Read Sehwi Hesekiel 33 Bible Online

Hesekiel 33 - Sehwi bible

Hesekiel 33

¹Yeɛ AWURADE lale ye dwirɛ ali hyirele me bieku kyɛ,

²“Sona awa, dwudwo kyire wɔ maen mmaa, ná se bɛ kyɛ, Sɛ mefa ngrandɛ meba maen bie aso, ná sɛ maen ne anu ama bɛye bɛ nu bienzua ko bɛfa ye bɛyɛ wɛmvoɛ;

³ná sɛ onwu ngrandɛ ne kyɛ ɔba maen ne aso, ná ohu totorobɛndo fa bɔ maen ne kɔkɔ a;

⁴ye de ebiala bɔ ɔkɔte totorobɛndo hulɛ ne, sɛ wamva kɔkɔbɔlɛ ne wanyɛ huu, ná ngrandɛ ne ba baku ye a, ye mogya kɔbɔ ye bɔbɔ ye ti so.

⁵Ɔtele totorobɛndo hulɛ ne, nakoso wamva kɔkɔbɔlɛ ne wanyɛ huu; ye mogya kɔbɔ ye bɔbɔ ye ti so. Nakoso ebiala bɔ otie kɔkɔbɔlɛ ne, onya ngoa ma ye kra.

⁶Nakoso sɛ wɛmvoɛ ne onwu ngrandɛ ne kyɛ ɔba, ná wanhu totorobɛndo ne wamva wammɔ maen ne kɔkɔ, ná ngrandɛ ne ba ɔbaku bɛ nu bie a, ye de sɔ sona ne, ye amumuyɛɛ nu yeɛ wawu ɔ; nakoso ye mogya de, wɛmvoɛ ne berɛ yeɛ ngobisa ngofi ɔ.

⁷“Yiti wɔ, Sona awa, mafa wɔ mayɛ Yisrael awuro ama bɛ wɛmvoɛ. Yiti tie me noa dwirɛ, ná fa bɔ bɛ kɔkɔ.

⁸Sɛ mekã mekyire bɔnefoɛ kyɛ, ‘Bɔnefoɛ, ewue yeɛ ekowu ɔ,’ ná andwudwo ammɔ bɔnefoɛ ne kɔkɔ maa wanyakyi ye yɔleɛ a, sɔ bɔnefoɛ ne kowu ye amumuyɛɛ nu, nakoso ye mogya de, wɔ berɛ yeɛ ngobisa ngofi ɔ.

⁹Nakoso sɛ ɛbɔ bɔnefoɛ ne kɔkɔ kyɛ ɔyakyi ye yɔleɛ, ná wanyakyi ye yɔleɛ a, ye amumuyɛɛ nu yeɛ okowu ɔ, nakoso wɔ de, ekonya ngoa kɔma wɔ kra.

¹⁰“Na wɔ, Sona awa, se Yisrael awuro ama kyɛ, Ɛmɔnwa: ‘Yɛ mmeraatolɛ ne yɛ bɔne wabu watia yɛ, ye sɔ ati yeɛ onyie yɛ yé ye; na ɔkɔyɛ sɛɛ né yanya ngoa?’

¹¹ Se bɛ kyɛ: Kyɛ nde ase ye, me nye ngye bɔnefoɛ ye wue nwo, na mmom me nye gye kyɛ bɔnefoɛ kɔyakyi ye yɔleɛ, ná okonya ngoa ɔ. AWURADE Nyameɛ noa dwirɛ ɛne. Ɛ́mɔyakyi, ɛ́mɔyakyi ɛmɔ bɔne yɔleɛ ne! O Yisrael awuro ama, nzu ati yeɛ odi kyɛ ɛmɔwuwu ɔ?

¹²“Na wɔ, Sona awa, se wɔ maen mmaa kyɛ: Kyẽa bɔ teneneeniɛ kɔto mmeraa ne, ye tenenee ngɔpepɛ ngole ye; yeɛ kyẽa bɔ bɔnefoɛ kɔkakyi ye si kɔma ye bɔne yɔleɛ ne, ye bɔne yɔleɛ ne ngɔfa ye ngɔhɔ ewue nu. Yeɛ kyẽa bɔ teneneeniɛ kɔyɔ bɔne ne, ɔngɔhora ngogyina ye tenenee so ngonya ngoa.

¹³Sɛ mekã mekyire teneneeniɛ kyɛ, amba, okonya ngoa, ná sɛ ɔfa ye nwo to ye tenenee so, ná ɔbɔ amumuyɛɛ bra a, mengɔkaye ye tenenee bra ne anu biala, na mmom ye amumuyɛɛ bra ne anu ala yeɛ okowu ɔ

¹⁴Yeɛ sɛ bɔnefoɛ koso mekã mekyire ye kyɛ, ‘Ewue ala yeɛ ekowu ɔ,’ nakoso sɛ ɔkakyi ye si ma ye bɔne, ná ɔyɔ bɔ ɔte paa ne bɔ ɔtengyɛ,

¹⁵ná sɛ bɔnefoɛ ne fa nikyee bɔ bafa basi ye berɛ awowaa ne osa ma ye mene, osa fa nikyee bɔ wawua ɔ ɔma ye mene, ná odi ngoa ahyɛdeɛ ne aso, bɔ ɔnyɔ amumuyɛɛ a, ye de, amba, okonya ngoa, ongowu.

¹⁶Ye bɔne bɔ wayɔ ne, mengɔkaye nu biala; wayɔ bɔ ɔte paa ne bɔ ɔtengyɛ ɔ, na amba, okonya ngoa.

¹⁷“Nakoso wɔ maen mmaa nwa, ‘AWURADE atee ndengyɛ’; wɔ aberɛ bɔ b’atee mmom yeɛ ɔndengyɛ ɔ.

¹⁸Sɛ teneneeniɛ kakyi ye si ma ye tenenee, ná ɔyɔ amumuyɛɛ a, nu yeɛ okowu ɔ.

¹⁹Yeɛ sɛ bɔnefoɛ kakyi ye si ma ye bɔne, ná ɔyɔ bɔ ɔte paa ne bɔ ɔtengyɛ a, nu yeɛ okonya ngoa ɔ.

²⁰Nakoso ɛmɔnwa: ‘AWURADE atee ndengyɛ.’ O Yisrael awuro ama, ngobua ɛmɔ nu biala ndɛen kyɛbɔ ye yɔleɛ te ɔ.”

²¹Bɛhyele yɛ nnure bɛhɔle ne, ye afoɛ buru ne nyɔ ne anu, bosome buru ne anu, ye elennu ne aso, biaa bie bɔ wanwati wafi Yerusalem ɔ ɔwale me berɛ oosele me kyɛ, “Babɔ kuro ne!”

²²Na AWURADE tumi wale me so nɔsoa ne koraka yeɛ biaa bɔ wanwati ne ɔbaawa ɔ. Na anzana biaa ne ɔbaawa me berɛ ngyerɛmɔ nen, né AWURADE ate me noa ne, yiti ɔtele me noa ne, na mandɔ mumu ko.

²³Yeɛ AWURADE lale ye dwirɛ ali hyirele me kyɛ,

²⁴“Sona awa, mmenia bɔ bɛtete sɔ Yisrael aseɛ bɔ wakakyi kurofoen ne aso ne, bɛnwa, ‘Né Abraham te sona horɛ, yeɛ onyane aseɛ ne fa yɛle ye deɛ ɔ; nakoso yɛ de yɛsone, na yɛ mmom yeɛ bafa aseɛ ne bama yɛ kyɛ yɛfa yɛyɛ yɛ deɛ ɔ.’

²⁵Yiti se bɛ kyɛ, AWURADE Nyameɛ nwa nyoo: Ɛmɔdi naen bɔ ye mogya wɔ ye nu ɔ, ɛmɔsɔne ɛmɔ mmosoen nemɔ, yeɛ ɛmɔkã mogya begua; na ɔkɔyɛ sɛɛ né ɛmɔanya aseɛ ne bafa bayɛ ɛmɔ deɛ?

²⁶Ɛmɔngyɛ ye nwo né ɛmɔali awue, ɛmɔbɔ akyiwadeɛ bra, yeɛ ɛmɔ nu biala fa obiɛngo aye; na ɔkɔyɛ sɛɛ né ɛmɔanya aseɛ ne bafa bayɛ ɛmɔ deɛ?

²⁷Se bɛ kyɛ, AWURADE Nyameɛ nwa nyoo: Kyɛ nde ase ye, nahorɛ nu, bɛ bɔ bɛwɔ kurofoen nemɔ aso ne, bɛkɔtotɔ ngrandɛ noa; bɔ ɔwɔ eburo ne koso, ngɔfa ye ngɔma ngaka aboyaa maa bɛkɔhye ye bekoli; yeɛ bɛ bɔ bɛwɔ anwoserɛ afealeɛ mɔ nu, ɔne nyɔboɛ bɔ wasi sua ɔ mɔ nu koso, ewue anwonyerɛ yeɛ okohũ bɛ ɔ.

²⁸Ngɔkakyi aseɛ ne kurofoen, na ɔkɔla berɛ mbaen, na ye anwomasoɛ anwoserɛ ne, ye bo kɔpɛ; yeɛ Yisrael mmokaa nemɔ kɔla berɛ mbaen bɔ ebiala ngɔfa so ɔ.

²⁹Na b’akyiwadeɛ bra bɔ babɔ ne amukoraa, sɛ ɔnate ye ti mekakyi aseɛ ne kurofoen, ná memaa ɔda berɛ mbaen a, yeɛ afei bekonwu kyɛ me ole AWURADE ɔ.

³⁰“Na wɔ Sona awa, wɔ maen mmaa nemɔ bɛkekã edwirɛ bɛfa wɔ nwo, bɛkekã ye wɔ fasue nemɔ anwo ne awuro nemɔ anoa nu. Bɛkekã bekyirekyire bɛ nwo ne b’eliɛma mɔ kyɛ, ‘Ɛmɔbra beetie edwirɛ bɔ ofi AWURADE noa ne oo!’

³¹Bɛba wɔ berɛ kyɛbɔ maen bɛkwaayia ne ala, bɛtenatena wɔ nyunu kyɛ me maen, betie wɔ noa dwirɛ, nakoso benni so; ofikyɛ bɛma bɛ noa dwirɛ yɛ fɛfɛɛfɛ kyɛ bale bato nu, nakoso b’ahone nu de, b’anwonya fiɛ yeɛ bɛpena ɔ.

³²Na tie, ɛte kyɛ edwein fɛfɛɛfɛ ma bɛ, kyɛ ebie bɔ ye komvi yɛ fɛ, bɔ ɔse sangoo bɔ paa ɔ ye dwein; ofikyɛ bɛte wɔ dwirɛ ne de, nakoso benni so.

³³Na sɛ sɔ dwirɛ ne ba nu a, yoo, ɔkɔwa nu koso amba, yeɛ afei bekonwu kyɛ ngɔmhyɛlɛniɛ bie ɔne bɛ baatena le ɔ.”