Read Sehwi Hesekiel 37 Bible Online

Hesekiel 37 - Sehwi bible

Hesekiel 37

¹AWURADE tumi wale me so, ɔnate AWURADE Sunzum so ɔfale me fitele, na ɔfale me oogyinane bɔnza bie bɔ mmowue ayi nu to ɔ ye afia.

²Ɔfale me hyinini pɛle mmowue nemɔ anwo bra yiale. Eh! Né bɛsone pee paa yeɛ begua bɔnza ne anu ɔ, na né bɛ nwo ayɛ kokwakokwa paa.

³Yeɛ obisale me kyɛ, “Sona awa, aso mmowue hemɔ bekonya ngoa anaa?” Na mmuale kyɛ, “Ao AWURADE Nyameɛ, hmmm, wɔ yeɛ ɛse ɔ.”

⁴Yeɛ osa sele me kyɛ, “Hyɛ ngɔm gua mmowue hemɔ aso, ná se bɛ kyɛ, ‘Ɛmɔ, mmowue bɔ ɛmɔ nwo ayɛ kokwakokwa ɔ, ɛ́mɔtie AWURADE noa dwirɛ.

⁵Bɔ AWURADE Nyameɛ ɔkã kyire sɔ mmowue hemɔ ɛhe: Ɛ́mɔtie, ngɔma nwomeɛ koowura ɛmɔ nu, na ɛmɔkonya ngoa.

⁶Ngɔfa ndii ngɔsosɔ ɛmɔ nu, ngɔmaa anwoɔnaen kɔwa ɛmɔ nwo, ngɔfa wereɛ ngopuro ɛmɔ nwo, ngɔfa nwomeɛ ngowura ɛmɔ nu maa ɛmɔkonya ngoa, na ɛmɔkonwu kyɛ me ole AWURADE.’ ”

⁷Yiti kyɛbɔ ɔfale ahyɛdeɛ mane me ne, nhyɛle ngɔm. Na me noa wɔ so bɔ mehyɛ ngɔm ne, yieee, ndele dede kukurokukuro bie, mmowue nemɔ toatoale so, na mmowue nemɔ hã siesiele ye nyunu.

⁸Nneane, na yieee, nwuni kyɛ ndii awa bɛ nwo, anwoɔnaen awa bɛ nwo, yeɛ wereɛ apuro bɛ nwo; nakoso né nwomeɛ nne bɛ nu.

⁹Yeɛ osele me kyɛ, “Hyɛ ngɔm frɛ nwomeɛ ne, Sona awa, hyɛ ngɔm, ná se nwomeɛ ne kyɛ, ‘AWURADE Nyameɛ nwa nyoo: Nwomeɛ ee, fi mvrama nna nemɔ anu bra oo, ná baale nwomeɛ gua mmenia hemɔ bɔ bahũhũ bɛ ne aso ma benya ngoa oo!”

¹⁰ Yiti nhyɛle ngɔm kyɛbɔ ɔfale ahyɛdeɛ mane me ne ala. Nwomeɛ ne oowurale bɛ nu, benyane ngoa, bedwɔsole begyinagyinane bɛ gya so, na né bɛte ɛlɔen piri paa.

¹¹Yeɛ osele me kyɛ, “Sona awa, mmowue hemɔ ole Yisrael awuro ama amukoraa. Tie, bɛnwa: ‘Yɛ mmowue nwo ayɛ kokwakokwa, yɛ anyelasoɛ atu amini, yeɛ waye ye sa wafi yɛ bo koraa.’

¹²Yiti hyɛ ngɔm ná se bɛ kyɛ, ‘AWURADE Nyameɛ nwa nyoo: O me maen, ɛ́mɔtie, mebaabukyebukye ɛmɔ asieleɛ nemɔ aso, ngɔye ɛmɔ ngofi ɛmɔ asieleɛ nemɔ anu, na ngɔfa ɛmɔ ngɔhɔ Yisrael aseɛ so.

¹³Ao, me maen, mmerɛ bɔ ngobukyebukye ɛmɔ asieleɛ nemɔ aso, ná ngɔyeye ɛmɔ ngofi ɛmɔ asieleɛ nemɔ anu nen, ɛmɔkonwu kyɛ me ole AWURADE.

¹⁴ Ngɔfa me Sunzum ngowura ɛmɔ nu, na ɛmɔkonya ngoa, na ngɔmaa ɛmɔkɔɔtena ɛmɔ bɔbɔ b’aseɛ so; na afei ɛmɔkonwu ye kyɛ me, AWURADE, me yeɛ mahã ɔ, na mayɔ, AWURADE noa dwirɛ ɛne.’ ”

¹⁵Yeɛ AWURADE lale ye dwirɛ ali hyirele me bieku kyɛ,

¹⁶“Sona awa, fa bakaa ná kyerɛ so kyɛ, ‘Ogyi berɛ ma Yuda, ɔne Yisraelfoɛ bɔ bɛboka ye so ne.’ Afei fa bakaa bieku, ná kyerɛ so kyɛ, ‘Ogyi berɛ ma Yosef bɔ ɔte Efraim bakaa ne, ɔne Yisraelfoɛ amukoraa bɔ bɛboka ye so ne.’

¹⁷Afei fa mmakaa nyɔ ne bɔ ye nwo ma ɔyɛ ko wɔ wɔ sa nu.

¹⁸Na sɛ wɔ maen mmaa bebisa wɔ kyɛ, ‘Edwirɛ bɔ ɛfa sɔ nningyein nemɔ kã ne, aso engohyire yɛ ye bo hɔ ɔ?’ a,

¹⁹bua bɛ kyɛ, ‘AWURADE Nyameɛ nwa nyoo: Ɛ́mɔtie, mebaafa Yosef bakaa ne bɔ otira Efraim sa nu ne, yeɛ afei Yisrael mmusua kure bɔ bɛboka ye so ne. Ngɔfa bɛ ngɔboka ye so, mekyire Yuda bakaa ne, maa bɛkɔyɛ bakaa ko, na bɛkɔyɛ ko wɔ me sa nu.’

²⁰Afei fa mmakaa bɔ ahyerɛhyerɛ so ne tira bɔ bɛ nye tua ɔ,

²¹ná se bɛ kyɛ, AWURADE Nyameɛ nwa nyoo: Ɛ́mɔtie, ngɔɔfa Yisraelfoɛ ngofi maen maen mɔ bɔ bahɔ so ne aso, ngɔboa bɛ noa ngofi nekaa biala, na ngɔfa bɛ ngɔwa bɛ bɔbɔ b’aseɛ so.

²²Ngɔyɛ bɛ maen ko wɔ aseɛ ne aso, wɔ Yisrael mmokaa nemɔ aso. Ɛhene ko yeɛ okoli bɛ mukoraa bɛ so ɔ, bɛngɔyɛ maen nyɔ ko, na bɛ nu ngɔhyɛ ngɔyɛ ahennie nyɔ ko.

²³Bɛngɔfa bɛ mmosoen ne b’akyiwadeɛ nningyein anaa bɛ mmeraatolɛ biala bengogua bɛ nwo fiɛ ko. Na mmom ngɔpepɛ ngole bɛ ngofi bɛ makyebu[10] amukoraa bɔ bali bafa bayɛ bɔne ne anwo; ngɔte bɛ nwo, na bɛkɔyɛ me maen, ná me wora mayɛ bɛ Nyameɛ.

²⁴“Me somvoɛ Dawide koli bɛ so hene. Mmoaenneafoɛ komapɛ yeɛ ɔkɔnea bɛ mukoraa bɛ so ɔ. Bɛkɔfa me nhyehyɛleɛ bɛkɔbɔ bɛ bra, na bɛkɔnea kyɛ bekoli m’ahyɛdeɛ so ɔ.

²⁵Bɛkɔtena aseɛ bɔ mva mane me somvoɛ Yakob, bɔ ɛmɔ nana mɔ tenane so ne aso; na bɛ ne bɛ mma mɔ ne bɛ nnomaa mɔ bɛkɔtena berɛ daa, na me somvoɛ Dawide koli bɛ so panyi daa.

²⁶ Asa koso, me ne bɛ yɛkɔyɛ asomdwee apam, ɔkɔyɛ me ne bɛ daa apam; ngɔmaa bekotindim, ngɔmaa bɛkɔta pee, na ngɔfa me nekaa krongron ne ngosie bɛ nu afebɔɔ.

²⁷ Bɛ nu yeɛ m’atenaleɛ ne koso kogyina ɔ. Amba, ngɔyɛ bɛ Nyameɛ, ná bɛ wora bayɛ me maen.

²⁸Na afei maen maen mɔ bekonwu kyɛ me ole AWURADE bɔ mete Yisrael nwo ɔ, mmerɛ bɔ me nekaa krongron ne ogyi bɛ nu afebɔɔ ne.”