Read Sehwi Hesekiel 31 Bible Online

Hesekiel 31 - Sehwi bible

Hesekiel 31

¹Afoɛ buru ne ko ne anu, bosome nza ne anu, ye kyẽa bɔ oli moa ne, AWURADE lale ye dwirɛ ali hyirele me kyɛ,

²“Sona awa, kã kyire Misraim hene Faro ne ye lɔen worawora ne kyɛ, “Wɔ titireyɛlɛ nu, nwa yeɛ ɛte kyɛ ye ɔ?

³Nea, Asiria te kyɛ Lebanon sida, ye mmaen nyemenenyemene, pusaa bɔ ye bo te fɔnwoo ɔ, na ɔwale paa kɔ anwuro, na ye ti anwuro kɔkã munungum ne anu dɔ.

⁴Onyane nzue onyi yɛle piri, aseɛ bo dɔ mbombonzue maa ɔyɛle tendenn, ye mbombonzue pɛ ye mmakaa mɔ nwo bra yia na ye asue mɔ tengyɛ fa eburo mmakaa mukoraa bo.

⁵Yiti ye tendenn hɔle anwuro trale eburo mmakaa mukoraa; ye mmaen frɔmfrɔm nemɔ yɛle pee, yeɛ ye sa nemɔ yɛle ndendenn, ɔnate kyɛ onyane nzue pee.

⁶ Ewienu nnomaa mukoraa bɛnwone bɛ saen wɔ ye mmaen frɔmfrɔm nemɔ anu; eburo ngaka mukoraa bɛwole bɛ mma wɔ ye mmaen nemɔ abo; na ye bo fɔnwoo ne anu yeɛ maen maen mbiri amukoraa bɛtenane ɔ.

⁷Ɔyɛle nyemene wɔ ye titireyɛlɛ ne anu, wɔ ye mmaen ndendenn ne anu, ofikyɛ ye ndii ne hɔle aseɛnwo, oodwuli nekaa bɔ nzue pee wɔ ɔ.

⁸ Sida mɔ bɔ bɛwɔ Nyameɛ turo ne anu ne, bendwu ye, yeɛ asia mmakaa bendwu ye mmaen frɔmfrɔm nemɔ ɛfa enyaa toto ye mmaen mɔ nwo a ɔnyɛ yee, Nyameɛ turo ne anu bakaa biala nne berɛ bɔ ɔyɛ nyemene te kyɛ ye ɔ.

⁹Mamaa wanya mmaen pee maa wayɛ nyemene, bɔ ɔnate so Eden turo nu mmakaa mukoraa, mmakaa bɔ bɛwɔ Nyameɛ turo ne anu ne, bɛ nye boro ye ɔ.

¹⁰“Yiti AWURADE Nyameɛ nwa nyoo: Ɔnate kyɛ onyi yɛle tendenn, bɔ ye ti anwuro ɔɔhane munungum ne anu dɔ, ná ɔyɛle ye tendenn nwo anwomasoɛ ne ati,

¹¹ngɔfa ye ngowura maen maen mɔ nu tuminiɛ ne sa; na ɔne ye koli amba kyɛbɔ ɔfata ɔ. Ɔnate ye amumuyɛɛ ti yeɛ matu ye bo mafi berɛ ɔ.

¹²Na ɛwɔfoɛ mɔ, bɔ bɛte maen maen mɔ nufoɛ atianuserɛfoɛ paa ne, bebuli ye bɛtole, na bɛyakyili ye berɛ. Ye mmaen guale mmokaa so ne bɔnza mukoraa nu. Yeɛ ye mmaen frɔmfrɔm ne bubu guale aseɛ so asue mukoraa noa; na aseɛ so maen mukoraa befili ye bo fɔnwoo ne anu, na bɛhɔ bɛyakyili ye berɛ.

¹³Ewienu nnomaa mukoraa bɛkɔɔtenatena ye wuruwaa ne aso, yeɛ eburo ngaka mukoraa bɛkɔɔtenatena ye mmaen nemɔ aso.

¹⁴Mayɔ sɔ, amaa ɔnate so asue noa mmakaa nu biala wamva ye tendenn wanhoahoa ye nwo, anaakyɛ wamma ye ti anwuro wangɔanga munungum ne anu dɔ. Na bakaa biala bɔ onya nzue ne, ongonyi ngɔhɔ anwuro sɔ; ofikyɛ ewue la berɛ ɔnwondɛ bɛ mukoraa, bɛkɔhɔ aseɛ bo dɔ bɛkɔɔboka adasa mmaa so, bɛ ne bɛ bɔ bɛkɔ ɛborɔ kumaa nu ne.

¹⁵“AWURADE Nyameɛ nwa nyoo: Kyẽa bɔ owuli hɔle ɛborɔ dɔ ne, mmaa besuni ye. Ɔnate ye ti, ngatale buma ne aso, na mamma ye nzue ne wanze. Nzili ye nzue pembepembe ne ate; na ɔnate ye ti, mama Lebanon ahera ɛsɛen tena; na ɔnate ye ti, eburo mmakaa mukoraa bɛ nwo tole.

¹⁶Ye asetɔlɛ bɔ ɔtɔle berɛ tuu ne, mvale so mane maen maen mɔ bɛwosole, mmerɛ bɔ mvindini ye ne bɛ bɔ bɛkɔ ɛborɔ kumaa nu ndole ɛborɔ dɔ ne. Na afei Eden mmakaa mukoraa, Lebanon mmakaa paa paa bɔ baneanea nu baye ɔ, mmakaa mukoraa bɔ benya nzue ɔ, bɛ wora kɔkyekye wɔ aseɛ bo dɔ.

¹⁷Na bɛ bɔ batotɔ ngrandɛ noa, ɔne bɛ bɔ bɛtenane ye bo fɔnwoo nu, wɔ maen maen mɔ nu ne, bɛ koso bɛ ne ye hɔle ɛborɔ dɔ.

¹⁸Eden mmakaa nu beni yeɛ w’animnyam ne wɔ piri ɔne ye sɛ ɔ? Nakoso bɛkɔfa wɔ ne Eden mmakaa bɛkɔhɔ aseɛ bo; ɛkɔɔboka bɛmbɛ-bɛ-bienzuafoɛ so, ɔne bɛ bɔ batotɔ ngrandɛ noa ɔ so. “Ɛhe fa Faro ne ye lɔen worawora ne amukoraa anwo, AWURADE Nyameɛ noa dwirɛ ɛne.”