Read Sehwi Hesekiel 32 Bible Online

Hesekiel 32 - Sehwi bible

Hesekiel 32

¹Afoɛ buru ne nyɔ ne anu, bosome buru ne nyɔ ne anu, kyẽa bɔ oli moa ne, AWURADE lale ye dwirɛ ali hyirele me kyɛ,

²Sona awa, bɔ Misraim hene Faro nwo awuye, ná se ye kyɛ, “Ebu wɔ nwo kyɛ ɛte maen maen mɔ nu gyata akrɔngrɔma, nakoso ɛte kyɛ bonzu bɔ ɔla ɛpo nu ɔ; ehuru totɔ wɔ w’asue nemɔ anu, ɛfa wɔ gya boro nzue ne, na ɛponda b’asue nemɔ.

³Na AWURADE Nyameɛ nwa nyoo: Ngɔfa maen maen pee bɛ so ngɔto m’asawu ngogua wɔ so, na bɛkɔtwetwe m’asawu ne bɛkɔhwe wɔ bekofite.

⁴Ngofindi wɔ ngɔto aseɛ so, ngogyi wɔ ngɔto buro, ngɔma ewienu nnomaa mukoraa bɛkɔɔtenatena wɔ so, na ngɔma aseɛ amukoraa so ngaka bekoli wɔ naen kɔma bɛ ko koyi.

⁵Ngɔto wɔ naen ngogua mmokaa nemɔ aso, na ngɔma wɔ fuin ne koyi bɔnza nemɔ anu tɛkyɛ.

⁶Ngɔfa wɔ mogya ngɔloaloa aseɛ ne aso toonn maa okoodwu mmokaa nemɔ aso, na ekoyi asue kumaa nemɔ anu to.

⁷ Sɛ menua wɔ boso a, ngɔkata ewienu, na ngɔma nzramaa mɔ kɔyɛ tunn; ngɔfa munungum ngɔkata eyia nyunu, na ɛsraen ngɔta.

⁸Ewienu nganea mukoraa bɔ bɛta ne, ngɔmaa bɛkɔyɛ wɔ so tunn, na ngɔfa awosii ngɔkata w’aseɛ ne aso, AWURADE Nyameɛ noa dwirɛ ɛne.

⁹Ngɔfa ahunundetelɛ ngɔto maen maen pee bɛ so, mmerɛ bɔ ngɔhye wɔ nnure ngɔhɔ maen maen nemɔ so, aseɛ bɔ ɛnze so ne aso ne.

¹⁰Ɔnate wɔ ti ngɔma maen maen pee bɛ nwo kodwiri bɛ; na mmerɛ bɔ ngɔnwaha me ngrandɛ wɔ bɛ nyunu ne, ɔnate wɔ ti awɔse kogua b’ahemvo mɔ. Na kyẽa bɔ ɛkɔtɔ ase ne, bɛ nwo kɔwosowoso bɛ, bɔ ebiala kɔpena ye ti ngoa ɔ.

¹¹Ofikyɛ AWURADE Nyameɛ nwa nyoo: Babilɔn hene ngrandɛ kɔwa wɔ so.

¹²Wɔ lɔen worawora ne, ngɔmaa bɛkɔtotɔ anwoserɛfoɛ bɛ ngrandɛ noa, mmenia bɔ bɛ mukoraa bɛ nwo yɛ suro paa wɔ maen maen mɔ nu ne. “Bekotu Misraim anwomasoɛ ne abo, na ye lɔen worawora amukoraa ne, bɛ boso konua.

¹³Ngohũhũ ye nyɛmmoa mukoraa ngofi asue mbiri nemɔ anoa; sona gya ngɔma bɛngɔponda ko, yeɛ nyɛmmoa gya ngɔma bɛngɔponda ko.

¹⁴Na afei ngɔma b’asue nemɔ kɔgyene, na ngɔma b’asueba nemɔ kɔtengyɛ kyɛ ngoo, AWURADE Nyameɛ noa dwirɛ ɛne.

¹⁵Na mmerɛ bɔ ngɔsɛkye Misraim aseɛ ne pasaa, bɔ ngɔsɛkye aseɛ ne aso nikyee biala maa ɔkɔla berɛ mbaen, bɔ ngohũhũ bɛ bɔ bɛte so amukoraa ne, yeɛ afei bekonwu kyɛ me ole AWURADE ɔ.

¹⁶Awuye he yeɛ bɛkɔfa bekosu ye ɔ: Maen maen mmaa mmrasua mɔ bekosu ye; bekosu Misraim ne ye lɔen worawora ne amukoraa, AWURADE Nyameɛ noa dwirɛ ɛne.”

¹⁷Na afoɛ buru ne nyɔ ne anu, bosome bɔ oli moa ne anu, ye eleburu ne nnu ne aso, AWURADE lale ye dwirɛ ali hyirele me kyɛ,

¹⁸“Sona awa, bɔ Misraim lɔen worawora ne ti so awuye, na bɛ ne maen maen atitire mɔ bɛ mma mmrasua nemɔ, gyi bɛ gua aseɛ bo dɔ maa bɛɛboka mmenia bɔ bahɔ ɛborɔ kumaa nu dɔ ne aso.

¹⁹‘Nwa yeɛ w’anwonyemene tra ye ɔ? Dwu kɔ aseɛ bo dɔ kɔla bɛmbɛ-bɛ-bienzuafoɛ bɛ nwo berɛ.’

²⁰Bɛkɔtotɔ wɔ bɛ bɔ batotɔ ngrandɛ noa ɔ bɛ nu. Mafa ye mawura ngrandɛ sa, yiti twe ye ne ye lɔen worawora ne amukoraa kɔ.

²¹Na bɛ nu anwoserɛfoɛ nemɔ, bɛ ne bɛ bokafoɛ mɔ, bɛkɔhã bekohyire bɛ bekofi ɛborɔ dɔ kyɛ, ‘Bɛmbɛ-bɛ-bienzuafoɛ bɔ bafa ngrandɛ bahũhũ bɛ ne, bawa aseɛ bo baalela.’

²²Berɛ yeɛ Asiria ne ye lɔen amukoraa bɛwɔ ɔ; bɛ bɔ bahũ bɛ, bɔ batotɔ ngrandɛ noa ne amukoraa, b’asieleɛ apɛ ye nwo ayia.

²³Bapɛ b’asieleɛ ne bato ɛborɔ kumaa ne abo dɔ paa, na ye lɔen ne apɛ ye asieleɛ ne nwo bayia. Bahũ bɛ mukoraa, batotɔ ngrandɛ noa, bɛ bɔ bɛmane ahunundetelɛ tɔle mmenia so wɔ ateasefoɛ aseɛ so ne.

²⁴“Berɛ yeɛ Elam wɔ ɔ, ɔne ye lɔen worawora amukoraa bɔ bapɛ ye asieleɛ nwo bayia ne. Bɛ mukoraa bahũhũ bɛ, batotɔ ngrandɛ noa; bɛte bɛmbɛ-bɛ-bienzuafoɛ bɔ bɛhɔle aseɛ bo dɔ, bɔ bɛmane bɛ nwo suronyi tɔle mmenia so wɔ ateasefoɛ aseɛ so ne, na bɛ ne bɛ bɔ bahɔ ɛborɔ kumaa nu ne, bɛso b’animguaseɛ.

²⁵Basɛ ye bɛen wɔ bɛ bɔ bahũhũ bɛ nemɔ anu, ɔne ye lɔen worawora ne amukoraa; b’asieleɛ apɛ ye nwo ayia. Bɛ mukoraa bɛte bɛmbɛ-bɛ-bienzuafoɛ, batotɔ ngrandɛ noa; ofikyɛ bɛmane bɛ nwo suronyi tɔle ateasefoɛ aseɛ so, na bɛ ne bɛ bɔ bahɔ ɛborɔ kumaa nu ne, bɛso b’animguaseɛ, na bafa bɛ bafra bɛ bɔ batotɔ ngrandɛ noa ne.

²⁶Berɛ yeɛ Meseke ne Tubal bɛwɔ ɔ, bɛ ne bɛ lɔen worawora ne amukoraa, na b’asieleɛ apɛ bɛ nwo ayia. Bɛ mukoraa bɛte bɛmbɛ-bɛ-bienzuafoɛ, batotɔ ngrandɛ noa; ofikyɛ bɛmane bɛ nwo suronyi tɔle mmenia so wɔ ateasefoɛ aseɛ so.

²⁷Na bɛmbɛ-bɛ-bienzuafoɛ anwoserɛfoɛ bɔ batotɔ, bɔ bɛfale b’akodeɛ bɛhɔle ɛborɔ, bɔ bɛfale bɛ ngrandɛ besiele bɛ, bɔ b’amumuyɛɛ ahã bɛ mmowue ne, bɛ ne bɛ ngɔla ngɔbɔ nu; ɔwɔ nu kyɛ anwoserɛfoɛ nemɔ bɛmane bɛ nwo suronyi tɔle mmenia so wɔ ateasefoɛ aseɛ so de.

²⁸Yiti, bɛmbɛ-bɛ-bienzuafoɛ mɔ nu yeɛ bekobubu wɔ nu ɔ, na ɛne bɛ bɔ batotɔ ngrandɛ noa yeɛ bɛkɔla bɛkɔbɔ nu ɔ.

²⁹Berɛ yeɛ Edom wɔ ɔ, ye ahemvo ne ye atitirefoɛ. B’anwoserɛ piri ne asi ne po, bafa bɛ bafra bɛ bɔ batotɔ ngrandɛ noa ɔ nu. Bɛ ne bɛmbɛ-bɛ-bienzuafoɛ, yeɛ bɛ bɔ bɛkɔ ɛborɔ kumaa nu ne yeɛ bɛkɔla bɛkɔbɔ nu ɔ.

³⁰“Berɛ yeɛ sorɔ dɔ atitirefoɛ amukoraa bɛwɔ ɔ, yeɛ Sidoniafoɛ amukoraa. Bɛ ne mmenia bɔ bahũ bɛ ɔ yeɛ bahɔ aseɛ bo dɔ ɔ. B’anwoserɛ bɔ bɛfa benwunanwunane mmenia ne asi ne po, animguaseɛ ahã bɛ. Bɛte bɛmbɛ-bɛ-bienzuafoɛ, bɛ ne bɛ bɔ batotɔ ngrandɛ noa yeɛ bɛlela berɛ ɔ, na bɛ ne bɛ bɔ bahɔ ɛborɔ kumaa nu yeɛ bɛso b’animguaseɛ ɔ.

³¹“Na sɛ Faro ne ye koɛhonɛfoɛ amukoraa benwu bɛ a, Faro kɔkyekye ye wora wɔ ye lɔen worawora bɔ batotɔ ngrandɛ noa ne anwo, AWURADE Nyameɛ noa dwirɛ ɛne.

³²Mama me nwo suronyi atɔ mmenia so wɔ ateasefoɛ aseɛ so, yiti ngɔfa Faro ngɔto bɛmbɛ-bɛ-bienzuafoɛ nu, ɔne ye lɔen worawora ne amukoraa, ngɔfa bɛ ngɔfra bɛ bɔ batotɔ ngrandɛ noa ɔ, AWURADE Nyameɛ noa dwirɛ ɛne.”