Read Sehwi Hesekiel 34 Bible Online

Hesekiel 34 - Sehwi bible

Hesekiel 34

¹Yeɛ AWURADE lale ye dwirɛ ali hyirele me kyɛ,

²Sona awa, hyɛ ngɔm tia Yisrael mmoaenneafoɛ nemɔ. Hyɛ ngɔm ná se mmoaenneafoɛ nemɔ kyɛ, ‘AWURADE Nyameɛ nwa nyoo: Ɛmɔ yaakɔ! Yisraelfoɛ mmoaenneafoɛ bɔ ɛmɔ bɔbɔ ɛmɔ nwo yeɛ ɛmɔnea so ɔ! Aso nna mmoaen nemɔ so yeɛ odi kyɛ mmoaenneafoɛ bɛnea ɔ?

³Ɛloe ne yeɛ ɛmɔdi ɔ, mmoaen ne nwo nwiaa yeɛ ɛmɔfa bɛyɛ ɛtena bɛkera ɔ, ɛmɔku bɔ walɔ ne, nakoso mmoaen nemɔ de, ɛmɔnnea bɛ so.

⁴Bɔ wayɛ mmerɛ ne, ɛmɔamma ye nwo anyɛ se; bɔ ɔnde apɔ ne, ɛmɔanza ye anwonyerɛ; bɔ wabubu ne, ɛmɔammɔ ye borɛ; bɔ bafoa ye maa wahɔ ne, ɛmɔamva ye bamma; bɔ wamini ne, ɛmɔangɔ ambena ye boso; na mmom nhyɛsoɛ ne atianuserɛ yeɛ ɛmɔfa bedi bɛ so ɔ.

⁵ Na bɛbɔle aya, ofikyɛ belle neafoɛ biala. Na bɛbɔle aya ne, bɛkakyili eburo ngaka aboyaa amukoraa bɛ noa aleɛ.

⁶Me mmoaen nemɔ bɛbɔ bɛsandele wɔ mmokaa mukoraa ne pambaa biala so. Amba, me mmoaen nemɔ bɛbɔle aya bɛhɔle aseɛ so nekaa biala, na ebiala ammisa bɛ boso, yeɛ ebiala ambena bɛ.

⁷“Yiti, ɛmɔ, mmoaenneafoɛ, ɛ́mɔtie AWURADE noa dwirɛ:

⁸Kyɛ nde ase ye, susu amba kyɛ, me mmoaen akakyi nikyee bɔ ebiemɔ bɛfẽ bɛfa ɔ; bakakyi eburo ngaka amukoraa b’aleɛ, ofikyɛ belle mmoaenneafoɛ biala; yeɛ me mmoaenneafoɛ nemɔ bambena bɛ boso, na mmom mmoaenneafoɛ nemɔ bɛnea bɛ bɔbɔ bɛ nwo so, na bɛnnea me mmoaen nemɔ aso, AWURADE noa dwirɛ ɛne.

⁹Yiti, ɛmɔ, mmoaenneafoɛ, ɛ́mɔtie AWURADE noa dwirɛ:

¹⁰AWURADE Nyameɛ nwa nyoo: Tie, meko metia mmoaenneafoɛ nemɔ; ngobisa me mmoaen nemɔ ngofi bɛ berɛ; ngɔmaa bɛkɔyakyi mmoaen nemɔ so nealɛ, maa ɔnate so mmoaenneafoɛ nemɔ bɛngɔnea bɛ bɔbɔ bɛ nwo so ko. Na ngofoti me mmoaen nemɔ ngofi bɛ noa nu, amaa ɔnate so bangakyi bɛ noa aleɛ ko.

¹¹“Ofikyɛ AWURADE Nyameɛ nwa nyoo: Tie, me, me bɔbɔ ngɔɔpena me mmoaen nemɔ boso, na ngɔnea bɛ so.

¹²Na kyɛbɔ mmoaenneafoɛ ɔpena ye mmoaen bɔ babɔ aya ɔ bɛ boso, wɔ kyẽa bɔ ɔne bɛ wɔ berɛ ne, sɔ ala yeɛ ngɔpena me mmoaen nemɔ bɛ boso ɔ; na ngɔye bɛ ngofi nekaa mukoraa bɔ babɔ aya bahɔ ɔ, wɔ munungum ne awosii kabii kyẽa ne.

¹³Ngɔye bɛ ngofi maen maen nemɔ anu, ngɔboaboa bɛ noa ngofi aseɛ nemɔ aso, ná mafa bɛ mawa bɛ bɔbɔ b’aseɛ so. Na ngɔnea bɛ so wɔ Yisrael mmokaa nemɔ aso, wɔ asue bɔnza mɔ nu ne aseɛ ne aso nekaa biala bɔ bɛte ɔ.

¹⁴Aleɛ paa yeɛ ngɔfa ngɔma bɛ ɔ, na Yisrael mmokaa ndendenn nemɔ aso yeɛ ɔkɔyɛ nekaa bɔ bekodidi ɔ. Berɛ yeɛ bekobutubutu ɔ, wɔ aseɛ bɔ aleɛ paa wɔ so ne aso, na bekoli ndire paa wɔ Yisrael mmokaa nemɔ aso.

¹⁵Me bɔbɔ deinn yeɛ ngɔnea me mmoaen nemɔ aso ɔ, na me bɔbɔ ngɔmaa bekobutubutu berɛ, AWURADE Nyameɛ noa dwirɛ ɛne.

¹⁶ Bɔ wamini ne, ngɔpena ye boso, yeɛ bɔ bafoa ye maa wahɔ ne, ngɔɔfa ye ngɔwa. Bɔ wabubu ne, ngɔbɔ ye borɛ, bɔ ɔnde apɔ ne, ngɔsa ye anwonyerɛ; na bɛ bɔ balɔ bɔ bɛ nwo yɛ se ne wora, ngɔnea bɛ so;[9] na ngɔfa pɛpɛɛpɛyɛlɛ yeɛ ngɔnea bɛ so ɔ.

¹⁷“Na ɛmɔ, me mmoaen kure, AWURADE Nyameɛ nwa nyoo: Ɛ́mɔtie, mebaabua boaen ne boaen b’afia ndɛen, yeɛ boaen nyii ne abɔngye nyii b’afia ndɛen.

¹⁸Aso wanyɛ ɛmɔ anyesɔ kyɛ ɛmɔdidi nekaa bɔ berɛ ndire te paa ɔ, bɔ yeɛ ɛmɔfa ɛmɔ gya betiatia ɛmɔ ndire bɔ waha ne aso ɔ? Aso wanyɛ ɛmɔ anyesɔ kyɛ ɛmɔno nzue gyengɔgyengɔ ɔ, bɔ yeɛ ɛmɔfa ɛmɔ gya bɛponda bɔ waha ne ɔ?

¹⁹Aso odi kyɛ me mmoaen bedi bɔ ɛmɔafa ɛmɔ gya batiatia so ne, ná bɛno bɔ ɛmɔafa ɛmɔ gya baponda ye ne anaa?

²⁰“Bɔ AWURADE Nyameɛ ɔkã kyire bɛ hɔ ɛhe: Ɛ́mɔtie, me, me bɔbɔ ngobua mmoaen bɔ balɔ nemɔ, ɔne bɔ bafɔ nemɔ b’afia ndɛen.

²¹Na ɔnate kyɛ ɛmɔfa ɛmɔ mvenu ne ɛmɔ bati besumusumu, ná ɛmɔfa ɛmɔ mmɛen bɛwowɔ bɛ bɔ bɛnde apɔ ne amukoraa, kɔpem kyɛ ɛmɔkɔbɔ bɛ kɔsande bɛkɔhɔ dedeede ne ati,

²²ngole me mmoaen nemɔ ngoa, bɛngɔyɛ ebiemɔ bɛ nikyee bɔ bɛfẽ bɛfa ɔ ko; na ngobua boaen ne boaen b’afia ndɛen.

²³ Ngɔma mmoaenneafoɛ ko kɔnea bɛ so. Ye ole me somvoɛ Dawide. Ɔkɔma bɛ aleɛ, ɔkɔma bɛ aleɛ ná wayɛ bɛ so mmoaenneafoɛ.

²⁴Na me, AWURADE, ngɔyɛ bɛ Nyameɛ, na me somvoɛ Dawide yeɛ ɔkɔyɛ bɛ so panyi kotua bɛ noa ɔ; me, AWURADE, me yeɛ mahã ɔ.

²⁵“Me ne bɛ yɛkɔyɛ asomdwee apam, na ngotu ngaka aboyaa mɔ bo ngofi aseɛ ne aso, amaa ɔnate so batena ɛserɛ ne aso asomdwee nu, ná balela ɛhɔayeɛ nemɔ anu.

²⁶Bɛ ne aseɛ bɔ bapɛ me bokaa ne anwo bayia ne, ngɔmaa bɛkɔyɛ saleɛ, na ngɔma esue kɔtɔ wɔ ye mmerɛ nu; ɔkɔyɛ saleɛ esue.

²⁷Eburo mmakaa bekosu bɛ mma, yeɛ aseɛ kɔhye aleɛ, na bɛ so anu kɔtɔ bɛ wɔ b’aseɛ so. Na mmerɛ bɔ ngobubu bɛ kɔnnua nu, ná ngole bɛ ngofi bɛ bɔ bafa bɛ bayɛ nganga nemɔ bɛ sa nu ne, yeɛ bekonwu kyɛ me ole AWURADE ɔ.

²⁸Bɛngɔyɛ nikyee bɔ maen maen mɔ bɛfẽ bɛfa ɔ ko, yeɛ aseɛ so ngaka ngɔhye bɛ ko, na mmom bɛkɔtena ase asomdwee nu bɔ ebiala ngonwunanwuna bɛ ɔ.

²⁹Ngɔma bɛ eboo nyemenenyemene, bɔ ɛhɔen ngohũ bɛ ko wɔ aseɛ ne aso ɔ, bɔ maen maen mɔ ngɔgoro bɛ nwo ko ɔ.

³⁰Na afei bekonwu kyɛ me, AWURADE, bɛ Nyameɛ ne, me ne bɛ yeɛ yɛwɔ berɛ ɔ; na bɛ, Yisrael awuro ama, bɛte me maen, AWURADE Nyameɛ noa dwirɛ ɛne.

³¹Ɛmɔte me mmoaen kure, me mmoaen bɔ mema bɛ aleɛ ɔ, ɛmɔte mmenia, na me yeɛ nde ɛmɔ Nyameɛ ɔ, AWURADE Nyameɛ noa dwirɛ ɛne.”