Read Sehwi Hesekiel 36 Bible Online

Hesekiel 36 - Sehwi bible

Hesekiel 36

¹Na wɔ, Sona awa, hyɛ ngɔm kyire Yisrael mmokaa nemɔ, ná kã kyɛ, ‘Ɛmɔ, Yisrael mmokaa, ɛ́mɔtie AWURADE noa dwirɛ.

²AWURADE Nyameɛ nwa nyoo: Na ɔnate kyɛ pɔfoɛ ne hane ɛmɔ nwo dwirɛ kyɛ, ‘Ehee! Tete asɔneyɛɛ nemɔ baayɛ yɛ deɛ’ ne ati,

³hyɛ ngɔm ná se kyɛ, AWURADE Nyameɛ nwa nyoo: Bɛkakyili ɛmɔ kurofoen, yeɛ bɛbɔle ɛmɔ tɔɔ wɔ nekaa biala, maa ɔnate so ɛmɔyɛle maen maen ngaa nemɔ b’agyapadeɛ, na mmenia gorole ɛmɔ nwo bɛfale ɛmɔ belili fene;

⁴yiti, ɛmɔ, Yisrael mmokaa, ɛ́mɔtie AWURADE Nyameɛ noa dwirɛ: Edwirɛ bɔ AWURADE Nyameɛ ɔkã kyire mmokaa ne pambaa mɔ, asue mɔ ne bɔnza mɔ, kurofoen mɔ ne nguro bɔ batu bafi so, bɔ maen maen bɔ bapɛ bɛ nwo bayia ne bafẽ bafa, ná basa bayɛ bɛ noa nu ngorohoɛ dwirɛ ne.

⁵Yiti AWURADE Nyameɛ nwa nyoo: Nahorɛ nu, nungunɛ piri paa nu yeɛ mefa medwudwo metia maen maen ngaa nemɔ ɔ, ɔne Edom amukoraa; ofikyɛ bele anigye amukoraa ne animtia piri paa bɛfale m’aseɛ bɛyɛle bɛ deɛ, kyɛbɔ ɔkɔyɛ bɔ bɛkɔfẽ so nningyein bɛkɔfa ɔ.

⁶Yiti hyɛ Yisrael aseɛ nwo ngɔm, na se mmokaa ne pambaa mɔ ne asue mɔ ne bɔnza mɔ kyɛ, AWURADE Nyameɛ nwa nyoo: Ɛ́mɔtie, me nungunɛhwenɛ ne me yaafɛlɛ nu yeɛ medwudwo ɔ, ofikyɛ maen maen mɔ bagua ɛmɔ nyunu ase.

⁷Yiti AWURADE Nyameɛ nwa nyoo: Meta ndaen kyɛ maen maen mɔ bɔ bapɛ ɛmɔ nwo bayia ne, bɛ bɔbɔ b’animguaseɛ kɔto bɛ.

⁸“Nakoso ɛmɔ, Yisrael mmokaa, ɛmɔkɔfefɛ ɛmɔ mmaen, na ɛmɔkosu ɛmɔ mmakaammaa bɛkɔma me maen Yisrael, ofikyɛ ɔngɔhyɛ né basa bawa.

⁹Tie, ngyi ɛmɔ asi, ngɔkakyi me nye ngɔwa ɛmɔ berɛ, bɛkɔsõ ɛmɔ so boo, ná balua ɛmɔ so nningyein.

¹⁰Ngɔma mmenia kɔta pee wɔ ɛmɔ so, Yisrael awuro ama mukoraa, bɛ mukoraa, ɛmɔkɔtenatena nguro nemɔ aso, na ɛmɔkosa bɛkɔkyekye kurofoen nemɔ.

¹¹Ngɔma mmenia ne ngaka bɛkɔta pee wɔ ɛmɔ so; bɛkɔwowo bɛkɔsone pee. Ngɔmaa mmenia kɔtenatena ɛmɔ so kyɛ daa ne ala, na ngɔlo ɛmɔ ngɔtra bɔ nyɛle ɛmɔ daa ne, na afei ɛmɔkonwu kyɛ me ole AWURADE.

¹²Amba, ngɔma mmenia bɔ bɛte me maen Yisrael, bɛkɔnatenate ɛmɔ so; bɛkɔfa wɔ bɛkɔyɛ bɛ deɛ, ɛkɔyɛ b’agyapadeɛ, na ɛngɔma bengoli abawuo ko.

¹³AWURADE Nyameɛ nwa nyoo: Ɔnate kyɛ bɛkã bekyire wɔ kyɛ, ‘Ɛkye mmenia di, na ɛma wɔ maen di abawuo’ ne ati,

¹⁴yiti, ɛngɔhye sona ngoli ko, yeɛ ɛngɔma wɔ maen ngoli abawuo ko, AWURADE Nyameɛ noa dwirɛ ɛne.

¹⁵Mengɔma ɛngɔte maen maen mɔ bɛ ngorohoɛ ne ko, wɔ nyunu ngogua ase wɔ maen maen mɔ bɛ nyunu ko, yeɛ ɛngɔma wɔ maen ngɔbɔ ko, AWURADE Nyameɛ noa dwirɛ ɛne.”

¹⁶Yeɛ AWURADE lale ye dwirɛ ali hyirele me bieku kyɛ,

¹⁷“Sona awa, mmerɛ bɔ né Yisrael awuro ama bɛte b’aseɛ so ne, bɛfale bɛ suban ne bɛ yɔleɛ beguale aseɛ ne anwo fiɛ. Na me nye so de, bɛ bra ne yɛle kyɛ brasua bɔ wabu ye sa ɔ ye nwo bɔ ɔnde ɔ.

¹⁸Na mogya bɔ bɛhã beguale aseɛ ne aso, ɔne mmosoen bɔ bafa bagua ye nwo fiɛ ne ati, m’ahone huli bɛ so paa.

¹⁹Mmɔle bɛ nzandele ngonguale maen maen mɔ nu, na ndole bɛ mbetene aseɛ mɔ so, na mmuale bɛ ndɛen kyɛbɔ bɛ bra ne bɛ yɔleɛ si te ɔ.

²⁰Nakoso beedwuli maen maen nemɔ nu nen, nekaa biala bɔ bɛhɔle nen, beguale me dumaa krongron ne anwo fiɛ, ofikyɛ mmenia hane dwirɛ fale bɛ nwo kyɛ, ‘Ɛhemɔ yeɛ bɛte AWURADE maen ne ɔ, nakoso batu bafi ye aseɛ ne aso bahɔ.’

²¹Nakoso me dumaa krongron bɔ Yisrael awuro ama beguale ye nwo fiɛ wɔ maen maen mɔ bɔ bɛhɔle so nu ne, ye nwo hiane me.

²²“Yiti se Yisrael awuro ama kyɛ, AWURADE Nyameɛ nwa nyoo: O Yisrael awuro ama, nna ɛmɔ ti yeɛ mebaawoso me nwo ɔ, na mmom me dumaa krongron ne ati ɔ, dumaa bɔ ɛmɔagua ye nwo fiɛ wɔ maen maen bɔ ɛmɔhɔle so nemɔ anu ne.

²³Na me dumaa piri bɔ ɛmɔagua ye nwo fiɛ wɔ maen maen mɔ nu, bɔ ɛmɔagua ye nwo fiɛ wɔ bɛ nu ne, ngɔyɛ ye krongron. Na sɛ meyɛ me dumaa ne krongron wɔ ɛmɔ nu, bɔ bɛ nye tua a, afei maen maen mɔ konwu kyɛ me ole AWURADE, AWURADE Nyameɛ noa dwirɛ ɛne.

²⁴Ofikyɛ ngɔfa ɛmɔ ngofi maen maen mɔ nu, ngɔboaboa ɛmɔ noa ngofi aseɛ amukoraa so, ná masa mafa ɛmɔ mawa ɛmɔ bɔbɔ b’aseɛ so.

²⁵Ngɔfa nzue gyengɔgyengɔ ngɔpete ɛmɔ nwo, na ɛmɔ nwo kɔte kofi ɛmɔ nwo bɔ ɔnde ne amukoraa nwo, na ngɔte ɛmɔ nwo ngofi ɛmɔ mmosoen amukoraa nwo.

²⁶ Ngɔma ɛmɔ ahone foforɛ, ngɔfa sunzum foforɛ ngowura ɛmɔ nu; ngɔye nyɔboɛ ahone bɔ ɔwɔ ɛmɔ nu ne, na ngɔma ɛmɔ anwoɔnaen ahone.

²⁷ Ngɔfa me sunzum ngowura ɛmɔ nu, ngɔmaa ɛmɔkoli m’ahyɛdeɛ so, na ɛmɔkɔnea kyɛ ɛmɔkoli me nhyehyɛleɛ so ɔ.

²⁸Ɛmɔkɔtena aseɛ bɔ mva mane ɛmɔ nana mɔ ne aso; ɛmɔkɔyɛ me maen, ná me wora mayɛ ɛmɔ Nyameɛ.

²⁹Ngɔpepɛ ngole ɛmɔ ngofi ɛmɔ nwo bɔ ɔnde ne amukoraa nu; ngɔfrɛ aleɛ ngɔwa maa okobu, na mengɔma ɛhɔen biala ngɔwa ɛmɔ so.

³⁰Ngɔma mmakaammaa ne fieso aleɛ kobu, amaa ɔnate so ɛhɔen angua ɛmɔ nyunu ase ko wɔ maen maen nemɔ anu.

³¹ Na afei ɛmɔkɔkaye ɛmɔ bɔne yɔleɛ ne ɛmɔ yɔleɛ bɔ ɔtte mayee ne. Na ɔnate ɛmɔ amumuyɛɛ ne ɛmɔ akyiwadeɛ bra ne ati, ɛmɔ nwo kɔyɛ ɛmɔ tɛ.

³²Na memaa ɛmɔnwu ye kyɛ, nna ɛmɔ ti yeɛ mebaayɔ sɔ ɔ, AWURADE Nyameɛ noa dwirɛ ɛne. O Yisrael awuro ama, ɛmɔ bra ne, odi kyɛ ɛmɔma ɔyɛ ɛmɔ nya, ná ɔyɛ ɛmɔ fɛre.

³³“AWURADE Nyameɛ nwa nyoo: Kyẽa bɔ ngɔte ɛmɔ nwo ngofi ɛmɔ amumuyɛɛ amukoraa nwo ne, ngɔmaa ɛmɔkɔtenatena nguro nemɔ aso, na ɛmɔkosa bɛkɔkyekye kurofoen nemɔ.

³⁴Aseɛ bɔ né ɔla berɛ mbaen ne, ɛmɔkɔyɔ so boo. Daa ne de, ɔlale berɛ mbaen bɔ né ebiala bɔ ɔpɛ nu ɔ ye nye tua ɔ.

³⁵Na bekose kyɛ, ‘Aseɛ he bɔ né ɔla berɛ mbaen ye, ye yeɛ wakakyi kyɛ Eden turo e! Yeɛ nguro bɔ né babɔ bayɛ kurofoen ne, yeɛ afei mmenia tete so, bɔ bato bɛ nwo fasue e!’

³⁶Na afei maen maen mɔ bɔ baha bɔ bapɛ ɛmɔ nwo bayia ne, bekonwu kyɛ me, AWURADE, me yeɛ makyekye nguro bɔ babɔ nemɔ ɔ, kyɛ me yeɛ malua mmakaa wɔ aseɛ bɔ né ɔla berɛ mbaen ne aso ɔ. Me, AWURADE, me yeɛ mahã ɔ, na ngɔyɔ.

³⁷“AWURADE Nyameɛ nwa nyoo: Asa koso, ngɔma Yisrael awuro ama bɛkɔsrɛ me maa ngɔyɔ ɛhe ngɔma bɛ: Ngɔmaa bɛkɔyɛ mmenia bɔ bata pee kyɛ mmoaen kure ɔ.

³⁸Na kyɛbɔ mmoaen kure krongron bɛ somaa te, kyɛbɔ Yerusalem mmoaen kure bɛ somaa te wɔ mmerɛ bɔ bedi aluolue wɔ nu ne, sɔ ala yeɛ mmenia kure kure koyi kurofoen nemɔ aso to ɔ. Na afei bekonwu kyɛ me ole AWURADE.”