Read Sehwi Hesekiel 38 Bible Online

Hesekiel 38 - Sehwi bible

Hesekiel 38

¹Yeɛ AWURADE lale ye dwirɛ ali hyirele me kyɛ,

² “Sona awa, fa wɔ nye kyire Gɔgo, bɔ ɔwɔ Magɔgo aseɛ so ne, Meseke ne Tubal bɛ hene ne, ná hyɛ ngɔm tia ye.

³Kã kyɛ, AWURADE Nyameɛ nwa nyoo: Tie, wɔ, Gɔgo, meko metia wɔ, wɔ bɔ edi Meseke ne Tubal so hene ne!

⁴Ngɔmaa ɛkɔfa wɔ nye kohyire neka foforɛ, ngɔfa koaa ngɔsosɔ w’awogyee, na ngɔhwe wɔ ne wɔ lɔen amukoraa ngofite, ɛne wɔ mbɔngɔ ne pɔngɔhanɛfoɛ, bɔ bɛ mukoraa bewurawura koɛ ndaadeɛ ahoroɔ, ɛlɔen piri paa bɔ bɛ mukoraa bewurawura buralɛ ataadeɛ, bɔ betiratira akokyɛm ne pealɛɛ ɔ.

⁵Pɛsia, Kuse, ne Libia boka bɛ so, bɔ bɛ mukoraa bele akokyɛm ne buralɛ kyerɛ ɔ;

⁶Gomɛre ne ye ɛlɔen amukoraa, Bete Togama bɔ ɔwɔ sorɔ dɔ paa ne ɔne ye lɔen amukoraa; maen pee paa yeɛ bɛboka wɔ so ɔ.

⁷“Boaboa wɔ nwo ná te gyina, ɛne wɔ lɔen amukoraa bɔ aboaboa bɛ noa wɔ wɔ nwo berɛ ne, ná yɛ bɛ so neafoɛ.

⁸Na ngyẽa pee asi ne, wɔ sa kɔhã tumi. Na afoɛ bɔ oli nziɛ nemɔ anu, ɛkɔɔfa koɛ kɔtoa maen bɔ wanya ye anwotɔ wafi ngrandɛ noa ne, maen bɔ maboaboa so ama noa wɔ Yisrael mmokaa so mafi maen maen pee so ne, mmokaa bɔ né bɛlela berɛ mbaen ne. Maen maen mɔ nu yeɛ mvale so ama mvili ɔ, na bɛ mukoraa bɛ so anu atɔ bɛ wɔ berɛ.

⁹Ɛkɔhɔ bɛ so kyɛ mvrama piri, ɛkɔyɛ kyɛ munungum kɔkata aseɛ ne aso, ɛne wɔ lɔen amukoraa ne maen maen pee bɔ bɛboka wɔ so ne.

¹⁰“AWURADE Nyameɛ nwa nyoo: Sɔ kyẽa ne, adwene biemɔ kɔwa wɔ ti anu, ɛkɔbɔ porɛ,

¹¹na ekose kyɛ, ‘Ngootua maen bɔ fasue nne ye nguro mɔ nwo ne, ngɔɔfa koɛ ngɔtoa mmenia bɔ bɛte berɛ konn asomdwee nu ne, bɔ bɛ mukoraa bɛtete nguro bɔ fasue nne bɛ nwo ɔ nu, bɔ belle pambim anaa mmuralɛ bɔ ɔbrambram pambim si ɔ;

¹²kyɛ ɛkwaafa koɛ nu nzesadeɛ ná ɛfẽ nningyein fa, kyɛ ɛkwaafa koɛ kɔtoa kurofoen mɔ bɔ afei de mmenia tete so ne, yeɛ mmenia bɔ baaboaboa bɛ noa bafi maen maen mɔ so ne, bɔ banya nyɛmmoa ne nningyein, mmenia bɔ bɛte aseɛ afia ne.

¹³Na Hyeba ne Dedan, yeɛ Tasise dwadifoɛ ne ye nguraa nu ama mukoraa bekobisa wɔ kyɛ, ‘Awa kyɛ ɛbaafa koɛ nu nzesadeɛ hɔ ɔ? Aboaboa wɔ lɔen noa kyɛ ɛbaafẽ nningyein kɔ anaa, kyɛ ɛbaasesa ɛdwetɛ ne sikaa kɔkorɛ, nyɛmmoa ne nningyein, ná ɛfa koɛ nu nzesadeɛ pee ɛkɔ anaa?’

¹⁴“Yiti, Sona awa, hyɛ ngɔm ná se Gɔgo kyɛ, AWURADE Nyameɛ nwa nyoo: Aso nna kyẽa bɔ me maen Yisrael ɔte asomdwee nu ne yeɛ ekonwu ye ɔ?[11]

¹⁵Ekofi w’atenaleɛ wɔ sorɔ dɔ paa kɔwa, ɛne maen maen pee bɔ bɛboka wɔ so ɔ, bɔ bɛ mukoraa bɛtete mbɔngɔ so ɔ, ɛlɔen pirikua ne koɛhonɛfoɛ anwoserɛfoɛ;

¹⁶na ɛkɔɔfa koɛ kɔtoa me maen Yisrael kyɛ munungum bɔ ɔkɔta aseɛ ne aso ɔ. Na mmerɛ bɔ oli nziɛ ne, ngɔfa wɔ ngɔwa maa ɛkɔɔfa koɛ kɔtoa me maen ne, bɔ ɔnate so maen maen bekonwu me ɔ, na ɛhe kosi wɔ mmerɛ bɔ ngɔfa wɔ, Gɔgo, wɔ so ngɔla me krongronyɛlɛ ali bɔ bɛ nye tua ɔ.

¹⁷“AWURADE Nyameɛ nwa nyoo: Aso wɔ ole bɔ mvale me somvoɛ mɔ bɔ bɛte Yisrael ngɔmhyɛlɛfoɛ so ngane ye nwo dwirɛ daa tete ne, bɔ bɛhyɛle ngɔm sɔ mmerɛ ne afoɛ pee, kyɛ ngɔfa wɔ ngɔwa maa ɛkɔɔfa koɛ kɔtoa bɛ ne anaa?

¹⁸Nakoso kyẽa bɔ Gɔgo kɔfa koɛ kɔɔtoa Yisrael maen ne, m’ahone kohu piri paa, AWURADE Nyameɛ noa dwirɛ ɛne.

¹⁹Na mekã ye wɔ me nungunɛhwenɛ ne m’ahonehulɛ wuruwuru ne anu kyɛ, sɔ kyẽa ne, aseɛ kɔwoso serɛserɛ wɔ Yisrael aseɛ so,

²⁰maa ɔnate so ɛpo nu naen, ewienu nnomaa, eburo ngaka, kaka biala bɔ ɔtwe ye nwo ase wɔ aseɛ so, yeɛ aseɛ so mmenia mukoraa bɛ nwo kɔwoso bɛ wɔ me nyunu. Mmokaa mukoraa bekodwiri bekogua, nyɔbotaen ndendenn mɔ kobubu kogua, yeɛ fasue biala kobu kogua ase.

²¹Na ngɔfrɛ ngrandɛ maa ɔkɔwa ye so wɔ me mmokaa ne amukoraa so, na ebiala kɔfa ngrandɛ kɔhɔ obiɛngo so, AWURADE Nyameɛ noa dwirɛ ɛne.

²² Ngɔfa ewue anwonyerɛ ne mogya yeɛ ngɔtea ye ɔ; na ngɔtɔ esue kandinga paa, asukɔtwea kungumaboɔ, see ne sɔfe yeɛ ngogua ye ne ye lɔen ɔne ye maen worawora bɔ bɛboka ye so ne aso ɔ.

²³Yiti ngɔla me piri ne me krongronyɛlɛ ali. Na ngɔye me nwo ali ngɔma maen maen pee bekonwu me, na afei bekonwu kyɛ me ole AWURADE.