nakoso sɛ ɛbɔ teneneeniɛ kɔkɔ kyɛ nnɛmaa ɔyɔ bɔne, ná wanyɔ bɔne a, ye de okonya ngoa amba, ofikyɛ otiele kɔkɔbɔlɛ ne, na wɔ wora apepɛ ale wɔ kra.”

²²AWURADE tumi ne wale me so wɔ berɛ, na osele me kyɛ, “Dwɔso, si nu kɔ bɔnza ne anu dɔ, na dɔ yeɛ me ne wɔ yɛkodwudwo ɔ.”

²³Yiti ndwɔsole nzili nu ngɔle bɔnza ne anu, na yieee, né AWURADE animnyam ne gyi berɛ, bɔ ɔte kyɛ animnyam bɔ nwuni ye wɔ asue Kebare noa ne ala ɔ; na mvale me nyunu mmutuli ase.

²⁴Yeɛ Sunzum ne wurale me nu, na ɔmaa ngyinane me gya so, na ɔne me dwudwole, na osele me kyɛ, “Kɔ ná kɔto wɔ nwo anoa nu wɔ w’awuro.

²⁵Na wɔ, Sona awa, tie, bɛkɔfa nyamaa bekogua wɔ so bɛkɔfa bɛkɔkyekye wɔ, kyɛbɔ ɛngɔhora bɛ nu kɔ ɔ.

²⁶Ngɔma wɔ temverema kɔmata wɔ nnaalɔ, na ɛkɔtɔ mumu bɔ ɛngɔhora bɛ nyunu twi ɔ, ofikyɛ bɛte abusua bɔ bayɛ lɔen ɔ.

²⁷Nakoso sɛ me ne wɔ yɛdwudwo a, ngɔsangye wɔ temverema nyamaa ne maa ekose bɛ kyɛ, ‘Bɔ AWURADE Nyameɛ ɔkã hɔ ɛhe.’ Bɔ okotie ne, maa otie, yeɛ bɔ ongotie ne koso, yakyi ye, ofikyɛ bɛte abusua bɔ bayɛ lɔen ɔ.